Yehovah de warti fu kisi têgo prèise

„Na heri dei mi wani blesi yu, èn mi wani prèise yu nen te ten di no skotu, iya, fu têgo.” — PSALM 145:2.

1. Fu san-ede David ben abi furu reide fu prèise Yehovah?

YEHOVAH loyaal dienstknekti David ben abi furu reide fu prèise Gado. Na kownu disi di ala sma ben sabi fu na Israèl fu owruten ben sabi na granfasi nanga bunfasi fu Yehovah èn ben frustan taki En kownuwroko ben de fu têgo. Na Moro Heiwan ben warti fu kisi prèise fu di a e satisferi na lostu fu ibri sani di e libi èn e sori sari-ati na en kotrow dienstknekti.

2. (a) Na sortu fasi Psalm 145 seti? (b) Sortu aksi wi sa luku?

² David ben gi a prèise disi na Gado na ini Psalm 145. Ibri vers fu na Psalm disi, di de wan acrostichon, e bigin nanga wan letter fu na Hebrew alfabet di a wan e waka baka a trawan, aladi wán letter (nun) ben mankeri. Na seti fu a psalm leki wan acrostichon ben dini kande leki wan yepi fu memre sani. Psalm 145 e gi Yehovah grani so leki e kon a fesi na ini den wortu: „Na heri dei mi wani blesi yu, èn mi wani prèise yu nen te ten di no skotu, iya, fu têgo.” (Psalm 145:2). Ma fa a Psalm disi kan abi krakti na wi tapu? San a kan du gi a matifasi fu wi nanga Gado? Fu kon sabi disi, meki wi luku fosi den vers 1 te nanga 10.

Na granfasi fu Yehovah na wan dangra sani

3. Neleki David, san wi de fruplekti fu gi ’wi Gado na Kownu’ èn fu san-ede?

³ David ben de wan kownu, ma a ben erken Yehovah leki tiriman, di a ben taki: „Mi wani hei yu, Ow mi Gado, na Kownu, èn mi wani blesi yu nen te ten di no skotu, iya, fu têgo” (Psalm 145:1). Nanga a srefi respeki disi, Yehovah Kotoigi e opo na nen fu Gado èn e prèise en na a heri grontapu. A libi fu wi e kisi furu blesi te wi e teki prati na ini na aktiviteit disi. Neleki David, na so wi de fruplekti fu gi yesi èn fu saka wi srefi na ondro Yehovah ondro leki ’wi Gado na Kownu’. Èn fu san-ede? En de na „Kownu fu têgo ten” (Openbaring 15:3). Boiti fu dati, na Moro Bigi David, Yeises Krestes, di e tiri komoto fu a hemel bergi Sion fu sensi 1914, e gi wi wan tumusi moi eksenpre fu saka en srefi na ondro Yehovah, na Kownu fu têgo ten.

4. Fa wi kan ’blesi Gado nen’?

⁴ David ben taki taki a ben ’wani blesi Gado nen’. Fa disi man fu de so gi soifri wan libisma? We, wan fu den sani de, taki fu blesi wan sma wani taki fu taki bun fu en. Blesi Yehovah nen e sori a tapu taki wi abi tranga lobi gi en èn en santa nen, Yehovah. Wi no e kragi noiti fu Gado, noiti e feni fowtu na en, noiti e degedege na en bunfasi. Soso te wi abi na fasi dati, ben gi wi srefi abra na Yehovah, èn e kibri wi soifri retifasi leki en dopu Kotoigi, wi kan taki nanga David taki wi ’wani blesi Gado nen fu têgo’. Efu wi kibri wi srefi na ini a lobi fu Gado, dan wi sa kisi na presenti fu têgo libi èn na so fasi blesi Yehovah fu têgo.—Yudas 20, 21.

