Sori taki yu abi fertrow na ini Yehovah fudi yu e poti den sani di yu leri na ini yu libi
„Fertrow tapu Yehovah èn du san bun, tan na grontapu èn handri nanga getrowfasi.” — PSALM 37:3.
1, 2. (a) San mu de na bun bakapisi fu persoonlek studie? (b) Sortu agersitori Yakobus e gi, èn na luku fu wan sma fesi san a e taki na soso wan frafra luku?
STUDIE fu a Wortu fu Gado no mu de wan sani di wan sma e du gewoon fudi wan sma abi prisiri na ini. Studie mu de wan yepisani fu bow fertrow na ini Yehovah (Odo 1:1-5). Den wortu di skrifi dya, na tapsei fu na psalmsingiman e meki wi si taki na fertrow na ini Gado di wan sma abi, e kon na fesi fudi a e ’du san bun’.
2 Yakobus ben poti krakti a tapu: „Tron duman fu na wortu èn no wawan yereman, fudi yu e bedrigi yusrefi nanga falsi denki. Bika efu wan sma de wan yereman fu a wortu, èn no duman dan sowan sma gersi wan man di e luku en fesi na ini wan spigri. Bika ai luku ensrefi èn ai waka gwe èn e frigiti sortu sma a de” (Yakobus 1:22-24). Na luku disi no ben mu de sobun soso wan es’esi luku. Gi „luku” den e gebroiki dya wan Griki wortu di ini en gronbetekenis „e sori tapu na wroko fu na yeye fu kon sabi bepaalde sani fu wan afersi”. — An Expository Dictionary of New Testament Words, W.E. Vine; teki gersi nanga Tori fu den Apostel 7:31, Kingdom Interlinear.
3. Fa wan sma di e luku na ini wan spigri kan frigiti es’esi „sortu sma a de”?
3 Tyari kon na ini yu prakseri dan wan man di e luku ensrefi fini na ini wan spigri, èn di kande mu kon si taki san a si no de so moi. A e si kande taki a abi wan ondrokakunbe di de a bakapisi fu nyan èn dringi tumsi, taki a abi olo na ondro en ai fudi a no e sribi bun èn proiproi ini en fes’ede fu sorgu ede di no e lusu en. Fudi a tanapu now leti na fesi ensrefi a e teki na bosroiti fu tyari kenki kon na ini en gwenti èn fasi fu libi, kenki di bun langa kaba a ben mu tyari kon. Dan ’a e waka gwe’. Koloku now taki a no e si nasrefi prenki disi moro, ’a e frigiti wantewante’ no someni fa a ben tan leki „sortu sma a de”. Na bosroiti fu en fu tyari kenki kon e psa gwe baka.
4. Fa na agersitori fu Yakobus kan gebroiki tapu wi studie?
4 Na so wan srefi fasi yu kan de wan bekwaam studenti fu na bijbel. Ma fa yu e du nanga san yu e si na ini na spigri fu na Wortu fu Gado? Te na ini dati yeye mankeri nanga flaka e kon fu si, dan disi e meki yu broko yu ede soso fu wan syatu pisi ten nomo ofu yu e teki na faste bosroiti fu meki den mankeri kon bun? Yakobus e taki moro fara: „A sma na a tra sei di e luku na ini na volmaakti wet, di de fu na fri, èn di e tan na dati, en sa de koloku, fudi a no de wan yereman di e frigiti ma wan duman fu a wroko fudi a e du en (Yakobus 1:25). Na psalmsingiman ben begi: „Leri mi, o Yehovah na ini na pasi fu den wet fu yu, sodati mi kan hori dati te na a kaba.” — Psalm 119:33.
San den du fu wi e ferteri wi
5. (a) San den du fu wi e ferteri fu wi? (b) San e wakti den sma di „de sma di e du san ogri”?
5 Fu tru san wi e du, e buwijsi san wi de na inisei. Èn fruku ofu ati wan sma sa meki kon na krin san a de na kibrifasi, fudi a o du bun ofu ogri (Psalm 51:6). Salomo ben taki: „Srefi nanga en du wan boi e meki den sabi en, ofu en wroko de soifri èn opregti” (Odo 20:11). Disi ben de so na ini na geval fu Yakob nanga Esau di den ben yongu ete. Te fu wan pisten Esau du ben meki a mankeri fu yeye warderi fu en kon na krin (Genesis 25:27-34; Hebrewsma 12:16). Disi de ooktu so na dusundusun sma di ben taki taki den e fertrow tapu Yehovah ma di ben sori taki den de sma di soleki a bijbel e taki, „e du san ogri” (Yob 34:8). Na psalmsingiman ben skrifi: „Te den goddelowsuwan e sproiti kon na doro leki na prani èn ala duman fu san ogri e meki bromki, dan a de sodati den pori den fu tego.” — Psalm 92:7.
