Meki den têgo anoe foe Jehovah de na horibaka foe joe

„Na têgo Gado na a tanpe foe oenoe, èn na ondrosei de den têgo anoe.” — DEUTERONOMIUM 33:27, American Standard Version.

1, 2. Foe san-ede na pipel foe Jehovah kan de seiker foe en horibaka?

JEHOVAH e broko-ede nanga en pipel. Ija, na ini ala den banawtoe foe den Israèlsma, „a ben de wan banawtoe sani gi en”! Ini lobi èn sari-atifasi, „a ben bigin opo den èn tjari den” (Jesaja 63:7-9). So boen, efoe wi de getrow na Gado, wi kan de seiker taki a e horibaka gi wi.

² Na profeiti Moses ben taki: „Wan kibripresi na a Gado foe owroeten, èn na ondrosei de den anoe foe Gado di e tan foe ten di no abi skotoe” (Deuteronomium 33:27). Wan tra vertaling e taki: „Na têgo Gado na a tanpe foe oenoe, èn na ondrosei de den têgo anoe” (American Standard Version). Ma fa den anoe foe Gado e horibaka gi den foetoeboi foe en?

Foe san-ede someni pina?

3. Oten na libisma famiri di e gi jesi sa njanboen dorodoro foe „na glori fri foe den manpikin foe Gado”?

³ A dini di wi e dini Jehovah no e kibri wi foe pina di ala onvolmaakti sma sabi. Job, na foetoeboi foe Gado, ben taki: „Libisma di gebore foe wan oema, e libi wan sjatoe ten èn en bere e kon foeroe nanga broeja” (Job 14:1). Foe „den dei foe den jari foe wi” na psalm-singiman ben taki: „Den sani di den e aksi tranga, na moeiti èn ogri sani” (Psalm 90:10). A libi sa tan na a fasi dati te leki ’na mekisani sa meki kon fri foe na katibo foe pori èn sa kisi na glori fri foe den manpikin foe Gado’ (Romesma 8:19-22). Dati sa pasa na ini a doesoen jari tiri foe Krestes. Tapoe na fondamenti foe Jesus loesoe-ofrandi, den libisma di saka densrefi na ondro a Kownoekondre sa ondrofeni froeloesoe foe sondoe nanga dede. Na a kaba foe na Millenium, Krestes nanga en kownoe-priester di de nanga en sa jepi kaba na libisma famiri di gi jesi foe doro volmaaktifasi, èn den sma di tan loyaal na Gado na a lasti tesi di sa kon foe Satan nanga en ogri jeje, a nen foe den sa skrifi foe ala ten na ini „na boekoe foe libi” (Openbaring 20:12-15). Dan den sa njanboen dorodoro foe na glori fri foe den manpikin foe Gado.

4. San wi moesoe doe, na presi foe kragi foe a fasi fa wi libi e waka?

⁴ Ini a pisiten disi, na presi foe kragi foe na fasi fa a libi foe wi e waka, meki wi froetrow tapoe Jehovah (1 Samuèl 12:22; Judas 16). Meki wi de grantangi toe foe wi Hei Priester, Jesus, di nanga jepi foe en wi kan kon krosibei foe Gado „so taki wi kan kisi sari-ati èn feni no froedini boen-atifasi leki jepi tapoe a joisti ten” (Hebrewsma 4:14-16). Noiti wi moesoe de leki Adam. Te joe e loekoe en boen, dan na wan fowtoe fasi a ben kragi Jehovah taki na en ben gi en wan takroe wefi, di a ben taki: „Na oema di joe ben gi foe de nanga mi, en ben gi mi foe na froktoe foe na bon èn foe dati-ede mi ben njan” (Genesis 3:12). Gado e gi boen sani èn a no e tjari pina kon a wi tapoe (Mateus 5:45; Jakobus 1:17). Slag di e miti wi de nofotron a bakapisi foe a mankeri di wi mankeri koni noso foe den fowtoe di tra sma meki. Den kan kon a wi tapoe toe foe di wi de nanga sondoe èn e libi na ini wan grontapoe di didon ini na makti foe Satan (Odo 19:3; 1 Johanes 5:19). Tokoe, den têgo anoe foe Jehovah ala ten e horibaka gi den loyaal foetoeboi foe en di ondro begi e froetrow tapoe en èn di densrefi e waka baka a rai di en Wortoe e gi. — Psalm 37:5; 119:105.

