Yu e warderi san Gado du?

„Efu wan sma wani kon na mi baka, dan a no musu wani sabi en srefi èn teki en pina-udu dei na dei èn waka doronomo na mi baka.” — LUKAS 9:23.

1. San na wantu fu den tumusi moi presenti di Gado gi?

WI ABI fu taki Gado tangi taki wi e libi. Efu a no ben meki a libismafamiri, dan noiti wi ben sa gebore. Ma Gado ben meki moro leki soso a libi. A meki unu na so wan fasi taki wi kan nyanbun fu furu sani: a tesi fu nyanyan, a waran fu a leti fu a son, a moi babari fu poku, a switi kowru fu wan pikin dreitendei, a safufasi fu lobi. Moro ete, Gado ben gi unu wan frustan èn a lostu fu kon sabi sani fu Gado. A ben meki den skrifi a beibri na ondro krakti fu en yeye, èn a beibri e gi wi gosontu tiri, a e sori wi fa fu libi wan moro koloku libi èn a e gi a howpu fu têgo libi na ini Yehovah regtfardiki nyun grontapu. Gado e gi so srefi en santa yeye, a yepi fu a gemeente pe yu de èn owru man nanga uma di abi lobi èn di kan yepi unu fu tan steifi ini en dienst. — Genesis 1:1, 26-28; 2 Timoteyus 3:15-17; Hebrew sma 10:24, 25; Yakobus 5:14, 15.

2. (a) San na a moro prenspari sani di Gado du gi wi? (b) Wi kan frudini frulusu nanga yepi fu wroko?

² Boiti ala den sani dati, Gado seni en eigi fosi gebore Manpikin fu fruteri wi moro fu san a Tata e fruwakti fu wi èn fu gi wan „frulusu nanga yepi fu wan frulusu-paiman” gi ibriwan sma di wani teki disi (Efeisia sma 1:7; Rome sma 5:18). A manpikin dati, Yeises Krestes, ben taki: „Bikasi Gado ben lobbi ala soema so, tee a gi da wan lobbi Pikien vo hem abra; vo ala soema, disi de bribi ini hem, no moe go lasi, ma vo dem habi da liebi vo teego” (Yohanes 3:16, Njoe Testament nanga dem Psalm). A frulusu di a frulusu-paiman dati tyari kon, de fu so wan waarde di e psa ala sani taki a no man srefisrefi taki wan sma kan du wroko fu frudini en, seiker no den wroko di sma ben du fositen na ondro na wèti fu Moses. Paulus ben skrifi sobun: „Den e fruklari wan sma regtfardiki no nanga yepi fu wroko fu a wèti, ma soso nanga yepi fu bribi ini Krestes Yeises.” — Galasia sma 2:16; Rome sma 3:20-24.

Bribi nanga wroko

3. San Yakobus ben taki fu bribi nanga wroko?

³ Frulusu e kon nanga yepi fu bribi, ma bribi nanga warderi gi ala san Gado du, musu buweigi wi fu du wan sani. A musu buweigi wi fu du sani di e sori wi bribi. Yakobus, na afubrada fu Yeises, ben skrifi: „Bribi, efu a no abi wroko, de ini en srefi wan dede sani.” A ben taki moro fara: „Sori mi yu bribi aparti fu den wroko, èn mi sa sori yu mi bribi nanga yepi fu den wroko fu mi.” Yakobus ben sori taki srefi ogri-yeye ’e bribi èn e beifi’, ma a de krin fu si taki ogri-yeye no e du den wroko fu Gado. Na a tra sei, Abraham ben abi bribi nanga wroko. ’En bribi ben wroko makandra nanga den wroko fu en èn en bribi ben kon volmaakti nanga yepi fu den wroko fu en.’ Yakobus ben taki ete wan tron: „Bribi sondro wroko na wan dede sani.” — Yakobus 2:17-26.

4. San Yeises ben taigi den sma fu du, di wani waka na en baka?

⁴ Yeises tu ben sori tapu a prensparifasi fu yoisti wroko, fu di a e taki: „Meki . . . yu leti skèin gi den sma, so taki den mag si den moi wroko fu yu, èn gi glori na yu Tata di de na ini hemel.” Efu wan sma wani kon na mi baka, a no musu wani sabi en srefi èn teki en pina-udu dei fu dei èn waka doronomo na mi baka.”a Efu wi „no wani sabi wi srefi”, dan wi e poti furu sani di wi srefi ben sa wani, na wan sei. Wi e erken taki wi abi fu gi Gado tangi fu ala sani, sobun wi e gi unu srefi na en leki en srafu, èn e du muiti fu leri sabi en èn fu du en wani, neleki fa Yeises ben du. — Mateyus 5:16; Lukas 9:23; Yohanes 6:38.