5. Na angri fu blesi Yehovah „ na heri dei” musu abi sortu krakti tapu wi?

⁵ Efu wi lobi trutru a Sma di gi wi libi, dan wi sa taki nanga David: „Na heri dei mi wani blesi yu, èn mi wani prèisi yu nen te ten di no skotu, iya, fu têgo” (Psalm 145:2). Fa wan dei ben sa leigi efu wi no ben blesi Gado! Meki noiti wi abi so furu fu du ofu broko wi ede so nanga sani na skin fasi taki wi e frigiti fu taki aladei bun fu wi hemel Tata ofu fu begi na en. Yeises ben meki kon a krin taki wi musu begi ibri dei, di a ben taki na ini na Modelbegi: „Gi wi na brede fu wi soleki na dei e aksi dati” (Lukas 11:3). Furu sma di de na ini na furuten dienst, e prèise Gado aladei te den e teki prati na a kresten diniwroko. Ma awinsi fa wi omstandigheid de tu, wi ati musu buweigi wi fu prèise Gado ibri dei na a wan ofu tra fasi. Èn go prakseri pikinso! Leki Kotoigi fu Yehovah di gi den srefi abra èn di abi na howpu fu têgo libi, wi abi na bigi fruwakti fu prèise en nen fu têgo.—Yohanes 17:3.

6. Fu san-ede Yehovah „de fu prèise srefisrefi”?

⁶ Wi abi seiker reide fu prèise Gado na heri dei, bika David ben taki moro fara: „Yehovah bigi èn [a de] fu prèise srefisrefi, èn a granfasi fu en na wan dangra sani” (Psalm 145:3). So bigi Yehovah de taki a no abi en speri, èn en tirimakti de gi en wawan. Kownu Nebukadnezar fu Babilon ben musu erken: „No wan sma de di kan hori Gado anu ofu di kan taigi en, ’San yu ben du?’” (Danièl 4:34, 35) Yehovah „de tapu ala tra gado wan Gado di de fu frede” (Psalm 96:4). A no de wan fruwondru sani taki a de „fu prèise srefisrefi”. Iya, no wan wortu fu prèise de tumusi hei te wi e gi bigi nen na Yehovah! Na En de warti fu kisi têgo prèise, sondro fu skotu dati.

7. San e buweise taki Gado ’granfasi de wan dangra sani’?

⁷ Yehovah „granfasi na wan dangra sani”. Awinsi o bigi a de na skin fasi, en granfasi de ini na sortu fu Gado di a de. Iya, den sani di a meki de tumusi fruwondru gi wi fu frustan, èn wi srefi ’a ben meki na wan wondru fasi’(Psalm 139:14; Yob 9:10; 37:5). Boiti fu dati, o fa Yehovah e tyari en srefi na wan heifasi! Na wan kotrow fasi a e hori en pramisi èn na wan lobi fasi a e tyari en prakseri kon na krin. Ma toku ete wi no sa sabi noiti ala sani fu Gado. Ini ala den têgo ten, wi man fu gro na ini sabi fu en, den sani di a meki èn en prakseri.—Rome sma 11:33-36.

Prèise den wroko fu Yehovah

8. (a) Fa „geslakti baka geslakti” ben prèise Yehovah wroko? (b) Efu wi e leri wi pikin fu Yehovah wroko nanga makti du, fa den sa si seiker a dini fu en? (c) Leki wan prisiri „geslakti”, san na salfu fikapisi du?