A e horibaka gi wi na ini ten foe siki

5. Sortoe deki-ati, siki sma sa feni na ini Psalm 41:1-3?

⁵ Siki e sorgoe ten na ten gi moro foeroe foe wi banawtoe. Tokoe David ben taki: „Kolokoe ibriwan sma de di e sori taki a e hori na mendriwan na prakseri; na a dei foe rampoe Jehovah sa meki a lon komoto. Jehovah srefi sa kibri en èn hori en na libi. Den sa prèise en kolokoe na grontapoe; èn joe no man gi en abra kwetikweti na a sili foe en feanti. Jehovah srefi sa horibaka gi en na tapoe wan kanape foe siki, joe sa kenki heri na bedi foe en ini a ten foe en siki.” — Psalm 41:1-3.

6, 7. Fa Gado ben jepi David di a ben de tapoe wan sikibedi, èn fa disi kan gi den foetoeboi foe Jehovah deki-ati na ini a ten disi?

⁶ Wan sma di e hori trawan na prakseri e jepi den sma di abi fanowdoe foe sani. „A dei foe rampoe” kan de ibri okasi foe rampoe noso wan langa pisiten foe pina di e swaki wan sma. A e poti froetrow tapoe Gado foe kibri en na ini ten foe siki, èn trawan ’e prèise en kolokoe na grontapoe’, foe di den e panja na njoensoe foe a fasi fa Jehovah e handri nanga en na wan sari-ati fasi. Gado ben horibaka gi David „na tapoe wan kanape foe siki”, kande na ini a span-ede ten di na manpikin foe David, Absalom, ben proeberi foe teki na kownoestoeroe foe Israèl abra. — 2 Samuèl 15:1-6.

⁷ Foe di David ben sori taki a e hori den mendriwan na prakseri, meki a ben firi taki Gado ben sa horibaka gi en, ala di a no ben man jepi ensrefi na ini wan sikibedi (Psalm 18:24-26). Ala di a ben siki hebi, a ben de seiker taki Gado ben sa ’kenki na bedi foe en’, no foe di a ben sa poeroe na siki na wan wondroe fasi, ma foe di a ben o gi en tranga nanga prakseri di e trowstoe en. A ben sa de neleki Jehovah ben o kenki na bedi foe en foe wan sikibedi kon tron wan bedi foe kon betre baka. Na a srefi fasi, efoe wi e njanpina foe wan siki leki Gado foetoeboi, dan den têgo anoe foe Jehovah sa horibaka gi wi.

Trowstoe gi na sma di e firi brokoskin

8. Fa wan kresten di siki ben sori taki a de ondro Gado?

⁸ Siki kan sorgoe gi brokoskin na jeje fasi. Wan kresten di siki hebi, èn di sontron e mankeri nofo krakti foe leisi srefi, e froeteri: „Disi e meki mi kisi foeroe firi foe brokoskin, firi taki mi no warti noti, èn srefi watra-ai”, a e taki. Foe di a sabi taki Satan wani broko en saka nanga a lasi di a kan lasi ati, meki a e feti baka, foe di a sabi taki nanga a jepi foe Jehovah a no man fadon (Jakobus 4:7). A man disi, na wan deki-ati gi tra sma di sabi taki a e froetrow tapoe Gado (Psalm 29:11). Srefi te a de na ini ati-oso, a e bèl siki sma èn trawan foe bow den na jeje fasi. A e bow ensrefi foe di a e arki Kownoekondresingi tapoe casette-lolo èn artikel foe na tijdschrift disi nanga en sisatijdschrift, Ontwaakt!, èn foe di a abi demakandra nanga kompekresten. Na brada disi e taki: „Mi e taki doronomo nanga Jehovah ini begi, èn e aksi en foe gi mi tranga, tiri, trowstoe, èn foe jepi mi foe horidoro”. Efoe joe na wan kresten di e ondrofeni serjoesoe gesontoe problema, froetrow ala ten tapoe Jehovah èn meki den têgo anoe foe en kon tron a horibaka foe joe.

