Sani kan prati joe foe a lobi foe Gado?

„Bika mi abi na overtoigi dati no dede, no libi, no engel, no tiri, no disiten sani, no sani di e kon, no krakti, no hé, no dipi, no wan enkri meki-sani sa kan prati wi foe a lobi foe Gado di de na ini Kristus Jezus, wi Masra.” — ROM. 8:38, 39.

1. A tapoe sortoe fasi a lobi foe Gado e tjari kon foe si aladé?

GADO na lobi. Aladé wi e kisi disi foe si na ini den fasi fa wi e tan a libi. Na loktoe di wi e hari teki, na watra di wi e dringi èn na njanjan de alamala bewijsi foe a lobi foe Gado. Boiti foe dati, boen sma èn den ogriwan e kisi den, awinsi den e warderi disi ofoe no. Jezus ben kotoigi foe disi di a ben taki foe en hemel Tata: „Ai meki en son opo tapoe den godelowsoewan èn den boenwan èn ai meki alen fadon tapoe den regtvaardikiwan èn den onregtvaardikiwan” (Mattéus 5:45). Ibri meki-sani di e libi na grontapoe, moe taki Gado tangi foe den sani foe tan na libi di Gado ben sorgoe foe den de. — Psalm 145:15, 16.

2. Fa na bigi lobi foe Jehovah e sori gi na libisma-famiri, èn fa Jezus ben sori warderi gi san Jehovah ben aksi foe en?

² A lobi foe Gado gi libi mekisani ben go moro fara leki soso na sorgoe foe meki na disiten libi tan di leki wan bromki e flaw èn e dré leki na grasi (1 Petrus 1:24). A seti sani nanga san libisma kan libi foe tégo: „Gado ben lobi grontapoe sote dati a ben gi en wan enkri gebore Manpikin, sodati ibriwan sma di e sori bribi na ini en, no ben sa kisi pori ma ben sa abi tégo libi” (Johannes 3:16). Na seti disi ben kostoe na Tata èn na Pikin boen foeroe. Na ini Gethsémane Jezus ben fadon na doti na a neti bifo en dede, a ben begi ini sowan hebi sari dati „en sweti ben tron leki broedoe, di ben fadon na gron”. Na ini a momenti disi foe sari Jezus ben denki na a sjen di ben trowe na tapoe a nen foe Gado èn a ben aksi srefi efoe na beker ben kan teki poeroe foe en. Ma a ben taki tapoe disi: „Ma ete, no soleki mi wani, ma soleki joe wani” (Lukas 22:44; Markus 14:36). Awinsi Jezus ben e firi hebi sari, tokoe a sani di Jehovah ben e aksi ben kon na tapoe a fosi presi. Srefi na ferwakti foe krawasi nanga wan safrisafri dede na wan pina-oedoe no ben man prati en foe na lobi foe Gado.

3. San Jehovah Kotoigi e taki na ini a ten disi nanga den wortoe foe Paulus leki a ben de den égi wortoe, èn nanga sortoe bakapisi gi densrefi?

³ San Jehovah e aksi, e kon ooktoe na tapoe na fosi presi na ini a libi foe Jehovah Kotoigi, di e waka now na ini den foetoe stap foe Jezus. „Efoe Gado de nanga wi”, na so ben e taki nanga den wortoe foe na apostel Paulus, „soema sa de dan tége wi? Soema sa de dan tége wi? Soema sa prati wi foe na lobi foe na Kristus? Pina ofoe benawtoe ofoe ferfolgoe ofoe angri ofoe soso-skin ofoe kefar ofoe fet’owroe? Na presi foe dati, ini ala den sani disi wi e kon leki winiman na fesi dorodoro, na ini na feti nanga jepi foe en di ben lobi wi” (Romeini 8:31, 35, 37). Na ini a jarhondro disi den sma di lobi meki oproeroe ben val Jehovah Kotoigi aan, naki den, wrifi den nanga tara èn tapoe den skin nanga fowroe wiwiri, gi mankeri na den skin, nanga tranga go didon na den oema foe den, meki den dede foe angri, soetoe den kiri nanga jepi foe sroedati di soetoe den trowe èn na ini nazi-concentratiekampoe den ben koti den ede poeroe srefi — alamala foedi den ben wégri foe meki sma prati den foe na lobi foe Gado.

