Jezus libi nanga diniwroko

Piki karoe tapoe na sabbat

HERI esi Jezus nanga en discipel gwe libi Jeruzalem foe drai go baka na Galiléa. A de lente, èn tapoe den gron na karoe de kaba na ini den tiki. Den discipel abi angri. Foe dat’ede den e piki karoe èn e njan dati. Ma foedi a de sabbat, meki a doe disi foe den no de wan sani di sma no e si.

A no langa psa ete dati den kerki tiriman na ini Jeruzalem ben proberi foe kiri Jezus foedi a ben sa pasa na sabbat wèt soleki den taki. Now a de den Fariséman di e kon nanga wan kragi. „Loekoe! Den discipel foe joe e doe wan sani di no mag tapoe sabbat”, den e kragi.

Den Fariséman e taki dati a piki foe karoe èn na wrifi foe den siri na ini den anoe meki den kon fri foe njan den de leki a koti èn a masi foe den. Ma na tranga fasi foe den foe tjari sani kon na krin foe san joe moesoe ferstan ondro wroko ben meki a sabbat kon hebi, aladi na dé disi joisti ben abi na méne foe de wan prisiri ten foe bow sma na jejefasi. Foe dat’ede meki Jezus ben poti na kragi na en sé nanga eksempre foe a bijbel di e sori dati Jehovah Gado noiti tapoe sowan tranga fasi ben tjari na sabbatwèt foe en kon.

Di David nanga den man foe en ben abi angri, Jezus ben taki, den ben tan tanapoe na a tabernakel èn ben njan den brede di ben poti a fesi foe Jehovah. Aladi den brede ben teki poeroe kaba na fesi foe Jehovah, èn vers wan ben poti na den presi foe den, tokoe leki fa a gwenti ben de na soso den priester ben mag njan foe en. Tokoe David nanga den man foe en na ini na omstandigheid dati no ben kisi kroetoe foedi den ben njan foe en.

Jezus e gi ete wan eksempre: „Joe no ben lési na ini na wèt dati tapoe den sabbat den priester ini a tempel no ben behandel na sabbat leki santa èn tokoe ben tan sondro fowtoe?” Ija, srefi tapoe na sabbat den priester e go doro foe srakti èn doe tra wroko ini a tempel èn a meki klari foe ofrandi foe meti! „Ma, mi e taigi oenoe”, Jezus e taki, „dati wan sani di moro bigi leki na tempel, de dja.”

Foe pir’ai gi den Fariséman, Jezus e go moro fara: „Efoe oenoe ben ferstan san a wani taki: ’Mi wani sar’ati èn no srakti-ofrandi’, dan oen no ben sa kroetoe den sma di no ben abi fowtoe.” Dan a e bosroiti: „Bika na Manpikin foe libisma de masra foe a sabbat.” San Jezus e bedoel nanga dati?

Jezus ben e sori na tapoe en vréde Kownoekondretiri foe doesoenjari. Siksi doesoen jari langa libisma ben tjari hebi katibo na ondro Satan Didibri, aladi tranga nanga feti ben de den sani foe ala dé. Na bigi sabbattiri foe Kristus na a tra sé sa de wan ten foe rostoe foe ala na pina èn ala na kwinsi dati. Mattéus 12:1-8; Leviticus 24:5-9; 1 Samuël 21:1-6; Numeri 28:9; Hosea 6:6.

◆ Sortoe kragi tjari kon tége den discipel foe Jezus, èn fa Jezus e piki dati?

◆ Tapoe sortoe fowtoe foe den Fariséman Jezus e sori?

◆ Ini sortoe fasi Jezus de masra foe na sabbat?