Falsi profeiti ini a ten disi
JEREMIA ben e dini leki Gado profeiti ini Jerusalem ini a ten di a foto ben lai nanga afkodrei, seks hoeroedoe, takroefasi, èn na trowe foe broedoe di no ben abi fowtoe (Jeremia 7:8-11). En no ben de na wan enkri profeiti di ben e wroko ini a ten dati, ma moro foeroe foe den trawan ben e dini den eigi afersi èn ben de kroeka. Fa so? Jehovah e froeklari: „Foe profeiti te srefi priester, ibriwan e handri tapoe wan bidrigi fasi. Èn den e proeberi foe dresi frafra na prati-libi foe mi pipel foe di den e taki: „Vrede de, vrede de, ala di vrede no de.”—Jeremia 6:13, 14.
Den falsi profeiti ben e meki a sori leki ala di someni kroeka ben de na ini a kondre, taki sani ben e go boen èn taki na pipel foe a kondre ben e libi ini vrede nanga Gado; ma dati no ben de so. Na kroetoe foe Gado ben e wakti den, leki fa Jeremia ben e meki bekènti sondro foe frede. A troe profeiti Jeremia no den falsi profeiti, ben kisi reti di ini 607 B.G.T. den sroedati foe Babilon ben pori Jerusalem, a tempel, èn den ben kiri na pipel so srefi ofoe trawan den ben srepi go a farawe Babilon. Den pikinso mofinawan di ben tan na baka ini a kondre ben lowe go na Egipti.—Jeremia 39:6-9; 43:4-7.
San den falsi profeiti ben doe? „Dati ede mi de teige den profeiti,’ na san Jehovah e taki, „den wan di e foefoeroe den wortoe foe mi, ibriwan foe en kompe’” (Jeremia 23:30). Den falsi profeiti ben foefoeroe na boen bakapisi di Gado wortoe ben sa abi tapoe sma di ben e arki den foe di den ben e gi a pipel deki-ati foe moro betre arki na lei presi foe arki na den troe warskow foe Gado. Den no ben e froeteri den „den froewondroe sani foe Gado,” ma den eigi idea, sani di a pipel ben wani jere. A boskopoe foe Jeremia ben kon troetroe foe Gado, èn efoe den Israèlsma ben handri akroederi en wortoe, den ben sa tan na libi. Den falsi profeiti ‘ben foefoeroe Gado wortoe, èn ben tjari a pipel go na wan rampoe. A ben de netso fa Jesus ben taki foe den kerki fesiman foe en ten di no ben de getrow: „Den de breni tjariman. Efoe now wan breniman e tjari wan breniman den ala toe sa fadon go na ini na olo.”—Tori. 2:11; Mateus 15:14.
Leki na ini den dei foe Jeremia, joe abi toe ini a ten disi falsi profeiti di e taki dati den e taki gi a Gado foe a Bijbel; ma den toe e foefoeroe den wortoe foe Gado foe di den e leri sma sani di e poeroe den prakseri foe san Gado taki troetroe nanga jepi foe a bijbel. Fa so? Meki foe wi piki dati, gebroiki leki wan markitiki, den fondamenti bijbel leri foe a Kownoekondre.
A waarheid foe a Kownoekondre
Na Kownoekondre foe Gado ben de na moro prenspari thema foe Krestes gi-leri, èn den ben taki foe en moro leki wan hondro tron ini den Evangelie. Froekoe ini en diniwroko Jesus ben taki: „Mi moesoe meki so srefi toe na tra foto na boen njoesoe foe na Kownoekondre foe Gado bekènti, bikasi na foe disi Gado ben seni mi kon.” A ben leri en bakaman foe begi: „Meki joe kownoekondre kon.”—Lukas 4:43; 11:2.
San, dan, na a Kownoekondre? So leki fa The New Thayer’s Greek English Lexicon e taki, na Griki wortoe san vertaal nanga „Kownoekondre” ini a bijbel wani taki ini a fosi presi, „Kownoekondre makti, kownoeskap, domein, tiri” nanga ini a di foe toe presi, „na gebied di de na ondro na tiri foe wan kownoe.” Nanga disi ini prakseri a de logis foe teki taki Gado kownoekondre de wan letterlijk tirimakti di wan kownoe ben e tiri en. Na disi na afersi?