4. Sortoe indruk na fasi foe doe foe wan jongoeman di ben wégri foe sma prati en foe a lobi foe Gado ben abi tapoe joe?

⁴ Fotenti jari pasa kaba wan jongoeman, wan foe Jehovah Kotoigi, ben skrifi en papa nanga mama na ini wan nazi-concentratiekampoe den sani di foe eksempre e kon now:

„A de now 9.00 joeroe a dé dati den moe tjari mi kon a fesi, ma mi moe wakti ete te 11.30 joeroe. Mi e skrifi den regel disi na ini wan isoleercel foe na sroedatilantikroetoe-oso. Mi abi tokoe sowan vréde, di moeilek joe kan bribi; ma mi ben poti ooktoe ala sani na ini na anoe foe Masra, èn a so mi moe tan wakti rustig tapoe a joeroe disi, aladi mi de alaten na ini boei. Den ben taigi joe, dati den no ben sa boei mi. Lé! Dé nanga neti: soso te den e weri mi krosi èn e poeroe mi krosi èn e krin a cel dan den poeroe den boei . . .

12.35 joeroe. Now ala sani sa kaba. Foe di mi ben tan na den bezwaar di mi abi [tége na aksi di den ben aksi en foe a ben libi en anbegi foe Jehovah Gado], mi kisi na dedestrafoe. Mi ben arki, èn baka di mi ben taki den wortoe ’Tan getrow te na dede’ èn wantoe tra wortoe foe wi masra, dan ala sani ben psa. Ma dati no de prenspari moro. Joe no kan tjari kon na ini prakseri sortoe vréde èn sortoe rostoe mi abi . . . Na vréde èn na prisiri disi di ben kon kaba na tapoe mi na ini na kroetoe-oso, èn di na grontapoe noiti kan ferstan, ben gi mi na overtoigi èn ben teki mi krinkrin abra di mi ben drai kon baka ini mi cel . . . No kré . . . Disi na a moro boen sani di mi kan gi joe nanga ala lobi brada nanga sisa tide, na laatste sonde bifo den sa gi mi na strafoe foe dede (koti mi ede poeroe), a dé di mi sa kon fri foe den boei foe mi.”a

„A sa meki joe de stanfaste, a sa meki de de tranga”

5, 6. Sortoe djaranti di Paulus nanga Petrus ben gi de wan trowstoe gi den sma di e kisi hebi tesi foedi den e hori tranga na a lobi foe Gado?

⁵ Na jongoeman disi ben prati foe na libi, ma no foe na lobi foe Gado. Na ini den jarhondro di psa Jehovah Kotoigi ben tron a marki foe den sortoe ogri-ati doe disi. Den dienstknegti foe Gado ben man foe ferdrage den sortoe ferfolgoe disi, srefi te na dede, no na ini égi krakti, ma ini a krakti foe Gado. „Gado de getrow” so Paulus e gi wi na djaranti, „èn a no sa gi pasi dati tesi miti joe moro leki san joe kan tjari, ma nanga na tesi a sa sorgoe foe wan pasi foe komoto, sodati joe kan tjari en” (1 Korinte 10:13). Jehovah disiten getrow kotoigi na ondro tesi ben kan taki densrefi sani leki Paulus di a ben de na ini doengroe-oso: „Masra ben de na mi èn ben gi mi krakti.” — 2 Timotéus 4:17.

