De krin na frustan èn skin

’Pristeri yu skin leki wan srakti-ofrandi di de libilibi, santa èn wan sani di e plisi Gado.’ — ROMEN 12:1.

1. Fu san-ede krinfasi na frustan èn na skin de fanowdu leki fa apostel Paulus taki?

WAN sma di wani dini na santa Gado Yehovah, musu de soyfri na yeye nanga „moreelfasi. A no de fu taki taki disi wani taki so srefi tu fu de krin na frustan èn skinfasi ofu krinfasi fu frustan nanga skin. Te yu luku na fasi pe na disiten seti fu sani de na ini, dan sma di e komoto na ini fu dini Yehovah no wwan musu tyari kenki kon na ini den denki, ma nofotron na ini den gwenti fu den tu. Na apostel Paulus ben skrifi gi kresten sma na ini Rome: „Fu dati-ede mi e aksi unu tranga, brada, tapu den sari-ati fu Gado, fu pristeri unu skin leki wan srakti-ofrandi di de libilibi, santa nanga e prisi Gado, wan santa diniwroko nanga wi denkikrakti. Èn no meki na seti fu sani disi seti unu moro langa, ma kon kenki fu di unu o kenki unu yeye kon de tra fasi, so taki yu kan ondrosuku si san de na bun èn switi èn volmaakti wani fu Gado” (Romen 12:1, 2). San de ini a tori fu krinfasi na frustan èn skin?

Krinfasi na frustan

2. Fa wi ay nanga wi ati ben sa kan buweygi wi go ini lusufasi fu libi nanga waka, èn san de fanowdu fu tan farawe fu disi?

² Srefi bifo Gado ben gi a Wet, na getrow Yob ben tyari kon a krin taki efu wi no dwengi wi ay nanga wi ati, den ben kan buweygi wi go na ini lusufasi fu libi nanga waka. A ben taki: „Mi meki wan frubontu nanga mi ay. Fa mi ben sa kan sori dan taki mi abi wan ay tapu wan nyun wenke? Eefu mi ati ben kori mi go na wan uma,. . . dati ben a de lusu fasi fu libi nanga waka, èn dati ben sa de wan sondu na fesi fu den krutuman” (Yob 31:1, 9-11). Efu wi abi wakawaka ay èn wi ati no e tan na wan presi, dan wi abi trangaleri fanowdu gi wi frustan, ’tranga leri di e gi inzicht’. — Odo 1:3.

3, 4. (a) San na eksenpre fu David nanga Batseyba e sori, èn san de fanowdu fu kenki takru denkigwenti? (b) Fu san-ede kresten onruman spesrutu musu luku bun?

³ Kownu David ay ben kori en go du sutadu nanga Batseyba (2 Samuèl 11:2, 4). Fu na eksenpre disi e kon na krin taki srefi man di Yehovah ben kobroyki na tapu wan spesrutu fasi, kan fadon go na ini sondu efu den no ben dwengi den frustan. A kan aksi tranga muyti fu kenki wi denkigwenti. Den muyti disi musu go makandra nanga faya begi fu kisi a yepi fu Yehovah. Bakadi David ben kisi berow fu en sondu nanga Batseyba, a ben begi: „Kriya srefi na ini mi wan soyfri ati, o Gado, èn poti na ini mi wan nyun stanfaste yeye.” — Psalm 51:10.

⁴ Kresten owruman spesrutu musu luku bun taki den no go kweki fowtu lostu di ben sa kan kori den go ini bigi sondu (Yakobus 1:14, 15). Gi na kresten owruman Timoteyus Paulus ben skrifi: „Na marki fu na opdragti disi na lobi komoto fu wan krin ati èn fu wan bun konsensi èn fu bribi sondro hoygrifasi (1 Timoteyus 1:5). A ben sa de seykerseyker wan hoygri sani efu wan owruman ben sa du en yeye wroko aladi a e gi pasi taki wan wakawaka ay e wiki prakseri na ini en ati fu du sani di no krin.

5. San yu musu tan farawe fu en fu tan krin na ini frustan?

⁵ Leki kresten wi alamala musu du ala wi muyti fu de krin na ini frustan. Disi wani taki fu hori wi srefi fara gwe fu ala film, tv-programma ofu buku di ben sa kan abi wan pori krakti tapu wi denki. Krinfasi na frustan wani taki taki nanga wi frustan wi e du muyti fu tan denki na den sani di de ’tru, regtvaardiki nanga krin’. Na apostel Paulus taki moro fara: „Sortu bun sani de tu èn ala sani san ferdini preyse tan prakseri den sani disi.” — Filipi 4:8.