⁸ So furu sani kan taki fu a prèise fu na bigi èn dangra Gado fu wi taki disi ben buweigi David fu taki: „Geslakti baka geslakti sa prèise yu wroko, èn fu den makti du fu yu den sa fruteri” (Psalm 145:4). Na wan geslakti fu a libismafamiri di kon baka a trawan ben prèise Yehovah wroko èn ben fruteri finifini fu den makti du fu en. Fa a de wan grani fu fruteri den sani disi na den sma di wi e hori oso-beibristudi nanga den! Fu eksenpre, wi kan fruteri den taki Gado ben meki ala sani (Genesis 1:1–2:25; Openbaring 4:11). Wi kan taki fu den makti du fu en na a ten di a ben fri den Israèl sma puru fu katibo na Egipti, ben yepi den fu wini den feianti fu Kanan, ben kibri den fu den no kiri den puru na ini Persiyakondre fu owruten èn fu moro furu ete (Exodus 13:8-10; Krutuman 4:15; Ester 9:15-17). Èn sani no e buweigi wi fu fruteri wi pikin fu Yehovah wroko nanga du? Efu wi e gi wi pikin den sortu leri disi èn den e si wi e dini Yehovah nanga prisiri, dan kande seiker den sa si a dini fu en leki wan prisiri sani èn gro nanga ’na prisiri fu Yehovah leki na fortresi fu den’ (Nehemia 8:10; Psalm 78:1-4). Na salfu fikapisi de wán prisiri „geslakti” fu Yehovah Kotoigi di e rikomanderi den wroko fu Gado na a „bigi ipi”, di de wan pisi fu na geslakti di sa go libi na ini na Paradèisgrontapu.—Openbaring 7:9.

9. Efu wi e denki fu den wroko nanga makti du fu Gado dan fu san wi kan de seiker?

⁹ Efu wi e go denki fu den wroko nanga den makti du fu Gado, dan wi e kisi moro overtoigi srefi taki ’Yehovah no sa libi en pipri fu en bigi nen ede’ (1 Samuwel 12:22; Psalm 94:14). Te wi miti nanga tesi, problema nanga frufolgu, dan wi kan de korostu èn nanga frutrow, taki „na vrede fu Gado” sa kibri wi ati nanga denkipowa (Filipi sma 4:6, 7). Sobun, fa a de wan sani di fiti taki wi e fruteri trawan fu wi lobi hemel Tata di e kibri wi!

10. Yehovah „wondru wroko„ abi sortu sani na ini èn fa wi e nyanbun fu den te wi go denki dipi fu den?

¹⁰ Wi musu teki ten fu denki dipi fu Yehovah majesteiti nanga wroko, bika David ben taki moro fara: „Na glori moifasi fu yu wartifasi èn den afersi fu den wondruwroko fu yu, nanga dati mi wani broko mi ede” (Psalm 145:5). Na wartifasi fu Gado de wan sani di e gi yu frede èn di no abi en speri (Yob 37:22; Psalm 148:13). Sobun, David ben broko en ede nanga na glori moifasi fu Yehovah wartifasi. A psalmsingiman ben broko en ede so srefi nanga afersi fu Gado „wondruwroko”. Ini disi yu ben abi na sori fu geregtigheid fu di Gado wai sondari puru èn hori den wan di e gi den srefi na ini a dini fu Gado na libi so leki na a ten fu a Frudu (Genesis 7:20-24; 2 Petrus 2:9). Fu denki dipi fu den sortu afersi disi e tranga wi matifasi nanga Yehovah èn e meki wi man fu fruteri tra sma fu en wartifasi nanga wondruwroko. Ini na ten fu den fotenti dei di Yeises ben de na ini na sabana, a ben kisi tranga fu kakafutu gi tesi, fu di a ben go denki dipi fu den sani di den hemel di ben kon opo gi en ben tyari kon na en prakseri (Mateyus 3:13–4:11). Baka dati a ben taki nanga trawan fu na wartifasi nanga den wondruwroko fu Yehovah.

11. (a) Fu san-ede skreki ben kon na tapu den sma di ben libi na ini Yerikow? (b) Fu di den furu nanga sortu yeye meki Yehovah Kotoigi e taki fu „den sani fu Gado di e gi frede” èn fu en „granfasi”?