⁶ Bakadi na apostel Petrus ben warskow wi foe loekoe boen nanga Didibri di e waka lontoe leki wan krasi lew e soekoe foe swari wi, a ben gi na djaranti: „Baka te joe njan pina foe wan sjatoeten, dan na Gado foe ala no-ferdini boenfasi, di ben kari joe kon na ini en tégo glori na ini wanfasi nanga Kristus, ensrefi sa meki na opleiding foe joe kon klari, a sa meki joe stanfaste, a sa meki joe kon tranga” (1 Petrus 5:8-10). Te wi e loekoe ala na jepi disi foe na sé foe Gado dan wan sani de krin: A lobi foe Gado no e misi noiti; efoe wi prati foe en, dan dati didon na wi, no na en.

7. Sortoe taktik Satan ben gebroiki na ini a geval foe Jezus, èn fa Jezus ben meki a prakseri foe Satan no go doro?

⁷ Satan no e kon feti alaten leki wan krasi lew. Nofotron a e kon leki wan „koni sneki” èn srefi leki wan „engel foe leti” di fadon komoto na bribi. A abi takroe prakseri nanga wi, èn wi moe loekoe boen dati a no teki wi abra. Wi moesoe weri na heri fetisani foe Gado foe „tan tanapoe faste tége den triki foe Didibri” (Genesis 3:1, Petrus-Canisiusvertaling; 2 Korinte 2:11; 11:13-15; Efese 6:11, Ingrisi NW-Verwijsbijbel, voetnoot). Na a bigin foe a diniwroko foe Jezus Satan ben kon na en èn ben gebroiki tekst foe Bijbel di a ben gebroiki tapoe wan fowtoefasi na ini wan moeiti foe kori Jezus go doe ogri. Dritron a tesi Jezus èn dritron den moeiti foe en ben misi. Jezus ben poeroe na drai di Satan ben wani gi na a bijbel poti na wansé nanga jepi foe tekst di a ben gebroiki boen. Baka dati Jezus ben taki dati Satan ben moesoe gwe. Ma Satan ’ben gwe soso foe en te wan tra boen ten ben doro’. — Lukas 4:13; Mattéus 4:3-11.

8, 9. Tapoe sortoe bedrigifasi Satan ben kon baka foe feti nanga Jezus, èn san Paulus ben taki dati wi moe doe leki wan kibri gi oensrefi?

⁸ Satan e go doro sondro foe weri. Ini difrenti fasi ai kenki ensrefi e tan kon baka. A ben kon baka na Jezus via den kerki fesiman foe a ten dati. Jezus ben ferstan disi èn a ben taki gi den sondro foe kibri wan sani: „Oen komoto foe oen tata Didibri.” Son sma kande sondro foe den wani srefi e dini den marki foe Satan. Na apostel Petrus ben doe disi di, aladi a ben bedoel disi boen, ben pir’ai gi Jezus nanga den wortoe: „De boen gi joesrefi, Masra; a sani disi no sa miti joe kwetkweti.” Jezus ben moesoe fermane Petrus tranga: „Go a mi baka, Satan! Joe de wan ston gi mi foe naki foetoe” (Johannes 8:44; Mattéus 16:22, 23). Na so wan basi, ofoe wan sma di e wroko nanga joe, wan kompeskoro mati, ofoe wan mati, wan famirman, wan papa ofoe mama ofoe wan trowpatna sondro foe espresi kan dini ooktoe den marki foe Satan. Alaten wi moe loekoe boen èn no gi pasi dati sortoe sani toe swaki na matifasi foe wi nanga Jehovah.

⁹ Foe dat’ede meki a de toemsi prenspari „foe weri na heri fetisani foe Gado, sodati wi kan tanapoe faste tége den triki foe Didibri; bikasi wi no abi wan stré nanga broedoe èn skin, ma nanga den godelowsoe jeje krakti ini den hemel kontren”. — Efese 6:11, 12.

