Froetrow tapoe Jehovah anoe di e tjari froeloesoe kon
„O Jehovah, . . . kon de na anoe foe wi ibri mamanten, ija, wi froeloesoe na ini ten foe banawtoe.” — JESAJA 33:2.
1. Na sortoe fasi Jehovah abi wan makti anoe?
JEHOVAH abi wan makti anoe. A no de foe taki, dati a no de wan anoe foe skin, foe di „Gado na wan Jeje” (Johanes 4:24). Ini bijbel, na agersi anoe e prenki na man di wan sma man foe sori en makti. So boen, a de nanga jepi foe en anoe, taki Gado e froeloesoe en pipel. Ija ’leki wan herder, Gado e loekoe en skapoe. Nanga en anoe a e tjari den pikin skapoe kon makandra, èn na en borsoe a e tjari den’ (Jesaja 40:11; Psalm 23:1-4). Fa na pipel foe Jehovah e firi seiker na ini en lobi anoe! — Teki gersi Deuteronomium 3:24.
2. Sortoe aksi di de dja warti foe wi poti wi prakseri?
2 Fa na anoe foe Jehovah ben tjari froeloesoe kon gi en pipel ini na ten di pasa èn ini a ten disi? Sortoe jepi Gado e gi den leki wan gemeente? Èn foe san-ede en pipel kan froetrow tapoe en anoe di e tjari froeloesoe kon na ini ala den banawtoe foe den?
Gado anoe di e tjari froeloesoe kon de a wroko
3. Leki fa Boekoe e taki, dan san ben sorgoe taki Israèl kon fri foe Egipti?
3 Bifo Gado ben froeloesoe den Israèlsma foe na katibo foe Egipti 3500 jari pasa kaba, a ben taigi en profeiti Moses: „Taigi den manpikin foe Israèl: ’Mi na Jehovah èn Mi sa tjari oenoe seiker komoto na ondro den lai foe den Egiptisma èn mi sa froeloesoe oenoe foe na katibo foe den, èn seiker mi sa teki oenoe nanga wan anoe di langa go a fesi èn nanga hebi kroetoe’” (Exodus 6:6). So leki fa na apostel Paulus ben taki, dan Gado ben tjari den Israèlsma komoto foe Egipti „nanga wan anoe di ben opo go na loktoe” (Tori foe den Apostel 13:17). Den manpikin foe Korak ben skrifi foe Gado leki na Sma di ben wini na Pramisi Kondre, nanga den wortoe disi: „Bika a no ben de nanga den eigi feti-owroe, taki den ben teki na kondre abra, èn a no ben de den eigi anoe di ben tjari froeloesoe kon gi den. Bika a ben de joe reti-anoe èn joe tapoesei-anoe èn na leti foe joe fesi, foe di joe ben abi prisiri na ini den.” — Psalm 44:3.
4. Fa froetrow tapoe na anoe foe Jehovah ben kisi pai na ini den dei di den Asiriasma ben go feti nanga Israèl?
4 Na anoe foe Jehovah ben de wan jepi toe gi en pipel ini den dei di den Asiriasma ben kon feti nanga den. Na a ten dati na profeiti Jesaja ben begi: „O Jehovah, sori wi boen-ati. Tapoe joe wi ben howpoe. Kon de na anoe foe wi ibri mamanten, ija, wi froeloesoe na ini ten foe banawtoe” (Jesaja 33:2). Gado ben jere na begi dati di en engel ben kiri 185.000 sma na ini na Asiria kampoe, èn dati meki kownoe Sanherib ben hari gowe „nanga wan sjen fesi”, sondro foe a ben teki Jerusalem abra (2 Kroniki 32:21; Jesaja 37:33-37). Wi e kisi pai ala ten efoe wi e poti froetrow tapoe Jehovah anoe di e tjari froeloesoe kon.
