Now a de na ten foe soekoe Jehovah
„Foe na sei foe Jehovah, komoto foe hemel a loekoe go tapoe den manpikin foe libisma, foe si efoe wan sma de di abi inzicht, wan sma di e soekoe Jehovah.” — PSALM 14:2.
1, 2. (a) Fa foeroe sma e si a troe Gado, Jehovah? (b) Fa wi sabi taki Jehovah e si a mi-no-ke fasi foe a libismafamiri?
INI a ten disi, atheïst sma (sma di no e bribi na ini wan gado), agnostici (den wan di e bribi taki sma no man foe sabi noti foe Gado), anbegiman foe falsi gado, èn miljoenmiljoen sma di e taki, taki den e bribi na ini Gado, ma di nanga den wroko foe den e sori taki den no sabi en e trowe na troe Gado (Titus 1:16). Foeroe sma e bribi neleki Nietzsche, a Doisri filosoofman foe a di foe 19 jarihondro, taki „Gado dede.” Jehovah no e si na grofoe mi-no-ke fasi disi? Nôno, bika a ben meki David skrifi ondro krakti foe santa jeje: „Na sma sondro froestan ben taki na ini en ati: ’Nowan Jehovah no de’. Den handri na wan ogri fasi, den ben handri na wan tegoe fasi ini den doe foe den. No wan sma de di e doe boen”. — Psalm 14:1.
2 David ben go doro: „Foe na sei foe Jehovah, komoto foe hemel a loekoe go tapoe den manpikin foe libisma, foe si efoe wan sma de di abi a koni foe si sani, wan sma di e soekoe Jehovah.” Ija, na Soeverein Masra e si den sma di wani kon sabi en èn dini en. Foe dati-ede, a de toemoesi prenspari foe soekoe en serjoesoe now. A sa wani taki a difrenti a mindri têgo libi nanga têgo pori. — Psalm 14:2; Mateus 25:41, 46; Hebrew sma 11:6.
3. Sortoe mogelijkheid de gi a ten di e kon?
3 Wi kan si foe dati-ede, foe san-ede a de so prenspari taki wi e jepi trawan foe soekoe Jehovah now. Te now ete, foeroe miljoenmiljoen sma de di noiti ben miti nanga wan Kotoigi foe Jehovah ofoe ben jere a „boen njoensoe foe na kownoekondre”. Èn o moro bigi a nomroe foe a „bigi ipi” sa kon bifo „a bigi banawtoe”, wi no sabi. Ma a man foe troe, taki moro sma sa soekoe èn feni Jehovah Gado ini a krosibei tamara, bifo a de toemoesi lati. Na aksi de now: San wi kan doe foe jepi miljoenmiljoen sma moro foe den feni Gado? — Mateus 24:14; Openbaring 7:9, 14.
4, 5. San foeroe sma e froekisi te den e soekoe wan gado?
4 Foeroe sma na ini a disiten grontapoe e soekoe, ma san den e soekoe? Soso pikinso sma de nomo, di troetroe e soekoe a wan troe Gado, Jehovah. Wan bigi nomroe foe sma wani wan gado di e fiti den eigi persoonlijk lostoe nanga prakseri di no abi gron. Na Amerkan enquêteura George Gallup, Jr., ben taki: „Foeroe difrenti no de foe feni troetroe a mindri kerki sma nanga den sma di no e go a kerki, te a e go foe bidrigifasi, dòk gi a pai foe belasting nanga a foefoeroe foe pikin sani, moro foeroe foe di wan lo sociaal relisi de.” A e taki moro fara taki „foeroe sma e meki wan relisi di den e firi densrefi boen na ini, wán di e kori den . . . Wan sma ben kari dati wan leisi relisi à la carte.” (Dati wani taki: poti na ini relisi san sma e froekisi.)
5 Tra sma sa taki: „A relisi foe mi boen nofo gi mi”. A no de foe taki, taki na aksi moesoe de troetroe: „A relisi foe mi boen nofo gi Gado?” A de troe, taki a moro bigi pisi foe na krestenhèit nanga na hindoe relisi de tevrede foe gi den stonpopki nanga den falsi gado foe den grani. Moro foeroe foe den sokari kresten e feni taki wan Driwanfasi gado sondro nen de nofo gi den. Èn moro leki 900 miljoen moslim sma e bribi na ini Alah. Na a tra sei, miljoenmiljoen atheïst sma e taki, taki no wan Gado no de.