Na greep foe sondoe tapoe na skin di fadon

10. San a wortoe „sondoe” wani taki, èn sortoe sani sa prati wi foe a lobi foe Gado?

¹⁰ Satan e fadon kon feti nanga wi tapoe punt pe wi de swaki na ini. Foe datmeki ai meki na skin firi foe wi go doe sondoe leki wan foe den marki di a lobi (Psalm 51:5). Na Griki wortoe di vertaal nanga sondoe de ha.mar’ti.a. Na werkwortoe ha.mar’ta.no, di wani taki noti moro leki „misi a marki” (Romeini 3:9, Ingrisi NW-Verwijsbijbel, voetnoot). O moro wi e misi a marki èn wi e misi foe hori den komando foo Gado, o moro wi e hari wisrefi poeroe foe a lobi foe Gado, bika „disi wani taki a lobi foe Gado, dati wi e hori en gebod” (1 Johannes 5:3). Soetadoe, hoeroedoe, kefarlek bigi seks doti libi, dringi pasa marki, fesa di nowan sma e hori ensrefi na wèt, gi wisrefi abra na skin firi di wi no e dwengi, djaroesoe, atibron, lostoe foe kon goedoe, ala den sortoe sani disi e prati wi foe na lobi foe Gado, èn „sma di e doe den sani disi, no sa kisi a Kownoekondre foe Gado”. — Galacia 5:19-21.

11. Fa sondoe kan kisi wi moro tranga na ini en anoe, nanga sortoe bakapisi te foe kaba?

¹¹ Film, boekoe, komedipré nanga tv-programma — pe joe abi na ini reklama di e meki a lobi foe goedoe, gridifasi, seks go na fesi, e gi faja na a soekoe foe prisiri pe skotoe nanga rem no de. Na fosi sondoe e meki a di foe toe moro makriki, na di foe dri èn na di foe fo e kon a baka, èn heri esi kaba wan sma e trowe ensrefi go na ini grontapoe fasi. Te foe kaba den sma di „abi lobi moro gi prisiri leki abi lobi gi Gado” e kon de krinkrin na ini „meki plan a fesi gi den lostoe foe na skin” (2 Timotéus 3:4; Romeini 13:14). Sondoe e teki owroe èn jongoesma krinkrin abra èn a konsensi foe den e bron tapoe krinkrin. „Foedi den lasi ala ferstan foe boen gwenti, meki den ben gi densrefi abra na loesoefasi foe waka nanga libi foe doe tapoe wan gridifasi ala sortoe foe doti libi.” — Efese 4:10; 1 Timotéus 4:2.

12. Foe sortoe tekst e kon na krin omeni makti a sondoe abi na tapoe wi, èn fa Paulus ben tjari a sari foe en kon a fesi?

¹² Den sma di teki a faste bosroiti foe sma no prati den foe na lobi foe Gado, moe tranga densrefi, sodati a sondoe abi makti na tapoe na fadon skin. A sondoe de wan kefarlek féanti soleki a bijbel e poti krakti alaten baka a tapoe: „A sma di e doe sondoe, de wan srafoe foe sondoe”, „ala sma de ondro sondoe”, „ala sma ben sondoe”, „no meki sondoe tiri more langa leki kownoe na ini oen skin di e dede”, „Oenoe de srafoe foe en . . . foedi oenoe e gi jesi na en”, „a paiman foe sondoe na dede” èn wi alamala de na ondro „na ai foe sondoe” (Johannes 8:34; Romeini 3:9, 23; 6:12, 16, 23; Galacia 3:22). Paulus den „ben seri na ondro sondoe”, èn „na ini katibo na a wèt foe sondoe”, san ben meki a kragi taki: „Na boen sani di mi wani foe doe, mi no e doe, ma na takroe sani di mi no wani foe doe, na dati mi e doe” (Romeini 7:14, 19, 23). Foe datmeki ai bari taki: „Ke, mi mofina sma. Soema sa ferloesoe mi poeroe foe na skin di e ondrofeni a dede disi?” Dan na prisiri piki e kon: „Tangi foe Gado nanga jepi foe Jezus Kristus wi Masra!” — Romeini 7:24, 25.

