Yeyses libi nanga diniwroko

Yeyses e puru den fowtu fu en gensman kon a doro

YEYSES bruya en gensman fu kerki so kofarlek taki den no e prefuru fu aksi en noti moro. Fu dati-ede a e bigin fu puru na don fu den kon a doro. „San unu e prakseri fu na Krestes?”, a e aksi. „Na pikin fu suma a de?”

„Fu David”, den Fariseyman e piki.

Ala di Yeyses no e taki, taki David no de na grantata na skinfasi fu na Krestes ofu na Mesiyas, toku a e aksi: „Fa David kan kari en dan ondro krakti fu santa yeye [na ini Psalm 110] ’Masra’, te a e taki: ’Yehovah taygi mi Masra: „Sdon na mi reti-anu te leki mi poti yu feyanti na ondro yu futu”’? Efu David e kari en fu dati-ede ’Masra’, fa a de dan en manpikin?”

Den Fariseyman e hori den mofo, bika den no sabi den sani trutru fu kon sabi na Krestes ofu na salfuwan. Na Mesiyas no de soso wan libisma di de wan bakapikin fu David, so leki den Fariseyman kande e bribi, ma a ben de na ini heymel èn ben de moro hey leki David, ofu David Masra.

Te Yeyses dray e taki now nanga den ipi sma nanga den disipri a e warskow den gi den sabiman fu Buku èn den Fariseyman. Fu di den ’sdon tapu na sturu fu Moses’ e leri sma na wèti fu Gado, meki Yeyses e gi na tranga: „Du èn hori . . . ala san den e taygi unu.” Ma a e taki moro fara: „No du leki fa den e du, bika den e taki fa a tori de ma no e du en.”

Den de hoygriman, èn Yeyses e puru den fowtu fu den kon a doro na ini pikinmoro den srefi wortu leki wantu mun a fesi di a ben nyan na a oso fu wan Fariseyman. „ Ala wroko di den e du,” a e taki, „den e du fu sma si den.” Èn a e gi eksenpre te a e taki:

„Den e meki den pikin dosu nanga tekst di den e weri leki wan wrokosani fu kibri den kon moro bradi.” Den kofarlek pikin dosu disi, di sma e weri na a fesi-ede ofu na a anu, e abi fo pisi fu na Wèti: Exodus 13:1-10, 11-16 nanga Deuteronomium 6:4-9; 11:13-21. Ma den Fariseyman e meki den pikin dosu disi kon moro bradi fu meki sma si taki den e hori na Wèti srefisrefi.

Yeyses e go moro fara fu taki, taki den e meki den ’franya fu den krosi fu den kon moro bigi’. Na ini Numeri 15:38-40 den Israèl sma e kisi na komando fu meki franya na den krosi fu den, ma den Fariseyman abi moro bigi franya leki ala tra sma. Ala sani den e du fu sma si dati! „Den lobi na moro prenspari presi”, Yeyses e taki fu sori taki dati no bun.

Ma na wan sari sani taki na angri disi fu de prenspari ben teki Yeyses eygi disipri abra. Fu dati-ede a e gi na ray: „Ma unu no musu meki sma kari unu Rabbi, bika wàn na unu Leriman, ala di unu alamala na brada. Boyti fu dati, no kari no wan sma na grontapu unu tta, bika wàn na unu Tta, na di fu Heymel. So srefi no meki den kari unu ’tiriman’, bika wàn na unu Tiriman, na Krestes.” Den disipri musu poti na angri fu de nomru wàn na wan sey! „Na moro bigi wan na unu mindri musu . . . de unu dinari”, Yeyses e frumane.

Dan a e taki wan lo helu gi den sabiman fu Buku nanga Fariseyman, pe a e kari den ala ten baka hoygriman. Den ’e sroto na kownukondre fu heymel gi den sma’, a e taki, èn „den de den sma di e waka den oso fu den weduwe plata èn e taki langa begi fu sma ay si”.

„Helu fu unu, unu breni tyariman”, Yeyses e taki. A e krutu den Fariseyman fu di den e mankeri yeye waarde, so leki e kon na krin ini den difrenti di den e meki so maar ini sani. Den e taki fu eksenpre: ’A no de noti efu wan sma e sweri na a tenpri, ma wan sma e teki wan fruplekti na en tapu efu a sweri na a gowtu fu a tenpri.’ Fu di den poti moro krakti na tapu na gowtu fu na tenpri leki na tapu na yeye waarde fu na presi dati fu anbegi, meki den e tyari na moreel brenifasi fu den kon a krin.

Èn so leki Yeyses du kba na fesi, na so a e krutu den Fariseyman fu di den „e poti den moro prenspari afersi fu na Wèti, namku geregteghèyt nanga sari-ati nanga frutrowfasi” na wan sey èn e poti moro prakseri na a pay fu a di fu tin pisi fu spesrey di no wani taki furu.

Yeyses e kari den Fariseyman ’breni tyariman di e doro na maskita ma e swari na kameyri!’ Den e doro wan maskita puru fu na win fu den, no soso fu di na pikin meti disi de wan insekt, ma fu di na ceremonieel fasi a no krin. Na poti di den e poti den moro prenspari afersi na wan sey yu kan teki gersi nanga a swari fu wan kameyri, so srefi wan meti di na ceremonieel fasi no krin. Mateyus 22:41–23:24; Markus 12:35-40; Lukas 20:41-47; Leviticus 11:4, 21-24.

◆ Fu san-ede den Fariseyman e hori den mofo te Yeyses e aksi den san David ben taki na ini Psalm 110?

◆ Fu san-ede den Fariseyman e meki den pikin dosu fu den nanga tekst èn den franya fu den krosi fu den kon moro bigi?

◆ Sortu ray Yeyses e gi en disipri?

◆ Sortu difrenti na ini sani den Fariseyman e meki so maar, èn fa Yeyses e krutu den fu na poti di den e poti den moro prenspari afersi na wan sey?