Teki na faste bosroiti foe dini Jehovah nanga wan ati di no prati
„Dini Jehovah nanga wan ati di no prati èn nanga wan sili di de klarklari, bika Jehovah e ondrosoekoe ala ati, èn ibri firi foe na prakseri a e si.” — 1 KRONIEKEN 28:9.
1. Sortoe aksi 1 Kronieken 28:9 e meki kon na fesi?
NA TEKST di skrifi dja na tapsé e kari wantoe aksi kon foe na tori foe na ati. Efoe den e taki dja foe wan troetroe ati foe na skin, fa wan sma ben kan libi dan nanga mendri leki wan ati di prati ofoe wan herheri ati? Wan sma foe eksempre ben sa kan libi nanga soso wan afoe ati? Jehovah e ondrosoekoe leki wan disiten atidatra den mankeri foe na troe-troe ati foe na skin? Èn te wi e taki foe den firi foe den prakseri, a de so taki wi ati de na sdon-presi foe prakseri? Tapoe son presi ini a bijbel a gersi dati den e sori a tapoe dati, bika drape den e taki foe na ’firi foe den prakseri foe na ati’ (Genesis 6:5; 1 Kronieken 29:18). Jehovah e ondrosoekoe wi troetroe ati foe na skin foe kon si san wi prakseri de? San den e bedoel te joe loekoe en boen nanga den wortoe ’foe dini en nanga wan ati di no prati’?
2. Sortoe prakseri den owroe Egyptesma, den Babylonsma, èn na Griki filosoofman ben abi foe na ati?
2 Den owroe Egyptesma ben bribi dati na troetroe ati foe na skin de a sdon-presi foe na ferstan nanga den firi. Den ben prakseri ooktoe dati a abi wan égi wani. Den Babylonsma ben taki dati na ferstan èn na lobi libi na ini na ati. Na Griki filosoof Aristoteles ben leri dati a ben de na sdon-pesi foe den zintuig (si, jere, smeri, taki, firi) èn na presi foe na sili. Ma di ten ben e psa dan a sabi ben kon moro foeroe èn den sma ben poti den prakseri disi a wan sé. Te foe kaba sma ben kon sabi san na ati de troetroe: Wan pompoe di e meki na broedoe lon psa na heri skin.
3. Sortoe troe tori e meki na ati de wan sani di e meki joe kisi frede?
3 Ija, a de na ini a fosi presi wan pompoe, ma wan toemsi kefarlek wan, di getrow e poesoe ibri seconde foe wi libi na redi libi watra dati! Na libisma ati pikinso moro bigi leki wan kofoe èn nanga wan hebi foe a no kisi ete wan pontoe, e klop wan hondrodoesoen tron ini wan dé foe pompoe na libi broedoe, sowan 7500 liter ini wan dé, tintin miljoen liter ini a libiten foe wan libisma psa na 96.000 kilometer langa ati nanga tité systema foe na skin. A naki foe na ati e doe kon foe wan bondroe foe cel di de na gangmaker èn di e seni elektrik impuls go a doro di e bepaal a tempo foe a naki foe na ati. Nowan spier na ini na skin e wroko jar-go-jar-kon moro tranga, moro langa èn moro tron go doro leki na ati. Ondro na druk foe firi ofoe krakti moeiti foe na skin a kan meki na capaciteit foe en kon de féfitron so moro foeroe. Efoe den e poeroe na ati foe na borsoekasi, dan ai tan wan pisten ete e naki. Srefi cel di den koti poeroe foe na ati sa tan doe disi na ondro boen omstandigheid. Soso den edetonton abi moro njanjan nanga zuurstof fanowdoe leki na ati.
4, 5. (a) Sortoe égifasi a bijbel e ferteri foe na ati? (b) Sortoe firi nanga bewégi foe ati de na ini na ati soleki a bijbel e taki?
