Na gudu fu wi, wan disiten diniwroko fu glori
„Wi abi na gudu disi na ini tokotoko patu, so taki na krakti di e psa ala marki fu san de normaal, ben sa de fu Gado èn no ben sa komoto fu wi srefi.” — 2 KORENTE SMA 4:7.
1. (a) Sortu glori gudu wi kan abi, èn fu san-ede? (b) San na beibri e taki fu na fasi fa na wèti fu Moses ben gi abra?
NA DINIWROKO fu na preiki fu „na bun nyunsu disi fu na kownukondre” ini na bosroiti fu na seti fu sani de fu tru wan gudu, wan tumusi warti sani. Fu di Yehovah na wan Gado fu glori, dan na diniwroko fu Gado na wan diniwroko fu glori, sobun wan gudu (Mateyus 24:14; 2 Korente sma 3:18–4:1). Fu na fasi fa na wèti fu Moses ben gi abra nanga glori, den e skrifi ini Exodus 34:29, 30: „Now a ben psa di Moses ben saka na bergi Sinaï, taki den tu tafra fu na Kotoigi ben de na ini na anu fu Moses, èn Moses no ben sabi taki na skin fu en fesi ben koti faya, fu di a ben taki nanga [Yehovah]. Di Aäron now nanga ala den manpikin fu Israèl ben si Moses, we, luku! na skin fu en fesi ben koti faya èn den ben kon frede fu go krosibei fu en.”
2. San na diniwroko fu na wèti fu Moses ben prenki a fesi, èn fu san-ede na diniwroko di ben du bakaten abi moro glori?
2 Vers 32 te nanga 34 e taki morofara: „Baka dati ala manpikin fu Israèl ben kon krosibei fu en èn a ben gi den na komando morofara fu ala sani san Yehovah ben taki nanga en na tapu na bergi Sinaï. Te Moses ben tapu fu taki nanga den, a ben gwenti fu tapu en fesi nanga wan duku. Ma te Moses ben go na Yehovah fesi fu taki nanga en, dan a ben puru na duku, te leki a ben go na dorosei.” Na diniwroko fu na wèti fu Moses ben de wan prenki na fesi fu na diniwroko fu na nyun frubontu nanga yepi fu na Mindriman, Yeises Krestes. Efu sobun na fosi diniwroko ben abi glori, o moro furu dan na baka ten diniwroko, „a gi fu na yeye”, musu psa en ini glori! (2 Korente sma 3:7-11) A abi moro glori fu di a abi wan glori di e tan, èn den bakaman fu Yeises Krestes e teki prati na ini. — Rome sma 12:11.
3. (a) San musu de na kofal ini na tori fu na diniwroko fu Yehovah Kotoigi, ma fu san-ede furu sma no e frustan disi? (b) San ben buweisi taki Moses ben de na ini a glori denoya fu Yehovah?
3 Fu dati-ede meki na diniwroko fu Yehovah Kotoigi de wan glori diniwroko. Ma disi na wan sani di furu sma, di na falsi relisi breni den, no e frustan. Ala di furu sma abi na beibri èn e leisi dati tu, toku den no abi ’ai di e si’ (2 Petrus 1:5-9). Fu puru na duku na fesi den ai, dan ini bribi den musu drai go na Yehovah Gado, bika di Moses ben go na fesi fu Yehovah, a ben puru na duku di ben tapu en fesi gi den dyu (2 Korente sma 3:16). Den Israèl sma ben frede fu si na glori fu Gado na a fesi fu na mindriman fu den èn ben aksi efu na glori dati ben sa kan teki puru na den ai nanga yepi fu wan duku di e tapu en. So leki wan sani di e skèin faya go ini dungru baka te faya skèin a tapu, na so Moses, na mindriman fu den, ben skèin na glori fu Yehovah go baka, so taki na buweisi ben gi taki en ben go na fesi fu Yehovah.
4. Fa sma di no e bribi na ini a ten disi e du neleki den dyu fu owruten, ma san den bakaman fu na Moro Bigi Moses no e frede?
4 Moses ben de wan prenki a fesi fu Gado bigi Profeiti, Yeises Krestes. Neleki a sma di e agersi en, na so na Moro Bigi Moses no frede fu si Gado glori langalanga. Ma te na a dei fu tide sma di no e bribi èn di Ddibri nanga en Babilon relisi breni den ai e du neleki den dyu fu owruten èn e weigri fu si na glori fu na Moro Bigi Moses, Yeises Krestes, ofu fu frustan en (2 Korente sma 3:12-15). Toku, den tru bakaman fu en no e frede fu luku na glori fu Yehovah di skèin kon baka so leki dati e skèin komoto fu na fesi fu Yeises Krestes. Fu di den kon fri fu na krakti fu Babilon, meki den e kisi deki-ati fu panya Gado glori. „Sobun, fu di wi”, Paulus ben skrifi, „abi so wan howpu, wi e kobroiki bigi fri fu taki sondro frede.” — 2 Korente sma 3:12.