Ija, na so a de, èn a kownoe a no wan tra sma moro leki Jesus Krestes. Bifosi Jesus ben gebore na engel Gabrièl ben taigi Maria: „A sa de grani , èn den sa kari en a Manpikin foe a Moro Heiwan, èn Jehovah sa gi en a Kownoestoeroe foe en tata David” (Lukas 1:32). Foe di Jesus e kisi wan Kownoestoeroe dati na wan boeweisi taki en de wan kownoe, wan sma di abi reti foe tiri. San e boeweisi so srefi toe dati a kownoekondre de wan troetroe regeri na a profeititori foe Jesaja: „Bika wan pikin gebore gi wi, wan Manpikin di den ben gi wi: èn na tirimakti sa kon tapoe en skowroe. . . Na a kownoetirimakti èn na a vrede wan kaba no sa kon.”—Jesaja 9:6, 7. King James Version.
Pe Jesus e tiri? Na Jerusalem? Nôno. Na profeiti Danièl ben si wan fisioen pe Jesus e kisi a kownoekondre, èn a fisioen ben meki a si Jesus ini hemel (Danièl 7:13, 14). Disi e agri nanga a fasi fa Jesus ben taki foe a kownoekondre. Foeroe tron a ben e kari en „a kownoekondre foe hemel” (Mateus 10:7; 11:11, 12). A e agri so srefi toe nanga Jesus wortoe gi Pilatus di Jesus ben tanapoe na fesi kroetoe na en fesi: „Mi kownoekondre no de wan pisi foe a grontapoe disi. Efoe mi kownoekondre no de wan pisi foe a grontapoe disi, dan mi dinari ben sa feti so dati mi no ben sa gi abra na anoe foe den djoe. Ma leki fa a de, mi kownoekondre no de foe na fonten disi” (Joh. 18:36). Joe leriman ofoe joe priester ben leri joe taki Jesus kownoekondre de wan troetroe tirimakti, di e tiri komoto foe hemel? Noso a e leri joe taki a kownoekondre de soso wan sani di de na joe ati? Efoe a leri joe den sortoe sani disi, dan a ben foefoeroe den wortoe foe Gado foe joe.
San a kownoekondre tirimakti abi foe doe nanga ala den difrenti sortoe tirimakti foe libisma? So leki fa The Encyclopedia of Religion di na oema Mircea Eliade ben tjari kon na doro e taki, dan di Martin Luther di ben tjari wan relisi kenki kon, ben taki foe a kownoekondre a ben kon nanga wan prakseri: „Den grontapoe tirimakti . . . so srefi toe wi kan kari Gado Kownoekondre.” Son sma e leri taki, libisma, nanga den eigi tranga moeiti, kan meki libisma tirimakti kon gersi Gado kownoekondre. Na ini 1983 na Grontapoe Rai foe Kerki ben poti krakti tapoe disi: Foe di wi e kotoigi foe en taki wi wani kisi troetroe vrede nanga a doe foe spesroetoe wroko, na jeje foe Gado kan gebroiki wi swaki moeiti foe meki den kownoekondre, foe a grontapoe disi, kon gersi a kownoekondre foe Gado.”
Ma loekoe, taki, na ini a Wi Tata begi, Jesus ben leri den bakaman foe en foe begi foe Gado Kownoekondre foe kon èn soso dan a ben taigi den foe begi: „Meki joe [Gado] wani pasa, so leki na ini hemel, so srefi toe na grontapoe” (Mateus 6:10). Nanga tra wortoe, libisma no e meki a kownoekondre kon nanga a leri di den e leri foe doe Gado wani. A de a kon foe a kownoekondre san sa meki Gado wani sa pasa na grontapoe. Fa?
Arki na san na profeititaki foe Danièl kapitel 2 vers 44 e taki: „Ini den dei foe den kownoe dati [libisma tiriman ini a ten foe a kaba] na Gado foe hemel sa opo wan kownoekondre srefi di noiti sa broko saka . . . A sa masi ala den kownoekondre disi èn tjari den kon na wan kaba.” A no de foe froewondroe taki Jesus ben taki dati en kownoekondre no de wan pisi foe a grontapoe disi! Presi foe dati, a kownoekondre sa pori den kownoekondre, den tirimakti, foe a grontapoe disi èn teki den presi foe tiri a libisma famiri. Leki a tirimakti foe a libisma famiri di Gado-gi, a sa meki kon seiker dati Gado wani sa pasa na grontapoe.