¹¹ Te wi e taki fu Gado wartifasi nanga wroko, dan wi e buweigi trawan fu taki fu den. David ben taki: „Èn den sa taki fu na tranga fu den sani fu yu di e gi frede; èn fu na sei fu yu granfasi, dati mi wani meki bekenti” (Psalm 145:6). Rakab ben taki fu na skreki di ben kon tapu den sma di ben libi na ini Yerikow di den ben yere fa Yehovah ben fri den Israèl sma na a Redi Se èn meki den wini den tu Amoriti kownu. Den sma ben e musu taki furu na ini Yerikow fu den sortu „sani di e gi frede” (Yosuwa 2:9-11). Èn seiker a o de so, taki na „bigi banawtu” di e kon krosibei sa de wan sani di e gi frede (Mateyus 24:21). Ma sani di e de skreki sani gi sma di kon de freimde sma gi Gado, e furu regtfardiki ati nanga na „frede fu Yehovah”, wan gosontu respeki gi en (Odo 1:7). Fu di den furu nanga so wan yeye fu respeki, meki Yehovah Kotoigi e taki fu na sori di Gado ben sori en makti. Iya, na Bigi Du-Wondruman de na moro prenspari tori fu takimakandra a mindri den salfuwan nanga den grontapu konpani fu den! Èn srefi frufolgu no e tapu den fu fruteri tra sma fu den sani disi èn fu na „granfasi fu Yehovah”.—Tori fu den Apostru 4:18-31; 5:29.

Prèise Yehovah fu en bunfasi

12. Fa Yehovah bunfasi e meki wi ’spoiti psa marki’ te wi e taki fu en?

¹² Gado de warti fu kisi prèise no wawan fu en granfasi ma so srefi fu en bunfasi nanga regtfardikifasi. Fu dati-ede David ben taki: „Nanga a taki di den taki fu yu bunfasi di psa marki, den sa spoiti psa marki, èn [fu] yu regtfardikifasi [ede] den sa opo wan prisiri babari” (Psalm 145:7). A bunfasi fu Yehovah de so bigi taki wi „e spoiti psa marki” nanga prisiri den wortu di abi fu du nanga dati. Na ini Hebrew tongo, na prakseri de fu watra di e spoiti nanga krakti komoto fu wan fonten. Sobun meki wi spoiti psa marki prèisesingi fu gi tangi na Gado, neleki wan krakti liba (Odo 18:4). Leki wan bigi lasi gi den na yeye fasi den Israèl sma ben frigiti Yehovah bunfasi (Psalm 106:13-43). Ma meki wi ati furu psa marki nanga tangi, so taki tra sma e kon abi berow, baka te den leri o bun Yehovah de gi en Kotoigi di gi den srefi abra.—Rome sma 2:4.

13. A sori fu retidu nanga regtfardikifasi fu Gado musu abi sortu krakti na wi tapu?

¹³ Meki a sori fu geregtigheid nanga regtfardikifasi so srefi buweigi wi fu opo wan prisiri babari. Efu wi e denki na a fasi disi, dan wi sa suku no wawan na a fosi presi a Kownukondre fu Gado, ma so srefi en regtfardikifasi. Alaten wi sa wani, taki wi waka nanga libi tyari prèise gi Yehovah. Iya, wi sa de geregelde Kownukondre preikiman di abi furu fu du na ini Gado dienst. A prèise fu wi gi Yehovah noiti sa beri na ini wan olo fu tan tiri.—Mateyus 6:33; 1 Korente sma 15:58; Hebrew sma 10:23.

Yehovah abi sari-ati

14. Sortu buweisi de taki ’Yehovah abi bun-ati nanga sari-ati’?

¹⁴ Te David e taki fu moro eigifasi fu Yehovah di de fu prèise, dan a ben taki: „Yehovah abi bun-ati èn sari-ati, a no e kisi atibron esi èn a de bigi na ini lobi switifasi” (Psalm 145:8). Gado abi bun-ati fu di a de trutru bun èn lobi fu gi sani (Mateyus 19:7; Yakobus 1:5). A e du srefi bun sani gi den sma di no e dini en (Tori fu den Apostru 14:14-17). Yehovah abi so srefi sari-ati, e sari sma, „ala di a e sabi taki wi de stof”. A no e fruakti wan ati di broko noso e du nanga wi akruderi den sondu fu wi, ma e sori moro sari-ati leki bun furu lobi Tata fu libisma (Psalm 51:17; 103:10-14). Iya, leki na moro bigi sori fu sari-ati, a ben seni en lobi Manpikin fu dede gi wi, so taki wi ben sa kan kon verzoen nanga Gado èn trutru tesi en bun-atifasi!—Rome sma 5:6-11.

