Loekoe boen foe no gebroiki makti tapoe wan fowtoe fasi
„Na frede foe Jehovah wani taki foe no wani si ogri na ai. Opo joesrefi èn bigi memre èn na takroe fasi èn na takroe mofo mi no ben wani si na ai.” — ODO 8:13
1. Tapoe sortoe kontren foe eksempre na onvolmaakti libisma ati de feradelek?
NA GEBROIKI tapoe wan fowtoefasi foe makti pe wan sma e prakseri ensrefi nomo de sondro degedege wan foe den takroe pasi di Jehovah Gado no wani si na ai. En Wortoe e gi wi rai sodati wi kan kakafoetoe gi na fasi disi di wi abi leki onvolmaakti libisma, bika a e ferstan a libisma ati. Wi e lési: „Na ati de moro feradelek leki wan tra sani èn a no e loekoe psa noti. Soema kan sabi en? Mi, Jehovah e ondrosoekoe na ati finifini, e ondroesoekoe den niri, ija, foe gi ibri wan sma akroederi en pasi, akroederi den froktoe foe en doe.” — Jeremia 17:9, 10.
2. Sortoe krakti makti abi nofotron tapoe sma di abi en?
2 Nanga reti a Wortoe foe Gado e warskow wi foe na fowtoe gebroiki foe makti. Na fasi foe gebroiki makti tapoe wan fowtoe fasi, de so tranga dati wan Ingrisi koniman ben taki den wortoe di e kon now: „Makti e tjari sma go foe gebroiki en fowtoe èn absoluut makti de absoluut porifasi.” A ben taki ooktoe: „foe ala den oorzaak foe na porifasi èn na broko saka foe libisma na moreel sé na makti de a wan di e tan moro langa èn moro actief.” Soleki oen ben si na ini na artikel na fesi dan a no afoe foe de so dati makti abi wan pori krakti, ma a kefar de wel drape, dati a abi dati.
3. Na sortoe de nanga makandra leki libisma makti kan gebroiki tapoe wan fowtoefasi, èn foe san-ede disi ben kan psa?
3 Soema moe loekoe boen nanga fowtoe gebroiki foe makti? A de pikinmoro ibrisma! Ini pikinmoro ibri fasi pe sma abi foe doe nanga makandra situwasi e sori densrefi pe na wan sma foe en goedoe, a sabi di a abi moro, a skin krakti, a positsi, a moi di a moi na skinfasi èn so morofara ede, abi wan sani a tapoe a trawan, O moro bigi na wini marki disi de, o moro bigi na tesi de foe gebroiki en tapoe wan fasi pe wan sma e prakseri ensrefi nomo. Foe san-ede? Foe di ’na firi foe libisma ati de takroe foe en jongoe jari kaba’ (Genesis 8:21). Ija, na onvolmaakti libisma ati „de feradelek”, bedrigi, ofoe nanga triki èn e kanti go na a sé foe ogri. — Jeremia 17:9.
Kristen owroeman
4. Foe sortoe moi rai di Jethro ben gi Mozes ben kon na krin dati Jethro ben sabi boenboen den tesi di ben e go makandra nanga a kisi foe makti?
4 Loekoe pikinso leki fosiwan den owroeman, den opziener na ini na kristen gemeente. Efoe wi e denki foe den égifasi disi di den moe abi, dan wi kan tjari kon na ini wi memre san Jethro ben taigi Mozes ini a tori foe a teki foe man di ben sa tron edeman foe doesoen, hondro, féfitenti èn tin: „Joe moe teki foe heri a pipel kapabel man, di e frede Gado, di e hori wortoe, di no wani si onregtvaardiki wini na ai” (Exodus 18:21). Na den sortoe man disi den ben kan gi a wroko foe loekoe sani. Den no ben sa gebroiki na tapoe wan fowtoe-fasi den winimarki di ben tai na wan positsi foe loekoe sani, bika na frede foe Gado wani taki foe no wani si ogri na ai. Den sortoe man disi no ben sa wani si troetroe „onregtvaardiki wini na ai”, na presi foe feti baka dati ofoe foe lobi dati.
