„Soekoe vrede èn feti na en baka”
„Bigi a nen foe Jehovah, di abi prisiri ini a vrede foe en foetoeboi.” — PSALM 35:27.
1. Foe sortoe vrede wi e njanboen ini a ten disi?
FA A de wan prisiri sani foe abi vrede ini a grontapoe disi di prati! Fa a de wan prisiri foe anbegi Jehovah, „a Gado foe vrede srefi”, èn foe abi prati ini den blesi foe na „froebontoe foe en foe vrede”! Fa a e gi kowroe-ati, a mindri ala den kwinsi foe a libi, foe sabi „a vrede foe Gado di e pasa ala prakseri” èn foe ondrofeni ’a banti foe vrede’ di e tai Gado pipel kon na wán, awinsi sortoe nationaliteit, tongo, ras, ofoe sociaal background den abi! — 1 Tesalonika sma 5:23; Esekièl 37:26; Filipi sma 4:7; Efeise sma 4:3.
2, 3. (a) Ala di Gado pipel sa horidoro leki wán man, dan san kan pasa nanga aparti kresten? (b) San bijbel e gi wi a deki-ati foe doe?
2 A vrede disi de wan diri sani gi wi leki Jehovah Kotoigi. Ma wi no kan teki disi leki wan sani di e kon foe ensrefi. Foe ensrefi a vrede no kan tan, soso foe di wi moksi wi srefi nanga a kresten gemeente ofoe foe di wi de wan pisi foe wan kresten osofamiri. Ala di na salfoe fikapisi nanga den kompe foe den, den „tra skapoe” leki wán ipi sa horidoro te na a kaba, tokoe aparti sma kan lasi na vrede foe den èn fadon komoto na bribi. — Johanes 10:16; Mateus 24:13; Rome sma 11:22; 1 Korente sma 10:12.
3 Na apostel Paulus ben warskow den salfoe kresten foe en ten: „Loekoe boen brada, taki ini no wan foe oenoe oiti, wan gadolowsoe ati di no e bribi, gro, foe di a e hari ensrefi poeroe foe na libi Gado” (Hebrew sma 3:12). Na warskow disi de so srefi gi a bigi ipi. Na so bijbel e gi kresten a deki-ati: „Soekoe vrede èn feti na en baka. Bika den ai foe Jehovah de na tapoe den regtfardikiwan, èn den jesi foe en e arki na den tranga begi foe den foe kisi jepi; ma a fesi foe Jehovah de kontrari den wan di e doe ogri sani”. — 1 Petrus 3:10-12; Psalm 34:14, 15.
„Prakseri sani foe na skin”
4. San kan pori a vrede foe wi nanga Gado?
4 San kan kon a mindri a feti di wi e feti a baka vrede? Paulus e kari wán penti te a e taki: „Prakseri sani foe na skin wani taki dede, ma prakseri sani foe na jeje wani taki libi èn vrede; foe di a prakseri di wi e prakseri sani foe na skin wani taki feantifasi nanga Gado” (Rome sma 8:6, 7). Nanga „skin”, Paulus e sori go tapoe a sondoe kondisi foe wi leki onvolmaakti libisma, di wi kisi foe wi papa nanga mama. Te wi gi abra na den fasi foe na sondoe skin dan dati sa pori na vrede foe wi. Efoe wan kresten sondro foe abi berow, e doe hoeroedoe, e lei, e foefoeroe, e gebroiki drugs, ofoe e pasa Gado wet tapoe wan ofoe tra fasi, a e pori a vrede nanga Jehovah di a ben abi wan dei (Odo 15:8, 29; 1 Korente sma 6:9, 10; Openbaring 21:8). Boiti dati, efoe a e gi pasi taki sani na skinfasi, e kon moro prenspari gi en leki sani na jejefasi, dan a vrede foe en nanga Gado e kon serjoesoe ini kefar. — Mateus 6:24; 1 Johanes 2:15-17.