9. Sortoe eksempel e sori taki brokoskin na jeje fasi sontron e trobi sma di e dini Gado?

⁹ Brokoskin na wan owroe problema. Ini ala a ten di Job ben de na ondro tesi, a ben taki leki wan man di Gado ben gowe libi (Job 29:2-5). Foe di Nehemia ben broko en ede foe a broko di Jerusalem nanga den skotoe foe en ben broko, meki disi ben meki en ati firi sari èn Petrus ben firi so brokoskin foe a taki di a ben taki, dati a no sabi Krestes, taki a ben bari krei (Nehemia 2:1-8; Lukas 22:62). Epafroditus ben firi brokoskin foe di kresten na ini Filipi ben jere taki a ben kon siki (Filipisma 2:25, 26). Brokoskin ben trobi wan toe kresten na ini Tesalonika, bika Paulus ben taki nanga den brada drape nanga tranga, foe „taki nanga den di firi brokoskin foe trowstoe den” (1 Tesalonikasma 5:14). So boen fa Gado e jepi den sortoe sma disi?

10. San kan de wan jepi te wi e proeberi foe kakafoetoe gi brokoskin na jeje fasi?

¹⁰ Wan persoonlijk bosroiti moesoe teki ini fa foe behandel serjoesoe firi foe brokoskina (Galasiasma 6:5). Nofo rostoe èn aktiviteit di de ini balansi kan jepi. Na presi foe wan sma di e firi brokoskin, e si difrenti problema leki wan bigi situwâsi pe jepi no de, a sa feni en wan jepi foe loesoe den wan froe wan. Jepi foe gemeente owroeman di e gi trowstoe, kan tjari foeroe boen kon, spesroetoe te na emotioneel problema disi e meki broko-ede na jeje fasi kon (Jakobus 5:13-15). Na tapoe foe ala den sani disi, a de prenspari foe froetrow tapoe Jehovah, foe di wi e ’poti ala broko-ede na en tapoe, bikasi a e sorgoe foe wi’. Foe tan begi doro nanga wi heri ati, kan tjari gi wan sma ’na vrede foe Gado di sa kibri na ati nanga na jeje koni nanga jepi foe Krestes Jesus.’ — 1 Petrus 5:6-11; Filipisma 4:6, 7.

Jehovah e jepi wi foe horidoro na ondro sari

11-13. San kan jepi foe lekti na sari foe na dede foe wan lobiwan?

¹¹ Wan tra ondrofeni di e foeroe wi nanga sari na a dede foe wan lobiwan. Abraham ben sari toemoesi foe a lasi di a ben lasi en wefi, Sara (Genesis 23:2). Di en manpikin Absalom ben dede, David ben sari srefisrefi (2 Samuèl 18:33). Ija, srefi na volmaakti man Jesus „ben krei” foe di en mati Lasarus ben dede! (Johanes 11:35) So boen, sari de te dede e teki wan lobiwan foe wi poeroe. Ma san kan jepi foe safoe na sortoe sari disi?

¹² Gado e jepi en pipel foe horidoro na ondro hebi sari te wan sma dede. En Wortoe e taki, dati wan opobaka sa de. Foe dati-ede, wi no e „sari neleki fa den tra sma di no abi howpoe e doe toe” (1 Tesalonikasma 4:13; Tori foe den Apostel 24:15). Jehovah jeje e jepi wi foe abi vrede èn bribi èn foe prakseri dipi foe na toemoesi moi ten tamara di e pramisi na ini en Wortoe, so taki sari prakseri foe a dede foe wan lobiwan no e teki wi abra krinkrin. Trowstoe e kon toe te wi e leisi den Boekoe èn e begi „na Gado foe ala trowstoe. — 2 Korentesma 1:3, 4; Psalm 68:4-6.