4 A Wortoe foe Gado e taki pikinmoro doesoentron foe na ati. Na ini wantoe foe den geval dati, den e taki foe na troetroe ati. Wantoe tra tekst abi foe doe nanga na mama ofoe a mindri pisi foe wan sani, soleki „na ini na ati foe na opo se” èn „na ini na ati foe na grontapoe” (Ezechiël 27:25-27; Mattéus 12:40). Ma pikinmoro tapoe doesoen tra presi den e gebroiki na ati na agersifasi. Kittels Theological Dictionary of the New Testament e kari pe „ati” tanapoe wan lo tekst na ondro ibri wan foe den ede di e kon now: „Na ati de na sdon-presi foe firi, lostoe nanga angri foe sani.” „Na ati de na sdon-presi foe na ferstan, na bigin foe prakseri nanga denki.” „Na ati de a sdon-presi foe na wani”, „na bigin foe a teki foe faste bosroiti.” „Na ati de foe dat’ede tapoe ala tra sani na wanenkri centrale presi na ini a libisma pe Gado e go na en, pe na libi foe dini Gado abi en roetoe èn di e bepaal na moreel libi nanga waka.”
5 Na agersi ati de na sdon-presi foe firi nanga san e bewégi wan sma. Akroederi foeroe tekst dan na ati kan de nanga prisiri, sari, doengroe, krin leki leti, feradelek, nanga foeroe fertrow, swaki ofoe tranga. Èn ati kan bron srefsrefi ofoe smelter foe frede, foe hémemre ofoe bigifasi ofoe safrifasi èn sakafasi, kan lobi fajafaja ofoe de foeroe nanga ogri-ati, kan de soifri èn krin ofoe meki a fowtoe foe soetadoe. Ai firi foe go doe ogri, ma a sa poesoe oenoe foe go doe boen.
No de af’afoe-ati èn ooktoe joe no moe de nanga toe ati
6, 7. (a) Sortoe sma na psalmist no ben wani si na ai, èn nanga sortoe doe na ini Israël èn Juda de leki wan eksempre foe na situwasi pe den sma disi de? (b) Fa Jezus ben sori dati a dini foe Jehovah af’afoe de wan sani di a no e teki?
6 Na letterlek ati moe de compleet foe a kan wroko, ma na agersi ati kan prati. Na Psalmsingiman, di a de krin, ben de wan man akroederi na égi ati foe Gado, ben skrifi na ondro santa jeje: „Den af’afoe-ati sma mi no ben wani si na ai” (Psalm 119:113). A mindri den sma dati joe ben abi den Israëlsma di Elia na wan tjalansifasi ben taigi den: „O langa oen sa tingatinga ete tapoe toe prakseri? Efoe Jehovah de na troe Gado go waka baka en; ma efoe a de Baäl, go waka baka en” (1 Kownoe 18:21). ’Den ben tingatinga af’afoe tapoe toe difrenti prakseri’.
7 Na so den skrifi ooktoe foe Juda, baka di wan pisi ben drai kon baka na Jehovan: „Èn tokoe ete na pipel ben tjari srakti-ofrandi go tapoe den hé presi; soso a ben de gi Jehovah, den Gado” (2 Kronieken 32:17). Nanga wan prati ati den ben taki dati den ben anbegi Jehovah, ma den ben doe en tapoe wan fasi di den no ben abi a reti foe dati èn na tapoe presi pe den ben anbegi Baäl a fesi. Jezus ben taki: „Nowan sma kan dini toe méstri leki srafoe” (Mattéus 6:24). Na ini a ten dati a ben de dati srafoe ben de leki wan pisi goedoe. Den ben moe de klarklari gi den masra foe den 24 joeroe ini wan dé. Na ten foe den no ben kan prati na mindri toe méstri, na wan pisi gi na wán èn na tra pisi gi na trawan. Na mama foe a tori na ini a takmakandra foe Jezus ben de: Nowan af’afoe dienst gi Jehovah!
