Yeyses libi nanga diniwroko

Te Krestes e kon ini Kownukondre-makti

YEYSES de ete nanga en apostru na tapu na Olèyfbergi. Leki wan piki tapu na aksi fu den fu wan marki fu en denoya èn a bosroyti fu na seti fu sani, a e fruteri den now na lasti wan fu wan lo fu dri agersitori. „Te na Manpikin fu libisma sa kon na ini en glori, èn ala engel nanga en,” so Yeyses e bigin, „dan a sa teki presi na tapu en glori kownusturu.”

Libisma no kan si engel na ini a heymel glori fu den. Na so na kon fu na Manpikin fu libisma, Yeyses Krestes, makandra nanga den engel musu de wan sani di libisma ay no kan si. Na kon disi e feni presi ini na yari 1914. Ma nanga sortu prakseri? Yeyses e tyari kon a krin: „Èn ala nâsi sa tyari kon na fesi en, èn a sa prati den sma fu makandra, so leki wan herder e prati den skapu fu den bokoboko. Èn den skapu a sa poti na en reti-anu sey, ma den bokoboko na en kruktu-anu sey.”

Ala di Yeyses e fruteri san sa psa nanga den sma di den prati poti na a sey fu bun-ati, a e taki: „Dan na kownu sa taygi den di de na en reti-anu sey: ’Un kon, un di mi Tta blesi, teki na kownukondre di sensi na poti fu na fondamenti fu grontapu ben seti gi unu leki gudu.’” Den skapu no sa tiri nanga Krestes na ini heymel ma sa kisi na Kownukondre leki gudu na a fasi disi taki den e tron en onderdaan. „Na poti fu na fondamenti fu na grontapu” ben feni presi di Adam nanga Eyfa ben bigin meki pikin di ben kan nyanbun fu na seti fu Gado fu bay na libismafamiri kon fri.

Ma fu san-ede den prati den skapu poti na a reti-anu sey fu bun-ati fu na Kownu? „Bika mi ben abi angri”, na Kownu e piki, „èn unu ben gi mi wan sani fu nyan; watra ben kiri mi èn unu ben gi mi wan sani fu dringi. Mi ben de wan vreemde sma èn unu ben teki mi na oso; nanga soso skin, èn unu ben weri krosi gi mi. Mi ben kon siki èn unu ben sorgu gi mi. Mi ben de na dungru-oso èn unu ben kon na mi.”

Fu di den skapu de na grontapu, meki den wani sabi fa den ben kan du den sortu tumusi bun wroko disi gi na heymel Kownu fu den. „Masra, oten wi ben si yu nanga angri èn gi yu nnyan,” den e aksi, „ofu taki watra ben kiri yu èn gi yu wan sani fu dringi? Oten wi ben si yu leki wan vreemde sma èn teki yu na oso. Ofu nanga soso skin èn weri krosi gi yu? Oten wi ben si yu siki ofu na ini dungru-oso èn go na yu?”

„Fu tru, mi e taygi unu”, na Kownu e piki, „fu so fara unu ben du en gi wan fu den moro pikinwan fu den brada disi fu mi, unu ben du en gi mi.” Den brada fu Krestes na den memre fu na fikapisi fu den 144.000 di de ete na grontapu, di sa tiri nanga en na ini heymel. Èn fu du bun na den, so Yeyses e taki, de na srefi leki du bun na en.

Dan, na Kownu e taki nanga den bokoboko. „Komoto gwe fu mi, unu di den fluku, na ini na têgo faya di seti gi Ddibri nanga en engel. Bika mi ben abi angri, ma unu no ben gi mi noti fu nyan, èn watra ben kiri mi, ma unu no ben gi mi noti fu dringi. Mi ben de wan vreemde sma, ma unu no ben teki mi na oso; nanga soso skin, ma unu no ben weri krosi gi mi; siki èn na ini dungru-oso, ma unu no ben sorgu gi mi.”

Ma den bokoboko e kragi: „Masra, oten wi ben si yu nanga angri ofu taki watra e kiri yu ofu leki vreemde sma ofu nanga soso skin ofu siki ofu na ini dungru-oso èn no ben dini yu?” Den bokoboko e kisi wan takru krutu tapu na srefi fondamenti leki di den skapu ben kisi wan bun krutu. „Fu so fara unu no ben du en gi wan fu den moro pikinwan [fu mi brada],” Yeyses e piki, „unu no ben du en gi mi.”

Krestes denoya na ini Kownukondre makti, leti bifo na kba fu na ogri seti fu sani ini na bigi banawtu, sa de sobun wan ten fu krutu. Den bokoboko „sa go na ini na têgo koti puru, ma den regtfardikiwan [den skapu] na ini na têgo libi”. Mateyus 25:31-46; Openbaring 14:1-3.

◆ Fu san-ede na denoya fu Krestes musu de wan sani di no de fu si èn sortu wroko a e du na a ten dati?

◆ Na sortu fasi den skapu e kisi na Kownukondre leki gudu?

◆ Oten „na poti fu na fondamenti fu na grontapu” ben feni presi èn fu san-ede na a ten dati?

◆ Tapu gron fu san meki sma e kisi krutu leki skapu ofu bokoboko?