Krinfasi fu wi eygi

6. (a) Gi eksenpre fu na buku Leviticus pe e sori taki krinfasi leki wan grupu èn fu wansma srefi ben de wan sani di ben musu na ini Israèl (b) San ben de na prakseri fu den sortu weti disi?

⁶ Sma ben taki: „na gi di wan sma e gi en srefi ini na dini fu Gado e bigin nanga krinfasi.” Aladi wan sma di de krin na moreel nanga skinfasi, no abi fu de nomonomo ini a dini fu Gado, toku wan sma di e gi en srefi ini a dini fu Gado seyker seyker musu de krin na moreel nanga skinfasi. Na wet fu Moses ben gi soyfri libilin fu na krin fu oso di ben abi siki èn fu wasi wan sma skin na ini difrenti geval fu dotifasi. (Luku Leviticus kapitri 14 nanga 15.) Ala Israèl sma ben de fruplegti fu sori taki den de santa (Leviticus 19:2). Na buku Yepi fu frustan na beybri e taki: „Den nyun weti, den libilin fu krinfasi nanga den moreel wet di Gado ben gi den [Israèl sma], ben memre den alaten baka taki den de wan santa pipri di Gado poti aparti.” — blz 559.

7. San de tru ini a tori fu Yehovah Kotoygi leki pipri, ma san wan tu opziener di e waka lontu luku gemeente ben skrifi?

⁷ Aladi Yehovah Kotoygi leki pipri de krin fu ibri doti èn ibri falsi relisi fu Babilon èn no e luku psa no wan moreel dotilibi na den mindri, toku tori fu opziener di e waka lontu luku gemeente e sori taki son sma no e broko-ede nanga krinfasi nanga netjesfasi fu den eygi. Fa wi kan ondrosuku fu sabi seyker taki wi tu de krin ini den tori disi? Wan bun muderi gi ala kresten osofamiri na Betel, wan nen di wani taki „oso fu Gado”.

8, 9. (a) Sortu ray e gi na ala nyun memre fu na Betelfamiri? (b) Ibri osofamiri musu meki sortu gronprakseri di den Betel-oso e hori hey tyari den?

⁸ Te wan sma tron memre fu wan Betelfamiri tapu na Edekantoro ofu tapu wan fu den beykantoro fu na Wachttorengenootschap na wan presi na grontapu, a e kisi wan brochure di na Tiriskin meki. Na ini na buku disi e kon a krin san den e fruwakti fu en tapu na kontren fu wrokogwenti nanga gwenti fu en eygi. Na ondro na ede „na sorgu gi den kamra nanga krinfasi” tanapu: „Na Betellibi e aksi taki wan sma hori hey skin, moreel nanga yeye markitiki. Ala sma na Betel musu broko den ede fu hori en srefi nanga en kamra krin. Disi de bun gi wan bun gosontu. Reyde no de fu wan sma musu doti. A de wan bun gwenti fu wasi ala dey . . . A de fanowdu fu kon nyan nanga anu di wasi (èn kande so srefi tu nanga fesi di wasi) èn dati den e fruwakti fu ibriwan sma. Fu sori taki yu e hori yu kamrapatna nanga na sisa di e krin kamra na prakseri dan yu musu wasi na wasibaki ofu na wasi-oso krin ala tron te yu e kobroyki en.”

⁹ Na ini den Beteloso den e hori den wc kefarlek krin èn sani seti gi den sma di e kobroyki den wc fu wasi den anu wantewante. Den e fruwakti fu den memre fu na famiri taki den e hori na wc krin baka te den kobroyki en, san wani taki taki den musu controleer luku efu na wc-watra spuru na wc bun. Na so fasi wan sma e sori taki a e hori tra sma na prakseri di e kon baka en fu kobroyki na wc ofu taki a e hori na sisa di e krin na wc a prakseri. A no musu de so, taki ibri kresten osofamiri musu meki den tumusi moy èn lobi gronprakseri disi tyari den?