6. Fu san-ede meki a de tranga fanowdu taki wi e sori fertrow na ini Yehovah?
6 Na nomru fu Goddelowsusma e gro, èn na pori fu den sa kon es’esi; Gado no sa ferdrage fu tego ogriman (Odo 10:29). A de fu dat’ede wan tranga fanowdu sani taki wi sori wi fertrow na ini Yehovah fudi wi poti ini wi libi san wi leri. „Kibri wan tumsi moi waka nanga libi a mindri den nâsi”, Petrus e fermane (1 Petrus 2:12). San de dan wantu kontren di kande wi kan tyari kenki kon.
Na fasi fa wi de nanga tra sma
7. Fu san-ede wi mu de koni nanga „den sma di de na dorosei”?
7 Wan kontren ben sa kan de na fasi fa wi e lolo nanga trawan. Odo 13:20 e warskow: „Na sma di e bemui nanga den sma di de sondro ferstan, a sa waka en takru.” Fudi son sma e poti en na wan sei fu gebroiki na rai disi fu santa yeye, meki den e gi densrefi pasi fu kon de fertrow nanga grontapu sma tapu den wroko ofu skoro. Wan brada di ben trow, fu a reide dati, ben kon fadon ini wan waka nanga libi di no krin nanga wan uma tapu wroko. A ben waka ooktu nanga kompe wrokoman di ben de man sma go na bar fu a presi pe a ben libi, nanga na bakapisi dati a ben kon drungu. Seiker wi mu go ’doro fu waka ini koni na fesi fu libisma di de na dorosei’. — Kolosesma 4:5.
8. Fa son sma kan tyari kenki kon na ini a fasi fa den de nanga kompe kristen?
8 Ma san wi kan taki fu a fasi fa wi de nanga wi kompe kristen? Kon wi taki fu eksempre dati yu mu pai wan brada moni. Yu ben sa mag poti sondro fu a de fanowdu a pai baka fu na moni na wan tra ten, èn e tak-go-tak-kon taki fudi na brada gersi taki a abi en bun, yu abi na moni moro tranga fanowdu leki en? „Na goddelowsusma e leni èn a no e pai baka”, Psalm 37:21 e taki fu en. Èn efu yu de wan basi, dan yu e gebroiki na gronprakseri „Na wrokoman warti en paiman”, te a e kon tapu na pai fu Kotoigi di e wroko na yu? (1 Timóteus 5:18). Paulus ben kan taki fu na fasi fa a ben de nanga trawan: ’Nanga santafasi èn opregtifasi fu Gado wi ben tyari wisrefi na ini na grontapu, ma moro spesrutu nanga unu.” — 2 Korinte 1:12.
Bescheidenfasi na ini krosi èn na fasi fa wi e sori wisrefi na dorosei
9. Sortu fasi fu weri krosi nanga fa wan sma e sorgu ensrefi na dorosei son owruman ben si?
9 Wan opziener di e waka, luku gemeente na ini Doisrikondre ben ferteri fu wantu kristen ini wan gemeente leki „na gympies generatie” fu na tumsi mi-no-kefasi krosi na komakandra. Na bijkantoro ben taki morofara tapu disi dati son fisitiman fu komakandra „de na a lanki fu wan dotfeba”, aladi „a moro bigi pisi fu wi brada e weri krosi na wan bescheidenfasi”. Wan tra kondre e ferteri ini nasrefi fasi taki: „mankeri fu persoonlek krin fu a skin fu wan sma de wan problema . . . son brada no e weri krin krosi. Den wiwiri no kan ete èn de fisti te den e go na komakandra ofu na ini na velddienst.” O prenspari a de gi Yehovah dienstknegti fu de netjes nanga krin na ala fasi! — 2 Korinte 7:1.
10. (a) Sortu gronprakseri mu tyari wi na ini sortu krosi èn sorgu fu wi skin na dorosei wi sa teki? (b) Oten rai ben sa de na en presi, èn fa wi mu teki dati?