5. San abi foe doe nanga a soekoe di wi e soekoe vrede?
5 Na a tra sei, na so Paulus ben taki, „Prakseri sani foe na jeje wani taki libi èn vrede”. Vrede na wan pisi foe den froktoe foe na jeje, èn efoe wi e oefen wi ati foe warderi jeje sani, èn e begi foe Gado jeje jepi wi na ini disi, dan wi sa kibri wi srefi foe „prakseri sani foe na skin” (Galasia sma 5:22-24). Na ini 1 Petrus 3:10-12, vrede abi foe doe nanga regtfardikifasi (Rome sma 5:1). Petrus e taki, taki a feti di sma e feti baka vrede wani taki toe ’drai baka gi san de ogri èn doe san de boen’. Gado jeje kan jepi wi foe „feti baka regtfardikifasi” èn foe kibri na so fasi a vrede foe wi nanga Gado. — 1 Timoteus 6:11, 12.
6. San na wan foe den frantiwortoe foe owroeman ini a tori foe a vrede foe a gemeente?
6 A feti baka vrede na wan foe den moro prenspari broko-ede foe den owroeman na ini a gemeente. Foe eksempel, efoe wan sma e proeberi foe tjari doe di no krin kon na inisei, dan den owroeman abi na frantiwortoe foe kibri a gemeente foe di den e proeberi foe gi a sondoeman tranga leri. Efoe a e teki a tranga leri, dan a sa kisi a vrede foe en baka (Hebrew sma 12:11). Ma efoe a no doe so, dan den moesoe trowe en na dorosei so taki a vrede demakandra di a gemeente abi nanga Jehovah, kan tan. — 1 Korente sma 5:1-5.
Vrede nanga wi brada
7. Gi sortoe kon a krin foe a ’prakseri foe sani foe na skin’ Paulus ben warskow den Korente sma?
7 ’Prakseri sani foe na skin’ no wawan kan pori a vrede di wi abi nanga Gado, ma so srefi wi boen demakandra nanga tra kresten. Paulus ben skrifi gi den Korente sma: „Oenoe abi skinfasi ete. Bika, foe di, djaroesoe nanga kesekese de na oenoe mindri, oenoe no de na skinfasi èn oenoe no e waka leki libisma?” (1 Korente sma 3:3). Djaroesoe nanga kesekese de joisti kontrari foe vrede.
8. (a) San kan pasa nanga wan sma di e meki djaroesoe èn kesekese kon na ini a gemeente? (b) Foe san a vrede foe wi nanga Gado e anga?
8 A pori di wan sma e pori a vrede foe na gemeente foe di a e meki djaroesoe èn trobi kon, na wan toemoesi serjoesoe afersi. Na apostel Johanes ben warskow, di a ben taki foe wan eigifasi di abi foe doe nanga vrede leki wan froktoe foe a jeje: „Efoe iniwan sma e taki: „Mi lobi Gado”, èn tokoe no wani si en brada na ai, dan a de wan leiman. Bika na sma di no lobi en brada di a si, no kan lobi Gado di a no si” (1 Johanes 4:20). Na a srefi fasi, efoe wan sma e tjari djaroesoe ofoe trobi kon a mindri brada a kan dan taki a abi troetroe vrede nanga Gado? Kwetikweti! Dan a e gi wi na deki-ati: „Go doro foe de nanga prisiri, foe kon na a reti pasi baka, foe kisi trowstoe, foe prakseri a srefi, foe libi ini vrede; èn a Gado foe lobi èn foe vrede sa de nanga oenoe” (2 Korente sma 13:11). Ija, efoe wi e go doro foe libi ini vrede nanga makandra, dan na Gado foe lobi èn vrede sa de nanga oenoe.
