Prisiri demakandra — Njanboen foe den wini, tan farawe foe den trapoe

„No wan sani de di moro betre leki te [wan man] moesoe njan èn dringi foe troe èn meki a sili foe en si boen foe a tranga wroko foe en.” — PREIKIMAN 2:24.

1. Na sortoe fasi a tiri foe Gado e jepi a pipel foe en ini a tori foe ontspanning?

A TIRI foe Jehovah e tjari foeroe wini gi den foetoeboi foe en. Wi kan si disi ini a bigi kontren foe ontspanning. A tiri foe en e jepi kresten foe tan farawe foe ala toe sei, foe no go soekoe sani toemoesi fara noso foe no doe en srefisrefi. Wan toe foe den kerkisma, di wani nomonomo foe sma weri krosi pinafasi èn tjari densrefi so toe, e si pikinmoro ala prisiri leki sondoe. Na a tra sei, moro foeroe sma e feti baka prisiri, srefi efoe disi de kontrari den wet èn gronprakseri foe Jehovah. — Romesma 1:24-27; 13:13, 14; Efeisesma 4:17-19.

2. San ben sori froekoefroekoe kaba fa Gado e si ontspanning?

² Ma san de foe taki foe a pipel foe Gado? Foeroe sma di e bigin studeri bijbel e feni en wan onfroewakti prisiri foe leri taki Gado troetroe ben meki libisma nanga a man di den man njanboen foe a libi. A ben gi wi fosi papa nanga mama wroko foe doe — ma a no soi wroko di e broko skin èn di marki a libi foe a moro bigi ipi foe den onvolmaakti libisma (Genesis 1:28-30). Prakseri foe den lo gesontoe fasi di ala sma, di e libi ini wan grontapoe paradijs, kan feni prisiri na ini. Prakseri foe a prisiri foe den foe loekoe na werdri meti, di no ben sa de wan kefar èn den fansortoe oso meti, di ben kan de wan pisi foe na aladei libi! Èn fa den ben sa abi njanjan „foe ala sortoe bon di de wan lostoe gi wan sma ai èn boen leki njanjan”! — Genesis 2:9; Preikiman 2:24.

3-5. (a) Sortoe marki ontspanning moesoe abi? (b) Foe san ede wi kan de seiker taki Gado no ben tapoe den Israèlsma foe abi prisiri?

³ Den aktiviteit dati, foe taki dati leti, wi kan si leki ontspanning, di a marki foe san ede den ben de ini paradijs ben sa de a srefi leki now: foe meki a libikrakti foe wan sma kon njoen baka èn moro jongoe, foe a kan go doro foe doe wroko di warti noso di abi wini. Te ontspanning e doe disi, dan a abi wini. Disi wani taki, dati troe anbegiman kan meki wan presi ini a libi foe den gi ontspanning, srefi efoe den no e libi ete na ini wan Paradijs? Ija. Insight on the Scriptures e taki foe ontspanning na mindri Jehovah en pipel foe owroeten:

⁴ „Den no e skrifi so krin na ini a bijbel tori foe den prisiri di den Israèlsma ben meki nanga ontspanning. Ma tokoe, a e meki sma si a meki foe prisiri nanga ontspanning, leki joisti èn sani di sma ben winsi, te den de ini akroederi nanga den relisi gronprakseri foe a nâsi. Den moro prenspari fasi foe ontspanning ben de a prei foe pokoe, singi, dansi, takimakandra, èn so srefi wan toe plèi. Den ben poti a poti foe raitori èn moeilek aksi na wan hei presi srefisrefi. — Kroet. 14:12.” — Pisi 1, bladzijde 102.

⁵ Di David ben drai kon baka foe wan feti di a ben wini, den Hebrew oema ben gebroiki luit (wan sortoe gitara) nanga sinsin di den ben meki prisiri (Hebrewtongo, sa·chaqʹ) (1 Samuèl 18:6, 7). A gron foe a Hebrew wortoe wani taki „lafoe” èn son vertaling e taki foe „oema di ben meki prisiri” (Byington, Rotherham, The New English Bible). Di den ben froisi na Ark, „David nanga a heri oso foe Israèl ben meki prisiri na fesi Jehovah nanga ala sortoe pokoesani”. Mikal, na trow-oema foe David, no ben abi wan balansi loekoe, foe di a no ben feni en boen taki David ben abi wan prati na den aktiviteit foe ontspanning (2 Samuèl 6:5, 14-20). Gado ben froeteri na fesi taki den sma, di ben o drai kon baka foe a katibo na Babilon, ben sa abi wan prati ini den srefi sortoe prisiri aktiviteit. — Jeremia 30:18, 19; 31:4; teki gersi Psalm 126:2.