¹³ Wi kan kisi trowstoe foe na howpoe foe na opobaka so leki fa Job di ben dini Gado ben doe, èn di a ben taki: „O, efoe joe ben sa kibri mi ini Sjeool, taki joe ben sa hori kibri mi te leki joe atibron pasa, taki joe ben sa poti wan pisiten gi mi èn dan ben sa prakseri mi’! Wan man di tranga na skin fasi kan libi baka te a dede? Ala den dei foe mi wroko di mi moesoe doe nanga dwengi mi sa wakti, te leki mi froeloesoe kon. Joe sa kari èn mi sa piki joe misrefi. Foe a wroko foe joe anoe joe sa abi wan tranga lostoe” (Job 14:13-15). So leki fa a gwenti de, dan wi no e ondrofeni bigi sari te wan lobi mati e go meki wan rèis, foe di wi e froewakti foe si en baka. Na dipi sari di na lasi foe wan lobiwan e tjari, kan kon saka pikinso te wi e loekoe a dede foe wan getrow kresten na a srefi fasi. Efoe a ben abi wan grontapoe howpoe, a sa wiki foe na sribi foe dede dja na grontapoe na ini a doesoen jari tiri foe Krestes (Johanes 5:28, 29; Openbaring 20:11-13). Èn efoe wi e howpoe foe libi na grontapoe foe têgo, dan kande wi sa de dja foe bari den lobiwan foe wi di kisi wan opo baka, wan odi.

14. Fa toe kresten weduwe ben kakafoetoe gi na dede foe den masra foe den?

¹⁴ Baka di a masra foe wan sisa dede, a sisa ben sabi taki a ben moesoe go doro nanga en libi na ini a dienst foe Gado. Boiti foe ’abi foeroe foe doe na ini a wroko foe Masra’, a ben meki nanga 800 pisi krosi wan mamio (1 Korentesma 15:58). „Disi ben de wan boen projekt”, a e taki, „bika ala na ten di mi ben e wroko, mi ben kan arki Kownoekondresingi nanga casette-lolo di abi bijbeltori, san ben foeroe mi prakseri”. Nanga foeroe prisiri a e memre na fisiti foe wan owroeman nanga a wefi foe en. A owroeman ben abi foeroe ondrofeni. A ben sori na ini bijbel, taki Gado troetroe e broko-ede nanga weduwe (Jakobus 1:27). Wan tra kresten oema no ben gi ensrefi abra na a firi foe sari ensrefi di en masra dede. A ben warderi na hori di mati ben horibaka gi en èn a ben kisi moro belangstelling gi tra sma. „Mi ben begi moro foeroe èn ben kweki wan moro krosibei matifasi nanga Jehovah”, a e taki. Èn fa a de wan blesi foe abi na horibaka foe Gado têgo anoe!

Jepi te wi e meki fowtoe

15. San den wortoe foe David na ini Psalm 19:7-13 wani taki troetroe?

¹⁵ Ala di wi lobi Jehovah wet, tokoe wi e meki fowtoe ten na ten. Disi sondro degedege e banawtoe wi, so leki fa ben pasa nanga David, di ben wani den wet, den froemane, ordroe èn kroetoe-bosroiti foe Gado moro leki gowtoe. A ben taki: „Joe eigi foetoeboi ben kisi warskow nanga jepi foe den; ini a hori di wan sma e hori den, wan bigi paiman de. Fowtoe — soema kan si den krin? Taigi mi taki mi de fri foe sondoe di kibri. Hori joe knekti so srefi fara foe den doe foe teki a reti gi ensrefi na wan asrantifasi; no meki den basi mi. Na ini a kefal dati mi sa de boen dorodoro èn mi sa tan fri foe pasa a wet foeroe leisi.” (Psalm 19:7-13). Meki wi go ondrosoekoe den wortoe disi finifini.