5. Foe san-ede na rai na ini 1 Petrus 5:2, 3 e fiti soboen èn fa wi kan tjari dati kon ini wi libi?
5 Na apostel Petrus ben sabi heri boen na kefar dati owroeman ben sa kan gebroiki makti tapoe wan fowtoe fasi; foe dat’ede a ben gi na rai di e kon now na owroeman ini na kristen gemeente: „Wé na ipi foe Gado di de ondro oen sorgoe, no ondro dwengi, ma nanga heri joe ati; no foe lobi foe wan oneerlek wini, ma foedi joe de klarklari; no leki basi tapoe den di de na goedoe foe Gado ma foe tron eksempre gi na ipi” (1 Petrus 5:2, 3). Wé na ipi foe Gado foe lobi foe oneerlek wini ede ben sa wani taki a gebroiki tapoe wan fowtoe fasi foe makti. Na so ooktoe na basi foe na ipi tapoe wan fasi pe wan sma e prakseri ensrefi nomo ben sa wani foe taki a fowtoe gebroiki foe makti. Wan owroeman foe eksempre kan abi wan krin méne foe na fasi fa en osofamiri moe weri krosi. Ma a moe loekoe boen dati a no proeberi foe poti den sortoe persoonlek fasi foe si sani disi tapoe a ipi; te a ben sa doe disi, dan a ben sa basi den.
6. San na nepotisme, èn fa owroeman ben kan meki na fowtoe dati?
6 Efoe owroeman no loekoe boen den ben kan meki a fowtoe foe nepotisme, san ben sa de ooktoe wan fowtoe gebroiki foe makti. Nepotisme? Ija, disi de wan wortoe di komoto foe na Latijn tongo èn di wani taki „neef”. A wortoe ben doe kon foe na takroe gebroiki di ben de a mindri paus nanga tra kerki hé man foe doe boen na famirman na kerki sé ofoe na goedoe sé èn moro spesroetoe na den pikin foe den brada ofoe sisa. Paus Nicolaas 3 ben abi srefi na nen foe „famiri edeman foe na nepotisme foe paus”. Efoe kristen owroeman no loekoe boen srefisrefi, dan famiri banti kan abi krakti na tapoe den srefsrefi na presi dati den meki jeje gronprakseri tjari den. Wán owroeman ben abi na overtoigi dati en manpikin ben kan kisi a rikomanderi leki opziener aladi den tra owroeman no ben agri nanga dati. Na papa froisi baka dati go na wan tra gemeente. Baka wan toe jari na manpikin no ben de wan owroeman ete. A ben de krin dati a papa ben meki na famiri banti abi krakti tapoe en.
7, 8. Foe sortoe eksempre e kon na krin dati nepotisme de kande troetroe wan kefar gi owroeman?
7 Wan tra fasi foe na fowtoe gebroiki foe makti tapoe a kontren foe nepotisme e kon na krin te owroeman no opo doe wan sani te wan famiriman foe den doe wan sondoe (Teki gersi nanga 1 Samuël 2:22-25, 30-35.) Wantoe jari psa kaba ini bepaalde gemeente ini na mindri pisi foe den Verenigde Staten foe Amerkankondre wan situwasi foe sondoe ben de di ben e seki joe. No so langa psa kaba na situwasi disi ben gro kon ooktoe ini bepaalde gemeente ini Europa. Foeroe jongoewan ben de ini a tori foe hoeroedoe, fowtoe gebroiki foe drugs nanga den sortoe sani dati. A no ben de pikinso foe den di ben de pikin foe owroeman, èn a ben de krin dati wantoe foe den owroeman disi ben e loekoe psa na takroe waka nanga libi foe den pikin foe den. Di den troe tori ben kon na krin, dan wantoe foe den owroeman disi ben lasi den wroko leki owroeman foe di den ben gebroiki tapoe wan fowtoe fasi den positsi leki owroeman ofoe foe taki en moro spesroetoe, foe di den no ben gebroiki den makti tapoe joisti faisi.
