Jezus libi nanga diniwroko

Jezus e poeroe na sari foe wan weduwe

SJATOE baka di Jezus ben dresi na knegti foe na legre edeman, dan a e hari go na Naïn, wan foto moro leki 30 kilometer zuid-west foe Kapernaüm. En discipel èn wan bigi ipi e go makandra nanga en. A kan de dati na a ten foe neti den e doro na a lanki foe Naïn, pe wan beri e waka miti den. Na dedeskin foe wan jongoe man den e tjari komoto foe a foto foe go beri.

Na toestand de gi na mama wan aparti sari sani, bika a de wan weduwe èn disi de na wan enkri pikin foe en. Di a man foe en ben dede, a ben kan feni trowstoe ini disi, dati a manpikin foe en ben de ete. Ala en ferwakti, en lostoe, en plan ben poti na tapoe a tamara foe a boi. Ma now no wan sma de na soema a kan feni trowstoe. Boen bigi na sari foe en de, aladi den sma foe na foto e go nanga en na a berpe.

Te Jezus e kisi na oema foe si, en ati e kon ini boewégi foe na kefarlek sari foe en. Foe dat’ede ai taki nanga wan safoe sten, èn tokoe nanga krakti di e gi fertrow: „Tapoe foe kré.” Na fasi fa ai doe e hari na prakseri foe na ipi foe sma. Te ai kon ooktoe krosbé èn ai fasi na bar tapoe san den e tjari na skin, dan den drageman e tan tanapoe. Ala sma moesoe ben e aksi ensrefi san a ben e go doe.

A de troe, dati den sma di e waka nanga Jezus ben si fa a ben dresi foeroe sma tapoe wan wondroefasi foe siki. Ma a de krin dati den noiti ben si fa a ben wiki wan sma foe dede. A kan doe sowan sani? Jezus e taki nanga a dedesma èn e komanderi: „Jongoe man mi e taigi joe: Opo tanapoe!” Èn a man e go sidon! Ai bigin taki èn Jezus e gi en na en mama.

Efoe den sma e si taki a jongoe man troetroe e libi, den e bigin taki: „Wan bigi proféti opo a wi mindri.” Trawan e taki: „Gado ben poti en prakseri tapoe en pipel”. Leki wan faja a njoensoe e panja ensrefi foe na ferwondroe wroko disi ini heri Judéa èn alape na ini a birti.

Johannes na Dopoeman de te now ete ini doengroe’oso. Ma en discipel e go ferteri en foe ala den sani disi di den e si Jezus e doe. Fa Johannes e doe? Èn fa someni tra sma e doe ini den kontren pe Jezus e doe en wondroe? Na piki e kon ini na tra uitgave. Lukas 7:11-18.

◆ San e psa efoe Jezus e kon ini a birti foe Naïn?

◆ Fa ai seki Jezus ati foe san ai si, èn san ai doe?

◆ Fa den sma e doe tapoe na wondroe di Jezus e doe?