10 Wi mu „weri krosi tapu bescheidenfasi, fatsunlek èn yoisti”, spesrutu te wi de bezig nanga yeye activiteit (1 Timóteus 2:9, New International Version). Na afersi no de ofu wan bepaalde stijl de spesrutu a modo ma efu a e fiti gi wan sma di e taki taki a de wan dinari fu Gado (Romeini 12:2; 2 Korinte 6:3). Tumsi informele friten-krosi ofu span krosi kan puru a prakseri fu sma fu na boskopu fu wi. Stijl di wantronwantron wan sma e si en èn di fu espresi fu meki mansma gersi umasma èn di espresi e meki umasma gersi mansma, seiker no e fiti. (Teki gersi Deuteronomium 22:5.) A no de fu taki taki gwenti fu a wan presi e kenki fu a trawan, èn dati e anga fu na weer, a wroko di wan sma e du, nanga so moro fara, sodati na kristen gemeente no e meki faste regel gi den brada nanga sisa na a heri grontapu. Ooktu a de so taki owruman no mu poti a luku fu den fu krosi tapu na ipi. Ma efu wan Kownukondrepreikiman abi wan stijl fu weri krosi èn morofara a sorgu fu ensrefi na dorosei di e stoor ini algemeen na gemeente ofu e puru wan sani na a diniwroko, dan a de na en presi fu gi switi rai. Yu ben sa teki nanga wan sakafasi den sortu rai dati, e sori fertrow na ini Yehovah? — Hebrewsma 1:7.
Fertrow a tapu dati Gado e soru g den di e suku a Kownukondre
11. Fa son sma ben soigi go na ini na onti baka skinafersi, èn fu san-ede disi no de koni?
11 „Tan suku dan fosi na Kownukondre èn en regtvaardikifasi, èn ala den tra sani disi sa kon a tapu” (Mattéus 6:33). Fa a de wan sari sani te wan sma e libi en na wan sei fu poti prakseri tapu den wortu dati! Fudi den e poti bribi na ini na anansitori fu seikerfasi na monisei meki den e feti srefsrefi baka gudu, grontapu opleiding èn grontapucarrière, ’e fertrow na tapu den sani di den abi fu hori densrefi a densrefi a libi’ (Psalm 49:6). Salomo e warskow: „No weri yu ede fu kisi gudu. . . . Yu ben meki yu ai psa es’esi a tapu, aladi a no de noti? Bika sondro mankeri a e gi ensrefi frei leki fu wan aka èn e frei gwe na hemel.” — Odo 2:4, 5.
12. Fa den sma di e feti baka gudu „e boro densrefi alape nanga furu pen”?
12 Na apostel Paulus e warskow morofara: „Bika na lobi gi moni de na rutu fu ala ogri sani, èn fudi den ben poti den muiti tapu na lobi dati, meki dati son sma ben lasi pasi komoto fu na bribi èn ben boro densrefi alape nanga furu pen” (1 Timóteus 6:10). Na ini wan takmakandra na ini U.S. News & World Report dr. Douglas LaBier ben taki taki furu yongu man nanga uma di e feti na baka gudu, „e ferteri fu firi fu ontevredefasi, frede, brokoska, leigi di den e firi ini a libi nanga paranoia (wan sortu lawsiki), èn ooktu wan heri lo fu skinkragi — ede-ati, baka-ati, kragi fu na maag, no man fu sribi, nyanyan problema.
13. Fu san-ede a de moro bun fu de tevrede nanga „nyanyan, krosi nanga wan presi fu tan”?
13 Den sma di e fertrow a tapu, dati Yehovah sa sorgu fu den, e kibri densrefi fu furu pen nanga frede. A de tru taki fu de tevrede nanga soso nomo „nyanyan, krosi nanga wan dak na yu tapu ede” kan wani taki taki na standard fu libi mu de pikinso bescheiden (1 Timóteus 6:8). Ma „warti sani no sa yepi na tapu a dei fu atibron” (Odo 11:4). Èn te wi e meki na dienst fu wi gi Yehovah kon moro bigi, dan Yehovah e feni wi bun fu kisi „a blesi fu Yehovah” di ’e meki wan sma kon gudu èn a no e poti pen na tapu dat’. — Odo 10:22.
„Suku vrede èn feti na baka dati”
14, 15. (a) Sortu afersi ten na ten ben trobi na vrede fu na gemeente? (b) Fa wi kan feti na baka vrede te kesekese e kon?