6. Fa a kresten Griki Boekoe e jepi wi foe de ini balansi ini a tori foe ontspanning?

⁶ Wi toe moesoe proeberi foe hori balansi ini a tori foe ontspanning. Wi e froestan, foe eksempel, taki Jesus no ben de wan sma di ben tapoe ensrefi foe no njanboen foe lostoe di ben prisiri en? A ben teki ten foe njanjan di ben gi en krakti, so leki wan „bigi switi-kon-fesa” di Levi ben hori. Èn di sma, di ben regtfardiki densrefi, ben kroetoe en, foe di a ben njan èn dringi, Jesus ben trowe den loekoe èn den fasi foe den (Lukas 5:29-31; 7:33-36). Memre toe, taki a ben de na wan trowfesa èn ben jepi so srefi foe prisiri ben de na a fesa (Johanes 2:1-10). Judas, Jesus en afoebrada, ben taki, dati kresten ben abi „lobi fesa”, so leki fa a sori disi ben de njanjan tafra pe mofinawan ben kan njanboen foe njanjan èn demakandra di ben prisiri èn ben gi bro skin. — Judas 12.

Prisiri demakandra na en ten èn presi

7. Fa a Wortoe foe Gado e gi deki-ati foe hori balansi ini ontspanning?

⁷ Preikiman 10:19 e taki boen foe ’brede foe meki den wrokoman lafoe èn win di e meki a libi de nanga prisiri’. Disi no e piki leki ontspanning foe ensrefi ben de fowtoe noso takroe, a no so? Tokoe a srefi boekoe e taki: „Gi ala sani wan fasti ten de, . . . wan ten foe krei èn wan ten foe lafoe; wan ten foe barikrei èn wan ten foe djompodjompo lontoe” (Preikiman 3:1, 4). Ija, ala di bijbel no e kroetoe ontspanning di joisti, a e warskow wi. Disi wani taki so srefi rai foe hori prisiri demakandra na en presi ini a tori foe ten èn o foeroetron. A e warskow wi toe foe no fadon ini trapoe san ben pasa foeroetron na bigi prisiri demakandra. — 2 Timoteus 3:4.

8, 9. Foe san ede a ten di wi e libi na ini èn a wroko di Gado gi wi abi krakti tapoe ontspanning?

⁸ Wi ben si taki den djoe, di ben drai kon baka foe Babilon — èn di ben abi foeroe tranga wroko foe doe — ben sa abi prati na prisiri ontspanning. Tokoe, Jeremia ben taki na fesi taki a no ben sa ’sidon nanga a pikin groepoe foe denwan di e meki spotoe èn mi no bigin foe e prisiri sote’ (Jeremia 15:17). Gado ben gi en a wroko foe tjari wan boskopoe foe strafoe di ben o kon, so boen a no ben de a joisti ten gi en foe meki prisiri.

⁹ Kresten ini a ten disi kisi a wroko foe meki Gado boskopoe foe howpoe bekènti èn so srefi foe meki a kroetoe foe en bekènti gi na ogri seti foe Satan (Jesaja 61:1-3; Tori foe den Apostel 17:30, 31). A ben sa moesoe de krin, foe dati ede, taki wi no moesoe gi pasi foe ontspanning e tron a moro prenspari sani ini wi libi. Wi kan agersi a penti disi nanga wan pikinso sowtoe noso wan spesroetoe spesrei, di e meki a tesi foe a njanjan kon moro boen. Joe ben sa kanti someni spesrei na ini, taki a e kon tesi srefi moro tranga leki a njanjan? Nôno, a no de foe taki. Ini akroederi nanga Johanes 4:34 èn Mateus 6:33, a moro prenspari broko-ede foe wi — a moro prenspari njanjan foe wi — moesoe de a doe foe Gado wani. So boen ontspanning e kon de leki spesrei. A moesoe meki sma firi switi èn meki den kon moro tranga, a no moesoe meki sma kon weri srefisrefi noso basi den.

10. Foe san ede wi alamala moesoe go ondrosoekoe na ontspanning foe wi baka ini a tori foe omeni ten wi e gi na dati?

¹⁰ Ma sidon prakseri: A no de so, taki moro foeroe sma ben sa taki, dati a ten èn a prakseri di den e gi na ontspanning no de so foeroe? Efoe den ben firi tra fasi, den ben sa tjari kenki kon. Disi no e sori taki ibriwan foe wi moesoe tan tanapoe èn, moesoe loekoe serjoesoe finifini na wan opregti fasi sortoe presi ontspanning e teki troetroe ini wi libi? A ben kon sondro foe wi sabi kan de, a moro prenspari pisi foe wi libi? Foe eksempel, wi e leti a telefisi sondro foe wi e denki te wi doro na oso? Wi ben kon kisi a gwenti foe poti wan heri ipi ten na wan sei gi ontspanning ibri wiki, so leki ibri freida noso satra neti? Wi ben sa firi broko saka te a joeroe dati doro èn wi de na oso sondro foe abi plan gi onstpanning? Toe tra aksi moro: A dei baka wan demakandra, wi e feni taki wi ben tan so lati na doro noso wi ben rèis so fara taki wi weri, kande sote taki wi no man abi wan prati na a kresten diniwroko kande noso no sa man foe gi a basi foe wi wan boen wroko foe a dei dati? Te na ontspanning foe wi, efoe a de na okasi noso foeroetron, abi a krakti dati na wi tapoe, dan a de troetroe prisiri di joisti èn di de ini balansi? — Teki gersi Odo 26:17-19.