5. San na makti anoe foe Gado ben doe gi kresten di ben kisi froefolgoe na a kaba foe na Fosi Grontapoefeti?
5 Na makti anoe foe Gado ben froeloesoe salfoe kresten di den ben kisi froefolgoe na a kaba foe na Fosi Grontapoefeti. Na ini 1918 den feanti foe na Tiri Skin ben kon ròs den na a edekantoro èn den ben poti prenspari brada na ini strafoe-oso. Foe di den ben frede den grontapoe makti, meki den salfoewan pikinmoro ben tapoe krinkrin nanga a kotoigiwroko foe den. Ma den ben begi foe a wroko disi bigin baka èn foe den ben kan kon krin foe na sondoe foe inaktiviteit èn foe a dotifasi foe frede. Gado ben gi piki, foe di a ben meki den brada di den ben poti na ini strafoe-oso kon fri baka, èn sjatoe baka dati Lanti ben soifri a nen foe den. Leki wan bakapisi foe den waarheid di den salfoewan ben taki foe den na a kongres foe den na ini 1919 èn na kanti kon foe a jeje foe Gado di e gi libi na sani, dan den ben kon na libi baka foe doe dienst gi Jehovah sondro frede, leki wan lasti kontroe foe Joèl 2:28-32. — Openbaring 11:7-12.
Jepi ini a gemeente
6. Fa wi doe sabi taki wi kan horidoro na ondro wan situwâsi di lai nanga tesi ini wan gemeente?
6 Ala di Gado e horibaka gi en organisâsi ini algemeen, tokoe en anoe e gi krakti na aparti sma na ini a organisâsi disi. A no de foe taki, dati omstandigheid no de volmaakti ini no wan gemeente, foe di ala libisma de onvolmaakti (Romesma 5:12). Foe dati-ede meki sonwan foe den foetoeboi foe Jehovah kan ondrofeni sontron ini wan gemeente wan situwâsi di lai nanga tesi. Foe eksempel, ala di Gajus ben doe „wan getrow wroko” foe di a ben teki brada na en oso di ben tjari wan fisiti kon, tokoe ete Diotrefes no ben teki den èn a ben proeberi srefi foe trowe sma di ben teki sma na den oso, dorosei foe na gemeente (3 Johanes 5, 9, 10). Ma tokoe Jehovah ben jepi Gajus nanga trawan foe tan teki sma na den oso foe horibaka gi na Kownoekondre preikiwroko. Froetrow na tapoe Gado nanga jepi foe begi, moesoe jepi wi foe tan doe getrow wroko, ala di wi e wakti tapoe en foe poti a situwâsi di kan de wan tesi gi wi bribi, kon reti baka.
7. Awansi sortoe omstandigheid ben de na ini na gemeente foe Korente, den loyaal kresten drape ben doe den plekti foe a gi di den ben gi densrefi na Gado?
7 Kon wi taki, dati joe ben de ini na fosi jarihondro gemeente foe Korente. Wan ten ben de, di kesekese a mindri groepoe ben de wan problema gi na wánfasi foe na gemeente, èn a gi di den ben gi pasi taki hoeroedoe ben tan, ben tjari a jeje foe a gemeente kon ini kefar (1 Korentesma 1:10, 11; 5:1-5). Bribiman ben tjari makandra go na grontapoe kroetoe, èn sonwan ben meki trobi foe difrenti afersi (1 Korentesma 6:1-8; 8:1-13). Strei, djaroesoe, atibron èn broejafasi, ben meki a libi moeilek. Sonwan ben degedege srefi na a makti foe Paulus èn ben wisiwasi a fasi fa a ben taki (2 Korentesma 10:10). Tokoe, loyaal sma foe a gemeente dati, ben hori densrefi na a gi di den ben gi densrefi na Gado ini a moeilek ten dati.
8, 9. San wi moesoe doe efoe wi kon tanapoe a fesi wan situwâsi di lai nanga tesi na ini wan gemeente?
8 Te wan situwâsi di lai nanga tesi e opo ede kon, dan wi moesoe tan krosibei foe Gado pipel. (Teki gersi Johanes 6:66-69.) Meki wi abi pasensi nanga makandra, e hori na prakseri taki son sma abi moro ten fanowdoe leki trawan foe weri „na njoen sma di wan sma moesoe de” èn foe weri sari-ati, boen-atifasi, sakafasi foe jeje, safri-atifasi nanga langa pasensi gi densrefi. Foe di den foetoeboi foe Gado abi difrenti kweki toe, meki wi alamala moesoe sori lobi èn moesoe gi sma pardon. — Kolosesma 3:10-14.