9. Fa wi doe sabi taki son tron aboisi nanga trobi sa de a mindri kresten?
9 Disi no wani taki, taki noiti aboisi sa de a mindri kresten. Na ini den wiki baka a Pinksterfesa, wan kesekese ben de na ini a jongoe kresten gemeente foe na aladei prati foe njanjan (Tori foe den Apostel 6:1). Na wán okasi wan kroetoe a mindri Paulus nanga Barnabas ben tjari „wan bigi atibron” kon (Tori foe den Apostel 15:39). Paulus ben moesoe gi Eodia nanga Sintiche, di sondro degedege ben de boen, fajafaja sisa, na rai „foe de nanga a srefi prakseri ini Masra” (Filipi sma 4:2). A no de foe froewondroe taki Jesus ben gi finifini rai fa foe doe te a vrede a mindri kresten ben kon pori èn a e poti krakti tapoe na tranga fanowdoe foe loesoe den problema disi wantewante! (Mateus 5:23-25; 18:15-17) A no ben sa gi a rai disi efoe a no ben froewakti moeilekhèit a mindri den bakaman foe en.
10. Sortoe situwâsi e kon son tron ini a gemeente, èn sortoe frantiwortoe disi e poti tapoe ala den sma di abi foe doe nanga dati?
10 Ini a ten disi, a kan taki wan sma firi mandi, foe di wan kompe kresten gebroiki wan wortoe sondro taktiek ofoe wan wortoe foe lagi en, so leki a e si dati. Wan bepaalde eigifasi foe wan sma kan tergi wan trawan srefisrefi. Persoonlijkheid kan boks nanga makandra. A kan taki wan sma no e agri srefisrefi nanga wan bosroiti foe den owroeman. Ini na skin foe owroeman srefi, wan owroeman kan abi wan toemoesi tranga persoonlijkheid èn a kan proeberi foe basi den tra owroeman. Ala di den sani disi e pasa, tokoe wi moesoe soekoe vrede èn feti na en baka. Na tjalensi de foe wroko tranga na den problema disi na wan kresten fasi so taki „na wánfasi banti foe vrede” kan tan. — Efeise sma 4:3.
11. Sortoe jepisani Jehovah ben gi foe jepi wi foe soekoe vrede nanga makandra?
11 Bijbel e taki: „Bigi a nen foe Jehovah, di abi prisiri ini a vrede foe en foetoeboi” (Psalm 35:27). Ija, Jehovah wani taki wi moesoe abi vrede. Foe dati-ede a gi oenoe toe toemoesi boen jepisani foe jepi wi foe kibri vrede a mindri makandra èn nanga en. Wan foe den na a santa jeje, di vrede na wan froktoe foe en, makandra nanga den eigifasi di abi foe doe nanga vrede, so leki langa pasensi, boenfasi, safri-atifasi, èn dwengi joe srefi (Galasia sma 5:22, 23). Na trawan a koni foe Gado, foe san wi e leisi: „Na koni foe tapoesei de na a fosi presi soifri, moro fara a lobi vrede, a de reidelek, a de klari foe gi jesi, a foeroe nanga sari-ati èn boen froktoe”. — Jakobus 3:17, 18.
12. San wi moesoe doe efoe a vrede foe wi nanga wi brada pori?
12 Foe dati-ede, te vrede foe wi nanga trawan pori, wi moesoe begi efoe koni foe tapoesei kan sori wi fa foe handri, èn wi moesoe aksi foe santa jeje foe gi wi krakti foe doe san de joisti (Lukas 11:13; Jakobus 1:5; 1 Johanes 3:22). Ini akroederi nanga wi begi, wi kan loekoe dan na ini a fonten foe Gado koni, a bijbel, foe kisi tiri èn so srefi loekoe ini bijbel lektuur di de, foe kisi rai foe na fasi fa foe gebroiki den Boekoe (2 Timoteus 3:16). Kande wi wani foe soekoe so srefi a rai foe den owroeman ini a gemeente. Wan kriboi stap ben sa de dan, foe waka baka a tiri di wi kisi. Jesaja 54:13 e taki: „Ala joe manpikin sa de sma di kisi leri foe Jehovah, èn a vrede foe den manpikin foe joe sa de pasa marki”. Disi wani taki, taki a vrede foe wi e anga foe a doe di wi e doe den sani di Jehovah e leri wi.