Den wan di abi jepi fanowdoe
6. San foeroe leisiman foe Na Waktitoren kon si?
6 Ma fa a de nanga den wan foe wi di e leisi a tijdschrift disi doronomo? Wi ben soekoe a troe Gado èn ben feni en. Wi ben ondrofeni taki den wortoe foe Jakobus 4:8 de troe: „Kon krosibei foe Gado, èn en sa kon krosibei foe joe.” Nanga a fajafaja demakandra foe wi nanga a kresten gemeente, wi kon moro krosibei foe Gado, èn wi srefi ondrofeni fa Jehovah e kon moro krosibei foe wi. — Johanes 6:44, 65.
7. Fa wi doe sabi taki foeroe sma de ete di abi belangstelling foe kon fajafaja ini a waarheid?
7 Ma wi sabi taki foeroe sma de ete di e prisiri foe de makandra na okasi nanga a pipel foe Jehovah, ma di no teki positief stap ete foe kon krosibei foe Jehovah foe di den no gi densrefi abra èn no teki dopoe. Fa wi doe sabi disi? Na ini 1990 pikinmoro a ben doro tin miljoen sma di ben de na a Memrefesa foe Jesus dede. Ma omeni foe den e preiki fajafaja a boen njoensoe foe a Kownoekondre? Pikinso moro leki fo miljoen. Dati wani taki, taki so wan siksi miljoen sma de di de mati foe na waarheid èn di son leisi e njanboen foe a demakandra nanga wi, ma di no bigin ete foe rikomanderi a soifri tongo foe a waarheid foe di den no e preiki a boen njoensoe foe a Kownoekondre. Sondro degedege, foeroe sma te na okasi sori ensrefi, e taki foe Jehovah nanga en Kownoekondre tiri. Ma den no sori den srefi krinkrin ete leki Kotoigi foe Jehovah. Wi wani foe jepi den sma disi so srefi. — Sefania 3:9; Markus 13:10.
8, 9. (a) San Jehovah e gi wi a deki-ati foe doe? (b) Foe san-ede a no de wan koni sani foe no doe a rai foe Jehovah?
8 Wi wani foe gi den sma disi deki-ati foe tron kolokoe, fajafaja Kotoigi foe Jehovah ini a kriboi pisi foe a bigi wroko di den e doe now na a heri grontapoe. Grantangi poti prakseri tapoe a lobi kari foe Jehovah na ini Odo 1:23: „Drai kon baka te mi piri-ai gi joe. Dan mi sa meki a jeje foe mi koekoe kon na tapoe gi joe; mi sa meki den wortoe foe mi bekenti na joe”. (Teki gersi Johanes 4:14.) Fa a e gi deki-ati foe sabi taki Jehovah sa handri tapoe den positief stap di wi e teki foe meki sma kon sabi wi na a nen èn na a anbegi foe en! Foe troe, wi no wani foe de a mindri den sma di den e skrifi foe den na ini Odo 1:24, 25: „Mi bari kari, ma oenoe e tan weigri, mi langa mi anoe, ma no wan sma de di e poti prakseri, èn oenoe e tan poti ala mi rai na wan sei èn na piri-ai foe mi oenoe no teki.”
9 Den sma di no e gi jesi na a rai foe Jehovah, foe soekoe en ala di a de foe feni èn di e wakti foe teki a bosroiti foe den te leki den e si taki a bigi banawtoe e bigin troetroe, sa kon si taki den ben wakti toemoesi langa. So wan fasi ben sa kan sori a mankeri foe bribi èn koni èn a ben sa kan de a wisiwasi foe a no-froedini boenfasi foe Jehovah. — 2 Korente sma 6:1, 2.
10. Foe san-ede a fasi foe no firi gi sma èn a mi-no-ke fasi de kefarlek?
10 Foe agersi a fanowdoe foe handri wantewante: Joe ben sa waka baka a boen rai foe wan datra soso te joe ben abi wan dobroe fokofoko siki kaba? Ofoe, na presi foe dati, joe ben sa doe dati te joe ben si den fosi marki foe a siki? Foe san-ede dan, joe e wakti moro langa foe poeroe joe srefi ini a siki grontapoe foe Satan èn foe teki a sei foe Jehovah nanga den Kotoigi foe en? Den takroe bakapisi foe no e firi gi sma, foe mi-no-ke fasi nanga na onborsoe fasi e tjari kon a krin na ini Odo 1:26-29: „Foe mi sei, mi sa lafoe na a eigi ongolokoe foe oenoe, mi sa spotoe te san oenoe frede e kon . . . Na a ten dati den sa tan kari mi, ma mi no sa piki; den sa tan soekoe mi, ma den no sa feni mi, foe di den no ben wani si sabi na ai èn den no ben teki a frede foe Jehovah.” Meki den no feni oenoe e ’soekoe Jehovah’, te a de toemoesi lati!