10. (a) Fu san-ede wan kofarliki diri wasi-oso no de fanowdu fu hori yu srefi nanga den pikin krin? (b) Sortu weti na ini lsraèl ben meki wan bun gosontu go na fesi, èn sortu leri Yehovah pipri na ini na ten disi kan teki fu dati?

¹⁰ A no de fu taki taki den omstandigheid e kenki fu kondre go miti kondre. Na son presi a de so taki den oso no abi wan wasi-oso ofu srefi wan douche. Kresten mma nanga ppa ini algemeen kan kisi nofo sopo nanga watra fu wasi den skin èn fu sorgu taki den pikin fu den krin.a Furu oso na a heri grontapu no de tapu wan gotro sistema. Ma doti watra nanga pupe kan puru bun na pasi fu di yu e beri den so leki den ben aksi fu den Israèl sma srefi na ini den srudati legre presi fu den (Deuteronomiyum 23:12, 13). Boyti fu dati, na ini den wet fu Yehovah gi na libi na ini den legre presi ben tanapu taki wan sma ben musu wasi krosi nanga en skin furutron, taki den ben musu kon sabi esi-esi sortu siki wan sma abi èn behandel dati esi-esi, taki wan sma na a yoysti fasi ben musu handri nanga dedeskin èn taki watra nanga nnyan ben musu hori krin. Ala den wet disi ben meki na nâsi de gosontu. Yehovah pipri na ini a ten disi ini a tori fu eygi gwenti ben sa musu poti wan moro lagi markitiki fu krinfasi? — Romen 15:4.

Krin oso nanga oto

11. (a) San wi kan taki fu na moro pikin kresten oso? (b) Sortu wroko makandra a e aksi fu ala memre fu na Betelfamiri?

¹¹ Wi oso, awinsi a de so pikin, kan de netjes nanga krin, ma disi e aksi wan bun osofamiri orga. Fu di wan kresten mma wani gi someni ten leki a kan na yeye afersi èn so tu nanga na preykiwroko, meki a no musu de fanowdu taki ibri dey a e gi ten na a puru fu krosi, buku, koranti, tijdschrift, nanga so moro fara, di osofamiriman ben libi ddon alape. Aladi yu abi sisa na Betel di e krin kamra, toku wi e fruwakti fu ibri memre fu na famiri taki mamanten bifo den go na wroko, den meki den bedi èn poti den kamra ini bun orde. Wi alamala abi warderi gi wan netjes nanga krin kownukondre zaal nanga kongreshal. Meki wi oso tu kotoygi taki wi de wan pisi fu Yehovah krin èn santa pipri!

12, 13. (a) Sortu ray e gi fu oto di sma e kobroyki na ini Yehovah dienst, èn fu san-ede disi no abi fu teki tumusi furu ten? (b) Sortu yeye reyde de fu de krin na skinfasi èn fu hori wi oso nanga wi oto krin èn netjes?

¹² Furu fu Yehovah dienstknegti na ini a ten disi, e kobroyki wan oto fu go na konmakandra èn velddienst. Na ini son kondre wan oto de wan sani di yu no kan misi na ini a dini fu Yehovah. Leki so dan a de neleki wi oso di wi musu hori netjes nanga krin. A no de fu taki taki kresten sma no kan gi ten psa marki na a boboy fu den oto, so leki son grontapu sma e du. Ma sondro fu fadon go na a tra sey fu a tori, dan Yehovah dienstknegti-musu feti a baka fu hori den oto redelek krin èn na ini wan bun kondisi. Ini son kondre a no e teki furu moni nanga ten fu meki wan benzine station wasi na oto. Fu a sey fu na inisey fu na oto, tin minuut krin èn puru sani na ini en e du wondru. Spesrutu owruman nanga dinari na ini na diniwroko musu feti na baka na ini disi fu de wan bun eksenpre, fu di den e kobroyki nofotron den oto fu teki grupu preykiman go ini velddienst. Te wan preykiman e go teki wan sma di abi belangstelling fu a go na wan konmakandra dan seyker a no de wan bun kotoygi efu en oto doti ofu a no sorgu en bun.

¹³ Na so wi sa gi grani na Yehovah leki memre fu en krin organisâsi nanga na muyti di wi e du na skinfasi fu de krin èn fu hori wi oso nanga wi oto krin nanga netjes.