14 Ete wan fasi fa wi kan sori dati wi e fertrow na ini Yehovah de fu ’suku vrede èn feti na baka’ na mindri den kompe-bribiman fu wi (1 Petrus 3:10-12). Sontron sma e meki soso-sani tron wan sani fu bita trobi a mindri brada: Na fasi fa na Kownukondrezaal mu tan, na kenki na ini gemeente gebied, nyun bukustudie di mu kon, na sorgu fu tijdschrift nanga lektuurvoorraad. Ooktu na ini son geval pe persoonlek ofu bisnis kesekese ben de ini a tori dan brada no ben lusu na afersi ini na yeye fu Mattéus 18:15-17, ma den ben stop fu taki nanga makandra ofu ben trobi na gemeente nanga na kesekese fu den.
15 Yakobus e taki: „Na siri fu na froktu fu regtvaardikifasi e sai a mindri omstandigheden fu vrede” (Yakobus 3:18). De klari fu dat’ede fu na bun fu na vrede fu agri nanga na tesi ofu denki fu trawan aladi yu e libi srefi persoonlek reti. (Teki gersi nanga Genesis 13:5-12.) Fu teki wan eksempre: Efu tu gemeente e meki gebroiki fu wan Kownukondrezaal dan no wán gemeente mu prakseri taki a de „en” zaal” èn taki a kan ferteri na tra gemeente sortu ten fu hori komakandra den mu abi ofu tra sani. Abi respeki gi makandra èn wrokomakandra mu de den sani di e kon na fesi.
16. San na a waarde fu na erken fu theokratis orde na oso èn na ini na gemeente?
16 Furu kesekese no abi fu de efu wi e erken theokratis orde èn e kibri wi yoisti presi (1 Korinte 11:3; Efese 5:22-27). Te umasma e respeki den winsi fu den masra fu den, pikinnengre den sani di den papa nanga mama ferteri den, dinari ini na diniwroko den sani di den owruman e sori den, dan den du fu den e meki „na gro fu na gemeente go a fesi fu bow ensrefi na ini lobi” (Efese 4:16). A no de fu taki taki son masra, papa nanga mama èn owruman, e misi na marki (Romeini 3:23). Ma a situwasi sa kon moro betre efu wi meki opruru ofu e kragi ofu e kakafutu gi sani di bedoel bun? Omoro bun a de fu kibri na presi di Gado gi a wi èn feti na baka na vrede!
Span wisrefi na ini na veld
17. (a) Sortu reide son sma e gi taki den abi soso wan symbolisch prati na a preikiwroko? (b) Leki fa Yesus e gi dek’ati dan fa kristen mu teki a druk fu a ten disi?
17 Ma gi furu sma na du fu na kristen komando fu preiki na bun nyunsu de na moro bigi tyalansi (Mattéus 24:14; 28:18, 20). Son sma abi soso wan pikin pisi na a velddienst, èn den e tak-go-tak-kon kande taki na druk fu verdien na moni fu tan a libi èn fu kweki wan osofamiri e meki a de muilek fu du moro. Wi e agri taki a de so taki a druk fu „den laatste dei” de kefarlek bigi (2 Timóteus 3:1). Ma Yesus ben warskow fu ’kon hebi nanga sorgu fu na libi’. Te den toestand e kon moro ogri, dan kristensma yoisti mu ’opo densrefi let’opu èn opo den ede go na loktu’ (Lukas 21:28, 34). Wan fu den moro bun fasi fu ’tan tanapu steifi’ teige den aanval fu Satan de ’fu weri na wi futu den susu nanga na sreka fu na bun nyunsu fu vrede’ — fu abi geregeld wan prati na a preikiwroko! — Efese 6:14, 15.
18. San kan de na reide taki son sma e hori densrefi na baka fu teki preati dorodoro na a preikiwroko?
18 Na ini Paulus dei furu kristen ben de (kon wi taki na ini son gemeente) di ’ben e suku den eigi belang, no di fu Kristus Yesus’ (Filippi 2:21). Dati ben sa kan de ooktu so nanga son sma a wi mindri na ini a ten disi? Kande den no abi nasrefi luku na tapu na suku fu na Kownukondre leki na man di ben feni wan „peri fu bigi waarde” di ben de tevrede nanga ibri offer di a ben kan tyari (Mattéus 13:45, 46). Fudi den gi densrefi abra na eigi belang meki den kan teki na pasi fu na moro mendri weerstand èn e du wan agersi dienst. Ma prakseri taki lobi gi Yehovah èn gi na naaste e buweigi tru kristen fu preiki, srefi efu na bigin fu wan takmakandra nanga sma di wi no sabi e go krinkrin teige wi natuurlek karakter. — Mattéus 22:37-39.
