Jesus libi nanga diniwroko

Hebi skin-ati foe tjari na a postoe

DEN e tjari Jesus go kiri makandra nanga toe banditi. No so fara foe a foto a groepoe e stòp na wan presi di nen Golgota ofoe Edekrabasi Presi.

Den e poeroe a krosi foe den strafoeman na den skin. Dan den e gi den win di abi mirre na ini. So leki fa a sori, dan na den oema foe Jerusalem meki disi, èn den Rome sma no e weigri foe den sma di den o spikri na wan postoe kisi a dringi disi di e tapoe pen. Ma, te Jesus e tesi en, a e weigri foe dringi. Foe san-ede? A de krin taki a wani de nanga ala en froestan ini a toemoesi prenspari tesi disi tapoe en bribi.

Now den e poti Jesus langalanga tapoe na postoe nanga en anoe a tapoesei foe en ede. Dan den sroedati e naki bigi spikri go na ini en anoe èn en foetoe. A e masi en fesi foe skini-ati te den spikri e boro go na ini en meti nanga den titei foe en skin. Te den e swing na postoe poti leti-opoe, dan na skin-ati no de foe tjari moro, foe di a hebi foe a skin e hari na den soro di kon foe den spikri. Ma na presi foe Jesus tapoe skreki gi den Rome sroedati, a e begi gi den: „Tata, gi den pardon, bika den no sabi san den e doe.”

Pilatus meki den anga wan bord na a postoe, pe skrifi: „Jesus foe Nasaret, a kownoe foe den djoe.” So leki fa a e sori, a no e skrifi disi soso foe di a e lespeki Jesus, ma foe di a abi wan tegoe gi den djoe priester di dwengi en foe gi Jesus a dedestrafoe. Pilatus e meki den skrifi dati na ini dri tongo, so taki ala sma kan leisi en — na ini Hebrewtongo, na ini a officieel Latijntongo, èn na ini Grikitongo di ala sma ben e taki.

Den ede-priester, so srefi Kajafas nanga Anas, e broeja. Na positief bariwroko disi e pori a joeroe foe den foe fiktori. Foe dati-ede den e sori taki den no e agri: „No skrifi ’A kownoe foe den djoe’, ma dati a ben taki: ’Mi na a kownoe foe den djoe.’” Pilatus ati di e bron, foe di den priester gebroiki en leki wan stropopki. A e piki den nanga fasti bosroiti èn nanga froeakti: „San mi skrifi, tan skrifi.”

Den priester, makandra nanga wan bigi ipi sma, e kon makandra now na a presi pe den sa kiri Jesus, èn den priester e proeberi foe taki sani kontrari a kotoigi di e gi nanga san skrifi tapoe a bord. Den e tan gi a falsi kotoigi di ben gi a fesi kaba na fesi kroetoe na ini a Sanhedrin. Foe dati-ede, a no de foe froewondroe taki sma di e waka pasa, e bigin taki na wan skempifasi, ala di den e seki den ede na wan spotoe fasi èn e taki: „O joe, di ben o broko a tempel èn ben sa bow en baka na ini dri dei, froeloesoe joesrefi! Efoe joe na wan manpikin foe Gado, saka komoto foe na pinapostoe dan!”

„Trawan a ben froeloesoe, ensrefi a no kan froeloesoe!”, den ede-priester nanga den kerki mati foe den e agri nanga makandra. „A de kownoe foe Israèl; meki a saka komoto foe a pinapostoe èn wi sa bribi ini en. A poti en froetrow na ini Gado; meki A froeloesoe en now efoe A wani en, bika a ben taki: ’Mi na a Manpikin foe Gado.’”

Foe di a jeje di de drape teki den abra, meki den sroedati toe e spotoe Jesus. Na wan spotoe fasi den e pristeri en swa win, di den e hori nomo, so leki fa a e sori, leti a fesi den mofoboeba foe en di kon drei. „Efoe joe na a kownoe foe den djoe,” den e skempi, „froeloesoe joesrefi.” Srefi den toe banditi — di a wan anga na a leti-anoesei foe Jesus èn a trawan na en kroektoe-anoesei — e spotoe Jesus. Go prakseri disi pikinso! A moro bigi man di oiti ben libi, ija, a sma di, makandra nanga Jehovah, ben meki ala sani, nanga wan fasti bosroiti e teki ala den skempi disi!

Den sroedati e teki den tapoesei krosi foe Jesus èn e prati den na ini fo pisi. Den e iti lòt foe si soema sa kisi den pisi disi. Ma na ondrosei krosi de sondro naad èn a de foe wan moro hei kwaliteit. Foe dati-ede den sroedati e taigi makandra: „Meki wi no priti en, ma meki wi iti lòt foe si soema sa kisi en.” Na so, sondro foe den sabi, den e meki na profeititori kon troe di e taki: „Den prati den tapoesei krosi foe mi a den mindri, èn foe den krosi foe mi den ben iti lòt.”

Baka wan pisiten, wan foe den banditi e kon si taki Jesus troetroe moesoe foe de wan kownoe. Foe dati-ede a e piri-ai gi na kompe foe en èn a e taki: „Joe no e frede Gado kwetikweti, now di joe e kisi a srefi kroetoe? Èn a no de foe taki, dati wi e kisi dorodoro san wi froedini foe den sani di wi ben doe; ma a man disi no ben doe no wan sani di no fiti.” Dan a e taki nanga Jesus èn a e aksi en tangitangi: „Prakseri mi te joe doro na ini joe kownoekondre.”

„Foetroe, mi e taigi joe tide”, Jesus e piki, „joe sa de nanga mi na ini a Paradijs.” Na pramisi disi sa kon troe te Jesus e tiri leki kownoe na ini hemel èn sa gi na ogriman disi di ben abi berow wan opobaka foe libi na grontapoe na ini a Paradijs di den sma di sa pasa Armagedon libilibi èn den kompe foe den, sa abi na grani foe wroko en. Mateus 27:33-44; Markus 15:22-32; Lukas 23:27, 32-43; Johanes 19:17-24.

◆ Foe san-ede Jesus e weigri foe dringi a win di abi mirre na ini?

◆ Foe san-ede, so leki fa a sori, den e poti na bord na a postoe foe Jesus, èn sortoe tra haritaki disi e tjari kon a mindri Pilatus nanga den ede-priester?

◆ Sortoe tra skempi Jesus e kisi na a postoe, èn san e tjari disi kon, so leki fa a sori?

◆ Fa na profeititori e kon troe ini san den e doe nanga Jesus krosi?

◆ Sortoe kenki wan foe den banditi e tjari kon, èn fa Jesus sa meki na aksi foe en kon troe?