15. Fu san-ede wi kan taki taki Yehovah Gado „no e kisi atibron esi” èn „de bigi na ini lobi switifasi”?

¹⁵ Wi lobi hemel Tata no e kisi atibron esi. A no e libi en srefi gi breni atibron. Yehovah de so srefi „bigi na ini lobi switifasi”. Dyaso na Hebrew tongo e sori tapu switifasi di e kon fu lobi èn di e plak en srefi hori na wan sani. A e tan du disi teleki a prakseri fu en nanga na sani dati kon tru. Wan tra fasi fu poti disi abra na „loyaal lobi”. Wan fu den sani fu Gado lobi switifasi, ofu loyaal lobi, de fu si na ini du fu sma di a fri, na hori a libi fu sma, a kibri fu sma, a tyari fu frulekti kon fu problema, èn na konbun baka fu sondu nanga yepi fu na frulusu paiman (Psalm 6:4; 25:7; 31:16, 21; 40:11; 61:7; 119:88, 159; 143:12; Yohanes 3:16). Taki Yehovah no ben tyari Armagedon wantronwantron kon, baka na ’orloku na ini hemel’, e gi ipi-ipi sma na okasi fu kisi frulusu, wan bigi sori fu na lobi switifasi fu Gado.—Openbaring 12:7-12; 2 Petrus 3:15.

16. Fa Yehovah ben buweisi taki a ben „bun gi ala sma”?

¹⁶ Te wi luku na sari-ati fu Gado, dan wi kan taki taki a abi wan gran ati. David ben fruklari: „Yehovah de bun gi ala sma, èn en sari-ati de tapu ala en wroko” (Psalm 145:9). Iya, Gado ben de bun gi den Israèl sma. Fu taki leti, „a e meki en son opo kon a tapu ogri sma èn bunwan èn e meki alen fadon tapu regtfardiki sma èn onregtfardiki sma” (Mateyus 5:43-45). Na ini Eden, Yehovah ben pramisi wan „siri” di ben sa de wan blesi. Bakaten a ben fruteri Abraham: „Nanga yepi fu yu siri ala nâsi fu grontapu seiker sa blesi den srefi” (Genesis 3:15; 22:18). Èn na bunfasi fu Gado de so bigi ini „a ten disi fu na kba”, taki ibriwan sma kan ’kon èn teki a watra fu libi fri’ (Danièl 12:4; Openbaring 22:17). Yehovah de klari fu du bun na ala mekisani di abi frustan, èn en bunfasi musu hari wi leki oiti wan ten kon krosibei na en.

17. Na sortu fasi Yehovah ’sari-ati de na tapu ala en wroko’?

¹⁷ „Den sari-ati fu Yehovah de abra ala en wroko” na a fasi disi taki a e seti sani bogobogo gi libisma nanga meti. Na En na „a Wan di e gi nyanyan na ala skin” (Psalm 136:25; 147:9). Gado no e gi grani na den guduwan èn e fruakti den wan di den e kwinsi, e gi grani na den heimemrewan èn e wisiwasi den sakafasiwan, e hei den donwan èn e saka den koniwan. Sondu sma e du disi ma a no de so nanga wi sari-ati hemel Tata (Psalm 102:17; Sefania 3:11, 12; Preikiman 10:5-7). Èn o bigi Gado sari-ati, bunfasi nanga lobi switifasi de ini a meki di a e meki frulusu kon nanga yepi fu na frulusu ofrandi fu en lobi Manpikin!—1 Yohanes 4:9, 10.