8. Fa wan sma kan abi, foe taki en na agersifasi toe-ati, èn foe sortoe toe tekst disi e kon na krin?
8 Ibri sma abi soso wan letterlek ati, ma na agersifasi wan sma kan abi toe ati. Na tapoe den sortoe sma disi David ben poti prakseri di a ben taki: „Nanga grati mofoboeba den e tan taki srefi nanga toe ati [„nanga wan ati èn wan ati”, Ingrisi NW-Verwijsbijbel, voetnoot]” (Psalm 12:2). Na wan ati ben de na tapoe san a sma de a dorosé, a tra ati ben de bezig a kibrifasi foe meki belang pe a sma e prakseri ensrefi nomo go a fesi. Na a fasi disi te a sma no ben de opregti èn nanga wan dobroe-ati a bijbel e skrifi foe en na a fasi disi: „Bika leki wan sma di na ini en sili ben meki berekening, na so a de. ’Njan èn dringi’ ai taki gi joe, ma en ati no de nanga joe.” „Awinsi a e meki en sten switi, no bribi na ini en, bika sébi tegoe sani de ini en ati”. — Odo 23:7; 26:25; Psalm 28:3.
9. San e sori dati na ini den dé foe Jeremia èn na Jezus ten toe-ati anbegi ben de?
9 Sowan sortoe hoigrifasi na mindri libisma na wan sari sani ma efoe sma sai en na ini na anbegi foe Jehovah dan den sa koti rampoe foe en. „No poti joe fertrow na tapoe bidrigi wortoe, foedi wan sma e taki: ’Na tempel foe Jehovah, na tempel foe Jehovah, na tempel foe Jehovah den de!’ Loekoe, joe e poti joe fertrow na ini bidrigi wortoe — séker a no sa jepi noti. San? Foefoeroe, kiri, doe soetadoe nanga sweri falsi èn tjari offer smoko gi Baäl èn waka baka tra gado di oen no ben sabi — èn oen moe kon na mi fesi na ini na oso disi pe a nen foe mi ben kari poti na tapoe èn oen moe taki: ’Soema sa kon fri sékerséker’, awinsi dati joe e doe ala den tegoe sani disi?” (Jeremia 7:4, 8-10) Jezus ben poeroe a sortoe dobroe-ati hoigrifasi disi kon na dorodoro a mindri den méstri foe wet èn den Fariséman: „Oen hoigriman, fa Jesaja ben taki foe oenoe a fesi na tapoe wan fasi di ben fiti di a ben taki: ’A pipel disi e gi mi grani nanga den mofoboeba, ma den ati de fara foe mi’” — Mattéus 15:7, 8.
10, 11. Na san Jehovah nanga Kristus Jezus e loekoe te den e kroetoe wan sma, èn foe san-ede?
10 Ala disi e meki kon na krin foe san-ede Jehovah ben taigi Samuël: „Gado no e si soleki libisma e si, bika libisma e si den sani san de foe si nanga ai; ma foe a sé foe Jehovah ai si fa na ati de” (1 Samuël 16:7). Efoe Jehovah foe dat’ede e kroetoe wan sma, dan a no e go a tapoe soso den sani di de foe si a dorosé frafra; a e go doro te na ati foe na afersi. Kristus Jezus ben ferteri foe na ati leki na poesoe krakti baka den doe foe wi, efoe den de now boen ofoe takroe, nanga den wortoe: „Wan boen sma e poeroe foe na boen goedoe foe en ati boen sani ma wan godelowsoe sma e poeroe foe en godelowsoe goedoe san de godelowsoe; bika foe den sani di foeroe na ati pasa marki, na mofo e taki.” Ooktoe a ben taki: „Foe na ati e kon godelowsoe prakseri, kiri, soetadoe, hoeroedoe, foefoeroe, falsi kotoigi nanga lé foe pori sma nen.” — Lukas 6:45; Mattéus 15:19.