Sma di e skèin Gado glori baka
5. Fa wi kan skèin na glori fu Gado èn de neleki Moses di ben de na fesi Yehovah na tapu na bergi?
5 Yeises ben puru na duku fu di a tyari kon a krin èn a meki kon bekenti na wi suma na Yehovah Gado (Yohanes 1:14, 17, 18). Sobun wi musu skèin, èn na so fasi na glori fu Gado kan skèin go doro ini „na glori bun nyunsu di e go fu Krestes, di de na prenki fu Gado”, a bun nyunsu di wi musu meki bekenti. A skèin go na doro fu en na „a glori sabi fu Gado nanga yepi fu na fesi fu Krestes”. Wi musu skèin na glori disi baka fu di wi e taki fu na glori fu Yehovah èn na glori fu En Kownukondre di en Manpikin e tiri na ini (2 Korente sma 4:4-6). Neleki di Moses ben de na tapu na ede fu na bergi na Yehovah fesi, na so den Kotoigi fu En na grontapu no e tapu na ati fu den nanga wan duku gi na glori fu Yehovah. Den e feni na glori moi di e skèin kon fu na fesi fu na Manpikin èn Kownu fu Yehovah, Yeises Krestes. Fu dati-ede, den musu skèin na leti disi fu na glori fu Gado go na doro na tra sma.
6. Fa Paulus e taki fu wi diniwroko fu glori na ini 2 Korente sma 3:18, èn fa wi leki bakapisi fu dati „e kenki”?
6 Gi ala konpe Kotoigi fu Yehovah glori, na apostru Paulus ben taki en so nanga den wortu disi: „Èn wi alamala, ala di wi e skèin na glori fu Yehovah neleki spikri nanga fesi di no tapu, e kenki kon kisi na srefi prenki fu glori te miti glori, na a srefi fasi leki fa Yehovah, na Yeye e du” (2 Korente sma 3:18). O moro wi e kisi fu na glori fu na leti disi, o moro wi musu skèin en èn o moro wi e kenki leki wan bakapisi fu dati. Na yeye e kon nyun baka èn e kon bun baka, ala di leki fa a sori kenki no sa de fu si ini wi skin ofu tapu wi fesi. A de na leti fu na glori boskopu di wi e skèin go a doro so taki kenki e tyari kon na ini wi. Na a srefi ten te wi e meki muiti fu du na diniwroko di de wan grani èn di de ini na panya fu na glori leti gi trawan, dan a libi fu wi e kenki so taki moro nanga moro wi e kon gersi Krestes. — Hebrew sma 13:15.
7. Fu sortu kontren tru glori e komoto, èn fa wi kan sori na glori dati?
7 Ala den sortu kenki disi ben kon fu na yeye ofu wroko krakti fu Gado. Den leriman fu na krestenhèit no e skèin na glori fu Yehovah, ma musu meki kobroiki fu na sori fu wan „show” fu kan brenki. Na glori no de na glori fu wi, èn wi no abi fu weri gi wi srefi tumusi moi kerki-krosi fu zijde, nanga gowtu brokaat, di meki moi nanga brenkibrenki diri ston. Trutru glori de wan sani di e komoto fu na yeye fu Gado èn a e tyari kon a doro fu di na glori kotoigi e gi di e go fu Yehovah, na Yeye.
Alamala de sma di e tyari leti èn di kisi grani
8, 9. Sortu deki-ati Paulus ben gi wi na ini 2 Korente sma 4:1, 2, èn sortu fasti bosroiti disi e aksi fu wi sei?
8 Ini 2 Korente sma 4:1, 2 wi e leisi: „Fu dati-ede, fu di wi abi na diniwroko disi akruderi na sari-ati di den ben sori wi, wi no e lasi-ati; ma wi broko nanga den bakabaka sani fu san sma musu firi syen, fu di wi no e waka nanga triki èn no e falsi na Wortu fu Gado, ma fu di wi e meki na waarheid bekenti, meki wi e rikomanderi wi srefi na ibri libisma konsensi na fesi na ai fu Gado.” Gado sori wi sari-atifasi fu di a gi wi wan diniwroko fu du. Disi na wan frumane fu gi wi tranga fu go doro nanga deki-ati, èn disi wi sa du tu! Fu di wi abi a grani taki wi kisi leti fu Gado Wortu, meki wi abi na prekti fu skèin dati go na trawan. — Teki gersi Mateyus 5:14-16.
