Doe moro leki foe taki nomo: „Hori joesrefi waran èn njan boen”
„Efoe . . . wan sma foe oenoe e taki gi [brada ini mofina omstandigheid]: ’Go ini vréde, hori joesrefi waran, èn njan boen’, ma joe o e gi den san den abi fanowdoe foe den skin, dan sortoe wini dati abi? . . . Bribi, efoe a no abi wroko, de tapoe ensrefi wan dede sani.” — JAKOBUS 2:15-17.
1. Fa wan brada na ini Nigeria ben kon na ini nowtoe?
SMA ben reken uit dati Lebechi Okwaraocha ben gebore bifo 1880. A de so boen moro leki wan hondro jari owroe. A ben kisi èn ben anbegi na fetisj foe en papa nanga mama foe Nigeria. Di a ben psa aititenti jari, a ben bigin studeri na bijbel nanga Jehovah Kotoigi. A ben poti na ini en libi san a ben leri èn a ben kisi dopoe. Foe dat’ede a de sowan dritenti jari kaba wan kotoigi. No langa psa kaba den owroeman foe en gemeente ben fisiti en nanga en 72-jari Anglicaans oema baka wan hebi alen. Ala toe no ben sabi san foe doe — na vloer foe na kampoe foe den nanga walinbo dak ben de ondro watra èn den no ben abi famiri di ben kan gi den wan oso foe tan ofoe ben kan jepi den foe repareer na oso. San joe ben sa doe efoe joe ben e libi na ini na presi dati? Meki wi go loekoe fosi wantoe bijbel rai bifo wi kon sabi san ben psa.
2. Foe san-ede wi abi belangstelling na ini a doe foe „toemsi boen wroko”?
2 Kristus Jezus ’gi ensrefi abra foe ben kan krin wan pipel foe ensrefi di ben sa de spesroetoe en goedoe, nanga faja gi toemsi boen wroko’ (Titus 2:14). Den wroko disi abi krosbé foe doe nanga na kownoekondre prékiwroko di e meki sma kisi libi (Markus 13:10; Openbaring 7:9, 10). Den „toemsi boen wroko” di wan kristen e doe de moro leki na so fanowdoe prékiwroko, bika Jezus afoebrada Jakobus e tjari kon a krin: „Na fasi foe anbegi foe na sé foe wi Gado èn Tata di de krin èn sondro flaka de disi: foe sorgoe gi wési nanga weduwe ini den benawtoe èn foe kibri joesrefi sondro doti foe na grontapoe.” — Jakobus 1:27.
3, 4. Fa wi kan leri foe den kapitel 3-5 foe 1 Timóteus foe „toemsi boen wroko” èn sortoe aksi disi e meki kon a fesi?
3 Gemeente ini na fosi jarhondro ben de ini ala toe sortoe foe „toemsi boen wroko”. Na ini 1 Timóteus kapiter 3 na apostel Paulus ben skrifi, bakadi a ben tjari kon a krin den égifasi foe opziener nanga dinari na ini na diniwroko, dati „na gemeente foe na libi Gado na . . . wan postoe èn jepi foe na waarheid” (1 Timóteus 3:1-15). A ben meki oen si dati kristensma di ben tan na den sortoe waarheidgetrow leri disi ben sa kari ferloesoe densrefi èn den sma di ben e arki na den (1 Timóteus 4:16). Morofara Paulus ben taki foe na ’toemsi boen wroko’ di ben de na ini a sorgoe na skinfasi gi getrow weduwe di ben de „mofina”. — 1 Timóteus 5:3-5.
4 Boiti dati wi e doe evangelium-wroko, dan wi moe poti ooktoe notisi tapoe „toemsi boen wroko” soleki ’a sorgoe foe wési nanga weduwe ini a benawtoe foe den’. San owroeman nanga dinari na ini na diniwroko kan doe na ini disi leki den sma di „e teki fesi”? (Hebrewsma 13:17) Fa trawan a mindri wi kan jepi den na ini disi? Èn san wi kan doe persoonlek tapoe a kontren foe den sortoe „toemsi boen wroko” disi?