9 Baka foeroe jari foe dienst gi Jehovah, wan brada ben taki: „Efoe wan sani ben de a moro prenspari sani gi mi, dan a ben de na tori foe tan krosibei na Jehovah organisâsi di joe kan si. Den fosi ondrofeni foe mi ben leri mi o don a de foe froetrow tapoe a fasi fa libisma e taki-go-taki-kon. Di mi ben kon froestan a tori dati, dan mi ben teki a bosroiti foe tan nanga a getrow organisâsi. Tapoe sortoe tra fasi wan sma kan feni boen-ati èn blesi foe Jehovah?” Joe e boboi na grani di joe kisi foe dini Jehovah na a srefi fasi makandra nanga en pipel di de nanga prisiri? (Psalm 100:2) Efoe dati de so, joe no sa meki noti hari joe gowe foe na organisâsi foe Gado noso foe pori joe matifasi nanga na Sma di anoe e tjari froeloesoe kon gi ala sma di lobi en.
Jepi te tesi lontoe wi
10. (a) Fa begi e jepi Gado pipel foe tanapoe a fesi tesi? (b) Sortoe seikerfasi Paulus ben gi na ini 1 Korentesma 10:13?
10 Leki getrow sma di de ini Gado organisâsi, wi e kisi en jepi na ini ten foe tesi. Foe eksempel, te tesi lontoe wi a e jepi wi foe hori wi soifri retifasi na en. A no de foe taki, dati wi moesoe begi ini akroederi nanga den wortoe foe Jesus: „No tjari wi kon na ini tesi, ma froeloesoe wi foe na ogriwan”, Satan Didibri (Mateus 6:9-13). Foe taki en leti, dan wi e aksi Gado so boen, foe no gi pasi taki wi fadon, te wi e kisi a tesi foe tranga jesi en. A e jere wi begi toe foe kisi na koni foe wini tesi (Jakobus 1:5-8). Èn den foetoeboi foe Jehovah kan de seiker foe en jepi, foe di Paulus ben taki: „No wan tesi ben kon na oenoe tapoe boiti di ala sma e kisi; ma Gado de getrow, èn a no sa gi pasi foe oenoe kon ini tesi, moro leki san oenoe kan tjari, ma nanga na tesi a sa sorgoe toe gi na pasi foe komoto, so taki oenoe sa man tjari en” (1 Korentesma 10:13). San na a fonten foe so wan sortoe tesi, èn fa Gado e sorgoe gi a pasi foe komoto?
11, 12. Gi sortoe tesi den Israèlsma ben broko kindi gi, èn fa wi kan abi wini foe a ondrofeni foe den?
11 Tesi e kon foe omstandigheid di kan meki taki wi no tan getrow na Gado. Paulus ben taki: „Den sani disi ben kon tron eksempel gi wi, so taki wi no ben sa de sma di ben o angri foe doe ogri sani, so leki fa den [Israèlsma] ben angri foe dati. No tron anbegiman foe kroektoe gado toe, so leki sonwan foe den, neleki fa ben skrifi: ’A pipel ben go sidon njan èn dringi, èn den ben opo meki prisiri.’ No meki wi doe hoeroedoe toe, so leki fa sonwan foe den ben doe hoeroedoe, nanga a wan enkri bakapisi taki den ben fadon, toetenti na dridoesoen [foe den] tapoe wán dei. No meki wi tesi Jehovah toe, so leki fa sonwan foe den ben tesi en, nanga a wan enkri bakapisi taki den ben dede nanga jepi foe sneki. No de sma toe di e kroetoe-kroetoe, so leki fa sonwan foe den ben kroetoe-kroetoe, nanga a wan enkri bakapisi taki den ben dede nanga jepi foe na kiriman.” — 1 Korentesma 10:6-10.
