Tan hori a frede fu yu gi Yehovah
„’Mi na wan gran Kownu’, Yehovah fu den legre ben taki, ’èn mi nen sa de wan sani di e gi sma frede a mindri den natie.’” — MALEACHI 1:14.
1, 2. (a) Sortu krakti boskopu na buku Maleachi abi? (b) Sortu leri de ini den bigin wortu fu Yehovah boskopu?
„WAN formeel taki: Na Wortu fu Yehovah di e go fu Israël nanga mofo fu Maleachi” (Maleachi 1:1). Nanga na syatu ferklari disi di e gi ferwondru na bijbel buku Maleachi e bigin. Ini a bijbel wan formeel taki de wan krutu na fesi ala sma fu goddelowsufasi. Disi seiker de so gi na buku Maleachi, nanga en krakti boskopu di e go langalanga na a natie Israël. Ini na buku di wi o luku en, krakti sa poti na tapu a fanowdu fu hori a frede fu wi gi, Yehovah èn wi lobi gi en.
2 Na ini den tu fosi vers fu na buku wan les de ini a gi fu rai. Yehovah e dyaranti den arkiman fu en lostu fu yepi den: „’Mi ben lobi unu’. Fa disi de wan bigin wortu di e gi korostu èn e waran na ati gi reti ati sma na ini Israël di ben e frigiti den plekti. Na boskopu e go moro fara: „Èn unu ben taki: ’Tapu sortu fasi yu ben lobi wi?’ ’Esau no ben de a brada fu Yakob?’ Den wortu fu Yehovah e taki. ’Mi ben lobi Yakob, ma Esau mi no ben wani si na ai; èn te fu kaba mi ben meki den bergi fu en tron wan broko leigi presi èn en famiri gudu gi den krabudagu fu na sabana.’” — Maleachi 1:2, 3.
3. San ben de den reide fu den firi fu Yehovah di a ben abi gi Yakob nanga Esau?
3 Fu san-ede Yehovah ben lobi Yakob èn bakaten den bakapikin fu Yakob? Fu di Yakob ben de wan man di ben frede Gado èn ben abi respeki gi en papa nanga mama di ben e frede Gado tu. Esau na a tra sei ben de wan sma di ben e prakseri ensrefi nomo èn di ben mankeri a frede fu Gado. Ooktu a ben mankeri respeki gi en papa nanga mama, di ben kisi fu Gado na natuurlek reti fu fruwakti dati a ben gi yesi na den. Nanga reti Yehovah ben lobi Yakob ma no ben wani si Esau na ai. Disi na wan warskow gi wi. Wi mu luku bun dati noiti wi lasi na frede gi Yehovah èn tron wan sma di lobi gudu soleki Esau, di ben e suku nomo soso satisfaksi gi den skinlostu fu en. — Genesis 26:34, 35; 27:41; Hebrewsma 12:16.
4, 5. (a) Sortu krakti na libi èn waka fu Yakob nanga Esau ben abi tapu den bakapikin fu den? (b) Sortu krakti disi ben mu abi tapu den Israëlsma?
4 Yoisti soleki Yakob fasi fu libi ben sori taki a ben de wan blesi gi en bakapikin, na so na libifasi fu Esau ben sori taki a de precies a tra sei gi en bakapikin, den Edomsma. Den Edomsma no ben abi a blesi fu Yehovah. Na presi fu dati, den ben tyari na atibron fu Yehovah kon a tapu den fu di den ben gens en ferbontu pipel a tapu wan ogri-ati fasi. Den legre fu Nebukadnezar èn bakaten den Arabiersma ben wini den. Soleki Yehovah ben taki na fesi, dan den Edomsma ben lasi gwe leki natie te fu kaba. — Obadya 18.
5 Den krutu fu Gado na den Edomsma bon bigin kaba bifo a ten fu Maleachi. Sortu krakti disi ben mu abi tapu den Israëlsma? Yehovah ben meki den sabi: „Un eigi ai sa si en, èn srefi unu sa taki: ’Meki Yehovah nen kon bigi tapu na kontren fu Israël’” (Maleachi 1:5). Ini den hondrohondro yari di ben psa dan den Israëlsma ben si nanga den „eigi ai” sortu bigi lobi Yehovah ben abi gi den leki natie.