Owroeman di e teki fesi na tapoe wan toemsi boen fasi
5. Sortoe sani Paulus ben seti di wan spesroetoe fanowdoe ben opo ede kon, èn na san ini disiten wi kan teki gersi nanga en?
5 Di na ini Judéa wan spesroetoe fanowdoe ben opo ede, dan Paulus, di ben de wan owroeman, ben teki fesi ini a seti foe wan dienst foe gi jepi. Sowan wroko foe teki fesi ben sorgoe dati broeja no ben kon, èn sani ben kan prati tapoe wan onpartijdigfasi, akroederi a fanowdoe foe sma (1 Korinte 16:1-3; Tori foe den Apostel 6:1, 2). Ooktoe owroeman na ini a ten disi ben moe teki fesi ini a orga foe dienst foe gi jepi baka rampoe soleki watra, tokotoko lawine, froedoeskwala, tornado ofoe aardbéfi èn na sofasi ’foe persoonlek belang ede den hori ai tapoe trawan’. — Filipi 2:3, 4.
6. Fa den owroeman ben opo doe wan sani di wan rampoe ben feni presi na ini California?
6 Na Ontwaakt! foe 8 oktober 1986 e gi wan eksempre foe so wan sortoe praktis foe kristendom. Owroeman ben opo doe wan sani di wan broko foe wan dijk ben meki wan watra kon soengoe sani ini California (VS). Den jeje herder disi ben go loekoe esesi fa a ben de nanga a ipi foe den foe si soema no ben de foe feni kande ofoe datra sorgoe ben moe gi ofoe njanjan ofoe oso ben de fanowdoe. Den owroeman ben tai den moeiti foe den kon makandra nanga na Edekantoro foe Jehovah Kotoigi. Wan komte foe gi jepi ben orga èn omoro kompe Kotoigi ben kon foe jepi, den ben orga den ini groepoe foe doe krin wroko èn foe repareer oso di ben kisi mankeri. Den owroeman ben loekoe ooktoe na tapoe a bai èn prati foe sani di ben de fanowdoe. Disi ben meki wi si dati te den sortoe spesroetoe nowtoe disi opo ede kon, ’ibri discipel kan bepaal san en kan gi’ ofoe kan doe akroederi san en kan tjari, ma a ben sa de wan ferstan sani foe go taki nanga den opziener foe a gemeente foe kisi foe jere foe den san foe doe. — Teki gersi nanga Tori foe den Apostel 11:27-30.
7. Tapoe sortoe moro algemeen fanowdoe wi moe opo doe wan sani ooktoe?
7 Aladi joe (efoe joe de now wan owroeman ofoe no) wawantron kande sa kan gi jepi ini wan serjoesoe nowtoe situwasi baka wan rampoe, tokoe moro algemeen fanowdoe de di kande net so prenspari, dati wani taki di de ini joe égi gemeente. Foe di den fanowdoe disi kande no de so sensationeel leki wan bigi rampoe, meki makriki wi kan loekoe psa den ofoe gi pikinso notisi na den, ma ini Jakobus kapitel 2:15-17 te joe loekoe en boen ai go joisti foe den fanowdoe foe na gemeente pe joe de. Ija, efoe joe ’bribi abi wroko ofoe tapoe ensrefi de wan dede sani’, moesoe kon spesroetoe na krin ini joe gemeente.
8. Fa opziener kan sori dati den abi koni te den e poti notisi tapoe den fanowdoe foe na gemeente?
8 Owroeman di e teki fesi, moesoe doe moeiti „foe de koni èn nanga ferstan” (Jakobus 3:13). Nanga koni den kari kibri na ipi tége bedrigiman di e go foe a wan na a tra brada (ofoe a wan gemeente na a trawan) ofoe di e meki tori foe „kisi jepi”. A de koni foe na sé foe owroeman foe no sori boenfasi ini a tori foe lesi, bika na bijbel regel de: „Efoe wan sma no wani wroko, no meki a njan toe” (2 Thessalonika 3:10-15). Ma den no wani ooktoe ’foe sroto na doro foe a firi foe den foe safoe sari-ati’ èn ooktoe den no wani foe gi den brada tranga na ini disi (1 Johannes 3:17). Ete wan réde foe san-ede den moe sori koni, de dati na bijbel no e gi oenoe regel sondro kaba ini a tori foe na sorgoe foe den pôtiwan nanga den wan di abi en moeilek. Situwasi de ini ibri pisten trafasi baka èn e kenki foe a wan presi go na a tra presi.