Na reide foe a krakti fasi foe doe disi foe a sei foe a kownoekondre e kon moro na krin te wi e go loekoe soema abi na kontrole a tapoe a grontapoe disi. Na apostel Johanes e skrifi: „Na heri grontapoe didon na ini a makti foe na ogriwan” (1 Johanes 5:19). „Na ogriwan” na Satan Didibri, di Paulus ben kari „a gado foe a sistema foe sani disi” (2 Korentesma 4:4). No wan fasi no de foe meki orga ini wan grontapoe foe san Satan Didibri de a gado foe en kan gersi leki a de a kownoekondre foe Gado.
Disi de wan reide san ede Jesus no ben go moksi ensrefi ini politiek. Te djoe di ben de nationalist (abi wan tranga firi gi en kondre) ben proeberi foe meki a tron kownoe a ben koti pasi gi den (Johanes 6:15). Leki fa wi ben si, sondro foe kibri wan sani a ben taigi Pilatus: „Mi Kownoekondre no de wan pisi foe a grontapoe disi.” Èn ini akroederi nanga disi a ben taki foe den bakaman foe en: „Den no de wan pisi foe a grontapoe, neleki fa mi no de wan pisi foe grontapoe” (Johanes 17:16). Dati ede, kerki fesiman di e leri taki a kon foe a kownoekondre foe Gado e kon moro gaw foe froebeter kon ini a seti foe sani disi, èn di e gi den ipi foe den deki ati foe wroko nanga a marki dati, de falsi profeiti. Den e foefoeroe na krakti nanga a makti foe san a bijbel e taki troetroe.
Foe san ede a Prenspari?
Ala disi de soso wan koni taki-go-taki-kon? Kwetikweti. Fowtoe leri foe Gado kownoekondre ben kori foeroe sma èn ben abi krakti srefi tapoe na fasi fa historia ben waka. Leki eksempel, na boekoe Théo, wan lomsoe encyclopedia, e taki: „Gado pipel e go na fesi nanga ai tapoe Gado kownoekondre di nanga jepi foe Krestes ben bigin wroko na grontapoe . . . Kerki na a siri foe a kownoekondre disi.” Na meki di den meki na lomsoe kerki kon de a kownoekondre foe Gado ini den jari hondro foe den middel eeuw di ben lai nanga kroektoe bribi, ben gi en kefarlek bigi makti. Srefi ini a ten disi, kerki fesiman e proeberi foe abi makti na tapoe a fasi fa grontapoe afersi e waka, ala di den e wroko foe hori baka gi son politiek sistema èn e wroko teige son trawan.
Wan njoensoe man ben pristeri wan tra fasi di panja lontoe na ala sei fa sma e si sani na ini a ten disi di a ben taki: „Na pasi foe refo na a kownoekondre foe di refo wani taki dati a pipel e bondroe kon na wan ini wan njoen libisma libimakandra, foe san faja ben soetoe gi leki wan marki di komoto foe Gado nanga jepi foe a man foe waarheid Jesus . . . Gandhi . . . den Berrigans”. Foe di den e gi a leri taki politiek aktiviteit kan meki Gado kownoekondre go na fesi èn foe di den no e bisi nanga den troetroe troe tori foe na kownoekondre, ben meki kerki fesiman go poti nen foe de kandidati foe kisi politiki posisi. A ben meki taki trawan ben abi foe doe nanga borgroe oproeroe èn e abi prati srefi na ini guerilla orlokoe. Noti foe disi de ini kroederi nanga a waarheid taki a kownoekondre no de wan pisi foe a grontapoe disi. Èn den kerki fesiman di de so dipi ini politiek no kan taki kwetikweti taki den no de wan pisi foe grontapoe, so leki fa Jesus ben taki dati foe en disipel. Den di e leri taki Gado Kownoekondre kan kon nanga jepi foe politiek aktiviteit, de falsi profeiti. Den e foefoeroe Gado wortoe foe libisma.