12 Den Israèlsma ben angri foe ogri sani, di den ben broko kindi gi na tesi foe meki gridi tjari den go ini a tjari kon na makandra èn a njan foe kwartel (pikin fowroe) di Gado ben gi na wan wondroe fasi (Numeri 11:19, 20, 31-35). A fesi foe dati, den ben tron anbegiman foe kroektoe gado di na gowe di Moses ben gowe, ben gi okasi na a tesi foe teki prati na a anbegi foe wan pikin kaw (Exodus 32:1-6). Doesoendoesoen ben dede foe di den ben broko kindi gi tesi èn ben doe hoeroedoe nanga oema foe Moab (Numeri 25:1-9). Di den Israèlsma ben gi densrefi abra na tesi èn ben kroetoe-kroetoe foe na kiri di den ben kiri den gensman Korak, Datan, Abiram nanga den kompe foe den, dan 14.700 sma ben dede foe wan strafoe di Gado ben seni (Numeri 16:41-49). Wi kan abi wini foe den sortoe ondrofenitori disi efoe wi e prakseri taki no wan foe den tesi disi ben de so hebi, taki den Israèlsma no ben man kakafoetoe gi den. Den ben kan doe disi efoe den ben sori bribi, ben de nanga tangi gi na lobi sorgoe foe Gado èn efoe den ben warderi na regtfardikifasi foe en Wet. Dan na anoe foe Jehovah ben kan froeloesoe den, so leki fa a kan froeloesoe wi.
13, 14. Fa Jehovah e sori wi na pasi foe komoto, te en foetoeboi e tanapoe na fesi tesi?
13 Leki kresten, wi e tanapoe a fesi tesi di ala sma e kisi. Tokoe wi kan tan getrow na Gado, foe di wi e begi en foe jepi wi èn e doe moeiti foe kakafoetoe gi tesi. Gado de getrow, èn a no sa meki wi kisi tesi moro leki san wi kan tjari. Efoe wi de loyaal na Jehovah, dan noiti wi sa feni a doe foe en wani, leki wan sani di no man. Na en e sorgoe foe wan pasi foe komoto, foe di a e gi wi tranga foe kakafoetoe gi tesi. Foe eksempel, te den e froefolgoe wi, wi kan kon ini a tesi foe no hori tranga na gronprakseri ini a howpoe foe no kisi hebi skin-ati noso foe no dede. Ma efoe wi e froetrow ini na makti anoe foe Jehovah, tesi noiti e doro na penti pe Jehovah no kan tranga na bribi foe wi èn gi wi nofo tranga foe hori wi soifri retifasi. Leki fa na apostel Paulus ben taki: „Na ala fasi den opo kon feti nanga wi, ma tokoe no na wan fasi taki den e drifi wi go na ini wan oekoe, so taki wi no kan boeweigi moro; wi no sabi moro san foe doe, ma no krinkrin sondro wan pasi foe komoto. Wi e kisi froefolgoe, ma sondro foe den gowe libi wi a baka; den e trowe wi na gron, ma wi no kisi pori.” — 2 Korentesma 4:8, 9.
14 Jehovah e jepi en pipel toe, foe di a e gebroiki en jeje leki wan jepiman foe meki wi memre sani èn leki wan leriman. A e tjari bijbel penti kon ini wi prakseri èn e jepi wi foe si krin fa foe gebroiki den, so taki wi kan kakafoetoe gi tesi (Johanes 14:26). Getrow foetoeboi foe Jehovah e froestan san na den tori di abi foe doe nanga wan tesi èn sani no e kori den foe waka wan fowtoe pasi. Gado ben sori den na pasi foe komoto, foe di a e meki den horidoro, srefi te na dede sondro foe broko kindi gi tesi (Openbaring 2:10). Boiti na jepi di Jehovah e jepi en foetoeboi nanga jepi foe en jeje, a e gebroiki den engel foe en foe na boen foe en organisâsi. — Hebrewsma 1:14.