9. (a) Fa den ben sorgoe ini na fosi jarhondro gi kristen weduwe di ben ferdini foe kisi jepi? (b) Sortoe vorm foe jepi den sortoe weduwe disi kan njan boen foe den?
9 Na ini 1 Timóteus 5:3-10 Paulus e taki foe eksempre foe weduwe di ’ben libi a baka èn di de mofina’ èn e ferdini foe kisi jepi. Den bribi famiriman foe den ben e tjari na ini na fosi presi na frantwortoe foe jepi den; efoe famiriman ben libi na plekti dati, dan dati ben kan doe ogri na a boen nen foe den na Gado. Ma efoe wan mofina weduwe di ben ferdini foe kisi jepi no ben kan kisi jepi na tapoe na fasi disi, dan den owroeman disi ben kan seti sani foe wan skinjepi foe a sé foe a gemeente. Ooktoe na ini a ten disi wantoe gemeente gi jepi na spesroetoe mofinasma ini den mindri. Ma ini a moro bigi pisi foe den kondre sani seti nanga jepi foe belasting moni gi owroesma nanga sikisma ofoe gi den sma di wel wani wroko ma no kan feni wroko. Ma kristen owroeman kande sa kan gi tapoe wan ofoe tra fasi jepi. Sonwan di de troetroe ini mofina omstandigheid èn di na ala fasi e kon ini aanmerking foe kisi sociale jepi, no e kisi dati foe di den no sabi fa den moe aksi en ofoe e sjensjen foe aksi foe en. Foe dat’ede meki owroeman kan soekoe foe sabi na den lantikantoro ofoe meki kontakti nanga kotoigi di abi ondrofeni tapoe na kontren disi. Den kan seti sani moro fara dati wan bekwaam brada ofoe sisa jepi na mofinasma foe njan boen foe den jepi di de foe kisi. — Romeini 13:1-4.
Orga praktis jepi
10. Foe san-ede owroeman moe poti notisi tapoe na wé foe na ipi?
10 Owroeman di de na ai nofotron de man di e sorgoe dati sma di de ini sari èn mofina omstandigheid, kisi jepi foe lobi brada nanga sisa. Den owroeman moesoe poti prakseri na a wé foe na ipi tapoe den jeje èn skinfanowdoe foe ala sma. A de wan sani foe ferstan dati owroeman omoro foeroe sa gi densrefi „na begi èn na diniwroko foe a wortoe” (Tori foe den Apostel 6:4). Foe dat’ede den sa proeberi foe seti en so dati memre foe na ipi di tai na bedi ofoe teki poti na ini wan atoso kisi njanjan na jejefasi. A kan de dati den owroeman e teki den komakandra na tapoe tape-lolo foe na boen foe den sma di no kan de drape. Owroeman nanga dinari na ini na diniwroko di ibriwan foe den sé e tjari den tape-lolo go na den sikiwan, si dati den fisiti foe den e gi den na okasi foe gi tra jeje presenti (Romeini 1:11, 12). Na asrefi ten den kan loekoe na san tapoe na momenti dati fanowdoe de foe en.
11. Tjari kon na krin fa jepi kan seti gi wan sisa di abi en moeilek?
11 Kande den e si dati wan malengri sma ofoe grani sisa wawantron ben sa kan kon na Kownoekondrezaal ofoe foe wan sjatoe pisten ben sa kan teki prati na a prékiwroko efoe wan sisa ben sa jepi foe wasi en èn foe weri en krosi. (Teki gersi nanga Psalm 23:1, 2, 5.) Den owroeman ben sa kan gi srefi wan brada na ini a mindri foe den na wroko foe seti sani foe dati. Den ben sa kan aksi na gemeente ooktoe ofoe friwani-wrokoman de di ben sa wani waka ofoe ben sa wani meki sowan sma di de ini moeilekheid rij makandra nanga den ini den oto. Efoe wan schema ben sa meki foe dati, dan ala sani ben sa go moro nanga orde srefi.