Krinfasi te wi e tyari yeye srakti-ofrandi

14. Sortu wet fu krinfasi na ini anbegi ben de gi Israèl, èn san den weti disi ben sori?

¹⁴ Ceremonieel krinfasi ini a tori fu anbegi ben de wan weti ini Israèl pe dedestrafu ben de a tapu. Yehovah ben taygi Moses nanga Aäron:”Yu musu hori den manpikin fu Israèl aparti fu na krin di den no kon de, so taki den no dede na ini na no-krin fasi fu den, fu di den e doti mi tabernakel di de a den mindri” (Leviticus 15:31). Tapu na Verzoendey na granpristri ben musu wasi en skin tu tron na ini watra (Leviticus 16:4, 23, 24). Na kopro-beki na a tabernakel èn bakaten na kefarlek bigi kopro se na ini na tenpri, ben furu nanga watra, di den pristri ben kan kobroyki fu wasi den skin bifo den ben tyari den srakti-ofrandi gi Yehovah (Exodus 30:17-21; 2 Kronieken 4:6). Fa a ben de nanga den Israèl sma ini algemeen? Efu fu na wan ofu tra reyde den ben doti na ceremonieel fasi, dan den no ben kan teki prati na a anbegi te leki den ben du akruderi den weti fu kon krin baka (Numeri 19:11-22). Ala disi e poti krakti a tapu taki den sma di ben anbegi na Santa Gado, Yehovah, musu de krin na skinfasi.

15. Fu san-ede meti-ofrandi no de fanowdu moro, ma sortu aksi e kon na fesi?

¹⁵ A de tru taki na ini a ten disi Gado no e aksi fu Yehovah pipri, taki den tyari meti-ofrandi go ini wan grontapu tenpri. Na ini a presi fu den srakti-ofrandi di ben de ondro wet wi kisi now „na ofrandi presenti fu na skin fu Yeyses Krestes, wan dey fu alaten” (Hebrew sma 10:8-10). Wi „[e anbegi] na Tta nanga yeye èn waarheid” (Yohanes 4:23, 24). Ma disi wani taki taki wi no abi srakti-ofrandi di wi musu pristeri wi santa Gado Yehovah? Èn den e aksi moro mendri krinfasi fu wi leki den Israèl sma?

16. Fa na profeytitori fu Maleyaki 3:3, 4 fu sensi 1919 ben kontru tapu salfu kresten, èn sortu ofrandi di Gado e teki den kan tyari?

¹⁶ Na profeytitori fu Maleyaki e meki wi si taki salfu kresten na grontapu ini a ten fu na kba ben sa kon soyfri ofu krin gi tenpri diniwroko. Na historiya e meki wi si taki na kon krni disi ben bigin na ini 1918. Fu sensi 1919 den memre fu na salfu fikapisi „seykerseyker [ben tron] gi Yehovah sma di e pristeri wan ofrandi prisenti ini regtfaardikifasi” èn den ofrandi prisenti de ’switi na Yehovah’ (Maleyaki 3:3, 4). Na so fasi den man fu tyari „yeye-ofrandi di Gado e teki nanga yepi fu Yeyses Krestes” (1 Petrus 2:5). Na apostel Paulus ben skrifi: „Meki wi tyari nanga yepi fu en alaten wan srakti-ofrandi fu preyse gi Gado, namku den froktu fu wi mofobuba di e meki en nen bekenti na publiki”. — Hebrew sma 13:15.

17. Fu san-ede den memre fu na „bigi ipi” musu de krin na skin, na frustan, na moreel èn na yeyefasi aladi den no de fu na kownu pristriwroko?

¹⁷ Aladi den memre fu na „bigi ipi sma” no kisi kari so leki na salfu fikapisi fu du pristri dienst na ini na tenpri, toku „den e du dey nanga neti santa diniwroko” gi Yehovah ini den grontapu fesidyari fu en yeye tenpri (Openbaring 7:9, 10, 15). So leki sma sabi, dan den no-pristri Israèl sma ben musu de ceremonieel krin fu teki prati na a anbegi na a tabernakel ofu bakaten na ini na tenpri. Na net so na bigi ipi tra skapu musu de krin na skin, na frustan, na moreel nanga na yeyefasi efu den wani du dienst na ini na tenpri èn makandra nanga na fikapisi wani abi wan prati na a tyari fu wan srakti-ofrandi fu preyse gi Gadol fu ’meki en nen bekenti na publiki’.