A abi krakti na tapu sma libi

5. (a) So leki fa Petrus ben sori dan san musu abi krakti tapu wi heri fasi fu libi? (b) Sortu tumusi bun wroko a ben rikomanderi?

⁵ Petrus ben sori a tapu taki „a diri brudu” fu Krestes, di gi fu a bun fu wi, de fu so wan waarde di e psa ala tra sani, taki wi warderi gi en musu de krin fu si na ini wi heri fasi fu libi. Na apostru ben kari furu sani di a warderi fu unu musu buweigi wi fu du. A ben gi a rai: ’Puru ala takrudu.’ ’Meki wan angri de gi a merki di no falsi èn di de fu a wortu.’ ’Meki bekenti na ala sei den tumusi bun sani fu a sma di hari yu puru fu a dungru kon ini en wondru leti.’ ’Puru yu srefi fu san de takru, èn du san bun.’ ’Dyompo taki gi yu srefi na fesi ibriwan sma di e aksi wan reide fu yu fu a howpu di de na ini yu.’ ’No libi moro gi den lostu fu libisma na ini a ten di tan abra na ini skin, ma gi a wani fu Gado.’ — 1 Petrus 1:19; 2:1, 2, 9; 3:11, 15; 4:2.

6. (a) Fa den fosi yarihondro kresten ben demo a bribi fu den? (b) San wi musu leri fu na eksenpre fu den?

⁶ Den kresten fu a fosi yarihondro ben libi akruderi a bribi fu den. A ben kenki den fasi fu si sani èn a sma di den de fu di a ben buweigi den fu tyari den libi kon ini akruderi nanga a wani fu Gado. Den ben frudrage taki den ben yagi den komoto fu den kondre, ston den, fon den, sroto den èn srefi kiri den, na presi fu du a bribi fu den ogri (Tori fu den Apostru 7:58-60; 8:1; 14:19; 16:22; 1 Korente sma 6:9-11; Efeisia sma 4:22-24; Kolose sma 4:3; Filemon 9, 10). A Romeini historia skrifiman Tacitus di furu sma sabi, èn di ben gebore na wan sani fu 56 G.T, e taki taki den kresten „ben kisi strafu fu go na ini fayaflam èn fu bron, fu dini leki wan faya gi a neti, te deiten ben psa gwe”. Toku den no ben degedege! — Na Annales, Buku XV, par. 44.

7. Na ini sortu situwâsi son sma de na ini kande?

⁷ Na ini son gemeente yu kan feni sma di e fisiti konmakandra furu yari kba. Den lobi Yehovah organisâsi, den e feni a pipri fu Gado leki den moro bun sma di den miti oiti wanten, den e taki positief fu a waarheid èn e dyompo taki gi a waarheid na fesi fu sma di de dorosei fu a gemeente. Ma wan sani e tapu den pasi, wan sani e hori den na baka. Noiti den teki a moi stap di den 3000 sma ben du na a penkstri dei, èn di na Etiopiaman, di ben sori bribi, ben aksi fu en, ofu di Ananias ben gi Saul tranga fu du sodra a fositen frufolguman dati ben kon frustan taki Yeises ben de trutru a Mesiyas (Tori fu den Apostru 2:41; 8:36; 22:16). San den sortu sma disi e mankeri na ini a ten disi? Fu san-ede den no teki a stap di a beibri e taki fu en leki „a aksi tangitangi na Gado fu wan bun konsensi”? (1 Petrus 3:21) Efu yu srefi de na ini a situwâsi disi — fu di yu sabi a waarheid ma e draidrai fu du wan sani nanga en — dan si a artikel disi leki wan sani di sreka gi yu fu di wi abi wan spesrutu lobi gi yu.

Wini den hendri fu teki dopu

8. Efu noiti yu ben de wan bun stukaman, san ben sa de now wan koni fasi fu handri?

⁸ San ben sa kan tapu yu pasi? A artikel a fesi ben sori taki sonwan ben sa kan feni a studeri nanga den srefi leki wan problema. Gado ben gi wi wan tumusi moi frustan, èn a e fruwakti taki wi e kobroiki en fu dini en. Son sma di noiti ben leri leisi moksi den srefi na a wroko dati fu leri te fu kba moro fu Gado èn fu den prakseri fu en. Fa a de nanga yu? Efu yu sabi leisi kba, yu e studeri trutru, neleki fa den Berea sma ben du, ’e ondrosuku finifini den Buku ibri dei’, fu si efu den sani disi de so? Yu ondrosuku „a bradi, a langa, a hei nanga a dipi” fu a waarheid? Yu diki dipi nofo na ini a Wortu fu Gado? Yu kon si fa a buku dati de trutru wan span tori? Yu kweki wan trutru angri fu sabi a wani fu Gado? Yu abi wan opregti angri gi a waarheid? — Tori fu den Apostru 17:10, 11; Efesiya sma 3:18.