11 Kristus Jezus di kisi na kroetoe, e loekoe na den presi pe Jehovah e loekoe: „Na mi de a sma . . . di e ondrosoekoe den moro kibri prakseri èn na ati, èn mi sa gi ibri wan sma foe oenoe akroederi den doe foe oenoe” (Openbaring 2:23). Foe dat’ede den e taki: „Kibri joe ati boen, ija, moro leki ala tra sani di de foe joe kibri, bika foe drape den fonten foe na libi de.” — Odo 4:23.
12. Foe san-ede wan ati di no prati na ini na dienst foe Jehovah e aksi moeiti fajafaja foe wi sé?
12 Na anbegi foe wi gi Jehovah no mag de af’afoe èn ooktoe no nanga toe ati, ma moe doe nanga wan ati di no prati. Disi e aksi foe wi sé faja moeiti. A de kefarlek koni na ini a taki dati fowtoe sani di oen fadon skin e hari oen go na den de boen. Aladi a kan bedrigi wi èn kan kibri na troetroe bewégi foe wi, tokoe Jehovah e si precies fa a moe de nanga na ati. A e warkow wi foe disi na a fasi disi: „Na ati de moro feradelek leki wan tra sani èn a no e si pasa noti. Soema kan sabi en? Mi, Jehovah, e ondrosoekoe na ati, e ondrosoekoe den niri, ija, foe gi ibriwan sma akroederi en pasi, akroederi na froktoe foe en doe.” — Jeremia 17:9, 10.
Kisi wan ati di no prati
13. San Jezus ben taki foe son kerkiman di ben de fajafaja ini a dini foe den na ini a ten foe en, èn sortoe bakapisi na fasi foe doe disi ben abi gi den?
13 Jezus ben taki foe den kerkiman ini en dé di ben faja gi na anbegi foe den: „Na ati foe na pipel disi kon deki, èn nanga den jesi den ben arki nanga ferferi, èn den ben tapoe den ai sodati den no ben sa si noiti nanga den ai èn jere nanga den jesi èn kisi ferstan nanga den ati èn drai baka, èn mi ben sa meki den gesontoe” (Mattéus 13:15). Foedi den ben meki kerki denki di den ben poti a fesi kaba tjari den, meki den ben tapoe den ai nanga jesi èn ben tranga den ati sodati den no ben o firi gi na leri foe Jezus. Foedi den ben trowe pir’ai, meki den ben tan a baka foe kweki wan ati di joisti bewégi e tjari en: „A sma di e arki na pir’ai e kisi ati [„e kisi boen bewégi foe ati”, Ingrisi NW-Verwijsbijbel, voetnoot]” (Odo 15:32). Den ben taki dati den ben anbegi Gado, ma den ben doe den „égi regtvaardikifasi” foe sma kan si den. — Mattéus 6:1, 2, 5, 16.
14. Sortoe eksempre e meki oen si fa na waarheid e kon na inisé foe wi?
14 Omoro boen a de dan foe de soleki kownoe Josafat foe Juda, di ’ben sreka en ati foe soekoe na troe Gado’ (2 Kronieken 19:3). Joe e sreka joesrefi moro boen foe soekoe Gado te joe e begi ini joe ati. Di na Hanna di ben de nanga sari ben begi fajafaja na Jehovah, ’a ben taki na ini en ati’ èn Gado ben jere en begi. Ooktoe wan sma moe de klarklari foe arki. Jezus mama ben arki: „En mama [ben kibri] ala den wortoe disi boen na ini en ati.” A ben bigin ’foe denki na ini en ati’ èn a ben tron wan getrow discipel foe Jezus. Jehovah e jepi den sma di e soekoe opregti na en. Lydia di ben frede Gado ben arki na Paulus „èn Jehovah ben opo en ati bradi, sodati a ben poti prakseri a den sani di Paulus ben taki”. A ben kisi dopoe (1 Samuël 1:12, 13; Lukas 2:19, 51; Tori foe den Apostel 16:14, 15). A de alaten na agersi-ati — den firi, den emotie, den boen bewégi foe ati — di e meki a waarheid kisi pasi kon ini a sma èn e meki roetoe na ini en.
