Foe bekenti joe sondoe — Wan sani de fowtoe na dati?

„NA BIKTI na wan kon krin na jeje fasi, wan fasi foe bigin agen, wan fasi foe poeroe owroe afersi komoto èn bigin njoenjoen. Mi lobi foe go bikti, foe froeteri na priester foe mi sondoe èn foe en gi mi pardon, èn mi lobi na boen firi di e kon na baka dati.” Na so wan fajafaja Katoliek sma e taki. — Bless Me, Father, for I Have Sinned.

Akroederi na New Catholic Encyclopedia, dan „Krestes ben gi ofoe ben abra na makti na den priester wawan foe tai ofoe loesoe, foe gi pardon ofoe no gi pardon foe” sondoe. Na srefi boekoe di wi e sori tapoe en, e taki taki nanga doronomo bikti den ben meine „foe tjari na santafasi foe libi, di ben lasi foe hebi sondoe ede, kon baka èn . . . foe krin na konsensi foe wan sma”. Ma tokoe, na moreel fasi foe handri na ini foeroe kondre e sori taki doronomo bikti no e meki foeroe sma di e doe dati ’kaba nanga ogri, èn doe boen’ (Psalm 34:14). Wan sani fowtoe na dati dan?

Soso wan gwenti?

Na bikti e bigin kande leki soso wan gwenti. Na ini Ierland, dan na fosi bikti e kon wantewante bifo na fosi komoeni. Èn a e gi froewondroe taki wan umapikin foe seibi jari ben sa prakseri moro foe na moi, pikin trowmisi japon di a sa weri, na presi foe ’tjari na santafasi foe libi, di ben lasi foe hebi sondoe ede, kon baka’?

„Na sani di moro foeroe ben seki mi ati foe prisiri ede, ben de na japon, boiti taki mi ben kisi moni foe den famiriman foe mi,” na so Ramona e erken, di ben bikti foe na fosi leisi di a ben de seibi. „Foe ala den oemapikin di mi ben sabi,” na so a e go moro fara, „no wán foe den ben prakseri foe jeje sani. No wán foe oenoe ben prakseri srefi foe Gado na a ten dati.”

Foe taki en leti, te den e dwengi jongoe pikin foe den bikti den sondoe doronomo, dan dati kan abi leki bakapisi a taki foe sani, sondro foe denki. „Mi ben gebroiki den srefi wortoe ibri ten baka”, Michael e taki, di so srefi ben bigin nanga na gwenti foe bikti di a ben de seibi jari.

Na kommentaar foe son Katoliek sma, di den ben teki skrifi na ini a boekoe Bless Me, Father, for I Have Sinned e sori taki srefi baka di den ben kon moro owroe, bikti ben abi pikinso jeje waarde nomo gi den. „Na bikti e leri joe foe lei, bika wan toe sani de di kowôn joe no man tjari joe srefi kon so fara foe froeteri den na a priester,” wan sma ben erken. Foe di den priester no e hori wán mofo, meki sma ben kan gebroiki disi foe kisi na moro lekti boetoe. Son wan ben loekoe foe feni wan „boen” bikti-fadri foe kisi na rai di den ben wani foe jere. „Baka di mi ben loekoe lontoe dri moen langa, mi ben feni na bikti-fadri di mi ben soekoe. Mi e si en ibri moen, fesi na fesi na ini a bikti kamra, èn a de kefarlek boen”, wan jongoe oema ben taki. „Efoe joe ben koni, joe ben soekoe wan priester di ben dofoe èn di no ben taki Ingrisitongo, boiti den wortoe ’dri odi Maria’”, na so wan tra Katoliek sma ben taki.

Leki fa a sori, dan wan sani de fowtoe nanga a fasi fa son sma e bikti. Ma bijbel e sori taki a de fanowdoe foe bekenti joe sondoe, bika a e taki: „A sma di e tapoe den sondoe foe en, sani no sa waka boen gi en, ma a sma di e bekenti den èn e libi den, sa ondrofeni sari-ati.” — Odo 28:13, The New Jerusalem Bible.

Disi wani taki, taki wan Kresten sma moesoe bekenti ala den sondoe foe en? Èn efoe dati de so, dan na soema? Na tra artikel sa ondrosoekoe den aksi disi.