13, 14. (a) Nanga jepi foe san wi e kon fri foe sondoe? (b) Fa wi kan tan na ini a lobi foe Kristus?

¹³ Te nanga na kon foe Kristus Jezus dan „na sondoe ben tiri nanga dede leki kownoe” (Romeini 5:14, 17, 21). Ma nanga na dede èn opobaka foe Jezus kownoe sondoe ben poeroe tapoe en troon gi den sma di teki na wan boenfasi na lobi presenti foe Gado en Manpikin. A ben ferloesoe wi foe wi sondoe, ben wasi den poeroe, ben krin wi foe den, ben fri wi foe den èn figi den poeroe krinkrin gi wi (Mattéus 1:21; Tori foe den Apostel 3:19; 22:16; 2 Petrus 1:9; 1 Johannes 1:7; Openbaring 1:5). Foe dat’ede a no na apostel wawan, ma ooktoe ala sma di e poti bribi na ini na broedoe foe Kristus Jezus di lon moe taki Gado tangi nanga jepi foe Jezus Kristus wi Masra, dati a ben opo na pasi foe fri wi foe na malengri èn skin katibo foe sondoe nanga dede.

¹⁴ A de foe dat’ede wan tranga fanowdoe sani foe no wawan foe de farawe tapoe wan ofoe tra fasi foe de prati foe a lobi foe Gado, ma ooktoe foe tan na ini na lobi foe Kristus. Foe tan krosbé foe Jezus wan sma moe doe asrefi sani leki te a wani kon krosbé na Gado. Jezus ben sori na tapoe disi nanga den wortoe: „Netleki fa a Tata ben lobi mi èn mi ben lobi oenoe, na so oenoe moe tan ini a lobi foe mi. Efoe oenoe e hori mi gebod, dan oenoe sa tan na ini a lobi foe mi, net soleki mi e hori den gebod foe na Tata èn e tan na ini en lobi.” — Johannes 15:9, 10.

Na kefar foe drifi gwe

15. San kan psa makriki nanga wi, èn san wi moe doe foe tan farawe foe na kefar?

¹⁵ Sorgoe dati joe no lasi na fri disi foe katibo foe sondoe nanga dede foedi joe e grati gwe ofoe drifi gwe. Disi kan pasa so safrisafri dati sondro wi e si en a e kon a wi tapoe. Galacia 6:1 e taki: „Brada, srefi efoe wan sma e doe wan fowtoe sani bifo a kisi ensrefi, dan oenoe di abi jeje égifasi e proberi meki sowan sma kon boen baka na ini wan jeje foe safri-atifasi, aladi ibriwan foe oenoe e hori ensrefi na ini ai, sodati oenoe ooktoe no kisi tesi.” Srefi efoe wan sma e gi wan tra sma rai, a moe ’hori ensrefi na ini ai’. Wi alamala de sma di esesi sani kan miti oenoe! „A de fanowdoe dati wi poti moro leki gewoon prakseri na den sani di wi ben jere, sodati wi no drifi gwe noiti.” — Hebrewsma 2:1.

16, 17. San de leki wan eksempre foe sori o kefarlek a de foe drifi gwe a jejefasi, èn san wi moe doe foe tan farawe foe na kefar disi?

¹⁶ Drifi gwe e psa sondro moeiti. Foe dat’ede meki a de so makriki èn foe taki en na jejefasi, so kefarlek. A kan psa dati joe e kon de prati foe a lobi foe Gado bifo joe kisi joesrefi. A de leki wan skapoe di e lasi pasi. Fa a e lasi pasi? Wan skapoeman e tjari kon na krin: ’A e lasi pasi aladi ai njanjan e gwe. A e si wan toe foetoe moro fara na sé wan pikinso groen grasi èn ai waka go drape foe njanjan na en. Dan ai si wan toe meter morofara ete wan moi ipi grasi foe njanjan na en. Wán di foe dri ipi grasi e loekoe moro moi èn a skapoe e waka go na en foe njanjan switi foe en. Te foe joe denki a de boen fara foe na ipi. A lasi pasi aladi a ben e njanjan gwe.’