12. Fa trawan kan wroko makandra nanga opziener ini na jepi foe sikiwan nanga graniwan?
12 Owroeman e si kande tra situwasi ini san jepi kan gi ofoe nanga san lobi seti kan poti. Wan grani ofoe siki sisa foe eksempre no kan sorgoe moro so gi en oso leki fosten. Wantoe dinari ini na diniwroko nanga trawan kan gi en wan anoe? Te den e koti a grasi gi en ofoe e koti den bon kon sjatoe, dan kande a e firi ensrefi moro betre foe di a sabi dati a oso no de now wan sjen gi na birti. Grasi de foe wai ofoe bespoiti? Wan sisa di e go doe boskopoe ben sa de klari foe meki kontakt nanga en even foe tjari dan den fanowdoe boskopoe gi en? Hori na ini prakseri dati den apostel ben abi belangstelling gi den sortoe praktis pisi disi èn ben sorgoe dati jepi ben gi foe na sé foe bekwaam sma ini na gemeente. — Tori foe den Apostel 6:1-6.
13. San ben de na bakapisi foe na jepi di den owroeman ben gi na a brada foe Nigeria di wi kari djonsro na fesi?
13 Den owroeman di wi ben kari kaba èn di na a ten foe wan herder fisiti ben feni Lebechi Okwaaocha nanga en oema ini wan sari situwasi, ben sori sowan kristen sorgoe. Na skin foe owroeman ben opo doe wan sani esesi nanga na afersi èn ben meki na gemeente kon sabi san den ben abi na ini den prakseri foe bow na oso baka. Difrenti brada nanga sisa ben gi materiaal èn ben abi wan prati na a projekt disi nanga den heri ati. Ini wan wiki ten den ben bow wan stéfi oso nanga wan metaaldak. Na tori foe Nigeria e taki foe dati:
„Den sma foe na dorpoe ben ferwondroe èn foe densrefi den ben tjari njanjan nanga dringi gi den brada nanga sisa di foeroe joeroe makandra ben wroko foe klari a wroko bifo na tra bigi alen ben sa kon. Foeroe sma foe a dorp ben kragi foe tra kerkigroepoe, soleki den ben taki, ben foefoeroe den sma na presi foe jepi den pôtiwan. A sani disi di ben psa ben de a takmakandra foe a dé foe na gemeenschap. Den sma foe a dorp kon e teki a waarheid moro boen èn foeroe osobijbelstudie ben opo.”
A prati foe joe na den „toemsi boen wroko” disi
14. Fa wi moe si a doe foe „toemsi boen wroko” gi wi brada?
14 A no de foe taki dati wi kan doe nofotron tapoe wan pepsoonlek basis èn wantewante wan sani gi den nowtoe foe granisma, den sikiwan, den sma di den teki na ini wan atoso ofoe den wan ini wi birti di abi en moeilek na tra fasi. Efoe wi e si wan tra fasi foe sori dati wi de troe kristen, dan foe san-ede wi no sa doe dati dan èn proeberi foe jepi? (Tori foe den apostel 9:36-39) Wi no e kon so fara foe doe disi foe di trawan e poti druk a tapoe wi. Den boewégi foe wi ati na kristen lobi. Foe a gi foe sortoe praktis jepi ooktoe a de ini a fosi presi na troetroe belangstelling èn sar’ati foe wi sé. A no de foe taki dati nowan sma foe oenoe kan drai a libimarki foe den graniwan, dresi den siki foe di wi e doe wondroe ofoe foe sorgoe dati ibriwan sma na ini na gemeente abi en boen asrefi fasi. Ma séker wi moe sori wan jeje foe wani sorgoe èn gi sani na tra sma. Te wi abi na jeje dati èn e doe akroederi nanga dati, dan dati sa jepi foe tranga na banti foe lobi a mindri wi nanga den sma di wi e jepi. Sowan tranga banti ben doe kon a mindri Paulus nanga Onésimus, wan njoen kristen ’di ben dini Paulus na ini en strafoso-boei’. — Filémon 10-13; Kolosse 3:12-14; 4:10, 11.