16. Foe san-ede wi moesoe tan farawe foe teki a reti gi wisrefi?

¹⁶ Den doe foe teki a reti gi joesrefi de moro serjoesoe sondoe leki a meki foe wan fowtoe. Gado ben drai baka gi Saul leki kownoe, foe di a ben teki a reti gi ensrefi foe tjari wan ofrandi èn foe di a ben meki na Amalèk kownoe Agag tan a libi èn ben hori a moro boen pisi foe den sani di den ben teki foe na feti, ala di Gado ben komanderi en taki den ben moesoe gi den Amalèksma abra na pori (1 Samuèl 13:8-14; 15:8-19). Gado ben naki kownoe Usia nanga gwasi, foe di na wan asrantifasi a ben teki den priesterwroko doe (2 Kroniki 26:16-21). Di den ben tjari na ark foe na froebontoe go na Jerusalem èn den meti di ben hari na wagi pikinmoro ben meki a fadon, dan Gado ben naki Usa kiri, foe di sondro foe abi lespeki, a ben graboe na ark hori foe tapoe en foe a no fadon (2 Samuèl 6:6, 7). So boen, efoe wi no sabi san foe doe noso oten wi abi na makti foe doe wan sani, dan wi moesoe sori bescheidenfasi èn go soekoe rai na den sma di e si sani moro krin (Odo 11:2; 13:10). A no de foe taki, dati efoe wi ben de oiti nanga asrantifasi foe teki a reti gi wisrefi, dan wi moesoe begi foe kisi pardon èn aksi Gado foe jepi wi foe kibri wisrefi gi a teki foe a reti gi wisrefi ini a ten di e kon.

17. Fa sondoe di kibri kan abi krakti na wan sma tapoe, ma fa tokoe wan sma kan kisi pardon foe sondoe èn froelekti?

¹⁷ Sondoe di sma e kibri, kan tjari banawtoe kon. So leki fa Psalm 32:1-5 e taki, dan David ben proeberi foe kibri na sondoe foe en, ma a ben taki: „Di mi ben tan pî, mi bonjo ben njan gowe foe di mi ben geme na heri dei. Bika dei nanga neti joe anoe ben de hebi a mi tapoe. A libiwatra foe mi kenki neleki na ini dreiten.” A proeberi di a ben proeberi foe tapoe na sten foe wan sondoe konsensi ben weri en, èn hebi sari ben swaki en krakti neleki wan bon, di e lasi den watra di e gi en libi ini a ten foe drei ofoe a faja ini dreiten. A de krin foe si taki a ben njanpina na jeje èn skin fasi èn a ben lasi prisiri foe di a no ben froeteri foe en sondoe. Soso foe froeteri Gado a sondoe foe en ben kan tjari pardon nanga froelekti kon. David ben taki: „Kolokoe a man di den e pardon en oproeroefasi, di den e tapoe en sondoe. . . Te foe kaba mi bekènti mi sondoe na joe, èn mi no ben kibri mi fowtoe. Mi ben taki: ’Mi sa bekènti mi sondoe na Jehovah!’ Èn joesrefi ben gi mi pardon foe na lawfasi foe mi sondoe.” Jepi di den kresten owroeman e gi na wan lobi fasi, kan jepi foe meki a kon boen baka na jeje fasi go a fesi. — Odo 28:13; Jakobus 5:13-20.

18. Sortoe boeweisi de taki sondoe kan abi bakapisi di e tan langa, ma san kan de a fonten foe kowroe-ati na ini den sortoe omstandigheid disi?