8 Wawantron a kan psa dati wan owroeman ofoe wan dinari ini na dini-wroko di e hori wan aksi-nanga-piki takmakandra tapoe wan komakandra e sori sowan sortoe fasi tapoe a kontren disi. A moe loekoe boen dati a no teki sma partij. Den memre foe en osofamiri kan sori na ini a pis tori disi na wrokomakandra foe den foe di den e loekoe a tapoe dati den e pristeri densrefi foe a gi foe kommentaar efoe nowan tra sma opo den finga, èn no moesoe wani nomonomo foe gi kommentaar efoe foeroe trawan e pristeri densrefi foe dati.
Brada di e waka loekoe gemeente
9. San wi e ferstan ondro na fowtoe gebroiki foe makti di sma sabi leki simonie èn pe a nen dati komoto?
9 Kristen na ini frantwortoe positsi, spesroetoe den brada foe na Wachttoren Genootschap di e waka loekoe gemeente, moe loekoe boen a tapoe srefsrefi dati den no meki a fowtoe sabisabi ofoe sondro den sabi èn di sma sabi leki simonie. Na wortoe ben doe kon foe na man Simon di Tori foe den Apostel 8:9-24 e kari èn di ben pristeri den apostel moni foe na presenti di ben sa meki a man nanga jepi foe opo anoe èn gi santa jeje na tra sma. Lukas ben ferteri: „Petrus ben taigi en: ’Dati joe lasi gwe nanga joe solfroe, foe di joe ben prakseri foe kisi a fri presenti foe Gado nanga jepi foe moni. Joe no abi no wan pisi ini na afersi disi, bika joe ati no de reti na ini na ai foe Gado. Sori foe dat’ede beraw, foe na lagifasi foe joe èn begi Jehovah dati a mag gi pardon na a prakseri foe joe ati efoe dati kan.’” Disi ben de na ini a di psa ooktoe wan takroe mindri hé man na ini na kerki. Wan encyclopedia e ferteri dati „na takroe doe disi ben pikinmoro algemeen ini na kerki na ini na di foe erfoe èn twarfoe hondro jari”.
10, 11. Fa owroeman ben sa man fadon go na ini a trapoe foe simonie?
10 Fa dienstknegti foe Jehovah ben sa kan doe sowan srefi sortoe sondoe? Efoe den no loekoe boen srefsrefi, den ben kan abi a firi foe rikomanderi wan owroeman foe wan prati tapoe wan kringkomakandra ofoe wan districtscongre foe na toemsi moi fasi foe en foe lobi foe teki sma na en oso di den ben ondrofeni foe en sé ofoe na boen foeroe kado di den ben kisi foe en. Joe ben abi srefi aparti geval pe wan owroeman ben gi bigi kado èn na a srefi ten ben aksi na a mogelekheid foe kisi wan ofoe tra spesroetoe grani. A de krin dati den sortoe sma disi no ben de tevrede foe tjari den srefi „leki wan mendriwan” èn foe libi en abra na a santa jeje foe bewégi den sma di de ini frantwortoe presi foe poti sma na ini wan wroko na tapoe wan theokratisfasi (Lukas 9:48). Na ondro den sortoe omstandigheid disi den no ben teki den sortoe kado disi, sodati wan toemsi moi eksempre ben gi na ini a no gebroiki foe makti di wan sma e kisi tapoe wan fowtoe fasi. Ala den sani disi di psa e sori o voorzigtiki prenspari owroeman moe de foe tan farawe foe na flaka foe simonie!