9 Sani fu san sma e firi syen, so leki fufuru, den e kibri nanga yepi fu na kori di den e kori èn e bidrigi sma. Ma yu no abi reide fu syen, bika na boskopu fu wi èn wi wroko no de wan bidrigi sani ma den de regtfardiki èn soifri. Fu dati-ede wi kan skèin ala na glori fu na leti. Wi no e handri Gado Wortu na wan bidrigifasi. Te wi ben sa du dati, dan dati ben sa wani taki taki wi e handri en na wan gridifasi fu wi srefi kon moro betre nanga yepi fu dati èn kisi glori, winimarki nanga grontapu makti gi wi srefi èn fu lon komoto gi gens èn frufolgu fu na sei fu grontapu. Den wan di no frede fu go na Yehovah fesi sondro fu tapu den fesi èn di e luku dûn go na ini a switi leti fu na waarheid, no sa frede tu fu si na frantiwortu fu den na ondro ai. Den sa sorgu taki den e skèin na leti go baka.
10. Fu san-ede a no de na fowtu fu Yehovah Kotoigi te den ai fu son sma neleki wan duku tapu gi na bun nyunsu fu na Kownukondre?
10 Te sma de di den ai tapu neleki nanga wan duku gi na bun nyunsu fu na Kownukondre, dan dati no de na fowtu fu Yehovah Kotoigi ma den eigi fowtu. Gado no e kibri na bun nyunsu fu na Kownukondre. Na preikiwroko fu Yehovah Kotoigi di e du na a heri grontapu de bekenti na ala sei. Neleki na apostru Paulus dan den kan taki tu: „Disi no du na ini wan farawe uku.” A bun nyunsu preiki trutru, so leki a ben skrifi, ’ini heri na mekisani di de na ondro hemel’. — Tori fu den Apostru 26:26; Kolose sma 1:23.
11. Fu san-ede na glori bun nyunsu tapu neleki nanga wan duku gi so furu sma fu na libismafamiri?
11 Den sma di na bun nyunsu fu Gado Kownukondre kibri gi den, de gensman, den wan di Ddibri breni den. (Teki gersi Mateyus 12:30.) Efu den no lusu den srefi fu na falsi relisi èn komoto fu den trapu fu Ddibri, dan den fiti fu kisi pori. Ondro krakti fu ogri yeye den sortu sma disi srefi e hari wan duku kon tapu den ai, bika na apostru Paulus e taki na ini 2 Korente sma 4:3-5: „Efu trutru now wan duku de di e tapu na bun nyunsu di wi e meki bekenti, dan a tapu gi den wan di o pori, a mindri den di na gado fu na seti fu sani disi breni na yeye fu den sma di no e bribi, so taki na brenki leti fu na glori bun nyunsu fu na Krestes di de a prenki fu Gado, no ben sa skèin psa. Bika a no wi srefi, wi e preiki, ma Krestes Yeises wi e preiki leki Masra, èn wi srefi leki den srafu fu unu fu Yeises ede.”
12. Fa Gado pipri e du na tapu den wortu fu 2 Korente sma 4:6, kontrari den wan di breni na yeyefasi?
12 Den wan di breni na frustanfasi, no wani bribi. Nanga a bribi di den no e bribi den e opo den frustan meki den ogri yeye boro go na ini (1 Timoteyus 4:1). Den no kan si na glori fu Yehovah ofu na skèin kon baka fu en komoto fu na fesi fu Yeises, na moro Bigi Moses. Yehovah pipri e fanga a glori leti fu na beibri èn e skèin en go na trawan. Ala dienstknekti fu Gado de sobun sma di e tyari leti, èn Gado e gi na komando fu skèin. Gado pipri musu skèin na leti baka èn den musu skèin na tapu trawan di de na ini dungru èn di de na ini kofar fu kisi pori. Disi de neleki fa 2 Korente sma 4:6 e taki: „Bika na Gado de na sma di taki: ’Meki na leti skèin komoto fu na dungru’, èn a skèin na den ati fu wi tapu fu meki den kisi leti nanga na glori sabi fu Gado nanga yepi fu na fesi fu Krestes.” Nanga disi na ini prakseri meki Yehovah Kotoigi e gi yesi na a komando fu Gado èn den e meki den leti skèin gi trawan, fu Gado kisi glori.
Wan gudu di diri na ini patu di safu
13. San na a bakapisi te na blesi diniwroko di wani taki taki sma e de tyariman fu leti, e gi na mekisani fu skin nanga brudu?