9. San na a yoisti fasi fu handri efu yu abi wan problema nanga wan sma na ini a gemeente?

⁹ Sontron sma e hori den srefi na baka fu wan trutru ofu lawlaw problema di den kisi nanga wan sma na ini a gemeente. Wan sma afrontu yu seryusu? Waka dan baka a markitiki di den wortu fu Yeises e gi: „Go tyari en fowtu kon na krin na mindri yu nanga en wawan” (Mateyus 18:15). Kande yu sa fruwondru fu si taki a sma no ben sabi srefisrefi taki a ben du yu wan hati sani. Ma srefi awasi a sabi dati, toku yu kan ’wini yu brada’, soleki fa Yeises ben taki. Yu sa yepi en kande tu fu kibri en srefi fu a no meki wan tra sma nakifutu. Boiti fu dati, te yu go prakseri fu a sani disi, dan suma yu e dini trutru — a sma dati ofu Gado? A lobi fu yu gi Gado de so pikinso, taki yu e meki iniwan fowtu fu wan onvolmaakti sma e kon a mindri a lobi fu yu gi En?

10, 11. San yu musu du efu a wan ofu tra sondu di du na kibrifasi hori yu te nanga now na baka?

¹⁰ Wan sondu di du na wan kibrifasi kan hori wan sma na baka fu teki dopu. Disi kan de wan sani di feni presi na ini a ten di psa ofu a kan de wan fowtu patron di e go doro. Efu disi de wan problema gi yu, dan a no de a ten dan fu poti na afersi reti? (1 Korente sma 7:29-31). Furu sma fu a pipri fu Yehovah ben musu tyari kenki kon na ini den libi. A beibri e taki: „Abi fu dati-ede berow èn drai yu srefi, so taki den sondu fu yu figi puru, so taki ten fu kowru-ati kan kon fu a sma fu Yehovah.” — Tori fu den Apostru 3:19.

¹¹ Awasi san yu du kande na ini a ten di psa, yu kan sori berow, kenki èn aksi Gado pardon. „Kiri fu dati-ede den membre fu yu skin di de na grontapu na ini a tori fu hurudu, dotifasi, seks lostu, takru lostu . . . Puru a owru sma nanga den wroko fu en èn weri gi yu srefi a nyun sma, di e meki kon nyun nanga yepi fu soifri sabi akruderi a prenki fu A Sma di ben meki en.” Yu kan tyari yu libi kon ini akruderi nanga den pasi fu en, nyan bun fu wan soifri konsensi èn abi a howpu fu têgo libi na ini en regtfardiki nyun grontapu. Dati no warti ala den muiti di ben sa de fanowdu gi dati? — Kolose sma 3:5-10; Yesaya 1:16, 18; 1 Korente sma 6:9-11; Hebrew sma 9:14.

12. San yu musu du efu tabaka, a fowtu kobroiki fu sopi, ofu drugs e hendri yu fu abi wan krin konsensi?

¹² A de so, taki a kobroiki fu tabaka, a fowtu kobroiki fu sopi, ofu de wan srafu fu drugs e hendri yu fu abi wan krin konsensi? Den sortu gwenti disi, di e tyari a libi kon ini kofar, no e sori wan mankeri fu respeki gi a tumusi moi presenti fu a libi di Gado gi? Efu so sortu gwenti e de na yu pasi, dan seiker a de a ten fu poti den reti. Den gwenti disi warti gi yu libi? Paulus ben taki: „Meki wi krin unu srefi fu ibri dotifasi fu skin nanga yeye, èn meki ini a frede fu Gado santafasi kon bun dorodoro.” Yu e warderi nofo den krin nanga regtfardiki pasi fu Gado fu du dati?b — 2 Korente sma 7:1.

Gudu na skinfasi

13, 14. (a) San a beibri e taki fu marki na skinfasi di yu e feti na baka? (b) Fu san-ede a de prenspari fu poti hemel sani na a fosi presi?

