Jezus libi nanga diniwroko

Soema de den sma di de troetroe kolokoe?

IBRIWAN sma wani sote foe de kolokoe. Foe di Jezus e ferstan disi meki a e bigin en bergipréki nanga a ferteri foe den sma di de troetroe kolokoe. Soleki wi kan ferstan, dan a e hari wantewante a prakseri foe a bigi publiki foe en. Èn tokoe den fosi wortoe foe en moe gersi gi foeroe sma wan sani di de kontrari ensrefi.

Aladi Jezus e taki den wortoe disi gi en discipel, a e bigin foe taki: „Kolokoe oen de, oen pôtiwan, bika a kownoekondre foe Gado de foe oen. Kolokoe oen de di abi angri now, bika oen bere sa foeroe. Kolokoe oen de di e kré now, bika oen sa lafoe. Kolkoe oen de te den sma abi ogri-ati foe oenoe . . . prisiri tapoe a dé dati èn djompo, bika loekoe! a paiman foe oen de bigi ini hemel.”

Na so Lukas ben skrifi na bigin foe a taki foe Jezus. Ma leki fa a tori foe Mattéus taki dan Jezus e taki ooktoe dati den sfri-ati sma, den sar’atiwan, den soifriwan foe ati èn den sma di lobi vréde de kolokoe. Den disi de kolokoe, na so Jezus e ferteri, foe di den sa kisi grontapoe, foe di den sa sori sar’ati gi den, èn foe di den sa si Gado èn foe di den sa kari den Manpikin foe Gado.

Ma Jezus e bedoel nanga a kolokoe di wan sma o abi no wawan bréti, soleki te wan sma abi prisiri. Troetroe kolokoe e go moro dipi. Èn a e tjari a prakseri kon abra foe tevrédefasi, wan firi foe satisfaksi èn a kontroe foe ferwakti foe a libi.

Jezus e sori soboen dati libisma di sabi den jeje nowtoe, di abi sari foe na sondoe toestand ede foe den èn e leri sabi Gado èn e go dini en, de troetroe kolokoe. Dan den de, awinsi den e abi ogri-ati foe den ofoe e ferfolgoe den foe a doe foe a wani foe Gado, kolokoe foe di den sabi dati den e plisi Gado èn sa kisi na paiman foe tego libi.

Ma foeroe foe den arkiman foe Jezus, netso leki son sma na ini a ten disi, e bribi dati abi en boen èn njan prisiri e meki wan sma kolokoe. Ma Jezus sabi en moro betre. A e meki wan toe kontrari kon a fosi di sondro degedege moe froewondroe en arkiman, èn a e taki:

„Eloe foe oenoe, oen goedoeman, bika oen abi oen trowstoe kaba dorodoro. Eloe foe oenoe di bere foeroe now bika oen sa abi angri. Eloe foe oenoe di e lafoe now, bika oen sa sari èn kré. Eloe foe oenoe te ala sma e taki boen foe oenoe. bika den sortoe sani disi den fosten tata foe den ben doe na den falsi proféti.”

San Jezus e bedoel? Foe san-ede na abi foe goedoe, na feti na baka prisiri èn na teki foe barnen foe sma abi leki bakapisi eloe? Disi de so bika wan sma di e libi gi den sortoe foe sani disi, no e moki presi fri ini en libi gi a dini foe Gado , na wan enkri sani di e gi troetreo kolokoe. Ma a no de foe taki dati Jezus no ben bedoel ooktoe dati soso pôti, angri-bere èn sari e meki wan sma kolokoe. Ma nofotron den sortoe sma disi di no abi sowan boen ede sa teki den leri foe Jezus moro boen èn nanga dati kisi troetroe kolokoe leki wan blesi.

Te Jezus moro fara e taki nanga en discipel, a e taki: „Oenoe de a sowtoe foe a grontapoe.” A no de foe taki dati a no e bedoel dati den de letterlek sowtoe. Sowtoe de moro foeroe wan sani foe hori wan sani, dati a no pori. Sé na altari ini Jehovah tempel wan bigi ipi sowtoe ben didon èn den priester di e doe wroko ben e gebroiki en foe sowtoe den ofrandi.

Jezus discipel de „a sowtoe foe na grontapoe” foe di den de wan krakti tapoe den sma di moe sorgoe dati den no pori. Ija, a boskopoe di den e meki bekenti, sa abi leki bakapisi dati ala sma di e teki en tapoe wan boen fasi sa tan na libi! A sa meki den égifasi foe tan go doro, loyaliteit nanga getrowfasi gro èn kibri den foe go ini jeje èn moreel pori.

„Oenoe de a leti foe a grontapoe”, Jezus e taki gi en discipel. Den no e poti wan lampoe na ondro wan baskita ma tapoe wan kandratiki, èn foe dat’ede Jezus e taki: „Meki na sofasi oen leti skijn gi den sma.” Jezus discipel e doe disi nanga na publiki kotoigi wroko foe den èn ooktoe foe di den de eksempre di e skijn tapoe a kontren foe waka nanga libi di de ini akroederi nanga bijbel gronprakseri. Lukas 6:20-26; Matteus 5:3-16.

◆ Soema de troetroe kolokoe èn foe san-ede?

◆ Tapoe soema wan eloe e taki a tapoe den, èn foe san-ede?

◆ Fa den discipel foe Jezus de na „sowtoe foe a grontapoe” èn „na leti foe a grontapoe”?