Yeises libi nanga diniwroko

Wan kesekese e sutu ede kon

BIGIN fu a neti, Yeises ben gi wan tumusi moi leri fu dini nanga sakafasi, fu di a ben wasi den futu fu den apostru fu en. Baka dati a ben poti a memrefesa kon leki wan nyun sani fu memre en dede di ben e kon krosibei. Now, spesrutu te wi luku san psa di dyonsro, dan wan sani e psa di e gi fruwondru. Den apostru fu en e kon na ini wan faya kesekese suma fu den de leki fa a sori, a moro bigiwan! Leki fa a sori, dan disi de wan pisi fu wan strei di ben de langa kba.

Tyari kon na prakseri, taki baka di Yeises skin ben kenki na tapu a bergi, den apostru ben strei sortu wan fu den ben de a moro bigiwan. Boiti fu dati, Yakobus nanga Yohanes ben aksi fu abi wan moro hei posisi na ini a kownukondre, wan sani di ben tyari moro kesekese kon a mindri den apostru. Fa a ben musu meki Yeises firi sari fu si den e meki trobi baka na a lasti neti di a de nanga den. San a e du?

Na a presi fu piri-ai gi den apostru fu a fasi fa den e tyari den srefi, dan nanga pasensi Yeises e taki-go-taki-kon baka nanga den: „Den kownu fu den nâsi e tiri na den tapu, èn den di abi makti na den tapu, den e kari Bunsma. Ma unu no musu de so. . . . Bika suma moro bigi, a sma di didon na tafra ofu a sma di e dini? A no de a sma di e didon na tafra?” Ala di a e memre den morofara na a eksenpre fu en, a e taki: „Ma mi de na unu mindri leki a sma di e dini.”

Ala di den apostru ben abi onvolmaaktifasi, toku den ben tan na Yeises na ini den tesi fu en. Fu dati-ede a e taki: „Mi e sroto wan frubontu nanga unu, neleki fa mi Tata sroto wan frubontu nanga mi, fu wan kownukondre.” A persoonlijk frubontu disi, a mindri Yeises nanga den loyaal bakaman fu en e meki den kon na ini wánfasi nanga en fu teki prati na ini en Kownukondre makti. Soso wan skotu nomru fu 144.000 sma e teki poti te fu kba na ini a frubontu disi fu wan kownukondre.

Ala di den apostru e kisi a tumusi moi fruwakti disi fu teki prati nanga Krestes na ini a kownukondre makti, toku den swaki na yeyefasi na a momenti disi. Yeises e taki: „A neti disi unu alamala sa nakifutu na mi”. Baka di Yeises taigi Petrus taki a begi fu a bun fu en, dan a e gi en tranga: „Te yu drai go kba, power dan fu yu sei den brada fu yu.”

„Pikin-nengre”, na so Yeises e fruklari, „wan syatu pisiten mi de ete nanga unu. Unu sa suku mi; èn so leki fa mi taigi den dyu: ’Pe mi e go, unu no kan kon’, na so mi e taigi unu na a momenti disi tu. Mi e gi unu wan nyun gebod, fu unu lobi makandra; neleki fa mi lobi unu, na so srefi unu musu lobi makandra. Nanga disi ala sma sa sabi taki unu de mi disipri, efu unu abi lobi gi makandra.”

„Masra pe yu e go?”, Petrus e aksi.

„Pe mi e go, yu no kan waka kon now na mi baka”, Yeises e piki „ma bakaten yu sa waka kon.”

„Masra fu san-ede mi no kan waka kon now na yu baka?”, Petrus wani sabi. „Mi sa gi mi sili fu yu ede.”

„Yu sa gi yu sili fu mi ede?”, Yeises e aksi. „Fu tru mi e taigi yu: Tide ete, iya, a neti disi, bifo wan kakafowru bari tu tron, yoisti yu sa taki dri tron taki yu no sabi mi.’

„Srefi awasi mi ben musu dede nanga yu,” Petrus e protesteer, „mi no sa taki noiti taki mi no sabi yu.” Èn ala di ala den tra apostru e taki a srefi sani, toku Petrus e dyaf: „Awasi ala tra sma e nakifutu na yu, noiti sani sa meki mi nakifutu!”

Te Yeises e sori go na a ten di a ben seni den apostru sondro portmoni nanga nyansaka go na ini a preikiwroko na ini Galileya, dan a e aksi: „Yu ben misi wan sani na a ten dati?”

„Nôno!”, den e piki.

„Ma now, meki a sma di abi wan portmoni, teki en, èn so srefi wan nyansaka”, a e taki, „èn meki a sma di no abi feti-owru, seri en tapusei-krosi èn bai wan. Bika mi e taigi unu taki a sani disi di skrifi, musu kontru na ini mi, namku: ’Èn den ben teri en na mindri den kruktudu sma.’ Bika san abi fu du nanga mi, e feni presi now.”

Yeises e sori tapu a ten te den sa anga en na a postu makandra nanga den ogriwan ofu kruktuduwan. A e sori so srefi taki baka dati den bakaman fu en sa musu kakafutu gi hebi frufolgu. „Masra, luku! dyaso tu feti-owru de”, den e taki.

„A nofo”, a e piki. So leki wi sa si, dan a abi di den abi den feti-owru na den, e gi Yeises esi-esi na okasi fu leri den ete wan prenspari les. Mateyus 26:31-35; Markus 14:27-31; Lukas 22:24-38; Yohanes 13:31-38; Openbaring 14:1-3.

◆ Fu san-ede a kesekese fu den apostru e gi so meni fruwondru?

◆ Fa Yeises e bigin fu lusu a kesekese?

◆ San e du kon nanga yepi fu a frubontu di Yeises sroto nanga den disipri fu en?

◆ Sortu nyun gebod Yeises e gi, èn o prenspari a de?

◆ Fa Petrus e sori bigifasi, èn san Yeises e taki?

◆ Fu san-ede den rai fu Yeises fu tyari wan moni nanga wan nyansaka e difrenti fu a wan di a ben gi na fesi?