Fu den du fu wi sa kon na krin ofu wi e frede Gado
6. Sortu kragi Yehovah ben abi teige den Israëlsma?
6 Na formeel taki e go moro fara: „’Wan manpikin, fu en sei, e gi grani na wan papa; èn wan knegti na en tumsi bun meistri. Efu now mi de wan papa, pe na grani de gi mi? Èn efu mi de wan tumsi bun meistri, pe a frede de gi mi?’ Yehovah fu den legre ben taki gi unu, unu priester di e feragti mi nen” (Maleachi 1:6; Exodus 4:22, 23; Deuteronomium 32:6). Yehovah ben poti den Israëlsma a pasi, ben sorgu gi den fanowdu fu den èn ben kibri den, net soleki wan tata ben sa du gi en manpikin. San a ben fruwakti nanga reti fu kisi fu dati baka? Grani èn frede. Na natie, pe yu ben abi na ini ooktu den priester, no ben du dati èn na presi fu dati ben sori dati den no ben e respeki Yehovah nen èn ben e feragti dati. Den ben tron „manpikin di fadon komoto na bribi”. — Yeremia 3:14, 22; Deuteronomium 32:18-20; Yesaya 1:2, 3.
7. Fa den Israëlsma ben prakseri fu na kragi disi èn san Yehovah ben piki den?
7 Den Iaraëlsma ben aksi: „Tapu sortu fasi wi ben feragti yu nen?” Na krakti piki fu Yehovah ben de: ’Fudi unu ben pristeri doti brede tapu mi altari.’ Èn unu ben taki: ’Tapu sortu fasi wi ben doti yu?’ Fudi yu e taki: ’Na tafra fu Yehovah de wan feragti sani.’ ’Èn te yu e pristeri wan breni meti leki srakti-ofrandi a no de noti.’ ’Èn te yu e pristeri wan malengri ofu siki meti a no de noti ogri.’ ’Tyari en go grantangi na a Granman fu yu. A sa abi prisiri ini yu, ofu a sa ontvang yu nanga switifasi?’ Yehovah fu den legre ben taki.” — Maleachi 1:6-8.
8. San den Israëlsma ben sori nanga den du fu den?
8 Na ini prakseri wi kan si fa wan Israëlsma e si a ipi fu en èn nanga triki e suku wan breni ofu malengri meti fu pristeri na Yehovah. Tapu a fasi disi a ben sa meki a gersi leki a ben tyari wan ofrandi, ma toku tapu wan gridifasi ben hori a moro bun sani fu na ipi meti fu en fu ensrefi. Sowan sani a no ben sa prefuru fu du nanga a granman! Ma den Israëlsma ben du en wel nanga Yehovah — netleki a no ben kan si na konkru nanga bidrigi fu den. Nanga reti Yehovah ben poti na aksi gi den: „Pe a frede gi mi de?” Nanga den mofo den ben taki kande dati den e frede Yehovah, ma den du fu den ben sori krin wan heri tra sani. — Deuteronomium 15:21.
9. Fa den priester ben du tapu san a pipel ben du?
9 San ben de a sani di den priester ben du tapu den feragti srakti-ofrandi disi? Den ben taki: „A no noti ogri.” Den ben taki bun fu den goddelowsu fasi fu den Israëlsma. Aladi den katiboman di drai kon baka fu Babylon ben bigin sobun fayafaya meki a tru anbegi kon bun baka, dan tog bakaten den ben sori wan mi no ke èn heimemre fasi èn regfardiki ini den eigi ai. Den ben lasi a frede fu den gi Yehovah. A tempeldienst fu den fu dat’ede ben de wan spotu sani, èn den ben hori den feisti fu den soso leki wan formaliteit. — Maleachi 2:1-3; 3:8-10.
10. (a) Sortu srakti-ofrandi Yehovah e aksi ini a ten disi? (b) Fa wawan Yehovah kan feni den offer fu wi bun?