11 Boiti foe dati, a kan de fanowdoe ten na ten dati wan bedinari di e waka lontoe e gi wan owroeman krakti rai. Ma efoe na bedinari di e waka lontoe ben kisi foeroe tron kado foe na owroeman dati ofoe ben njan boen foe a lobi d a lobi teki sma na oso, dan a kan feni en moeilek foe gi en eerlek rai. Wegi prakseri go-kon pe a e prakseri ensrefi nomo ben sa kan tapoe en foe doe en plekti foe gi a fanowdoe rai? A sa poti den jeje belang foe en brada moro hé leki en égi wini na skinfasi? Ija, a sa feti a baka foe plisi Gado ofoe libisma? — Galacia 1:10.
Na osofamirilibi
12. Foe sortoe réde masra moe opo ai loekoe boen dati den gebroiki makti tapoe wan joisti fasi?
12 Inisé foe na famirilibi a de ooktoe fanowdoe dati ibriwan sma loekoe boen foe no gebroiki tapoe wan fowtoefasi bepaalde winimarki di en leki wan man ofoe oema abi moro leki wan trawan ofoe wan bepaalde makti di en leki man ofoe oema abi. Wan masra foe di a de ede foe na osofamiri, ofoe foe di a abi moro bigi skin krakti, ofoe foe di a de a sma di e wroko a moni, kan handri leki fa en e denki èn firi ofoe tapoe wan fasi pe a e prakseri ensrefi nomo sondro foe firi gi trawan èn nanga dari e sori pikinso empathie, dati wani taki foe poti ensrefi ini a situwasi foe wan trawan. Paulus e poti krakti a tapoe dati oemasma moe saka densrefi na ondro den man foe den. Na a srefi ten a e taigi den man dati den moe lobi den leki den égi skin èn moe de klari foe dede gi den, so leki ook Kristus dede gi na kristen gemeente (Efese 5:25-33). Den sortoe rai disi moe hori wan masra ini a tori foe wan fowtoe gebroiki foe en makti ofoe na boen positsi pe a de na ini. Bakadi na apostel Petrus ben gi oemasma na rai foe saka densrefi a den man foe den ondro, a ben gi den masra a fermane di e kon now: „Oen man, tan na asrefi fasi foe libi na en akroederi sabi, e sori en lespeki leki wan moro swaki patoe, na oemasmafasi, foe di joesrefi de erfgenaam nanga den foe na no-ferdini boen foe na libi, sodati den begi foe joe no tapoe.” Ija, efoe masra wani de ini wan boen matifasi nanga Jehovah, dan den moe loekoe boen soifri srefi dati den gebroiki na makti di den abi tapoe wan joistifasi. — 1 Petrus 3:7.
13. (a) Foe sortoe égifasi foe oemasma masra sontron e meki wan fowtoe gebroiki foe en? (b) Fa den trowoema di ben e prakseri densrefi nomo ben sori wan fowtoe gebroiki foe makti, èn sortoe komando foe bijbel den ben poti nanga dati na wan sé?
13 Sma ben taki dati na trowpatna di lobi a trawan moro, de ini a makti foe a sma di lobi moro mendri. Na ini disi wan séker marki foe waarheid gersi taki a de ini algemeen, a lobi foe oemasma e go moro dipi leki disi de na a masra foe den — lobi de moro prenspari gi den èn foeroe masra e gebroiki disi tapoe wan fowtoefasi te den e prakseri densrefi nomo. Na a tra sé a de bekenti dati oemasma ben wégri foe doe den trowplekti efoe den no kisi san den wani. Te joe loekoe en boen dan son oemasma ben wégri srefi foe gi den man foe den na trowplekti krinkrin. A wan sari sani foe taki dati disi sontron ben meki dati wan man ben doe soetadoe. Ala den sortoe rai disi foe Paulus di tanapoe na ini 1 Korinte 7:3-5 èn di ben poti a wan sé de ooktoe wan fowtoe gebroiki foe makti pe wan sma e prakseri ensrefi nomo.