11. Sortoe jepi de gi den sma di e soekoe foe dini Gado?
11 A kan taki son sma di e leisi a tijdschrift disi, e soekoe a troe Gado te now ete. Wi breiti taki joe e horidoro na ini a soekoe di joe e soekoe. Wi e begi taki a sabi di joe abi foe bijbel sa boeweigi joe foe teki moro positief stap foe tanapoe kankan gi a waarheid. De seiker taki ibri gemeente foe Jehovah Kotoigi de klariklari foe jepi joe nanga a soekoe di joe e soekoe. — Filipi sma 2:1-4.
A ten foe de fajafaja èn foe handri
12, 13. Foe san-ede wi moesoe teki stap di abi foe doe nanga a troe anbegi?
12 Foe san-ede a de prenspari taki wi alamala moesoe handri foe sori sma taki wi de nanga Jehovah Gado èn en troe anbegi? Foe di den sani di e pasa na grontapoe e go na wan heimarki. Den bladzijde foe historia e drai moro esi leki libisma kan leisi den. Now a no de a ten foe loekoe san e go èn san e kon ofoe foe de broko-kowroe. Jesus ben taki toemoesi krin: „A sma di no de na mi sei, de kontrari mi, èn a sma di no e tjari kon makandra nanga mi, e panja sani”. A ben taki so srefi: „A sma di e sjen gi mi èn gi den wortoe foe mi, a Manpikin foe libisma sa sjen gi en te a kon na ini en glori èn na ini di foe na Tata èn foe den santa engel”. — Mateus 12:30; Lukas 9:26.
13 Now a de a ten foe de fajafaja èn foe handri! Wi sabi na sortoe sei den sani di e pasa na grontapoe e go, èn wi e si taki Armagedon e opo ede kon na a horizon. Foe dati-ede a kari de, foe soekoe Jehovah now bifo a ’dei foe en atibron’, ala di a de foe feni ete. Na ini a bigi banawtoe, a sa de toemoesi lati. — Sefania 2:2, 3; Rome sma 13:11, 12; Openbaring 16:14, 16.
14. Sortoe reide wi abi foe soekoe Gado?
14 Foe troe, a heri libismafamiri moesoe soekoe a boen-ati foe Gado now. Na apostel Paulus ben taki en na wan joisti fasi na ini Tori foe den Apostel 17:26-28: „[Gado] ben meki komoto foe wán sma ibri nâsi foe sma, foe libi tapoe a heri fesi foe na grontapoe, èn a ben poti den fasti ten èn den fasti skotoe foe den libipresi foe den sma, so taki den ben sa soekoe Gado, efoe kande den ben sa kan firi en èn feni en troetroe, ala di te joe e loekoe en boen a no de fara foe ibriwan foe wi. Bika foe en wi abi libi, wi e boeweigi èn wi de.” Den lasti wortoe dati, „bika foe en wi abi libi, wi e boeweigi èn wi de”, e gi wi nofo reide foe soekoe Gado. Tangi foe a no-froedini boenfasi foe Jehovah, taki wi e libi ini a smara ma prenspari biosfeerb foe a pikin grontapoe disi. Wi no moesoe taki a Soeverein Masra foe na universum tangi? Èn wi no moesoe sori en nanga den doe foe wi taki wi de grantangi? — Tori foe den Apostel 4:24.
15. (a) San na prakseri foe na historia skrifiman Arnold Toynbee ben de foe a marki foe wan moro hei relisi? (b) San wi moesoe doe foe kan gi Gado glori?
15 Historia skrifiman Arnold Toynbee ben skrifi wan leisi: „Na troe prakseri foe wan moro hei relisi de, foe meki den rai nanga den waarheid na jejefasi, di de na inibere foe a relisi dati, skèin go na someni sili leki a kan, so taki ibriwan foe den sili disi sa man foe meki a troetroe marki foe libisma kon troe. A troetroe marki foe libisma de foe gi Gado glori èn foe njanboen foe En foe têgo” (An Historian’s Approach to Religion, bladzijde 268-269). Foe man foe gi Gado glori, wi moesoe soekoe en fosi èn teki dorodoro sabi foe en nanga den prakseri foe en. Foe dati-ede a kari foe Jesaja, e fiti so boen: „Soekoe Jehovah, oenoe pipel, ala di oenoe kan feni en. Kari en, ala di a sori taki a de krosibei. Meki a gadolowsoe man libi en pasi èn a man foe takroedoe den prakseri foe en; èn meki a drai go baka na Jehovah, di sa sori en sari-ati, èn na wi Gado, bika a sa gi pardon foeroe”. — Jesaja 55:6, 7.