10 Kande son sma e taki: ’Disi no abi fu du nanga wi; wi no e tyari meti ofrandi moro.’ Ma wi e tyari wan tra sortu ofrnadi. Luku na faya begi fu Paulus: „Mi [e begi] unu tranga, un brada, tapu na gron fu na sari-atifasi fu Gado, fu pristeri un skin leki wan srakti-ofrandi di de na libi, santa èn e plisi Gado, wan santa dienst nanga unu denki” (Romeini 12:1). Na srakti-ofrandi di Gado e aksi na ini a ten disi, na yusrefi! Dati wani taki, yu krakti, yu talenti èn den koni fu yu. A sa feni na ofrandi fu wi bun efu wi e gi a moro bun sani di wi abi. Fu pristeri Yehovah den sani di tan abra, di wi kan teki gersi nanga malengri èn siki srakti-ofrandi, sa abi seiker krakti na tapu a matifasi fu wi nanga en.
11. Sortu kritisch ondrosuku ibri dienstknegti fu Yehovah di gi densrefi abra mu du?
11 Awasi son sma e taki: „A no noti ogri”, toku wi sabi fa Yehovah e denki fu a tori. Meki wi luku fu dat’ede heri bun na „srakti-ofrandi” di wi e tyari ini a vorm fu santa dienst, san abi na ini a prati fu wi na a preikiwroko èn na sani di wi e du tapu a kontren fu persoonlek studi èn a go na komakandra. Yu abi na overtoigi dati yu e pristeri Yehovah a moro bun sani san yu abi ofu a de soso san tan abra? Na kefar no de wan sani di no kan, dati wan sma go so ini prisiri nanga ontspanning na a kaba fu a wiki, dati a no abi ten ofu krakti fu preiki na bun nyunsu fu na Kownukondre ofu fisiti den komakandra. Wi heri waka nanga libi, wi aladei libi, na ini san yu abi na yeyefasi èn den buweigi fu wi ati, mu abi fu du nanga na offer di wi e tyari gi Yehovah. Meki a de a moro bun sani!
Kon sabi suma trutru e frede Gado
12. Sortu rai e gi now?
12 „Now dan” na profeititori e taki, „Safu grantangi na fesi fu Gado, sodati a sori wi bunati” (Maleachi 1:9). Nanga tranga Yehovah e gi den Israëlsma dek’ati fu du san bun, fu sori na yoisti frede gi Gado èn fu pristeri en san a abi reti na tapu. Wi mu du ini a ten disi asrefi. Soso te wi e libi na ini akruderi nanga den vereiste fu Yehovah, wi kan kisi èn wi kan hori en bunati.
13. (a) Na ini sortu trapu wi ben sa kan kon now efu wi no ben sa abi frede gi Gado? (b) Fa na krakti fu big’ai fu na sei fu den priester fu Israël ben kon na fesi?
13 Sondro na yoisti frede gi Gado dan wi dienst ben sa kan de gi un soso wan formalisme èn ben sa kan du nanga gridi wini na ini prakseri. Luku pikinso fa Yehovah e aksi den priester fu Israël ini a tori fu a tempeldienst fu den: „’Suma de ooktu a mindri unu di sa tapu den doro? Èn unu no sa leti mi altari fu soso. Nowan prisiri mi abi ini unu’, Yehovah fu den legre ben taki’, èn ini den offer presenti fu un anu mi no abi nowan prisiri’” (Maleachi 1:10). O, den priester ben de drape fu du tempeldienst, fu tapu den doro fu na santa presi èn fu leti den altari ma den no ben du dati fu soso. Den ben suku presenti èn tyuku fu den Israëlsma di ben e kon na a tempel fu tyari srakti-ofrandi. Yehovah no ben abi prisiri ini a ten dati èn a no abi now prisiri, ini dienst di e du soso nanga gridi wini ini prakseri. Dati na wan tegu sani ini en ai.