Efoe den kerki fesiman foe a krestenhèit ben leri san a bijbel e taki troetroe, dan den ipi foe den ben sa sabi taki Gado Kownoekondre foe troe sa loesoe den problema so leki pina, siki, na difrenti a mindri ras, nanga a kwinsi foe trawan. Ma dati sa de na a joisti ten foe Gado èn na a fasi foe Gado. A no sa kon nanga jepi foe a kon moro boen foe den politiek sistema di sa pasa gowe te na kownoekondre kon. Efoe den kerki leriman disi ben de troe profeiti, den ben sa leri den ipi dati ala di den e wakti Gado kownoekondre foe opo handri den kan kisi troetroe, Gado-gi, praktis jepi foe handri den problema di e meki grontapoe de fa a no moesoe de.
Te foe kaba, den ben sa leri den ipi taki den situwâsi na grontapoe (di e kon takroe moro nanga moro) di e meki someni nowtoe kon ben taki na fesi ini bijbel èn dati den de wan marki taki a kon foe a kownoekondre de krosibei. Ija, heri esi a kownoekondre foe Gado sa handri, èn sa poeroe den politiek stroktoeroe foe now na den presi. Fa dati sa de wan blesi!—Mateus 24:21, 22, 36-39; 2 Petrus 3:7; Openbaring 19:11-21.
Libisma famiri ondro Gado Kownoekondre
San na kon foe Gado Kownoekondre sa wani taki gi a libisma famiri? We, joe kan si joesrefi ala mamanten e wiki nanga foeroe krakti ini joe skin? No wan sma di joe sabi siki ofoe e dede. Srefi den lobiwan foe joe di ben dede drai kon baka na joe nanga jepi foe wan opobaka (Jesaja 35:5, 6; Johanes 5:28, 29). No moro langa ekonomia problema di e kon foe gridi bisnis afersi noso oneerlijk ekonomia sistema. Joe abi joe eigi boen oso nanga nofo gron pe ala san joe abi fanowdoe kan gro foe gi njanjan na a famiri (Jesaja 65:21-23). Joe kan waka lontoe na iniwan presi na ala ten foe dei ofoe neti sondro foe frede taki sma o molesteri joe. Orlokoe no de moro — noti di e meki a seikerfasi foe joe de ini kefar. Ibriwan sma abi wan boen belangstelling dati sani waka joe boen. Den ogriwan no de moro. Lobi nanga regtfardikifasi e tiri. Joe kan prakseri fa a sa de ini so wan ten? We, disi na a sortoe grontapoe di a kownoekondre sa tjari kon.—Psalm 37:10, 11; 85:10-13; Mika 4:3, 4.
Disi de soso wan dren di no sa kon troe? Nôno. Leisi den tekst di kari na ini a paragraaf na fesi disi, èn joe sa si taki ala sani di taki drape e sori tapoe troetroe pramisi foe Gado. Efoe te nanga now ete joe no man si den sani disi krin san e prenki san Gado kownoekondre kan èn sa doe gi a libisma famiri, dan wan sma ben foefoeroe Gado wortoe foe joe.
Kolokoe, sani no abi foe tan na a fasi dati gi joe. Jesus ben taki dati na ini wi ten „na boen njoensoe disi foe a kownoekondre sa preiki na a heri grontapoe pe libisma e libi leki wan kotoigi gi ala nâsi; èn dan a kaba sa kon.” (Mateus 24:14). Na tijdschrift di joe e leisi na wan pisi foe a preikiwroko dati. Wi e gi joe deki-ati foe kibri joesrefi foe falsi profeiti no bidrigi joe. Loekoe moro dipi ini a Wortoe foe Gado foe feni a waarheid foe Gado Kownoekondre. Dan, saka joesrefi gi a kownoekondre dati, san na wan sani di na Bigi Herder, Jehovah Gado gi wi. Foe troe a de na wan enkri howpoe foe libisma, èn a no sa misi.
[Prenki na tapoe bladzijde 5]
Luther ben leri taki den ben kan si libisma tirimakti leki Gado Kownoekondre
[Sma di abi a reti foe a prenki]
Nanga switifasi froetrow foe na British Museum
[Prenki na tapoe bladzijde 7]
Leki wan lobi Herder, Jehovah nanga jepi foe en kownoekondre sa tjari situwâsi kon di no wan libisma kan tjari