11. Foe san ede a e fiti foe loekoe a fasi foe na ontspanning foe wi?

¹¹ A ben sa de wan boen sani toe foe wi go loekoe toe a sortoe foe ontspanning foe wi. A de di wi de wan foetoeboi foe Gado no de wan djaranti taki na ontspanning foe wi na wan sani di fiti. Poti prakseri na san na apostel Petrus ben skrifi gi salfoe kresten: „A de nofo taki ini a ten di pasa oenoe ben doe a wani foe den nâsi foe di joe ben gi joesrefi abra na doe foe jajolibi, ogri lostoe, hebi dringi foe win, njan nanga dringi foe gridi èn pasa marki, sidon e dringi sopi èn afkodrei di no de akroederi a wet” (1 Petrus 4:3). A no ben e sori den finga, foe taki en so, e kragi den brada foe en taki den ben doe san den sma ini grontapoe ben e doe. Tokoe a prenspari gi kresten foe de na ai (ini a ten dati èn now), foe di wan sma kan fadon makriki gi ontspanning di e doe ogri. — 1 Petrus 1:2; 2:1; 4:7; 2 Petrus 2:13.

De na ai gi trapoe

12. Tapoe sortoe trapoe 1 Petrus 4:3 e poti prakseri?

¹² Gi sortoe trapoe wi moesoe de na ai? We, Petrus ben kari „hebi dringi foe win, njan nanga dringi foe gridi èn pasa marki, sidon e dringi sopi”. Wan Doisri man, di e poeroe sani kon moro krin, ben froeklari taki den Griki wortoe di den ben gebroiki „ben fiti moro foeroe gi prisiri dringi na wan njanjanfesa”. Wan profesor foe Zwitserland ben skrifi taki den doe dati ben de wan gwenti na a ten dati: „A fasi fa den skrifi foe en ben moesoe de wan pisi foe konmakandra di den ben orga noso srefi gewoon groepoe foe sma pe den ben doe den sjen sani di den ben skrifi foe den.”

13. Fa a gebroiki foe sopi na prisiri demakandra ben de wan trapoe? (Jesaja 5:11, 12)

¹³ Foe abi dringi di abi sopi na bigi prisiri demakandra ben tjari foeroe sma go ini wan trapoe. Bijbel no e tapoe a gebroiki foe wan pikinso foe den sortoe dringi dati, a no e doe dati. Leki wan boeweisi foe disi, dan Jesus ben meki win na wan trowfesa na Kana. Sma no ben dringi sopi pasa marki drape, foe di Jesus ben hori a rai foe Gado hei foe tan farawe foe hebi sopiman (Odo 23:20, 21). Ma prakseri foe a pikin pisi sani disi: A fesiman foe a fesa dati ben taki, dati na tra fesa den e poti a boen win fosi ’èn te sma droengoe, a win di no de so boen ben poti’ (Johanes 2:10). So boen a ben de wan gwenti taki djoe ben kon droengoe na trowfesa pe ala sma ben kan kisi win pasa marki.

14. Na sortoe fasi kresten di e ontfanga fisitiman, kan kakafoetoe gi a trapoe di dringi, di abi sopi na ini, kan gi?

¹⁴ Na a srefi fasi, son kresten, di e ontfanga fisitiman, teki a bosroiti foe gi win, biri, nanga tra dringi di abi sopi na ini soso efoe densrefi kan hori ai na tapoe san den fisitiman foe den e kisi noso e gebroiki. Efoe wan groepoe moro bigi leki san a sma srefi, di e ontfanga fisitiman kan hori ai na tapoe, so leki na a djoe trow di wi ben taki foe en, dan foeroe sopi kan de wan kefarlek trapoe. Wan sma kan de drape, di ben feti nanga a problema foe dringi sopi èn ben wini en. Joe kan froestan taki te a sma kan go teki sopi sondro marki èn sondro foe wan sma hori ai na tapoe dati, dan disi kan kori a sma foe gi ensrefi abra na toemoesi foeroe foe dati èn pori a fesa gi ala sma. Wan opziener na Doisrikondre, di de wan papa toe, ben taki dati na osofamiri foe en abi wini foe switi kompe na prisiri demakandra nanga kompe bribiman. Ma a ben taki moro fara, taki a kisi di den ben kan kisi problema ben de krinkrin moro bigi te biri ben de foe kisi makriki.