¹³ A disiten grontapu e poti a abi fu bun bakapisi nanga „a meki bigi nanga den sani di sma abi fu tan na libi” a fesi fu pikinmoro ala sani. Ma Yeises ben agersi „den broko-ede fu a seti fu sani disi èn a bidrigi krakti fu gudu” nanga „maka” di e stek a wortu fu Gado. A ben aksi tu: „Sortu wini a sa abi gi wan libisma efu a e wini a heri grontapu, ma e lasi en sili?” — 1 Yohanes 2:16; Markus 4:2-8, 18, 19; Mateyus 16:26.

¹⁴ Yeises ben sori a tapu taki Gado seti sani gi den fowru fu feni nyan èn den leili fu meki moi bromki. Ne a ben aksi: „Omeni moro yu warti leki den fowru? . . . Omeni moro [Gado] sa weri krosi gi yu!” Wi e du bun so leki Yeises ben fruteri, fu ’stóp fu broko wi ede’ ini a tori fu gudu na skinfasi. A ben taki: „Suku doronomo [Gado] kownukondre, èn den sani disi yu o kisi a tapu.” A ben sori taki wi musu poti hemel sani na a fosi presi bika pe wi gudu de, na dape wi ati sa de tu’. — Lukas 12:22-31; Mateyus 6:20, 21.

Dienst ini a frede fu Gado nanga a yepi fu Gado

15. Sortu moi deki-ati na eksenpre fu den fosi yarihondro kresten e gi wi?

¹⁵ Fu preiki gi trawan sori taki a de wan problema gi yu? Fruleigifasi e meki taki yu e hori yu srefi na baka? Efu dati de so, a de prenspari fu memre taki den fosi yarihondro kresten ben abi a srefi sortu firi di wi abi na ini a ten disi. Gado no ben frukisi furu koniwan nanga maktiwan, ma a „ben frukisi den swaki sani fu grontapu fu gi den tranga sani syen” (1 Korente sma 1:26-29). Makti kerkitiriman ben gens den „gewoon” sma disi èn ben komanderi den fu stóp preiki. San den kresten ben du? Den ben begi. Den ben aksi Gado fu taki fri èn sondro frede, èn a ben gi den dati. Leki bakapisi, a boskopu fu den ben furu Yerusalen èn bakaten ben seki a heri grontapu! — Tori fu den Apostru 4:1-4, 13, 17, 23, 24, 29-31; 5:28, 29; Kolose sma 1:23.

16. San wi e leri fu a „Bigi wolku fu Kotoigi” di den skrifi fu en na ini Hebrew sma kapitri 11?

¹⁶ Sobun, frede gi libisma noiti mag de a mindri unu nanga a dienst gi Gado. Hebrew sma kapitri 11 e fruteri fu wan bigi „wolku fu kotoigi” di ben abi frede gi Gado èn no gi libisma. So wan srefi sortu bribi wi musu sori. Na apostru ben skrifi: „Fu di wi abi so wan bigi wolku fu kotoigi lontu unu, meki wi puru so srefi ibri hebi nanga a sondu di e frekti unu makriki, èn meki wi lon nanga horidoro a streilon di de na wi fesi.” — Hebrew sma 12:1.

17. Sortu deki-ati Gado ben gi nanga yepi fu Yesaya?

¹⁷ Gado kan gi den diniman fu en bun furu yepi. A Mekiman fu a universum ben fruteri Yesaya: „Den wan di e howpu tapu Yehovah, sa kisi nyun krakti. Nanga frei leki den di fu aka den sa opo go na loktu. Den o lon èn no firi broko-skin; den o waka èn no weri.” — Yesaya 40:31.

18. Fa yu ben sa kan wini a fruleigi fasi fu teki prati na a Kownukondre preikiwroko?

¹⁸ Den deki-ati nanga koloku Kotoigi di yu e si na ini a gemeente pe yu de, de wan pikin pisi nomo fu den moro leki dri nanga afu milyun faya diniman na a heri grontapu. Den e prisiri fu abi wan prati na ini a wroko di Yeises Krestes srefi ben taki na fesi nanga den wortu disi: „A bun nyunsu disi fu a kownukondre sa preiki na a heri grontapu pe libisma e libi leki wan kotoigi gi ala nâsi, èn dan a kba sa kon.” Efu a teki prati na a Kownukondre preikiwroko de wan problema gi yu, ala di yu abi na koni fu du dati, fu san-ede yu no e aksi wan Kotoigi di abi bun bakapisi ini a diniwroko, fu go nanga en fu teki prati na a preikiwroko? A tru taki Gado e gi „krakti di e psa san de normaal”, èn kande yu sa fruwondru fu kon si sortu prisiri a dienst disi ini a frede fu Gado de trutru. — Mateyus 24:14; 2 Korente sma 4:7; Luku so srefi Psalm 56:11; Mateyus 5:11, 12; Filipi sma 4:13.

