Jesus libi nanga diniwroko

„Foe troe, disi ben de Gado Manpikin”

JESUS no ben de langa na a postoe te, na brekten joeroe, wan dangra sortoe doengroe foe dri joeroe langa e feni presi. A no ben de wan kon doengroe foe son di meki dati doe kon, foe di disi e pasa soso na a ten foe na njoen moen, èn a de foeroe moen na a ten foe a paska. Boiti dati, a kon doengroe foe son e hori soso wan toe miniti. Foe dati-ede a doengroe disi moesoe kon foe Gado! Kande disi e meki den sma di e spotoe Jesus go prakseri èn a e meki srefi taki a skempi foe den kon na wan kaba.

Efoe a tori disi di e gi frede, e pasa bifo na wan ogridoeman ben piri-ai gi en kompe èn e aksi Jesus foe prakseri en, dan disi de kande wan sani di ben meki a kisi berow. Kande a de na ini a doengroe disi taki fo oemasma, a mama foe Jesus, en sisa Salome, Maria Magdalena èn Maria, a mama foe na apostel Jakobus a Mendriwan, e waka go moro krosibei na a pina-oedoe. Johanes, na apostel di Jesus lobi, de drape nanga den.

Fa a ’e soetoe’ na ati foe Jesus mama srefisrefi te a e si fa na manpikin foe en, di a ben gi bobi èn di a ben boboi, e anga na a postoe, ala di a abi toemoesi hebi skin-ati! Tokoe Jesus no e prakseri en eigi skin-ati, ma na tan boen foe en mama. Nanga foeroe moeiti a e beni en ede go na a sei foe Johanes èn e taigi en mama: „Oema, loekoe, joe manpikin!” Dan a e beni en ede go na a sei foe Maria èn e taigi Johanes: „Loekoe, joe mama!”

Jesus e gi na so fasi na sorgoe foe en mama, di, so leki fa a e sori, de now wan weduwe, abra na a apostel di a lobi spesroetoe. A e doe disi foe di den tra manpikin foe Maria no sori bribi ete na ini en. Na so fasi a e gi wan moi eksempel, foe di a no e sorgoe wawan gi den fanowdoe na skin fasi foe en mama, ma so srefi gi en fanowdoe na jeje fasi.

Na wan sani foe dri joeroe bakadina Jesus e taki: „Watra e kiri mi.” Dan, te a e firi taki en Tata, kon meki wi taki en so, hari a kibri di a ben kibri en poeroe foe en, so taki a soifri retifasi foe Jesus ben kan kisi tesi dorodoro, dan e bari nanga wan tranga sten taki: „Mi Gado, mi Gado, foe san-ede joe gowe libi mi?” Te den sma e jere disi, dan sonwan foe den di ben tanapoe krosibei e taki: „Loekoe! A e kari Elia.” Wantewante wan foe den e lon teki wan spons di nati nanga swa win, e poti en na a ede foe wan pisi hysoptaki èn e gi Jesus foe dringi. Ma tra sma e taki: „Libi en! Meki wi si efoe Elia o kon poeroe en.”

Te Jesus e kisi na swa win, a e bari taki: „A kaba!” Ija, a doe ala wroko di en Tata ben seni en kon doe na grontapoe. Te foe kaba a e taki: „Tata, na ini joe anoe mi e froetrow mi jeje.” Nanga disi Jesus e gi en libikrakti na Gado, nanga a froetrow taki Gado sa gi en disi baka. Dan a e boigi en ede, èn e dede.

Tapoe a momenti te Jesus e hari en lasti bro, wan hebi gronseki e feni presi, di e priti den klipston. Na seki de so hebi taki den memre-grebikamra dorosei foe Jerusalem e broko opo, èn dede skin e flei komoto foe den. Sma di e waka pasa èn di e si taki den dede skin kon na doro, e go ini na foto èn e froeteri san den si.

Boiti dati, na a momenti te Jesus e dede, a kefarlek bigi garden di e prati na Santa presi foe na Moro Santa presi na ini Gado tempel, e priti ini toe pisi, foe tapoesei te kon miti gron. A garden disi di abi someni moimoi sani na tapoe, hei, so leki fa a sori, so wan 18 meter èn a hebi srefisrefi! A wondroe disi, di e froewondroe sma, no e sori wawan taki Gado ati e bron nanga den kiriman foe en Manpikin, ma a e sori toe taki sma kan go now na ini a Moro Santa presi, hemel srefi, nanga dede foe Jesus.

We, te sma e firi a gronseki èn e si den sani di e pasa, dan den e kon frede srefisrefi. A legre ofsiri di moesoe sorgoe foe den kiri Jesus, e gi Gado glori. „Foe troe, disi ben de Gado Manpikin”, a e taki. So leki fa a e sori, dan a ben de drape di den ben taki foe a de di Jesus de a manpikin foe Gado na fesi a kroetoe di den ben kroetoe Jesus na fesi Pilatus. Èn now a de seiker taki Jesus de a Manpikin foe Gado, ija, taki troetroe a de a moro bigi man di oiti ben libi.

Den wondroe sani disi e naki na ati foe tra sma toe, èn den e drai go baka na oso e naki den borsoe, leki wan marki taki den e firi sari nanga sjen srefisrefi. Foeroe oema disipel foe Jesus, di den prenspari sani disi di pasa seki toemoesi, e tanapoe farawe e loekoe a tori di e feni presi. Na apostel Johanes de drape toe. Mateus 27:45-56; Markus 15:33-41; Lukas 23:44-49; 2:34, 35; Johanes 19:25-30.

◆ Foe san-ede wan kon doengroe foe son no kan de a reide taki na doengroe ben hori dri joeroe langa?

◆ Sortoe moi eksempel Jesus e gi den wan di abi grani mama nanga papa, sjatoe bifo a dede?

◆ San na den fo lasti sani di Jesus e taki bifo a dede?

◆ San de a bakapisi foe a gronseki, èn san a wani taki, dati a garden foe na tempel e priti na ini toe?

◆ Fa den wondroe abi krakti tapoe a legre ofsiri, di ben moesoe sorgoe foe den kiri Jesus?