¹⁷ A so a de ooktoe nanga den sma di na jejefasi e drifi gwe. A kan bigin sondro wan fowtoe prakseri foe wantoe goedoe ofoe grontapoe de makandra ofoe prakseri foe bepaalde tekst. Ma pikinso-pikinso den sortoe sma disi e kon de moro fara foe na ipi foe Gado èn a no e teki so langa ofoe den priti densrefi foe na gemeente èn foe na lobi foe Gado. Den no ben poti prakseri na tapoe na dek’ati foe Paulus: „Tan tesi efoe joe de na ini bribi, tan bewijsi dati den feni joe boen.” — 2 Korinte 13:5.

18, 19. Fa wi e sorgoe dati Didibri lon gwe foe wi, èn fa wi e kon na Gado?

¹⁸ „Kakafoetoe gi Didibri”, den e ferteri wi „èn a sa lon gwe libi joe.” Te wi meki wan koni gebroiki foe „na fet’owroe foe na jeje, dati de, a Wortoe foe Gado”, dan wi kan naki den triki foe Didibri trowe. Dati ben de a fasi fa Jezus ben man foe Satan gwe libi en na ini a sabana. Ooktoe den ben ferterl wi: „Kon krosbé na Gado èn en sa kon krosbé na joe” (Jakobus 4:7, 8; Efese 6:17). Netleki den skrifiman foe den Psalmen na so wi moe tan krosbé na Gado foedi wi e hori tranga na en Wortoe: „Na fermane foe Jehovah de getrow, a e meki na wan di no abi ondrofeni kon koni.” „Mi e tan sori dati mi de nanga ai na a sé foe joe fermane. Joe Wortoe de wan lampoe gi mi foetoe, èn wan leti tapoe mi pasi. . . . Mi no ben drifi komoto foe den fermane foe joe.” — Psalm 19:7; 119:95, 105, 157.

¹⁹ Nanga jepi foe begi, nanga a studeri foe a Wortoe foe Gado, nanga a lobi foe wi brada nanga sisa èn na kon alaten makandra nanga den èn nanga a ferteri foe a kownoekondre foe Gado na tra sma — na tapoe ala den fasi disi wi e kon a Gado èn na en lobi, soleki dati e kon na krin na ini Kristus Jezus wi Masra. — 1 Thessalonika 5:17; Romeini 12:2; Hebrewsma 10:24, 25; Lukas 9:2.

20. Jehovah Kotoigi e meki sortoe krakti ferklari di Paulus ben taki kon de now a faste bosroiti foe den?

²⁰ Na ini wan kefarlek bigi èn krakti ferklari Paulus ben tjari na faste bosroiti foe ala den disiten kotoigi foe Jehovah na heri grontapoe kon na fesi, di a ben taki: „Wi abi na overtoigi dati no dede, no libi, no engel, no tiri, no disiten sani, no sani di e kon, no krakti, no hé, no dipi, no iniwan enkri tra mekisani sa kan prati wi foe a lobi foe Gado, di [kon de foe si, Jerusalem Bible] de ini Kristus Jezus wi Masra.” — Romeini 8:38, 39.

[Foetoewortoe]

Joe kan memre disi ete?

◻ Fa Jehovah lobi de foe si na ini den seti foe en foe hori wi libi?

◻ Sortoe methode Satan ben proberi foe prati Jehovah Kotoigi foe a lobi foe Gado?

◻ Sortoe tekst e sori o tranga na graboe de di sondoe abi na tapoe wi, èn fa wi kan kon fri foe dati?

◻ Foe san-ede a drifi gwe de so kefarlek, èn fa wi kan meki dati no sa?