Jesus libi nanga diniwroko

Den e tori Jesus èn teki en foe go sroto

NETI pasa moi fara kaba te Judas e tjari wan bigi ipi sroedati, edepriester, Fariseiman, nanga tra sma na ini a djari foe Getsemane. Den priester agri foe pai Judas 30 solfroe moni efoe a e tori Jesus.

A neti a fesi, di Jesus ben seni Judas gowe foe na Paska njanjan, a ben go, soleki fa a e sori, langalanga na den edepriester. Den disi ben tjari den eigi dinari èn so srefi wan groepoe foe sroedati wantewante kon na wan. Kande Judas ben tjari den go fosi pe Jesus nanga den apostel ben hori na Paskafesa. Di na bigi ipi sma, di ben tjari fetisani nanga lampoe èn flambo nanga den, kon si taki den ben gowe, dan den ben waka a Judas baka komoto foe Jerusalem èn ben abra a Lagipresi foe Kidron.

Te Judas e tjari a groepoe sma go tapoe na Olijfbergi, a de seiker taki a sabi pe a kan feni Jesus. Ini a wiki di pasa, di Jesus nanga den apostel ben rèis go-kon a mindri Betania nanga Jerusalem, den ben stòp foeroe leisi na ini a djari foe Getsemane foe teki bro drape èn foe taki makandra. Ma fa den sroedati sa kon sabi now, soema na Jesus, foedi kande a doengroe foe den olijfbon e kibri en? Kande noiti den no ben si en a fesi. Judas e gi den wan marki, te a e taki: „Na sma di mi e bosi, dati na en; oenoe hori en èn tjari en gowe na wan boen fasi.”

Judas e tjari a bigi ipi sma go na ini a djari, a e si Jesus nanga den apostel foe en, èn a e waka langalanga go na en tapoe. „Odi, Rabbi!”, a e taki èn a e bosi en na wan toemoesi switifasi.

„Mati, nanga sortoe reide joe de dja?”, Jesus e piki en. Dan, te a e gi piki tapoe en eigi aksi, a e taki: „Judas, joe e tori na Manpikin foe libisma nanga wan bosi?” Ma a nofo foe na toriman foe en! Jesus e kon a fesi, ini a faja foe den flambo èn den lampoe di e bron, èn e aksi: „Soema oenoe e soekoe?”

„Jesus foe Nasaret”, den e piki.

„Dati na mi”, Jesus e piki, aladi a e tanapoe nanga deki-ati na den fesi. Foedi den e froewondroe foe na deki-ati foe Jesus èn foedi den no sabi san foe froewakti, meki den man e wai go nanga baka èn fadon na gron.

„Mi taigi oenoe taki dati na mi”, Jesus e go doro nanga bedari. „Efoe a de so taki oenoe e soekoe mi, dan libi den wan disi meki den gowe.” Sjatoe a fesi, na a tapoesodro, Jesus ben taigi en Tata na ini begi taki a ben kibri en kotrow apostel èn taki no wan foe den ben lasi gowe „boiti a manpikin foe pori”. Soboen, foe meki a wortoe foe en ben sa kon troe, a e aksi foe den kan meki den bakaman foe en gowe.

Te den sroedati e kisi den srefi, den e opo èn e bigin foe tai Jesus, dan den apostel e froestan san o pasa. „Masra, wi sa feti nanga a feti-owroe?”, den e aksi. Fosi Jesus piki, Petrus e gebroiki wan foe den toe feti-owroe di den apostel ben tjari, èn e opo go feti nanga Malkus, wan srafoe foe na heipriester. Na slag foe Petrus e misi na ede foe a srafoe, ma a e koti a letisei jesi foe en poeroe.

„Oenoe tapoe”, Jesus e taki te a e kon a mindri. A e fasi a jesi èn e dresi a presi di kisi mankeri. Dan a e leri den wan prenspari sani, foedi a e komanderi Petrus: „Poti joe feti-owroe baka na en presi, foedi ala den wan di e teki a feti-owroe sa kisi pori nanga a feti-owroe. Ofoe oenoe e prakseri taki mi no kan aksi mi Tata now foe seni moro leki twarfoe legioen foe engel kon gi mi na a momenti disi?”

Jesus de klariklari foe den teki en foe go sroto. Foedi a e poeroe kon a krin: „Fa Boekoe ben sa kon troe, taki sani ben sa pasa na a fasi disi?” Èn a e taki moro fara: „A no de so taki, sondro misi mi moesoe dringi na beiker di a Tata gi mi?” A e agri srefisrefi nanga a wani foe Gado gi en!

Dan Jesus e taki nanga na ipi foe sma. „Oenoe e kon nanga feti-owroe èn kodja leki teige wan rofer, foe sroto mi? Dei na dei mi ben sidon na ini a tempel foe gi leri, èn tokoe oenoe no ben sroto mi. Ma ala den sani disi pasa sotaki den boekoe foe den profeiti ben sa kon troe.”

Now a groepoe foe sroedati nanga a sroedati edeman èn den dinari foe den djoe, e graboe Jesus èn e tai en. Te den apostel e si disi, den e libi Jesus èn e lon gowe. Ma wan jongoe man — kande a de a disipel Markus — e tan a mindri foe na ipi. Kande a ben de na ini a oso pe Jesus ben hori na Paskafesa èn bakadati a ben waka foe drape go na a ipi foe sma baka. Ma now den kon sabi en baka, èn den e proeberi foe graboe en. Ma a e libi en linnen krosi na baka èn e lowe nanga pikinso krosi na en skin. Mateus 26:47-56; Markus 14:43-52; Lukas 22:47-53; Johanes 17:12; 18:3-12.

◆ Foe san-ede Judas ben de seiker taki a ben sa feni Jesus na ini a djari foe Getsemane?

◆ Fa Jesus e sori taki a e broko en ede nanga den apostel foe en?

◆ San Petrus e doe foe tapoe slag gi Jesus, ma san Jesus e taigi en?

◆ Fa Jesus e sori taki a e agri srefisrefi nanga a wani foe Gado gi en?

◆ Soema e tan a baka te den apostel e libi Jesus, èn san e pasa nanga en?