„Kolokoe den sma de di lobi vrede”
13, 14. (a) San e kon na fesi na ini den wortoe foe Jesus „den sma di lobi vrede”? (b) Fa wi kan kon tron sma di e meki vrede doe kon?
13 Jesus ben taki ini en Bergipreiki: „Kolokoe den sma de di lobi vrede, bikasi den sa kari den ’manpikin foe Gado’ (Mateus 5:9). Djaso „den sma di lobi vrede”, no e sori go na wan sma di foe en eigi, abi wan safri fasi. Na Griki wortoe foe na fosi bigin wani taki „sma di e meki vrede doe kon”. Wan sma di e meki vrede doe kon, sabi fa foe tjari vrede kon baka, te a pori. Ma, moro prenspari ete, wan sma di e meki vrede doe kon e proeberi ini a fosi presi foe ensrefi no pori a vrede. ’Vrede e tiri ini en ati’ (Kolose sma 3:15). Efoe den foetoeboi foe Gado e feti a baka foe de sma di e meki vrede doe kon, dan problema a mindri den sa tan pikinso nomo.
14 Foe tron wan sma di e meki vrede doe kon wani taki, taki wi e erken wi eigi swakifasi. Foe eksempel, a kan taki wan kresten abi na fasi taki en ati e teki faja esi-esi ofoe e firi sani esi-esi èn abi na firi taki gaw den e afrontoe en. Te a de ondro kwinsi, den firi foe en kan meki taki a e frigiti den bijbel gronprakseri. Disi a no wan sani di wi no e froewakti foe onvolmaakti libisma (Rome sma 7:21-23). Tokoe, den e kari feanti fasi, trobi, èn kisi hebi atibron leki wroko foe na skin (Galasia sma 5:19-21). Efoe wi e feni den fasi disi ini wi srefi — ofoe te trawan e tjari disi na ondro wi prakseri — wi moesoe begi serjoesoe èn sondro foe stòp, foe a jeje foe Jehovah kan meki a dwengi di wi e dwengi wi srefi èn safri-atifasi, gro na ini wi. A no de foe taki, taki ibriwan sma moesoe feti a baka foe meki den eigifasi disi gro leki wan pisi foe a njoen persoonlijkheid foe en. — Efeise sma 4:23, 24; Kolose sma 3:10, 15.
15. Fa na koni foe tapoesei de kontrari trangajesi fasi di no de reidelek?
15 Son tron, a tranga-edefasi foe wan sma di ala ten wani sani moesoe waka na a fasi fa en wani, e trobi wan gemeente ofoe wan skin foe owroeman. A de troe, taki te a e go foe Gado wet, wan kresten moesoe de nanga wan fasti bosroiti, a no moesoe boigi srefi. Èn efoe wi denki taki wi abi wan boen prakseri di kan tjari wini gi trawan, dan a no de wan fowtoe sani foe taki leti san wi e denki, so langa wi e froeklari na reide foe wi. Ma wi no wani de leki den sma ini grontapoe di „no e opo densrefi gi no wan enkri kroederi” (2 Timoteus 3:1-4). Na koni foe tapoesei, a lobi vrede, de reidelek. Den sma, di den fasi foe handri foe den e sori wan patron foe tranga-ede di no e boigi, moesoe hori na ini prakseri na rai foe Paulus gi den Filipi sma, foe ’no doe no wan sani foe joe eigi boen nomo.’ — Filipi sma 2:3.
