Yeyses libi nanga diniwroko

A e fisiti agen na tenpri

YEYSES nanga en disipri ben psa na di fu dri neti fu den na ini Betaniya sensi den ben kon fu Yerikow. Now nanga a deybroko fu munde, 10 Nisan, den de kba a pasi e go na Yerusalen. Yeyses abi angri. Te a e si fu dati-ede wan figabon di abi wiwiri, a e go drape fu si efi a abi wantu figa.

Taki na bon abi wiwiri kba na wan sani di no de normaal gi na pisiten disi bika leki fa a gwenti de, dan figa e lepi pas na ini yuni èn a de now na a kba fu maart. Ma a de krin taki Yeyses e firi taki fu di wiwiri de fruku kba na a bon, seyker yu sa abi figa kba na en. Ma a e mandi. Den wiwiri gi a bon wan bidrigi luku. Yeyses e fluku a bon nanga den wortu: „Meki fu têgo no wan sma nyan moro fu na froktu fu yu.” Na ini wan tra uitgave fu na tijdschrift disi wi sa abi belangstelling fu leri den bakapisi fu a fluku di Yeyses fluku na figabon èn san disi wani taki na agersifasi

Te Yeyses nanga en disipri e go moro fara, dan den e kon heri esi na ini Yerusalen. A e go na a tenpri di a ben ondrosuku na bakadina fu a dey a fesi. Ma tide a e opo du wan sani, neleki fa a ben du dri yari a fesi di a ben kon na a Paska ini 30 G.T. Yeyses e puru den sma di e seri èn bay sani ini a tenpri èn e dray den tafra fu den sma di e kenki moni èn den bangi fu den doyfi seriman ondro go na tapu. A no e gi pasi srefi fu wan sma tyari wan wrokosani waka psa na tenpri.

Te a e krutu den sma di e kenki moni èn e seri meti na ini a tenpri, a e taki: „Buku no skrifi: ’Mi oso den sa kari wan oso fu begi gi ala nâsi?’ Ma unu meki a tron wan fufuruman-olo.” Den de fufuruman fu di den e aksi tumusi hey prèys fu den sma di no kan tra fasi leki fu bay fu den, den meti di den abi fanowdu fu tyari ofrandi. Fu dati-ede Yeyses e si den bisnis disi leki wan fasi fu bidrigi ofu fufuru.

Te den granpristri nanga sabiman fu a Wèti nanga den prenspariwan fu na pipri e yere san Yeyses du, dan den e suku agen fasi fu kiri en. Nanga disi den e sori taki den no de fu kenki. Ma toku ete den no sabi fa den musu puru Yeyses a pasi fu di ala den sma e tan krosibey fu en fu yere en.

Boyti dyu na skinfasi, dan yu abi so srefi no-dyu sma di kon na a Paska. Den de proseliti sma, san wani taki taki den teki na fasi fu anbegi fu den dyu. Wantu Griki sma, di seyker de proseliti sma e go now na Filipus èn e aksi efu den kan si Yeyses. Filipus e go na Andreyas, kande fu aksi efu so wan miti nanga den sma disi fiti. A de krin taki Yeyses de te now ete na ini na tenpri, pe den Griki kan si en.

Yeyses sabi taki a abi wantu dey ete fu libi, èn fu dati-ede a e tyari na situwâsi fu en kon moy a fesi nanga wan eksenpre: „Na yuru doro gi na Manpikin fu libisma fu kisi glori. Fu tru, fu tru, mi e taygi unu: Efu wan aykaru no fadon na ini gron èn dede, a e tan soso wàn ay; ma efu a dede dan a e meki furu froktu.”

Wan aykaru no abi furu waarde. Ma fa a e de, efu a poti go na ini a gron èn „e dede” fu di wan kba e kon na a de fu en leki wan pikin siri? Na ay e sproyti dan èn e gro baka wan pisiten èn e tron wan tiki di e meki furu, furu aykaru. Na so tu Yeyses de soso wán volmaakti libisma. Ma efu a dede kotrow na Gado a e tron na wrokosani fu gi têgo libi na kotrow sma di abi na srefi yeyefasi fu offer den srefi leki en. So bun, Yeyses e taki: „A sma di lobi en sili srefisrefi, e pori en, ma a sma di abi ogri-ati gi en sili na ini na grontapu disi, sa kibri en gi na têgo libi.”

A de krin taki Yeyses no e denki na en srefi wwan, bika a e go moro fara fu tyari kon a krin: „Efu wan sma wani dini mi, a musu waka na mi baka, èn pe mi de, na drape mi dinari sa de tu. Efu wan sma e dini mi, na Tta sa gi en grani.” Fa disi de wan tumusi moy payman fu waka baka Yeyses èn dini en! A de na payman fu kisi a grani fu a Ppa fu kon de wán nanga Krestes na ini na Kownukondre.

Te Yeyses e denki na a hebi pina nanga takru dede di e wakti en, dan a e taki moro fara: „Now mi sili de ini bruya èn san mi sa taki? Tta, frulusu mi puru fu na yuru disi.” Efu san e wakti en ben kan tan farawe fu en! Ma nôno, so leki a e taki: „Na fu disi ede meki mi kon na a yuru disi.” Yeyses e agri nanga na heri seti fu Gado, èn so srefi tu nanga en eygi ofrandi dede. Mateyus 21:12, 13, 18, 19; Markus 11:12-18; Lukas 19:45-48; Yohanes 12:20-27.

◆ Fu san-ede Yeyses e fruwakti fu feni figa, aladi a no de a ten fu den?

◆ Fu san-ede Yeyses e kari den seriman na ini a tenpri „fufuruman”?

◆ Fa Yeyses de leki wan aykaru di e dede?

◆ Fa Yeyses e denki fu na pina nanga dede di e wakti en?