13 Ini a tori fu na tumusi bigi dienstgrani disi a de tumusi prenspari taki den tyariman fu leti sori taki den de warti fu abi na leti fu di den e kibri den soifri-retifasi na Yehovah. Na fruwondru dienstgrani disi Gado no gi na den santa engel, di ben angri fu luku ini den sani disi, ma na blesi dienstgrani disi a ben gi na mekisani fu skin nanga brudu (1 Petrus 1:12). Disi a du fu gi glori na en eigi krakti a mindri fu swaki mekisani. So leki fa 2 Korente sma 4:7 e taki: „Ma wi abi na gudu disi na ini tokotoko patu, so taki na krakti di e psa san de normaal, ben sa kon fu Gado èn no ben sa kon fu wi srefi.”
14. (a) San na a ’gudu disi ini tokotoko patu’? (b) Fu san-ede Moses nanga Yeises de koni eksenpre gi wi ini a tori fu so wan gudu?
14 Na ini owruten den ben kobroiki patu fu kibri warti sani. San na a diri gudu disi di Yehovah Kotoigi abi na ini safu tokotoko patu — di de den srefi leki swaki mekisani di meki fu na doti fu na gron? Na gudu disi a no soso na leti di skèin na ini den ati. A de na diniwroko fu na leti dati, na diniwroko ofu dienst, di musu du na ini den skin fu doti. Na wroko wani taki taki den musu meki na leti, di Gado meki skèin na tapu den ati, skèin go na doro. Na diniwroko disi na wan bun gudu, fu di a de na warti dienstgrani di no soso na salfu fikapisi fu na „pikin ipi” ma so srefi na „bigi ipi” „tra skapu” fu na Tumusi Bun Herder, Yeises Krestes, abi wan prati na en (Lukas 12:32; Yohanes 10:14-16; Openbaring 7:9). Moses nanga na sma di a e prenki, Yeises Krestes, de koni eksenpre gi wi, so taki wi e kisi yepi fu poti wi ati tapu na gudu disi fu dienst fu Gado, „bika pe yu gudu de, na drape yu ati sa de tu”. — Mateyus 6:19-21; Hebrew sma 11:26.
15, 16. (a) Fa na krakti di e psa san de normaal, e sori taki a komoto fu Gado èn no fu wi srefi? (b) Fu san-ede ala na gens di grontapu e gens wi no sa man fu broko den tokotoko patu fu Gado?
15 Fa na krakti di e psa na sani di de normaal, sori dan taki a kon fu Gado èn no fu wi srefi? Na a fasi disi: Den sortu safu, tokotoko patu disi leki wi, di abi na warti diniwroko opdragti disi, no de warti fu en èn noiti no ben sa kan teki so wan grani gi wi srefi. Boiti fu dati, leki Kotoigi fu Yehovah wi e miti ala sortu druk fu feianti di e abi leki marki fu meki wi broko saka èn broko wi soifri-retifasi so taki wi no fiti fu tyari na frantiwortu fu na opdragti di Yehovah gi wi. Sobun, a musu de na krakti fu na Sma di gi unu na opdragti èn di e yepi wi fu kakafutu gi hebi meshandri fu na sei fu na grontapu disi èn fu hori fasti na wi opdragti èn sori wi srefi warti fu den hori wi ini en diniwroko. Fu dati-ede ala gens fu na sei fu na grontapu toku no sa man fu broko Gado tokotoko patu èn fufuru den fu na diri gudu, bika na ini 2 Korente sma 4:8-12 tanapu:
16 „Na ala fasi den opo kon feti doronomo nanga wi, ma toku no na so wan fasi taki den e drifi wi go na ini wan naw so taki wi no kan buweigi moro; wi no sabi moro san fu du, ma no krinkrin sondro wan pasi fu boro komoto; den e frufolgu wi, ma den no libi wi a baka sondro yepi; den e trowe wi na gron, ma no wai puru. Ala ten na ala presi na ini wi skin wi e frudrage na fasi fu handri di e tyari dede kon di Yeises ben kisi, so taki na libi fu Yeises so srefi kan meki kon a krin na ini wi skin. Bika wi di e libi, e kon tanapu alaten na fesi dede fu Yeises ede, so taki so srefi na libi fu Yeises kan kon a krin na ini wi skin di sa dede. Fu dati-ede dede e wroko na ini wi skin, ma libi [nanga yepi fu na preiki fu na bun nyunsu fu na Kownukondre] na ini yu.”