Sortoe praktis jepi wi kan gi?
16. (a) Na fesi foe sortoe tjalensi a kresten gemeente e kon tanapoe? (b) Na sortoe praktis fasi wi kan gi trawan jepi foe dini Jehovah?
16 Den miljoenmiljoen sma di abi belangstelling, ma di no de fajafaja preikiman ete, de wan tjalensi gi wi alamala. San wi e doe na wan praktis fasi leki owroeman, dinari na ini a diniwroko, pionier èn preikiman foe jepi den sma di de mati foe a waarheid, foe kon teki fajafaja prati nanga wi ini a troe anbegi? Wán fasi foe gi praktis jepi pe a de fanowdoe, de foe go teki den na den oso èn foe tjari den na den konmakandra na ini a Kownoekondrezaal so taki so srefi den kan njanboen doronomo foe den winimarki foe Jehovah jeje. A rai foe Paulus na ini Hebrew sma kapitel 10, vers 24 nanga 25, de tranga fanowdoe na ini a ten disi so leki fa a ben de fanowdoe na ini a ten di a ben taki dati: „Meki wi poti prakseri tapoe makandra foe kan gi tranga ini lobi nanga toemoesi boen wroko, foe no libi a baka foe wi konmakandra, so leki a de a gwenti gi son wan, ma gi makandra tranga èn dati moro foeroe te wi e si a dei e kon krosibei.” Wi e gi ala sma, di wani ondrofeni a boen wani foe Jehovah, deki-ati foe abi demakandra doronomo nanga Jehovah Kotoigi na ini den Kownoekondrezaal foe den na ini a birti foe den.
17. Sortoe aksi moesoe kisi wan piki efoe wi wani jepi bijbel-studenti foe go a fesi ini a soekoe di den e soekoe Jehovah?
17 Efoe wi e studeri a bijbel nanga wan sma di e kon doronomo na konmakandra, wi kan jepi a sma dati foe tron wan preikiman foe a boen njoensoe? (Loekoe Orga foe doe wi diniwroko, bladzijde 99-102, Bakratongo.) Èn efoe a e tron wan preikiman di no dopoe, wi e gi en a kari foe kon doronomo nanga wi na ini a poebliki preikiwroko èn foe kon na sonwan foe den studie èn den gobaka foe wi? (Loekoe Na Waktitoren foe 1 december 1989, bladzijde 31, Bakratongo.) Nanga tra wortoe, efoe den feni den njoen sma disi boen kaba, wi e gi den a deki-ati foe di wi e sori den langalanga wantoe foe den positief bakapisi foe a preikiwroko foe wi? — Mateus 28:19, 20.
Jehovah de warti foe wi soekoe en
18. Fa Jehovah sori a libismafamiri en sari-ati fasi?
18 Foe na froeloesoe ofrandi foe Krestes Jesus ede, Jehovah no e hori wi na ati foe den sondoe foe wi èn den sani di wi misi foe doe efoe wi abi berow èn efoe wi e sori bribi. Loekoe den wortoe foe David: „A no ben doe srefi nanga wi akroederi den sondoe foe wi, èn a no ben doe nanga wi akroederi den ogridoe foe wi san wi e froedini. Bika so leki fa hemel hei moro leki grontapoe, na so en lobi boenfasi de moro hei gi den wan di e frede en. So fara leki fa son-opo de foe sondongo, so fara a ben poti den fowtoe foe wi. Neleki fa wan papa e sori den manpikin foe en sari-atifasi, na so Jehovah ben sori den wan di e frede en, sari-atifasi. Bikasi ensrefi sabi heri boen foe san wi meki, a e hori na ini prakseri taki wi de doti.” — Psalm 103:10-14; Hebrew sma 10:10, 12-14.
19. Sortoe deki-ati de gi den sma di drifi gowe foe a waarheid?
19 Jehovah de a troetroe Gado di e doe boen èn di abi sari-ati. Efoe wi e kon na en nanga sakafasi èn nanga berow, a e gi wi pardon èn a e frigiti. A no e hori wi na ati nanga leki bakapisi têgo skin-ati na ini hèlfaja. Nôno, a de so leki fa Jehovah ben taki: „Mi — mi de a sma di e figi poeroe den fowtoe foe oenoe, foe mi wani ede, èn den sondoe foe oenoe mi no sa tjari moro na ini prakseri.” Fa dati moesoe de wan deki-ati gi ibriwan sma di kande drifi gowe foe na waarheid èn di misi foe hori a demakandra foe den nanga Jehovah! Den so srefi e kisi na deki-ati foe soekoe Jehovah now èn kon baka na ini wan fajafaja demakandra nanga en pipel foe en nen. — Jesaja 43:25.