Jepi na ini persoonlijk afersi
15. Sortoe persoonlijk jepi wi kan feni na ini Heisingi?
15 Den sma di de na ini Jehovah organisâsi e kisi a jepi foe en na ini persoonlijk afersi. Foe eksempel, sonwan e soekoe kande wan kresten trowpatna (1 Korentesma 7:39). Efoe a froewakti foe den no kon troe, a kan de wan jepi foe hori kownoe Salomo foe Israèl na prakseri. A no ben man kisi wan jongoe wenke foe Sulem leki oema foe trow nanga en, bika a jongoe wenke ben lobi wan herder di ben de nanga sakafasi. Wi kan kari na tori disi foe na kownoe na singi foe Salomo ongolokoe lobi. Wi e krei langalanga watra-ai kande efoe wi eigi moeiti na ini lobi afersi, na ini wan seiker kefal no abi boen bakapisi, ma Salomo basi na firi di a ben abi di en froewakti no ben kon troe, èn wi kan doe disi toe. Na jeje foe Gado kan jepi wi foe sori taki wi e dwengi wisrefi noso sori tra eigifasi foe Gado. Na Wortoe foe en e jepi wi foe teki na troe tori di de foeroetron wan hati sani, taki wan sma no kan firi romantis lobi, so boen a lobi mindri wan man nanga wan oema gi ibriwan sma, (Heisingi 2:7; 3:5). Tokoe, Na Heisingi e sori taki a kan dati wi e feni wan kompe bribiman di lobi wi troetroe. Ma moro prenspari de, taki na „toemoesi boen singi” disi e kon troe ini na lobi foe na Boen Herder, Jesus Krestes, gi en „trowmisi” foe 144.000 salfoe bakaman. — Heisingi 1:1; Openbaring 14:1-4; 21:2, 9; Johanes 10:14.
16. San na „banawtoe na ini a skin” di kresten di trow e ondrofeni, kan abi na ini?
16 Srefi den sma di trow nanga wan bribiman abi „banawtoe na ini den skin” (1 Korentesma 7:28). Broko-ede nanga sorgoe sa de, di abi foe doe nanga masra èn wefi nanga den pikin (1 Korentesma 7:32-35). Siki kan tjari problema nanga span kon. Froefolgoe noso pina na ekonomia fasi kan meki en moeilek gi wan kresten papa foe sorgoe gi den fanowdoe sani foe en osofamiri tan na libi. Strafoe-oso kan prati papa nanga mama foe pikin èn sonwan kan kisi hebi skin-ati èn den kan kiri den srefi. Ma ini ala den sortoe omstandigheid disi, wi kan kakafoetoe gi a tesi di de ini a drai di wi moesoe drai baka gi na bribi, efoe troetroe wi e froetrow tapoe Jehovah anoe di e tjari froeloesoe kon. — Psalm 145:14.
17. Sortoe osofamiri problema Gado ben meki Isak nanga Rebeka ben man foe froedrage?
17 Kande wi moesoe horidoro na ondro wan toe tesi foe wan langa ten. Foe eksempel, wan manpikin kan gi en papa nanga mama, di e dini Gado, sari, foe di a e trow nanga wan sma di no de ini bribi. Dati ben pasa ini na osofamiri foe na famiri-edeman Isak èn en wefi Rebeka. A manpikin foe den, Esau, di ben abi 40 jari, ben trow nanga toe Heitit oema di ben de „wan fonten foe bita-ati gi na jeje foe Isak èn Rebeka.” Foe taki en leti, „Rebeka ben tan taigi Isak: ’Mi e tegoe foe mi libi foe den oemapikin foe Hèt ede. Efoe Jakob [na tra manpikin foe den] oiti e teki wan wefi foe den oemapikin foe Hèt so leki den wan disi foe den oemapikin foe na kondre, san na libi foe mi wani taki moro fara?’” (Genesis 26:34, 35; 27:46.) So leki fa a sori, dan na problema disi di no ben tan ben pina na regtfardiki sili foe Rebeka. (Teki gersi 2 Petrus 2:7, 8.) Tokoe, na anoe foe Jehovah ben horibaka gi Isak nanga Rebeka, èn ben meki den man foe horidoro na ondro na tesi disi, ala di den ben tan hori wan tranga matifasi nanga En.