15. Fa wi kan gi jepi na wantoe di de troetroe mofina èn di e ferdini jepi?
15 Sontron wi kan doe wan sani tapoe wan skin fanowdoe nanga wan switifasi presenti, ofoe wi seni dati now sondro foe kari wi nen of poti wan sani safri ini a anoe foe wan sma. Wan brada ben lasi en wroko èn a no ben kan feni wan trawan? Wan sisa tanapoe a fesi onferwakti datrakostoe, a kisi wan ongolokoe ofoe den foefoeroe en? Den sortoe situwasi disi kan kon ini wi birti. Te wi e gi „presenti foe sari-ati”, dan wi Tata di e si ini kibripresi, sa disi nanga prisiri (Mattéus 6:1-4). Ofoe na presi foe gi moni, kande kan gi netleki Job krosi na den pôtiwan ofoe njanjan-sani ofoe njanjan di wi bori na oso gi den weduwe ofoe pikin sondro papa. — Job 6:14; 29:12-16; 31:16-22.
16. Tapoe sortoe tra fasi sontron jepi kan gi? Tjari dati kon a krin.
16 Na ondrofeni ofoe den kontakti foe joe kan go de wan fonten foe praktis jepi. Wan brada ben aksi brada W----- foe leni en wan moni. Na switi piki foe en ben de: ’Foe san-ede joe e denki dati mi ben sa abi ekstra moni dati mi kan leni joe?’ A piki ben de: ’Foe di joe e hori ai moro boen tapoe joe moni.’ Brada W-----, di ben sori dati a ben man si boen foe ogri, èn di ben leni nofotron moni na sma di ben de na ondro moeilek omstandigheid, ben gi a rai di e kon now: ’San joe abi troetroe kande fanowdoe de pikinso jepi foe leri foe wroko moro boen nanga joe moni, èn nanga ala prisiri mi sa jepi joe nanga dati efoe joe wani teki a jepi foe mi’. Brada di e fiti den standaard foe libi na njoen omstandigheid ofoe di de klari foe wroko tranga, srefi efoe a de wroko di sma no e si leki hé, e warderi sowan sortoe jepi srefsrefi. Efoe a leni foe moni de troetroe fanowdoe, dan a no de foe taki dati a ben sa de boen foe meki wan kontrakti de tapoe papira di teken nanga anoe sodati bakaten problema no sa kon. Tokoe foeroe brada di no e leni nanga prisiri moni foe trawan, sa warderi en srefsrefi foe kisi persoonlek jepi foe di trawan e gi den rai ofoe e meki den njan boen foe na ondrofeni foe den (Romeini 13:8). Disi e kon moi ini na eksempre foe wan ondrofenitori foe West-Afrika pe Emmanuel ben de na ini a tori:
Ala di Emmanuel ben de wan bekwaam barbier a ben abi pikinso klanti, èn a ben las’ati foe a man di a no ben man foe sorgoe gi ensrefi. Ne wan owroeman ini a gemeente di ben de na ai ben aksi Emmanuel efoe a ben sa wani foe go prakseri foe doe tra wroko. Na piki foe en ben de ija, bika a no ben abi na prakseri foe meki wroko-hémemre de wan skotoe gi en. Na owroeman ben taki nanga den kompe wrokoman foe en èn a ben man feni wan wroko gi Emmanuel leki verpleger ini wan atoso. Ai doe en heri boen ini na wroko disi èn a ben kan jepi trawan ini na gemeente.