De krin nanga netjes gi velddienstkonmakandra

18. Fu san-ede wi musu broko wi ede ini na tori fu wi eygi krinfasi, krosi nanga susu te wie teki prati na a publiki kotoygi wroko èn e go na konmakandra?

¹⁸ San disi wani taki ini praktijk? A wani taki taki a no ben sa fiti kwetikweti èn a ben sa sori taki wi no abi respeki gi Yehovah fu teki presi gi en ini na oso-fu-oso diniwroko, na strati ofu ini wan sma oso efu wi no ben sa de krin na skinfasi èn weri krosi netjes. So bun wi no musu de nanga mi-no-kefasi na ini den sortu afersi disi. Wi musu poti bun prakseri a tapu, so taki wi tyari wi srefi na wan fasi di fiti bedinari di e tyari Yehovah nen. Wi krosi no abi fu de diri, ma musu de krin èn bescheiden èn kotoygi fu wan bun tesi. Wi susu musu ondrow so srefi tu bun èn musu de netjes. Na a srefi fasi tapu ala konmakandra èn ooktu na bukustuka wi musu de krin na skinfasi èn weri krosi di fiti.

19. Sortu yeye winimarki e kon fu wi krin nanga netjesfasi fa wi tan na dorosey leki kresten bedinari?

¹⁹ Na krin èn netjes sori fu wi srefi na a ten te wi e teki prati na a kotoygiwroko èn tapu wi konmakandra de wán fasi ’fu moy na leri fu wi Frulusuman, Gado’ (Titus 2:10). A de wan kotoygi di wi e gi tapu en srefi. Furu sma kon ondro na indruk fu wi krinfasi nanga netjesfasi èn disi ben tyari den go so fara fu arki wi boskopu di e go fu den wondru prakseri fu Yehovah fu regtfaardiki nyun heymel èn wan nyun grontapu di kon krin. — 2 Petrus 3:13.

20. Sortu bun froktu de so srefi tu na bakapisi taki wi de krin na yeye èn na skin?

²⁰ Omoro Yehovah nyun seti fu sani di krin e kon krosibey, omoro wi alamala musu ondrosuku wi srefi fu si efu wi musu tyari kenki kon na ini wi denki ofu na ini wi gwenti. Paulus ben skrifi: „Mi e taki na ini libisma wortu fu na swakifasi fu unu skin; biasi neleki fa yu pristeri yu memre leki srafu gi fasi di no krin èn gi kruktudu nanga kruktudu na yu fesi, na so yu musu pristeri yu memre now leki srafu gi regtfaardikifasi èn santafasi na yu fesi” (Romen 6:19). Yeye krinfasi èn skin krinfasi e tyari nownow kba bun froktu kon, namku „santafasi . . . èn leki bakapisi te fu kba tégo libi” (Romen 6:22). Meki fu dati-ede ’aladi wi e pristeri wi skin leki srakti-ofrandi di de libilibi santa èn di e prisi Gado’, de krin na yeye èn skin. — Romen 12:1.

[Futuwortu]

Penti fu memre

◻ Fa wi ay nanga wi ati kan buweygi wi go ini lusufasi fu libi nanga waka?

◻ Sortu winimarki den Israèl sma ben kisi te den ben gi yesi na Yehovah wet ini a tori fu krinfasi gi den alamala leki grupu èn gi den eygi leki aparti sma?

◻ Sortu gronprakseri di den e hori hey na ini Beteloso ibri kresten osofamiri musu meki tyari den?

◻ Spesrutu oten wi musu broko wi ede nanga fa wi e tan na dorosey?

◻ Sortu yeye reyde Yehovah futuboy abi fu hori den oso nanga oto krin nanga netjes?

[Prenki na tapu bladzijde 28]

„Na Betellibi e aksi taki den hey markitiki na skinfasi, na moreelfasi nanga na yeyefasi hori hey”

[Prenki na tapu bladzijde 30]

A de fanowdu taki wan mma ibri dey e gi ekstra ten na a puru fu sani di osofamiriman ben libi ddon?

[Prenki na tapu bladzijde 32]

Kobroyki 10 minuut fu krin na ini sey fu wan oto kan du wondru