19. Fu san-ede broko-kowru muiti no e plisi Yehovah, èn fa wi ben sa kan ondrosuku wi eigi dienst?
19 Efu sani no e buweigi wi fu go reiki dan na lobi fu wi gi Yehovah èn wi fertrow na ini en de pikinsomoro leki wan theoretis ferstan fu sani. „Sabi na Gado fu yu tata èn dini en nanga wan ati di no prati”, David ben gi Salomo tranga, „bika Yehovah e ondrosuku ala ati, èn ibri firi fu den prakseri a e si” (1 Kronieken 28:9). Yehovah no e meki sma spotu nanga en fudi wan sma e span ensrefi pikinso nomo. Srefi wan geregelde prati na a velddienst no e prisiri en efi soso wi e gi wan pikinso fu san wi ben sa kan du efu wi ’ben span wisrefi krakti’ (Lukas 13:24). Sobun ibri kristen mu luku na prati fu en na ini na velddienst na wan eerlek fasi èn mu aksi ensrefi: ’Mi e du trutru ala sani di mi kan du?’ Kande wi mu tyari kenki kon ini den sani di wi e poti leki prenspari na ini wi libi.
Tranga di wi e kisi fu du bun nanga den eksempre fu trawan
20. Fu san-ede a de wan sani di fiti fu luku den bun eksempre fu kompe-kristen?
20 Na dienst fu wi di Gado no e du tapu na gron fu „a teki fu wisrefi gersi nanga tra sma” (Galacia 6:4). Ma ete den bun eksempre fu trawan nofotron kan buweigi wi fu du moro. Na apostel Paulus ben taki srefi: „Waka na mi baka, soleki mi ben waka na baka Kristus” (1 Korinte 11:1). Luku dan omeni ten wi brada e gi ibri mun na ini na velddienst. Na ini den Verenigde Staten na gemiddelde yuru gi preikiman kren fu 8,3 na ini 1979 go na 9,7 na ini 1987! Wi brada ben meki na ten di den e gi ini na dienst kren safrisafri. Dati de so ooktu nanga wi?
21. San pusu furu sma fu go na ini na pionierdienst? Gi eksempre.
21 Nanga den faya eksempre fu trawan meki preikiman e kon ini buweigi ini bigi nomru fu bigin nanga na wroko fu wan gewone pionier. Na ini California (VS) wan yongu sisa Angela, ben kisi wan kefarlek moi wroko plus wan studiebeurs fu kisi les tapu wan heiskoro di a ben wani. Na presi fu dati Angela ben teki fu go ini na furutendienst. A reide fu en? „Fudi mi ben e lolo nanga furu pionier mi ben kan si dati den ben abi wan trutru dipi prisiri èn satisfaksi di ben de moro leki fu de tevrede nanga yusrefi, ma ben de na ini na matifasi fu den nanga Yehovah. Mi ben wani abi na dipi prisiri èn satisfaksi dati.”
22. San na den winimarki fu na gebroiki fu san wi ben leri?
22 Yu wani „dipi prisiri èn satisfaksi”? We, „fertrow tapu Yehovah èn du san bun”! Meki nanga san yu sabi pusu yu fu du ala san yu man na ini Yehovah dienst. Te yu poti den sani di yu sabi na ini yu libi, dan na yeye go na fesi fu yu sa kon de krin gi ala sma èn trawan sa nyan bun fu dati tapu wan fasi di e ferlusu libi (1 Timóteus 4:15, 16). Meki a de so dati ala sma fu dat’ede tapu wan bunfasi teki den wortu fu Paulus na ini Filippi 4:9: „Den sani di yu ben leri èn di yu ben teki èn di yu ben yere èn kon si na mi, tyari dati go ini praktijk, èn na Gado fu vrede sa de nanga yu.”
Sani fu luku ete wantron
◻ San wi mu du te wi e tan luku na ini na spigri fu na Wortu fu Gado?
◻ Fa wi ben kan tyari kenki kon na ini na fasi fa wi e lolo nanga trawan?
◻ Fu san-ede a no de wan ferstan sani fu feti na baka gudu?
◻ Fa wi kan suku vrede na ini na gemeente?
◻ San mu buweigi wi fu abi wan prati dorodoro na a velddienst?
[Prenki na tapu bladzijde 6]
A no nofo fu si yeye mankeri nanga flaka. Wi mu handri fu meki den kon bun!
[Prenki na tapu bladzijde 8]
Den sma di e feti baka gudu, e gi densrefi nofotron „furu pen”