20, 21. (a) Sortoe eksempel di e gi deki-ati, wi abi ini a Juda foe owroeten? (b) San den sma foe Juda ben moesoe doe foe kisi a blesi foe Jehovah?
20 Ini a tori disi wi abi wan eksempel ini kownoe Asa foe Juda foe owroeten di e gi deki-ati. A ben roetoe falsi anbegi poeroe foe na kownoekondre foe en, ma pisi foe hèiden anbegi ben de ete. A pisi tori na ini 2 Kroniki 15, vers 2 te nanga 4, e froeteri wi san profeiti Asaria ben taigi Asa leki wan memre gi en: „Jehovah de nanga joe so langa joe e sori taki joe de nanga en; èn efoe joe e soekoe en, a sa meki joe feni en, ma efoe joe e gowe libi en, a sa gowe libi joe. Èn foeroe dei Israèl ben de sondro wan troe Gado . . . Ma te den ben drai go baka na Jehovah, a Gado foe Israèl, ala di den ben de na ini a banawtoe foe den èn ben soekoe en, dan a ben meki den feni en.”
21 Jehovah no ben prei kibri nanga kownoe Asa ma „a ben meki Asa feni en.” San a kownoe ben doe tapoe a boskopoe disi? Ini a srefi kapitel, vers 8 èn 12 e piki: „Èn so esi leki Asa ben jere den wortoe disi . . . , a teki deki-ati èn baka dati a meki den poeroe den tegoe sani na ini a heri kondre . . . èn a ben bigin foe meki na altari foe Jehovah, di ben tanapoe a fesi na inisei djari foe Jehovah, kon njoen baka. Moro fara [Juda] ben kon ini wan froebontoe foe soekoe Jehovah, a Gado foe den fositen papa, nanga heri den ati, èn nanga heri den sili.” Ija, den ben soekoe Jehovah serjoesoe „nanga heri den ati èn nanga heri den sili”. Èn san ben de a bakapisi gi a nâsi? Vers 15 e froeteri wi: „Èn heri Juda ben sori prisiri foe san den ben sweri; bika nanga heri den ati den ben sweri èn nanga ala prisirifasi foe den sei den ben soekoe en, so taki a ben meki den feni en; èn Jehovah ben tan gi den rostoe na ala sei.”
22. San e gi wi a deki-ati foe de fajafaja now ini a dienst foe Jehovah?
22 We, a no de wan deki-ati gi wi alamala foe doe positief stap ini a tori foe a soifri anbegi foe Jehovah? Wi sabi taki a kan, taki miljoenmiljoen sma moro kan gi Jehovah prèise. Sondro degedege foeroe foe den sma disi e tjari kenki kon ini den libi, so taki den kan doro den bijbelmarkitiki foe na dienst foe Jehovah. Tra sma e gro na ini inzicht èn na ini bribi, e soekoe Jehovah, èn esi-esi den sa abi a krakti foe prati na soifri tongo nanga trawan foe di den e meki den froestan a waarheid foe Jehovah nanga en kownoekondre dorodoro. Èn foe san-ede a de so prenspari taki ibriwan foe wi moesoe soekoe Jehovah now di a de foe feni? Foe di a njoen grontapoe foe en di a ben pramisi, de krosibei! — Jesaja 65:17-25; Lukas 21:29-33; Rome sma 10:13-15.
[Foetoewortoe]
a Wan sma di nanga aksi-aksi e ondrosoekoe fa wan bigi nomroe foe sma e prakseri foe fansortoe tori.
b A pisi foe a grontapoe nanga a atmosfeer di abi ala bon nanga meti na ini.
Joe e memre disi ete?
◻ Soema e sori wan mi-no-ke fasi na a troe Gado, Jehovah?
◻ Te o fara relisi abi krakti tapoe a waka nanga libi foe sma?
◻ Sortoe mogelijkheid de foe meki moro fajafaja Kotoigi kon?
◻ Foe san-ede a de now a ten foe de fajafaja èn foe handri?
◻ Foe san-ede Jehovah de warti foe den soekoe en?
[Prenki na tapoe bladzijde 10]
Foeroe mati foe Jehovah Kotoigi di e go na a Memrefesa de sma di kan tron diniman foe Gado
Sma di ben de na a Memrefesa foe 1990: 9.950.058
Heimarki foe preikiman na ini 1990: 4.017.213
[Prenki na tapoe bladzijde 12]
Ini den dei foe kownoe Asa, a nâsi ben drai go baka na Jehovah