14. San e sori taki papa nanga mama de di e meki wan fowtoe gebroiki foe makti di den abi tapoe den pikin?
14 Foe di pikinnengre moe gi jesi na den papa nanga mama ini akroederi nanga Masra, dan disi e gi den papa nanga mama, moro spesroetoe a papa foe den, makti a tapoe den. Fa den sa gebroiki a makti disi? Sondro foe prakseri, sondro foe firi, sondro empathie (foe poti densrefi na ini a situwasi foe den pikin)? Disi de now precies san foeroe grontapoe papa, èn wantoe mama, e doe èn nanga disi meki na algemeen de foe na „syndroom foe na pikin di den mishandel” ben doe kon. Akroederi World Health foe januari/februari 1984 dan „pikin di den mishandel de ini ibri libigemeenschap”, èn „a gersi dati na ini a disiten moro pikin den e mishandel, den e soigi wini poeroe for den, den e fon den ofoe libi den a densrefi abra, èn na ibri pisi foe a grontapoe e kisi a porsi foe en”. Ini wan tra rapport tanapoe dati ini den Verenigde Staten den laste tin jari na mishandel foe pikin ben de moro leki toe tron. Ala disi séker e sori tapoe wan fowtoe gebroiki foe makti. Srefi wan kristen papa ofoe mama di no ben sa prakseri foe mishandel wan pikin srefsrefi, kan meki a fowtoe foe wan sortoe foe mishandel foe pikin, soleki e kon na krin ini na rai di Paulus ben gi: „Oen papa, no ferferi oen pikin, ma tan kweki den na ini na tranga leri èn na makti rai foe Jehovah. Oen papa, no tergi oen pikin sodati den no lasi ati.” — Efese 6:4; Kolosse 3:21.
15, 16. Fa pikin kan meki wan fowtoe gebroiki foe makti, èn san disi e aksi foe a sé foe papa nanga mama?
15 O fa a sa de wan vreemde sani na a bigin, ooktoe pikin kan meki a fowtoe foe gebroiki makti tapoe wan fowtoefasi. Fa so? Pikin kan tjari papa nanga mama go so fara foe handri kontrari san den sabi boenboen foe na lobi di den papa nanga mama abi gi den. Wan pikin di sabi dati a ferdini fonfon, kan kré so kefarlek foe wiki sari ini wan sma dati en mama no man go so fara foe gi en na fonfon di a moe kisi. Wan bisnis oema di sani e waka boen gi en e gafa foe na koni foe en foe drai den kranti leki fa a wani. A e taki: „Disi na san oemasma kisi di den gebore. Joe moe si pikinso fa mi oemapikin e drai en papa leki fa a wani.”
16 Akroederi wan tori foe koranti „dan na ini Noord-Amerika wan skreki gro de ini ’foe pikin di wani sori taki den abi makti’ èn di e basi èn e drai a libi foe den papa nanga mama foe den”. Ma na dresi no didon na ini a gi foe rai na den pikin, ma den papa nanga mama moe hori sani moro betre na ini anoe. Den papa nanga mama di de bigisma moe de leki wan skotoe a fesi foe den pikin foe den. Jongoe pikin esesi man foe si pratifasi èn pré na wan papa ofoe mama tege a trawan foe kisi san den wani. Papa èn mama moe teki wan faste bosroiti foe san de joisti èn na a srefi ten djaranti den pikin foe den alaten foe a lobi foe den. Netleki Jehovah na so kristen mama nanga papa e gi tranga leri nanga lobi. — Hebrewsma 12:5, 6.
Na ini tra fasi fa sma de nanga makandra
17. Fa wi ben si kan taki foe wan fowtoe gebroiki foe makti na ini a fasi fa wan sma di e gi tra sma wroko èn wan sma di e kisi wroko?