Na bigi ipi e si „na gudu disi” leki wan diri sani
17. Fa na bigi ipi e si na waarde fu „na gudu disi” fu na diniwroko fu glori?
17 „Dede [de] e wroko na ini wi, ma na ini unu na libi.” Na fruklari disi fiti Kresten di salfu nanga yeye. Toku a kan meki wi prakseri heri bun na a matifasi fu na salfu fikapisi fu Gado nanga na bigi ipi fu tra skapu. Den salfuwan sabi taki te fu kba den musu tyari na grontapu libifasi fu den kon na wan kba ini dede soleki Yeises ben du, ma den abi konpe di den kan prati na glori gudu fu diniwroko nanga den fu den yepi den fu du na moro bigi pisi fu na preiki wroko fu na bun nyunsu fu na Kownukondre. Neleki na salfu fikapisi, na so a bigi ipi tra skapu ini a ten disi, sabi taki a wan enkri gudu di sa psa na faya feti fu Armagedon èn di sa tan te na ini na nyun grontapu, sondro taki faya bron èn pori en, na a gudu disi fu na blesi diniwroko, na diniwroko gi Yehovah Gado èn en glori Kownu, Yeises Krestes. Na bigi ipi sa hori na dati èn du dei nanga neti santa diniwroko gi Gado na ini en tenpri. — Openbaring 7:15.
18. (a) San sa psa heri-esi nanga na falsi glori fu na grontapu disi? (b) Sortu „glori” Yeises ben poti na wan sei, èn nanga sortu fasi fu handri a ben kisi wan tumusi bun glori?
18 Dyonsrodyonsro Gado sa meki wan kba kon na a falsi glori fu na disiten takru seti fu sani — wan „glori” di e tan go doro fu sensi na ten di Satan Ddibri ben teki Yeises go na tapu na hei bergi èn ben sori en ala kownukondre fu grontapu èn „na glori fu den” (Lukas 4:5, 6). Yeises ben weigri na glori di komoto fu so wan fonten èn ben tan waka na grontapu na baka wan libifasi di Gado ben feni bun. Fu dati-ede den ben sa poti kownu-ati na tapu en ede nanga wan glori di hei srefi moro leki na glori di en, leki na wan enkri gebore Manpikin fu Gado, ben abi na ini hemel bifo a ben kon du na grontapu wroko di Yehovah ben taigi en fu du. — Yohanes 5:36; 17:5; Filipi sma 2:9-11.
19. Sortu bigi grani fu diniwroko e doro en kba, èn san na wi fasti bosroiti ini a tori disi?
19 Na kba fu na Ddibri seti fu sani disi, di den taki a fesi fu en, no sa kon bifo na Kownukondre Kotoigiwroko du na a heri grontapu leki wan bigi èn lasti pisi fu na aktiviteit fu den bakaman fu Yeises Krestes, den Kotoigi fu Yehovah (Mateyus 24:14). Na Kownukondre Kotoigiwroko du now drikwart yarihondro kba èn so leki den sani di e psa na ini grontapu ini wi ten e sori, dan na kba di den ben taki a fesi fu en musu de krosibei. Fu dati-ede meki na bigi grani fu abi wan prati na a diniwroko fu a santa tiri, fu a kownukondre musu doro en kba (Mateyus kapitri 24, 25; Markus kapitri 13; Lukas kapitri 21). Na grani fu wi fu abi wan prati na a kotoigiwroko na a heri grontapu di abi fu du nanga na Kownukondre di opo, de trutru wan glori gudu di den Kotoigi fu Yehovah, leki bakaman fu en Manpikin, Yeises Krestes, di poti na tapu na kownusturu e si leki wan diri sani. A de na faya angri fu den fu hori fasti na dati te leki na Kownukondre kotoigiwroko doro en kba èn na almakti Gado, Yehovah, poti wan kownu-ati na tapu na universeel situwâsi nanga na kotoigi di en srefi o gi taki en na a Universeel Soeverein. — Sefanya 3:8.
San yu ben sa piki?
◻ Fu san-ede na diniwroko fu Yehovah Kotoigi de wan glori diniwroko?
◻ Fu san-ede a bun nyunsu tapu neleki nanga wan duku gi so meni sma na ini a ten disi?
◻ San na ’a gudu disi na ini tokotoko patu’?
◻ Fu san-ede Gado kobroiki safu, tokotoko patu gi na diri diniwroko fu en?
◻ Sortu waarde a pipri fu Gado e si ini „na gudu disi”, èn fu san-ede?
[Prenki na tapoe bladzijde 29]
Na glori fu Gado e skèin komoto fu na fesi fu Yeises Krestes, na Bigi Moses. Yehovah Kotoigi abi na grani fu fanga Gado en glori leti fu na beibri èn skèin en go na trawan baka