15. Wi moe de klari foe doe san foe kisi wan ati di no prati?
15 Foe kisi wan ati di no prati, dan nanga wi firi wi moe de klarklari foe poti prakseri di wi ben poti a fesi a wan sé èn meki Gado de troe, awinsi dati nanga disi wan toe foe den santa pikin oso foe wi ofoe kerkileri di wi ben lobi sa broko saka (Romeini 3:4). Gridi bewégi foe ati moe poeroe foe meki oen ati kon de so foe teki a wani èn den pasi foe Jehovah. Jehovah ben skrifi en wet wan dé tapoe ston, ma bakaten a ben skrifi wèt tapoe libisma ati. Na apostel Paulus ben skrifi ooktoe na tapoe ati. Èn ooktoe joe ’kan skrifi lobi boenfasi nanga trow tapoe na tafra foe joe ati’. — Odo 3:3; Hebrewsma 10:16; 2 Korinte 3:3.
16. Sortoe aksi e poti prakseri na tapoe den stap di wan sma moe doe foe kan abi wan ati di no prati gi Jehovah?
16 Na ati foe joe de wan boen ondro gron foe skrifi den gron prakseri nanga wèt foe Jehovah na tapoe? Joe sa krin en foe denki di joe ben poti a fesi, sodati joe e meki presi gi a waarheid foe Gado? Joe sa go doro moro fara foe studeri, foe kenki joe denki, poeroe na owroesma di joe de èn foe weri na njoenwan, di ben doe kon akroederi na prenki foe Gado? Joe sa doe ala joe moeiti foe de wan wrokoman di no afoe sjen foe noti èn di e handri a wortoe foe waarheid joisti? — Romeini 12:2; Kolosse 3:9, 10; 2 Timotéus 2:15.
Hori wan ati di no prati
17. David ben gi tranga na en manpikin Salomo foe doe san èn foe san-ede Salomo ben libi en foe waka baka na rai dati?
17 David ben taigi Salomo: „Èn joe, mi manpikin Salomo, sabi na Gado foe joe Tata èn dini en nanga wan ati di no prati èn nanga wan sili di de klarklari; bika Jehovah e ondrosoekoe ala ati, èn ibri firi foe den prakseri a e si.” Salomo ben bigin troetroe nanga wan ati di no ben prati na en dienst ma di den jari ben psa a no ben tan horidoro na ini dati: „Now a ben psa di Salomo ben kon owroe, dati en égi oema ben beni en ati go foe waka na baka tra gado; èn en ati no ben de sondro foe prati nanga Jehovah, en Gado, soleki na ati foe en tata David.” — 1 Kronieken 28:9; 1 Kownoe 11:4.
18, 19. (a) Sortoe difrenti sani Satan sa gebroiki foe tapoe joe foe hori wan ati di no prati? (b) Fa Satan sa kenki en taktik efoe a no si winimarki nanga den moro fini moeiti disi?
18 Joe sa doro pe Salomo ben misi? Efoe joe ben gi joesrefi abra na Gado leki wan kotoigi foe Jehovah, èn ben poeroe ala af’afoe-ati ofoe toe atifasi foe joe anbegi èn ben gi jesi na den wortoe foe Jezus foe ’lobi Jehovah, joe Gado, nanga heri joe ati’, joe sa teki dan now na faste bosroiti foe sorgoe taki joe ati e tan krinkrin, gi Jehovah? (Mattéus 22:37). Satan no sa prisiri nanga dati èn a de wan gensman di foeroe nanga triki. Na ati foe joe sa de a marki di a poti ensrefi a tapoe. A sabi dati na ati e beni go na sondoe èn a kan boro go na ini efoe joe meki a tan di joe moe tan na ai kon slap. A no ben gi ’na ini na ati foe Judas Iskariot foe tori Jezus’? (Johannes 13:2) Moni, lobi foe goedoe, prisiri, hémemre, a waka foe wan pasi foe tron wan sani ini a grontapoe, na lostoe foe prodo nanga san wan sma abi, skin lostoe — a sabi den presi foe wi di swaki èn na tapoe dati a e soetoe den faja péri foe en go. Joe sa kiri den alamala nanga na skilt foe bribi? — Efese 6:16; 1 Johannes 2:15-17.