Loyaalwan e blesi Yehovah

18. (a) Fa den wroko fu Gado „e prèise en”? (b) Oten sani musu buweigi wi fu prèise Yehovah?

¹⁸ Gado de warti fu kisi prèise fu ala sei. So leki David e taki en: „Ala yu wroko sa prèise yu, ow Yehovah, èn den loyaalwan fu yu sa blesi yu” (Psalm 145:10). Den wroko fu Gado fu den sani di a meki e „prèise en”, neleki fa wan oso di bow bun de leki wan grani gi a bowman èn wan moi vaas gi en koni patubakriman (Teki gersi Hebrew sma 3:4; Yesaya 29:16; 64:8). So fruwondru den sani di Yehovah meki de, taki den buweigi engel nanga libisma fu prèise en. Den manpikin fu Gado di de engel ben agri nanga prisiri di a ben poti na fondamenti fu grontapu (Yob 38:4-7). David ben taki taki ’den hemel e fruteri fu a glori fu Gado èn na loktu e fruteri fu na wroko fu en anu’ (Psalm 19:1-6). Wi kan prèise Yehovah srefisrefi te wi e si wan aka e sweif lontu ini loktu ofu wan dia e lon esi-esi abra wan pikin bergi fu grun grasi (Yob 39:26; Heisingi fu Salomo 2:17). A fiti fu prèise Yehovah te wi e koti nyanyan ofu e nyan wan switi nyanyan nanga wi mati (Psalm 72:16; Odo 15:17). Den skin fu wi di meki na wan wondru fasi so srefi kan meki wortu fu tangi kon fu prèise Gado.—Psalm 139:14-16.

19. Suma na den „loyaalwan”, èn san den e du?

¹⁹ Ini na ten disi Yehovah „loyaalwan” di kisi salfu nanga en yeye e blesi en na grontapu. Den e taki bun fu en èn e angri fu si taki en wani e psa na grontapu so leki na ini hemel (Mateyus 6:9, 10). Aladi den salfuwan e fruteri trawan fu Gado wondru wroko, dan na bigi ipi e gro ini nomru dei fu dei. Makandra nanga den loyaalwan di kisi salfu, den e dini nanga faya leki Kownukondre-preikiman. Tangi e buweigi yu fu abi alaten wan prati na ini a wroko disi fu prèise Gado?

20. (a) Fa Yehovah nen sa kon santa? (b)  Sortu aksi e tan abra fu wi go luku ini a tori fu Psalm 145?

²⁰ Leki Yehovah Kotoigi wi de neleki David ini a gi fu prèise na Gado. Na meki kon santa fu Yehovah santa nen nanga a prèise fu en de afersi fu prenspari belang. Fu di na nen fu Gado sa kon santa nanga yepi fu Gado Kownukondre, dan na beibri leri disi fu na Kownukondre de wan prenspari pisi fu na bun nyunsu di wi e meki bekenti. Psalm 145 e gi krin leti na yeye fasi na ini disi? San wi takimakandra fu na tra pisi fu na psalm disi sa tyari kon na krin? Na sortu tra fasi a e buweisi taki Yehovah de warti fu kisi têgo prèise?

San na den piki fu yu?

◻ Fa wi kan blesi Yehovah nen?

◻ San na wantu fu den wroko fu Gado di e prèise en?

◻ Fa wi sa du efu wi e warderi Yehovah bunfasi?

◻ Na sortu fasi Gado sori en sari-ati?

[Prenki na tapoe bladzijde 24]

Yu e fruteri yu pikin fu den makti du fu Yehovah so leki papa nanga mama di ben gi den srefi na ini a dini fu Gado na ini a Israèl fu owruten ben du?

[Prenki na tapoe bladzijde 27]

So leki wan oso di bow bun de wan grani gi na bowman, na so den sani di Yehovah meki e tyari prèise gi en