14. Fu san-ede wan fanowdu de alaten nomo fu luku bun nanga big’ai fasi?
14 Na fanowdu fu luku bun nanga gridifasi èn big’ai ini a ten disi no de moro mendri. Alatron baka den buku e warskow wi fu big’ai èn e ferklari dati Gado bun-ati no de tapu big’ai sma (1 Korinte 6:10; Efese 5:5). Meki a de so dati a lobi èn frede fu wi gi Yehovah ini a du fu wi diniwroko sa meki wi kon fri fu dini oiti fu gridi wini ede. Wi mu de gaw fu hari puru ibri pisi fu den sortu firi disi, efu den e opo kon ini wi ati. Owruman nanga dinari ini a diniwroko spesrutu e kisi na warskow ’fu no abi gridi tapu oneerlek wini’ (Titus 1:7; 1 Timotéus 3:8; 1 Petrus 5:2). A ben sa kan dati son sma fu espresi e wroko wawan fu wan bun matifisi nanga brada di ini skinfisi kan yepi, nanga a bakapisi dati favoritisme du kon èn wan sma no nanga prisiri sa gi den sortu sma disi rai. Noiti wi wani tron leki den big’ai priester fu Israël di ben de nomo fu kisi presenti nanga tyuku fu den kompe Israëlsma fu den.
15. (a) Fa Maleachi ben sori taki alape na grontapu sma ben sa de di e frede Yehovah? (b) Sortu tekst e hori baka gi disi?
15 Efu ben sa poti now na aksi: „Pe na frede de gi mi?” Dan sma sa de na ini grontapu di ben sa kan piki: ’Dya wi de. Wi de den sma di e frede yu’? Seiker! Suma na den dan? Yehovah getrow kotoigi, di de alape na grontapu fu feni. Na internationaal grupu fu sma disi èn na wroko di den ben sa du, ben tyari kon a fesi ini Maleachi 1:11: „’Bika fu pe na son e opo, iya te go pe a son e dongo mi nen sa meki bigi a mindri den natie, . . . mi nen sa kisi wan presenti, iya, wan krin presenti; bika mi nen sa de bigi a mindri den natie’, Yehovah fu den legre ben taki.” — Luku ooktu Psalm 67:7; Yesaya 33:5, 6; 41:5; 59:19; Yeremia 32:39, 40.
16. Sortu difrenti betekenis den wortu „fu na opo fu na son te go na a dongo fu na son” kan abi, èn fa disi e kruderi now nanga den tru tori?
16 O moi Maleachi e taki dya fu na bigi wroko di ben sa du na ini wi ten fu di na bun nyunsu ben sa meki bekenti tapu na heri grontapu (Mattéus 24:14; Openbaring 14:6, 7). Fu pe son e opo te go pe son e dongo wani taki, te yu luku en geografisch fu oost go te na west. Pe wi e luku ooktu ini a grontapu, wi e feni sma di e frede Yehovah èn e du en wani. Fu pe son e opo go te pe son e dongo ,wani taki ooktu na heri dei langa. Iya, sondro fu stop dienstknegti fu Gado di e frede èn e tyari offer fu prijse en. Soleki Yehovah ben pramisi dan den sma di e frede en trutru e meki en nen bekenti na a heri grontapu. — Exodus 9:16; 1 Kronieken 16:23, 24; Psalm 113:3.
Tan hori na yoisti frede gi Gado
17. San kan de a bakapisi efu wi lasi wi respeki gi Yehovah èn a frede gi en?
17 Gi den sma di e misi fu sori respeki gi Yehovah èn fu frede en, na anbegi nanga dienst e tron wan hebi. Yehovah ben taigi den Israëlsma: „Unu doti mi fu di un e taki: ’Na tafra fu Yehovah de wan sani di doti, èn a froktu fu en èn a nyanyan fu en de wan feragti sani.’ Èn unu ben taki: ’Luku! Fa a de wan weri skin!’” (Maleachi 1:12, 13). Asrefi kan psa na ini a ten disi. Gi den sma di e lasi na frede gi Yehovah, komakandra nanga velddienst nanga tra kristen activiteit ben sa kan tron wan hebi.