19 Èn efoe ala den triki nanga taktik disi foe Satan no doro den marki, dan a no e tapoe. Dan a e tron wan krasi lew. di e proberi foe swari den getrow kotoigi foe Jehovah nanga jepi foe oproeroe sma di e gebroiki tranga ogridoe èn nanga jepi foe fonfon, straf’oso nanga srefi dede. Ma na ondro ala den tesi dati Jehovah sa tranga den sma di sa gi densrefi na en krinkrin nanga wan ati di no prati. — Jakobus 4:7; 1 Petrus 5:8-10; Openbaring 2:10.
20, 21. (a) Sortoe aksi ben kan poti na a ondrosookoe foe na letterlek ati? (b) Fa wi kan gebroiki den srefi sortoe aksi disi foe ondrosoekoe na agersi-ati?
20 Ten na ten wan ondrosoekoe foe na letterlek ati de fanowdoe. Na ati e kisi na wan geregeld fasi na joisti njanjan ini wan fasi di nofo? Na naki foe na ati de regelmatig èn krakti, ofoe safrisafri èn swaki? Na ati e hori na druk foe na broedoe na tapoe na joisti peil? A e kisi na oefening di a abi fanowdoe? (Foe de gesontoe dan na ati langaten baka makandra e pompoe na wan kraktifasi) Na gangmaker e sorgoe dati na ati e kisi en tempo na den fanowdoe di e kenki? Na ati e kon de na ondro firi di e poti en na ondro hebi druk?
21 Efoe na ati foe na skin ben ondrosoekoe geregeld, omeni moro na agersi ati! Jehovah e ondrosoesoekoe en; ooktoe wi moe doe dati. A e kisi nofo jeje njanjan nanga jepi foe geregelde égi studi èn a go na komakandra? (Psalm 1:1, 2; Odo 15:28; Hebrewsma 10:24, 25) Den firi èn dipi firi foe na agersi ati e bewégi wi foe de fajafaja na ini a velddienst — sodati sontron kande srefi wi e span wisrefi krakti na ini na jepi-pionierdienst? (Jeremia 20:9; Lukas 13:24; 1 Korinte 9:16) Èn na ini sortoe klimaat wi de? Tra ati di de wán èn sondro den de prati na den srefi firi nanga bewégi foe ati e lontoe en? — 2 Kownoe 10:15, 16; Psalm 86:11; Odo 13:20; 1 Korinte 15:33.
22. Nanga san wi sa abi na djaranti dati sani sa waka boen na ini a faste bosroiti foe wi foe dini Jehovah nanga wan ati di no prati?
22 Efoe na ondrosoekoe foe na ati di joe doe e meki joe piki den aksi di tanapoe na tapsé nanga ja, dan joe e kibri na agersi-ati foe joe. Dan makandra nanga miljoenmiljoen tra getrow kotoigi joe sa si fa joe faste bosroiti foe dini Jehovah nanga wan ati di no prati sa kisi wini-marki. Ala sma di e doe disi, e kisi na djaranti: „A vréde foe Gado, di e psa ala prakseri, sa kibri joe ati èn joe jeje-krakti nanga jepi foe Kristus Jezus.” — Filippi 4:7.
Joe kan memre disi ete?
◻ Sortoe égifasi na agersi-ati abi?
◻ Fa wi kan doe dati wi no de af’afoe-ati ofoe nanga toe-ati?
◻ Foe san-ede Jehovah nanga Kristus Jezus e loekoe na a ati te den e kroetoe wan sma?
◻ Fa wi kan kisi èn hori wan ati di no prati?
[Prenki na tapoe bladzijde 7]
Joe abi toe fesi?
[Prenki na tapoe bladzijde 6]
Lydia
Josafat
Hanna
Maria