18. Sortoe persoonlijk tesi C. T. Russell ben froedrage nanga na jepi foe Gado?
18 A e gi sari te wan memre foe na osofamiri di dopoe, e go doe en safrisafri ini na dienst foe Gado. (Teki gersi 2 Timoteus 2:15.) Tokoe sonwan ben horidoro srefi na ondro a lasi na jejefasi foe wan patna, so leki disi ben pasa nanga Charles T. Russell, na fosi presidenti foe na Waktitoren-genootschap. A wefi foe en ben broko den banti di a ben abi nanga na Genootschap èn a ben gowe libi en na ini 1897, baka so wan 18 jari di den ben trow nanga makandra. Na ini 1903 en wefi ben aksi foe den broko-trow na lanti, èn disi ben pasa na ini 1908. A sari foe Russell ben de krin di a ben taigi en ini wan brifi di a ben skrifi moro a fesi: „Mi ben begi Masra fajafaja foe joe ede. . . . Mi no sa broko joe ede nanga a sari foe mi, noso proeberi foe meki joe firi sari, foe froeteri foe den firi foe mi di mi e kisi te ten na ten mi e waka pasa den krosi nanga den tra sani foe joe, di e tjari krin kon na mi prakseri fa joe ben de fosi — so foeroe nanga lobi èn sari-atifasi èn lobi foe jepi sma — na jeje foe Krestes. . . . O, poti prakseri na ondro begi san mi wani taigi joe. Èn de seiker taki na moro bigi sari foe mi, na hati di a e hati mi, no de taki a tra pisi foe mi libi mi o tan mi wawan, ma a de a fadon di joe fadon, mi lobiwan, a têgo lasi foe joe, so fara leki mi kan si dati.” Ala di Russel ben firi so sari, a ben abi na hori di Gado ben horibaka gi en te na a kaba foe en libi na grontapoe (Psalm 116:12-15). Jehovah ala ten e horibaka gi en loyaal foetoeboi.
Komoto na ini ala nowtoe
19. San wi moesoe memre efoe problema di e gi banawtoe e tan go doro?
19 Na pipel foe Jehovah sabi taki en na „wan Gado di e doe, wroko foe froeloesoe”, wan Sma „di aladei e tjari na lai gi wi” (Psalm 68:19, 20). Foe dati-ede, leki sma di gi densrefi abra èn di abi demakandra nanga en grontapoe organisâsi, meki noiti wi lasi-ati krinkrin efoe problema di e gi broko-ede e tan go doro. Prakseri taki „Gado de gi wi wan kibripresi èn tranga, wan jepi di de klari foe wi feni ini ten foe banawtoe” (Psalm 46:1). A e pai ala ten efoe wi e froetrow na ini en. „Mi ben aksi Jehovah rai, èn a ben piki mi”, David ben taki, „èn a ben froeloesoe mi foe ala den sani di ben frede mi. . . . Na mofinawan disi ben kari, èn Jehovah srefi ben jere. Èn foe ala en banawtoe A ben kibri en.” — Psalm 34:4-6.
20. Sortoe aksi e tan abra foe wi go poti prakseri?
20 Ija, wi hemel Tata e kibri en pipel na ini ala banawtoe. A e horibaka gi en grontapoe organisâsi, e gi jepi ini gemeente nanga persoonlijk afersi. A no de foe taki, dati „Jehovah no sa libi en pipel” (Psalm 94:14). Ma meki wi go poti prakseri now tapoe tra fasi di Jehovah e jepi en pipel leki aparti sma. Fa wi hemel Tata e jepi den foetoeboi foe en di siki, di brokosaka na jejefasi, di de nanga bigi sari, foe di den lasi wan lobiwan na ini dede noso foe di den abi sari foe den fowtoe foe den? So leki wi sa si, dan so srefi na ini den afersi disi, wi abi reide foe bow tapoe na makti anoe foe Jehovah.
Fa joe ben sa piki?
◻ Fa na anoe foe Jehovah ben tjari froeloesoe kon ini den ten di pasa?
◻ Fa Jehovah e jepi en pipel na ini a gemeente ini a ten disi?
◻ Sortoe jepi Gado e gi ini persoonlijk afersi?
◻ San wi moesoe doe efoe problema di e gi banawtoe e tan go doro?
[Prenki na tapoe bladzijde 8, 9]
Gado ben tjari den Israèlsma komoto foe Egipti „nanga wan anoe di ben opo go na loktoe”