¹⁸ Sondoe kan abi bakapisi di e tan langa. Disi ben de so nanga David, di ben doe soetadoe nanga Batseiba, ben tjari Batseiba masra go na ini dede, èn ben trow nanga na weduwe di ben hori bere (2 Samuèl 11:1-27). Ala di Gado ben sori sari-ati foe na Kownoekondre froebontoe ede, na berow foe David, èn a fasi fa a ben handri nanga sari-ati nanga trawan, tokoe David ben ondrofeni ’rampoe na ini en eigi oso’ (2 Samuèl 12:1-12). Na pikin di ben gebore na ini soetadoe, ben dede. Amnon, a manpikin foe David, ben go didon nanga tranga na en afoe sisa Tamar èn tapoe a komando foe Absalom, a brada foe Tamar, den ben kiri Amnon (2 Samuèl 12:15-23; 13:1-33). Absalom ben gi David sjen foe di a ben go didon na den tra oema foe David. A ben proeberi foe teki na kownoestoeroe sondro foe a ben abi na reti tapoe dati, ma a ben kon miti nanga dede (2 Samuèl 15:1–18:33). Sondoe ala ten abi takroe bakapisi. Foe eksempel, wan ogridoeman di den sluit uit, kan abi berow èn den kan teki en baka na ini a gemeente, ma a e teki jari kande foe poeroe na takroe nen èn den emotioneel soro di de a bakapisi foe sondoe. Ini a pisiten dati, fa a e gi kowroe-ati foe kisi na pardon foe Jehovah èn na horibaka foe den têgo anoe foe en!

Froeloesoe foe den banawtoe di e kon a wi tapoe

19. Fa na jeje foe Gado kan de wan jepi te wi e kisi hebi tesi?

¹⁹ Te wi e kisi hebi tesi, a kan taki wi e mankeri nofo koni èn krakti foe teki wan bosroiti èn foe doe en. Ini so wan kefal, na jeje foe Gado „e kon jepi wi na ini wi swakifasi; bika wi no sabi san foe begi so leki a de fanowdoe, ma na jeje srefi e aksi sani gi wi nanga soktoe di sma no e jere” (Romesma 8:26). Efoe Jehovah e tjari kenki kon ini omstandigheid, wi moesoe de grantangi. Tokoe a anoe foe en kan gi wi kibri na wan tra fasi. Efoe wi e aksi foe kisi koni, dan Jehovah ben sa kan sori wi nanga en jeje san wi moesoe doe èn gi wi na fanowdoe tranga foe doe dati (Jakobus 1:5-8). Nanga en jepi wi kan horidoro te „difrenti tesi e meki wi firi sari” èn wi kan pasa den nanga wan bribi di kisi tesi èn di kon tranga. — 1 Petrus 1:6-8.

20. Foe san wi sa njanboen efoe wi e proeberi troetroe foe meki den têgo anoe foe Jehovah de a horibaka foe wi?

²⁰ Meki noiti wi kon weri foe go na Gado na ini begi. „Den ai foe mi de doronomo a tapoe Jehovah, bika na en e poeroe mi foetoe komoto foe na srepi”, David ben taki. „Drai joe fesi kon na mi èn sori mi boen-ati; bika mi de mi wawan èn mofina. Den nowtoe foe mi ati ben kon moro foeroe; o meki mi komoto ini mi banawtoe. Loekoe den pina foe mi èn den moeiti foe mi. Èn gi mi pardon foe mi sondoe” (Psalm 25:15-18). Neleki David wi sa njanboen foe a froeloesoe foe Gado, foe boen-ati, èn foe pardon efoe troetroe wi e meki den têgo anoe foe Jehovah kon tron a horibaka foe wi.

[Foetoewortoe]

Fa joe ben sa piki?

◻ Fa Jehovah e jepi den foetoeboi foe en di siki?

◻ San sa kan de wan jepi te wi e proeberi foe kakafoetoe gi brokoskin na jeje fasi?

◻ San kan jepi wi foe lekti na sari foe a dede foe wan lobiwan?

◻ Fa den sma di e kibri den sondoe kan kisi froelekti?

◻ Sortoe jepi de te a pipel foe Jehovah e kisi hebi tesi?

[Prenki na tapoe bladzijde 16, 17]

Wi kan kisi trowstoe foe na howpoe foe na opobaka, so leki fa Job, di ben e dini Gado, ben doe dati