17. Fa joe ben sa kan jepi wan brada di de ini atoso? (Psalm 41:1-3)
17 Te wan kompe kristen de ini wan atoso, a presi pe den e sorgoe sikisma, agen a tori e kon tapoe opregti belangstelling nanga broko-ede gi sma. Joe kan sori disi ini a deklari di joe de klari foe lési kristen lektuur di e bow a bribi na sikiman ofoe ferteri en ondrofenitori di e gi en dekati. Ma fanowdoe na skinfasi de ooktoe di joe kan jepi? Ini son presi a de so, dati den datra-oso de so foeroe nanga sma dati wan sikiman no e wasi ofoe e kisi njan efoe wan sma di e kon fisiti en no doe dati. Efoe den datra gi pasi foe dati, dan joe kan tjari kande foe dat’ede boen njanjan gi en ofoe jepi en wasi ensrefi ofoe wasi en. A no sa feni en wan switi sani foe kisi wan kabai ofoe slipper? (2 Timóteus 4:13) Ofoe joe ben kan pristeri joesrefi foe doe wan ofoe tra afersi di a sikiman e broko en ede nanga en? Kande ai broko en ede foe fa a moe kisi en moni foe bank èn fa en stroomrekening sa pai optijd. A kan de wan heri jepi foe doe soso wantoe eenvoudig sani, soleki foe sorgoe dati den brifi foe en no e kon ipi na oso, dati den plantjes foe en kisi watra ofoe dati na gaskraan foe en tapoe.
18. San de a faste bosroiti di joe teki foe doe gi brada nanga sisa di de ini moeilek omstandigheid?
18 Sondro degedege a de so, dati ibriwan foe wi kan feni pasi tapoe fa wi kan doe sani moro boen foe di wi e doe moro leki soso foe taki: „Hori joesrefi waran èn njan boen” (Jakobus 2:16). Prakseri den brada nanga sisa foe joe na ini na gemeente. Son getrowwan de troetroe ini mofina omstandigheid na skinfasi, den e siki, de malengri ofoe tai na bedi? San joe kan doe na praktis fasi foe jepi den lobi memre disi foe na gemeente foe soema Kristus ben dede gi den? Te joe abi na fasi disi, dan disi sa jepi joe foe de sreka moro boen foe opo doe esesi wan sani te moeilekheid kon.
19. (a) Foe san-ede balansifasi na tapoe a kontren disi de so prenspari? (b) Nanga sortoe sani wi kan doe trawan moro bigi boen, èn foe san-ede disi de so? (Psalm 72:4, 16)
19 Te wi poti wisrefi a tapoe foe jepi wi brada nanga sisa, dan wi sa bewijsi dati wi bribi no dede. Asrefi bribi dati e poesoe wi foe wroko tranga ini na kristen prékiwroko. Wi moe hori a jepi foe trawan a skinfasi èn a teki prati geregeld na a kristelek evangeliumwroko ini balans nanga makandra. (Teki gersi nanga Mattéus 15:3-9; 23:23.) A rai foe Jezus gi Martha nanga Maria e sori a balansifasi disi. A ben taki dati efoe wan sma ben sa wegi sani di a abi fanowdoe na skinfasi tége jeje njanjan dati a laatste wan de „na boen pisi”, di den no sa teki poeroe (Lukas 10:39-42). Den sikiwan nanga den pôtiwan sa de alaten na ini na seti foe sani disi. Wi kan èn wi moe doe boen sani gi den (Markus 14:7). Ma na toemsi boen sani di wi kan doe èn di sa tjari bakapisi kon di sa tan langa, de foe leri tra sma foe a kownoekondre foe Gado. Na tapoe dati Jezus ben poti ensrefi (Lukas 4:16-19). Nanga jepi foe na Kownoekondre foe Gado, dan den pôtiwan, den sikiwan èn den wan di e kisi kwinsi sa tan kisi ferlekti. Fa a de wan prisiri foe jepi wi brada nanga sisa èn tra sma foe poti den howpoe na tapoe Gado, èn foe graboe stéfi na troetroe libil. — 1 Timóteus 6:17-19.
Joe e memre disi ete?
◻ San de den moro prenspari „toemsi boen wroko” di na kristen gemeente ben moe doe?
◻ Fa den owroeman foe na gemeente kan poti balans notisi tapoe „toemsi boen wroko” ini na skinfasi foe den brada?
◻ Sortoe praktis sani den owroeman kan doe?
◻ Sortoe praktis sani joe ben kan doe foe jepi joe brada di de ini mofina omstandigheid?