19. Sortu wroko fu gi leri Yeises ben komanderi den bakaman fu en fu du?

¹⁹ Yeises e fruwakti taki den wan di e warderi a Kownukondre boskopu, musu handri akruderi dati. A ben taki: „Go fu dati-ede èn meki disipri fu sma fu ala nâsi, dopu den ini a nen fu a Tata èn fu a Manpikin èn fu a santa yeye, èn leri den fu hori ala san mi komanderi unu.” — Mateyus 28:19, 20.

20. Efu yu e go na fesi na yeye fasi, dan sortu aksi kan de wan aksi di o fiti heri-esi?

²⁰ A warderi fu yu gi den blesi fu Gado, gi a „diri brudu” fu Yeises, èn gi a tumusi moi howpu fu têgo libi e buweigi yu fu du wan sani? (1 Petrus 1:19). Yu tyari yu libi kon ini akruderi nanga den regtfardiki markitiki fu Gado? Yu e teki prati doronomo na a meki fu disipri? Yu ben sori taki yu no wani sabi yu srefi èn yu gi yu libi abra na Gado? Efu a piki tapu ala den aksi disi de wan krin piki fu iya, dan a kan de a ten fu aksi wan fu den owruman ini a gemeente pe yu e go, a srefi aksi di a Eitiopia bribiman ben poti gi Filipus: „San e tapu mi fu kisi dopu?” — Tori fu den Apostru 8:36.

[Foetoewortoe]

Yu e memre disi?

◻ Sortu spesrutu reide wi abi fu de Gado grantangi?

◻ San bribi nanga warderi musu buweigi unu fu du?

◻ Sortu problema ben sa kan hendri wi fu gi yesi na Gado, èn san wi kan du nanga disi?

◻ Sortu aksi den sma di no dopu ete ben sa kan aksi den srefi?

[Faki na tapoe bladzijde 20]

’Sortu „gron” na mi?’

Yeises ben gi wan agersitori fu wan man di ben go na doro fu sai siri. Wantu siri ben fadon a sei a pasi èn fowru ben nyan den. Trawan ben fadon na tapu ston presi di no abi furu doti. Disi ben sproiti, ma di son ben opo kon, den ben kon drei èn ben dede. Tra siri baka ben fadon a mindri maka èn ben stek. Yeises ben taki taki den dri grupu disi ben teki a presi fu: ini a fosi presi, a sma di „e yere a wortu fu a Kownukondre ma no e frustan san a wani taki”; ini a di fu tu presi, wan sma di e teki a wortu ma e drai baka fu a faya fu „tesi ofu frufolgu ede”; èn ini a di fu dri presi, a sma di ’a broko-ede fu a seti fu sani disi nanga a bidrigi krakti fu gudu e stek a wortu gi en’.

Ma Yeises ben fruteri so srefi fu tra siri di ben fadon a tapu bun gron. A ben taki: „Disi na a sma di yere a wortu èn frustan san a wani taki, di trutru e meki froktu.” — Mateyus 13:3-8, 18-23.

A ben sa bun fu aksi unu srefi: ’Sortu „gron” na mi?’

[Faki na tapoe bladzijde 21]

Den ben dede gi den bribi

Yu sabi wan sma di moro betre ben sa wani fu dede leki fu du en bribi ogri? Dusundusun Yehovah Kotoigi du dati. Dr. Christine E. King ben skrifi na ini The Nazi State and the New Religions: Five Case Studies ini Non-Conformity: „Wán tapu ibri tu Kotoigi fu Doisrikondre den ben poti ini strafu-oso, wán tapu ibri fo ben lasi den libi.”

Di den tumusi ogridu fu den kanpu te fu kba ben stóp na ini 1945, dan ’a nomru fu Kotoigi ben gro èn no wan poti fu gronprakseri fu den na wan sei ben feni presi’. Na ini The Nazi Persecution of the Churches J. S. Conway ben skrifi fu den Kotoigi: „Nowan tra sekte ben sori na sortu fasi tu so wan fasti bosroiti èn ben kakafutu gi a heri krakti fu a terrorisme fu a Gestapo.”

Den reide fu san-ede den ben frufolgu Yehovah Kotoigi no ben de fu politik ofu ras ede. Na presi fu dati, na fu lobi gi Gado meki den ben nyan pina srefisrefi èn a weigri di den ben weigri fu du a konsensi fu den di oefen nanga yepi fu a beibri, ogri.