17 Na ini a fasi foe wroko makandra foe wan sma di e gi wroko èn wan wrokoman tesi e kon ooktoe foe gebroiki makti na tapoe wan fowtoefasi. Nanga disi na ini prakseri meki Paulus ben gi srafoe-masra, di ben akroederi pikinso nanga disiten sma di e gi trawan wroko, opziener, nanga basi, na rai di e kon now: „Oen masra . . . poti a tapoe-skreki di oen e tapoe-skreki gi den na wan sé bika oen sabi dati na méstri foe den èn foe joe de ini hemel, na en partijfasi no de” (Efese 6:9; Kolosse 4:1). Kristensma di na ini grontapoe afersi abi na loekoe tapoe wan wroko, moe loekoe boen dati den no gebroiki den makti tapoe wan fowtoefasi. Boaz foe owroeten wi ben sa man kari leki wan sma di ben de ini wan toemsi moi wroko makandra nanga den sma di ben e wroko nanga en. — Ruth 2:4.
18. Tapoe san brada nanga sisa di no trow moe loekoe boen sodati den no meki a fowtoe foe a fowtoe gebroiki foe makti?
18 Ete wan tra kontren wi wani kari pe kristen moe loekoe boen foe no gebroiki makti na tapoe wan fowtoefasi, èn dati wani taki na krakti di de a mindri den sekse foe hari makandra. Soso kaba na fasi foe jongoe sisa e meki dati foeroe foe den ben sa wani trow sote èn kisi pikin. Leki wan bakapisi foe disi a kan psa dati brada sondro foeroe moeiti kan pré nanga a lobi foe sisa. Disi de séker wan fowtoe gebroiki foe makti. Paulus ben gi Timoteus na rai: ’Behandel owroe sisa leki mama, jongoe oema leki sisa nanga ala krinfasi.’ Na a tra sé a rai gi na kristen oema „foe moi densrefi nanga krosi di sorgoe moi nanga bescheidenfasi èn gesontoe ferstan”. Efoe den trow now ofoe no trow, den moesoe loekoe boen toe ’foe sori wan krin waka nanga libi’. — 1 Timotéus 2:9; 5:2; 1 Petrus 3:2.
19. Foe na gebroiki foe sortoe tra égifasi wi moe broko wi ede, boiti dati wi moe sori koni, geregtigheid nanga lobi?
19 Ini den bijbellectuur foe wi foeroe sani taki foe a tori dati kristensma moe meki a koni foe Gado tjari den, foe sori geregtigheid ini ala san den e doe èn dati lobi di abi en fundamenti tapoe gronprakseri moe poesoe den. Foe san oen taki kaba na fesi kon a krin dati ala dienstknegti foe Jehovah moe broko den ede ooktoe foe na égifasi, ofoe na goedoe foe makti. Noiti den moesoe gebroiki a fasi disi tapoe wan fowtoefasi, ma alaten gebroiki en na wan joistifasi. Na rai di na Wortoe foe Gado e gi foe disi e kotoigi troetroe foe na koni foe Gado. Te wi teki den sortoe rai disi boen na ati, dan wi sa gi Jehovah nen grani, de wan blesi gi tra sma èn kisi a boenati foe Gado.
Sortoe rai joe kan memre?
◻ Fa wi kan taki dati wi gebore nanga na firi foe gebroiki makti tapoe wan fowtoefasi?
◻ Foe san-ede owroeman moe loekoe boen dati den no gebroiki den makti tapoe wan fowtoefasi?
◻ Tapoe sortoe fasi trowpatna no moesoe gebroiki den makti di den abi tapoe wan fowtoefasi ini na matifasi foe makandra?
◻ San papa nanga mama èn pikin moe poti na wan sé na ini a fasi fa den de nanga makandra ini a tori foe a fowtoe gebroiki foe makti di den abi?
[Prenki na tapoe bladzijde 7]
Simon ben proeberi foe gebroiki en goedoe foe abi makti tapoe Petrus. San wi kan leri foe a tori disi?
[Prenki na tapoe bladzijde 9]
Joe pikin e gebroiki makti foe meki joe doe san a wani?