18. San ben psa ten na ten nanga sonwan fu den disi ten dienstknegti fu Gado?
18 Luku pikinso fa Na Wachttoren fu 1937 (na Ingrisitongo) e skrifi fu den sortu sma disi: „Gi den wan disi di no de getrow dan a grani disi fu dini Gado fu di den e sori na fesi fu tra sma den kownukondrefroktu, soleki Masra ben komanderi, tron soso weri skin ceremonie èn formaliteit, di no e gi den nowan okasi fu brenki na ini den ai fu libisma. Fu go oso fu oso nanga na Kownukondreboskopu ini gedrukte vorm èn fu pristeri disi na den sma, de gi den sortu sma di de prenspari na ini den eigi ai wan tumsi lagi sani. Den no e feni prisiri na ini . . . Fu dat’ede meki den ben taki èn e tan taki: ’Na waka disi nanga buku de soso nomo wan sani fu seri buku. Fa a de wan weri skin sani!’” Srefi ini a ten disi yu abi ten na ten sma di feni na velddienst wan ferferi sani di alaten e kon baka èn e feni a fisiti fu komakandra wan soi sani. Disi kan de so efu wi lasi a frede fu wi gi Yehovah èn na asrefi ten nanga dati a lobi fu wi gi en.
19. Fa wi kan tan sori warderi gi den seti fu Yehovah?
19 Fu hori a frede fu wi gi Yehovah, sa meki dati wi tan nanga sakafasi na en fesi èn de alaten nanga furu warderi gi ala sani sa a e du gi wi. Efu wi de now tapu wan pikin komakandra ini wan oso ofu tapu wan bigi komakandra fu tindusun sma ini wan stadion, wi de Yehovah grantangi fu na grani fu de makandra nanga wi kristen brada. Wi sa sori na grantangi fu wi fu de drape èn fu gi tranga „fu sori lobi èn tumsi bun wroko” na tra sma di de drape nanga yepi fu takmakandra di e bow bribi èn kommentaar di e gi na a ten fu komakandra (Hebrewsma 10:24, 25). Efu wi kisi na grani fu du wan pisi tapu wan komakandra, dan wi no sa libi wan sreka te na a lasti momenti èn esesi tyari wantu prakseri komakandra. Behandel den sortu toewijzing dati noiti leki wan aladei sani. Den de santa grani èn a fasi tapu fa wi e du den, de ooktu wan sori fu na respeki èn frede fu wi gi Yehovah.
20. (a) San wi no mu frigiti noiti? (b) Wi e kon na sortu bosroiti?
20 Fa na bakapisi de wan sari sani gi den sma di lasi na frede gi Yehovah! Den no abi warderi gi na no-ferdini grani fu de ini wan bun matifasi nanga na Soeverein fu na universum. „’Mi de wan gran Kownu’, Yehovah fu den legre ben taki, ’èn mi nen sa de wan sani di e gi frede a mindri den natie’” (Maleachi 1:14; Openbaring 15:4). Meki wi no frigiti dati noiti. Meki ibriwan fu wi de leki na psalmsingiman di ben taki: „Wan patna mi de fu ala sma di e frede yu trutru” (Psalm 119:63). Bakadi wi luku na afersi disi, dan wi e kon na asrefi bosroiti leki Salomo di ben taki: „Frede na tru Gado èn hori en gebod. Bika disi na a heri ferplekti fu libisma. Bika na tru Gado srefi sa tyari ibri sortu fu wroko kon ini krutu ini a tori fu ala sani san de kibri, fu si ofu a de bun ofu ogri.” — Preikiman 12:13, 14.
Leri di komoto fu na buku Maleachi
◻ Fu san-ede den Israëlsma ben mu frede Yehovah?
◻ Fa e kon na krin ini den du fu wi efu wi e frede Yehovah trutru?
◻ San e bewijsi dati ini a ten disi ala pe na grontapu sma de di e frede Yehovah?
◻ Fu san-ede wi mu tan hori na yoisti frede gi Gado?
[Prenspari pisi na tapu bladzijde 7]
Fu pe son e opo te go pe son e dongo Yehovah nen sa meki bigi
[Prenki na tapu bladzijde 6]
Den Iraëlsma ben feragti Yehovah fudi dri ben pristeri breni, malengri ofu siki meti leki srakti ofrandi