16. Fa na rai foe Paulus na ini a boekoe Filipi sma e jepi wi foe kakafoetoe gi a prakseri foe joe eigi boen nomo?
16 Ini a srefi brifi disi, Paulus e gi na deki-ati taki wi moesoe de ’nanga sakafasi foe jeje’, opregti ’loekoe na trawan moro hei leki wi srefi.’ Disi de srefisrefi kontrari a loekoe foe wi eigi boen nomo. Wan lepi kresten no e prakseri ini a fosi presi foe poesoe en eigi prakseri go doro, foe no meki en fesi fadon, ofoe foe kibri en eigi posisi èn makti. Disi ben sa de kontrari na deki-ati di Paulus ben gi foe ’no tan hori ai tapoe en eigi afersi wawan, ma so srefi foe persoonlijk belangstelling ede tapoe di foe tra sma. — Filipi sma 2:4; 1 Petrus 5:2, 3, 6.
Wortoe foe vrede
17. Sortoe fowtoe gebroiki foe na tongo kan pori na vrede foe wan gemeente?
17 A sma di e feti baka vrede, e loekoe boen spesroetoe fa a e gebroiki en tongo. Jakobus e warskow: „Na tongo na wan pikin memre èn tokoe a e skepi kefarlek. Loekoe! Fa wan pikinso faja de fanowdoe foe soetoe faja gi so wan bigi boesi!” (Jakobus 3:5) Ogri-ati gongosa, soekoe fowtoe foe trawan te den drai den baka, krasi èn grofoe wortoe, knoroe èn kragi, so srefi kori na wan oneerlijkfasi soso foe feni wi eigi wini — ala den sani disi na wroko foe na skin di e pori a vrede foe Gado pipel. — 1 Korente sma 10:10; 2 Korente sma 12:20; 1 Timoteus 5:13; Judas 16.
18. (a) Ini a kefal foe wan no-espresi fowtoe gebroiki foe a tongo, san na a joisti pasi di ala sma di abi foe doe nanga dati moesoe teki? (b) Fa lepi kresten moesoe doe te atibron e meki wan sma taki bita wortoe?
18 A de troe, Jakobus ben taki: „No wan sma kan dwengi a tongo” (Jakobus 3:8). Srefi lepi kresten e taki sontron sani di baka ten e gi den opregti sari-ati. Wi alamala e howpoe taki trawan sa gi wi pardon foe den sortoe fowtoe disi so leki fa wi e gi den pardon (Mateus 6:9, 10). Son tron wan ogri atibron kan sorgoe gi wortoe di e ati wan sma. Dan, wan sma di e meki vrede kon sa memre taki „wan piki, di safoe, e kowroe atibron, ma wan piki di e ati sma, e meki atibron opo kon” (Odo 15:1). Foeroetron, a sa moesoe hari dipi bro èn a sa moesoe weigri foe gi piki tapoe wortoe foe atibron nanga ete moro wortoe foe atibron. Baka ten, te a atibron kon kowroe, wan boen-ati sma di e meki vrede doe kon sabi fa foe loekoe pasa sani di den ben taki ini na faja foe a momenti. Èn wan kresten di abi sakafasi sa sabi fa foe aksi pardon èn fa foe proeberi foe dresi den soro di a ben meki. A de wan marki foe moreel krakti foe man taki eerlijk „Mi e firi sari foe dati.”
19. San wi e leri foe Paulus nanga Jesus foe na fasi fa rai moesoe gi?
19 Na tongo moesoe gebroiki kande foe gi trawan rai. Paulus ben piri-ai gi Petrus na poebliki, di a lastiwan disi ben handri fowtoe na ini Antiogia. Èn Jesus ben gi krakti rai ini den boskopoe foe en gi den seibi gemeente (Galasia sma 2:11-14; Openbaring, kapitri 2, 3). Efoe wi e ondrosoekoe den eksempel disi, dan wi e leri taki rai no moesoe de so safoe taki a e lasi en krakti. Tokoe Jesus nanga Paulus no ben de grofoe ofoe ogri-ati. A rai foe den no ben de wan sani foe poeroe den eigi broeja kon a doro. Den ben proeberi opregti foe jepi den brada foe den. Efoe a sma di e gi rai e firi taki a no man foe basi en tongo dorodoro, a ben sa kan teki na bosroiti foe bro èn saka en skafoe pikinso bifo a e taki wan sani. Noso, a ben sa kan taki grofoe wortoe èn meki wan moro bigi problema kon leki a wan di a wani foe loesoe. — Odo 12:18.
