Jesus libi nanga diniwroko

Jesus e sori ensrefi moro tron

DEN disipel e firi brokosaka ete. Den no e froestan foe san ede a grebi leigi, èn den no e bribi toe san den oema ben froeteri den. Baka ten tapoe sonde, Kleopas èn ete wan tra disipel e gowe libi Jerusalem so boen, foe go na Emaus, di didon so wan erfoe kilometer moro fara.

Na pasi, ala di den e taki foe den sani di ben pasa a dei dati, wan freimde sma e kon waka nanga den. „San na den sani di oenoe e taki ala di oenoe e waka?”, a e aksi.

Nanga wan sari fesi den disipel e stòp, èn Kleopas e piki: „Joe e libi leki wan freimde sma na ini Jerusalem èn foe dati ede joe no sabi den sani di ben pasa drape den dei disi?”

„Sortoe sani?”, a sma e aksi.

„Den sani di abi foe doe nanga Jesus foe Nasaret”, den e piki. Den ede-priester foe wi èn den tiriman [ben] gi en abra foe a kisi dedestrafoe èn den ben spikri en na wan postoe. Ma wi ben howpoe taki a man disi ben sa de na sma di ben o froeloesoe Israèl.”

Kleopas nanga a kompe foe en e froeklari sortoe froewondroe sani ben pasa a dei dati — a tori foe a bovennatuurlijk si di sma ben si engel nanga a leigi grebi — ma den e gi a tapoe taki den ben aksi densrefi san den sani disi wani taki. A freimde sma e piri-ai gi den: „O oenoe sma sondro froestan, di no de esi foe ati foe bribi ala sani di den profeiti ben taki! A no ben de so, taki a Krestes ben moesoe njan pina foe den sani disi ede èn taki a ben moesoe go na ini a glori foe en?” Dan a e froeklari den pisi foe bijbel di abi foe doe nanga a Krestes.

Te den doro te foe kaba krosibei foe Emaus, a freimde sma e doe neleki a wani waka doro. Foe di den disipel wani foe jere moro, den e aksi tranga: „Tan nanga oenoe, bika neti e doro kaba èn dei pasa gowe kaba.” A e tan so boen foe njan nanga den. Te a e begi, e broko a brede èn e gi den disi, den e si taki a de troetroe Jesus ini wan skin foe libisma meti. Ma dan a e gowe.

Now den e kon froestan foe san ede a freimde sma ben sabi so foeroe! „A ati foe wi no ben kon fajafaja foe inisei di a ben taki nanga oenoe a pasi, di a ben opo den Boekoe gi wi dorodoro?”, den e taigi makandra. Sondro draidrai, den e opo èn esi-esi den e go baka na Jerusalem, pe den e feni den apostel èn den sma di ben kon makandra nanga den. Bifo Kleopas nanga a kompe foe en kan taki wan sani, den trawan e taki nanga prisiri: „Masra troetroe opobaka foe dede èn a ben sori ensrefi na Simon!” Dan den toe man e froeteri fa Jesus ben sori ensrefi toe na den. Disi na a di foe fo tron foe a dei disi dan, taki Jesus sori ensrefi na difrenti foe en disipel.

Ala di den doro tapoe, foe di den disipel frede den djoe, Jesus wantronso e sori ensrefi foe a di foe feifi tron. A e tanapoe leti na den mindri èn e taki: „Vrede de nanga oenoe.” Den frede te foe dede, foe di den e prakseri taki den e si wan jeje. Foe dati ede Jesus e tjari kon a krin taki a no de wan jeje èn a e taki: „Foe san ede oenoe de ini broeja, èn foe san ede degedege e kon na ini oen ati? Loekoe mi anoe èn mi foetoe, taki a de mi srefi; firi mi èn loekoe, bika wan jeje no abi meti nanga bonjo so leki oenoe e si taki mi abi.” Tokoe ete den e draidrai foe bribi, foe di a e sori wan toemoesi moi prakseri taki Jesus e libi.

Foe di a wani jepi den foe froestan boen taki en de Jesus troetroe, meki a e aksi: „Joe abi wan sani dja foe njan?” Baka di a teki wan pisi baka fisi èn e njan en, a e bigin gi den leri èn e taki: „Disi na den wortoe di mi ben taigi oenoe di mi ben de ete nanga oenoe [bifo mi dede], taki ala den sani di skrifi foe mi na ini a wet foe Moses èn ini den Profeiti èn ini den Psalm ben moesoe kon troe.”

Te Jesus e go doro nanga, te joe e loekoe en boen, san gersi wan bijbelstudie èn a leri den: „Na so den skrifi taki a Krestes ben sa njanpina èn a ben sa opo baka foe dede na a di foe dri dei, èn tapoe gron foe en nen, den ben sa preiki na ini ala nâsi, berow foe man kisi pardon foe sondoe — bigin foe Jerusalem, oenoe moesoe de kotoigi foe den sani disi.”

Foe wan ofoe tra reide Tomas no de na a prenspari sondeneti konmakandra disi. Foe dati ede nanga foeroe prisiri den trawan e froeteri en, na ini den dei di e kon a baka: „Wi si Masra!”

„Efoe mi no si a marki foe den spikri na ini en anoe”, Tomas e gens taki, „èn mi no soetoe mi finga na ini a marki foe den spikri èn mi no soetoe mi anoe na ini en seibere, mi no sa bribi kwetikweti.”

We, aiti dei a baka den disipel e miti makandra baka na ini wan oso. A leisi disi Tomas de nanga den. Ala di den doro tapoe, Jesus e kon tanapoe agen na den mindri èn a e taki: „Vrede de nanga oenoe”. Dan a e drai loekoe Tomas, èn e kari en: „Poti joe finga dja, èn loekoe mi anoe, èn teki joe anoe èn soetoe en na ini mi seibere, èn no de moro langa sondro bribi ma kisi bribi.”

„Mi Masra èn mi Gado!”, Tomas e bari taki.

„Joe e bribi foe di joe ben si mi?”, Jesus e aksi. „Kolokoe foe den wan di no e si èn tokoe e bribi.” Lukas 24:11, 13-48; Johanes 20:19-29.

◆ Sortoe sani wan freimde sma e aksi den toe disipel di de a pasi foe go na Emaus?

◆ San a freimde sma e taki di e meki na ati foe den disipel kon de fajafaja foe inisei?

◆ Fa den disipel e kon si taki a freimde sma na Jesus?

◆ Te Kleopas nanga a kompe foe en e drai go baka na Jerusalem, sortoe prisiri tori den e kisi foe jere?

◆ Fa Jesus e sori ensrefi foe na di foe feifi tron na den disipel foe en, èn san e pasa dan?

◆ San e pasa aiti dei baka na a di foe feifi tron di Jesus ben sori ensrefi, èn fa Tomas e kon bribi te foe kaba taki Jesus de a libi?