Jezus libi nanga diniwroko
Den piki di Jezus gi na den sma di ben e feni fowtoe na en
A DE sabbat. Jezus e dresi wan man di e siki 38 jari kaba. Ma den djoe kerki tiriman e feni fowtoe a tapoe en dati a ben pasa a sabbat. Jezus e piki: „Mi Tata tan wroko te now ete, èn mi e tan wroko.”
Ma aladi den Fariséman e tjari den sani disi kon a fesi, tokoe a wroko foe Jezus no e fadon na ondro den wroko di a sabbatwèt e tapoe. Na Gado ben gi en na préki nanga dresiwroko foe en foe doe èn foedi a e waka na baka na eksempre foe Gado meki a e tan doe en ala dé. Ma na piki foe en e meki den djoe ati kon moro bron srefi leki den ben de kaba èn den e proberi foe kiri en. Foe san-ede?
Foedi no wawan den abi na méne dati Jezus ben pasa na sabbat ma na tapoe foe dati den e si dati san Jezus ben taki dati a de na Manpikin foe Gado de leki a kosi foe Gado. Ma Jezus no ben frede èn a e go moro fara nanga en piki foedi a e go moro dipi tapoe na boen matifasi pe a de nanga Gado. „Na Tata abi lobi gi na Manpikin” a e taki, „èn a e meki a si ala san di a e doe.”
„Netleki fa a Tata e wiki den dedewan” Jezus e go moro fara, „na so na Manpikin e meki sma kon a libi soema a wani.” Ija, foe taki en na jejefasi dan a Manpikin e wiki dedesma kaba! „A sma di e jere mi wortoe èn e bribi na ini en di ben seni mi kon.” Jezus e taki, „komoto foe dede go abra na ini a libi.” Ija, so a e go, moro fara: „A joeroe e kon, èn a de now, pe den dedewan sa jere na sten foe na Manpikin foe Gado, èn den di ben poti prakseri a tapoe sa libi.”
Aladi te na a momenti dati nowan tori ben de dati Jezus ben wiki wan sma letterlek komoto foe dede, tokoe a e taigi den sma di e feni fowtoe dati sowan letterlek opobaka foe dede sa feni presi. „No froewondroe foe dati,” a e taki, „bika a joeroe e koni pe ala sma di de na ini den memregrebi, sa jere en sten èn sa kon a doro.”
A de krin dati Jezus noiti ete ben tjari so krin kon na publiki na toemsi prenspari rol di a abi na ini a prakseri foe Gado leki now. Tokoe den sma di e feni fowtoe a tapoe Jezus abi moro leki soso en égi kotoigi na ini a tori foe den sani disi. „Oenoe ben seni sma go na Johannes,” Jezus e tjari kon ini den memre, „èn a ben gi kotoigi foe na waarheid.”
Soso toe jari a fesi Johannes na Dopoeman ben ferteri den djoe tiriman disi foe na Sma di ben sa kon baka en. Èn Jezus e memre den na a bigi respeki di den ben sori na a Johannes di de now na ini doengroe-oso. A e taki: „Foe wan sjatoe ten oenoe ben wani prisiri srefsrefi na ini en leti.” Jezus e tjari disi kon na memre foe den na ini a howpoe foe jepi den, ja, foe ferloesoe den. Tokoe en no e anga foe na kotoigi foe Johannes.
„A de . . . den wroko srefi di mi e doe [makandra nanga a wondroe di a ben doe djonsrode] di e gi kotoigi foe mi dati a Tata ben seni mi kon.” Ma boiti foe dati Jezus e taki moro fara: „Na Tata srefi, di ben seni mi, ben gi kotoigi foe mi”. Gado foe eksempre ben gi kotoigi foe Jezus dopoe nanga den wortoe: „Disi na mi Manpikin, na lobiwan.”
Den sma di e feni fowtoe foetroe no de foe gi den pardon foe di den e trowe en. Den Boekoe di den e taki den e ondrosoekoe, joisti e kotoigi gi en: „Efoe oen ben bribi Mozes, oen ben sa bribi mi.” Jezus e tapoe, „bika a ben skrifi foe mi. Ma efoe oen no e bribi den boekoe foe en fa oen sa bribi dan den wortoe foe mi?” Johannes 5:17-47; 1:19-27; Matt. 3:17.
◆ Foe san-ede a wroko foe Jezus no de wan pasa foe a sabbat?
◆ Fa Jezus e taki foe en toemsi prenspari rol na ini a prakseri foe Gado?
◆ Na a kotoigi foe soema Jezus e sori foe bewijsi dati a de a Manpikin foe Gado?