20. San moesoe tiri ala sani san wi e taki teige ofoe foe wi brada nanga sisa?
20 So leki a ben taki kaba a fesi, dan vrede nanga lobi abi foeroe foe doe nanga makandra leki froktoe foe na jeje. Efoe san wi e taigi den brada foe wi — ofoe e taki foe den — de ala ten wan sori foe a lobi di wi abi gi den, dan a sa jepi foe vrede de na ini a gemeente (Johanes 15:12, 13). Den wortoe foe wi moesoe de „nanga switifasi, moksi nanga sowtoe” (Kolose sma 4:6). Foe taki en so, den moesoe de nanga boen tesi, èn moesoe wroko tapoe na ati. Jesus ben gi na rai: „Abi sowtoe na ini joe srefi, èn hori vrede a mindri makandra.” — Markus 9:50.
„Doe ala moeiti”
21. San sma e si krin foe Gado pipel na den alawiki konmakandra foe den, na den bigi konmakandra èn den bigi kongres?
21 A psalmsingiman ben skrifi: „Loekoe! O boen èn o switi a de te brada e libi makandra na ini wánfasi!” (Psalm 133:1) Foe troe, wi e feni en wan prisiri sani foe de nanga wi brada, spesroetoe te wi de na den alawiki konmakandra, na den moro bigi konmakandra èn den bigi kongres. Na den okasi dati a vrede foe wi de krin srefi gi sma na dorosei.
22. (a) Sortoe falsi vrede den nâsi denki taki den sa doro heri-esi, èn pe a sa tjari den go? (b) Na ini sortoe troe vrede Gado froebontoe foe vrede sa tjari wi go na ini?
22 Heri-esi den nâsi sa prakseri taki den e doro vrede sondro Jehovah. Ma ala di den e taki, „Vrede nanga seikerfasi!”, dan wantewante wan pori sa kon tapoe ala den sma di no abi vrede nanga Gado (1 Tesalonika sma 5:3). Baka dati, na bigi Kownoe foe Vrede sa bigin foe dresi a libismafamiri foe den rampoe bakapisi foe a lasi di libisma ben lasi a vrede nanga Gado biginbigin (Jesaja 9:6, 7; Openbaring 22:1, 2). Dan, Gado froebontoe foe vrede sa abi leki bakapisi wan rostoe di sa de na a heri grontapoe. Srefi den meti foe na wei sa ondrofeni rostoe foe feantifasi. — Psalm 37:10, 11; 72:3-7; Jesaja 11:1-9; Openbaring 21:3, 4.
23. San wi moesoe doe now efoe na howpoe tapoe wan njoen grontapoe di foeroe nanga vrede de wan diri sani gi wi?
23 Fa dati sa de wan glori ten! Joe e angri foe a ten dati? Efoe a de so, „feti na baka vrede nanga ala sma”. Soekoe vrede now nanga den brada foe joe, èn spesroetoe nanga Jehovah. Ija, „foe di oenoe e froewakti den sani disi, doe ala moeiti foe a feni oenoe te foe kaba sondro flaka èn sondro fowtoe èn ini vrede.” — Hebrew sma 12:14; 2 Petus 3:14.
Joe e memre disi ete?
□ San kan pori a vrede foe wi nanga Jehovah?
□ Sortoe aboisi ini a gemeente moesoe kisi wan loesoe?
□ Sortoe jepisani Jehovah ben gi foe jepi wi foe soekoe vrede èn feti na en baka?
□ Sortoe maniri na skinfasi kan pori a vrede foe a gemeente, èn fa wi kan kakafoetoe gi den?
[Prenki na tapoe bladzijde 18]
Vrede de pasa marki a mindri den wan di kisi leri foe Jehovah
[Prenki na tapoe bladzijde 20]
O prisiri a vrede de foe brada di e dini ini wánfasi!