15. Fa wi kan kisi boen tiri tapoe wan prisiri demakandra?

¹⁵ A trow na Kana ben abi wan „fesiman foe a fesa” (Johanes 2:8). Disi no wan taki, dati te wan osofamiri abi wan groepoe na den oso gi wan njantafra noso wan pisi ten foe abi demakandra, taki den moesoe poti wan fesiman. A masra foe na oso ben sa abi a frantiwortoe foe tiri a fesa dati. Ma te wan groepoe abi soso toe osofamiri na ini noso a de pikinso moro bigi, dan a moesoe de krin taki wan sma moesoe abi frantiwortoe foe san e pasa. Foeroe papa nanga mama ben ondrosoekoe disi te a manpikin noso na oemapikin foe den ben kisi wan kari gi wan prisiri demakandra. Den ben meki kontakti nanga a sma, di e ontfanga fisitiman, foe aksi en soema sa tiri na heri fesa, so srefi soema sa de drape te na a kaba. Kresten papa nanga mama ben kenki den eigi schema foe de drape, so taki owroewan èn so srefi jongoewan ben kan njanboen foe a demakandra nanga makandra.

16. Sortoe joisti sani wi moesoe go prakseri ini a tori foe a bigi den demakandra?

¹⁶ A bijkantoro foe a Waktitorengenootschap na Kanada e skrifi: „Son owroeman ben froestan taki a rai, di abi foe doe nanga a skoto foe a bigi foe prisiri demakandra, ben wani taki, dati bigi demakandra na trow-oso de kontrari a rai. Den ben kon na a bosroiti taki efoe wi e kisi a rai foe hori wi prisiri demakandra ini wan pikin groepoe, di sma kan tiri, dan a ben sa de wan fowtoe sani foe abi 200 noso 300 sma na wan trow-oso.”a Na presi foe poti toemoesi foeroe krakti tapoe a taki o bigi ibri sma srefi wani a groepoe moesoe de, a moro prenspari prakseri moesoe poti na tapoe taki boen tiri de, awansi omeni sma sa de drape. Na ipi foe win di Jesus ben gi e sori taki wan moi bigi groepoe ben de drape na a trow na Kana, ma a ben de krin, taki den ben tiri sani na wan fasi di ben fiti. Boen tiri no ben de na tra fesa foe a ten dati; a bigi foe den ben kan de wan reide taki boen tiri no ben de. Omoro bigi wan demakandra, omoro bigi a tjalensi, foe di a de makriki gi swakiwan, di abi a firi foe gi densrefi abra na sani pasa marki, foe hori densrefi. Na demakandra di no ben abi tiri den ben kan meki sani pasa di no de so soifri. — 1 Korentesma 10:6-8.

17. Fa kresten kan sori balansi te wi e meki plan gi wan konmakandra?

¹⁷ Boen tiri foe wan prisiri demakandra wani taki so srefi a meki foe den plan foe en èn a sreka foe en. Disi no e aksi taki sma moesoe go denki wan thema di e naki sma ati, foe meki a fesa de wan aparti sani noso wan di sma sa tan memre, ma di ben sa de neleki den grontapoe fesa, so leki bigi dansi pe den sma di drape e weri paki foe gersi pôpi sma noso wan fesa pe sma e weri masker. Joe kan prakseri taki den getrow Israèlsma na a Pramisi Kondre e meki plan gi wan fesa pe ala sma moesoe weri leki den heiden na Egipti noso wan tra kondre? Den ben sa meki plan gi dansi, di e wiki sekslostoe noso di opo-opo èn di ben de pôpi na mindri den hèiden? Drape na a bergi Sinai, den ben kon ini a trapoe foe pokoe nanga dansi, di kande ben de a modo ini a ten dati èn ben de pôpi na Egipti. Wi sabi fa Gado nanga Moses, a foetoeboi foe en di ben lepi, ben si na ontspanning dati (Exodus 32:5, 6, 17-19). Foe dati ede a sma di e ontfanga fisitiman noso a sma di e teki fesi na wan prisiri sani di e feni presi, moesoe go prakseri efoe den sa singi noso dansi; èn efoe dati de so, dan a moesoe de seiker taki dati de ini akroederi nanga kresten gronprakseri. — 2 Korentesma 6:3.

18, 19. Sortoe inzicht wi kan kisi foe Jesus, di den ben kari en na wan trow, èn fa wi kan gebroiki disi?

¹⁸ Te foe kaba, wi e memre taki ’den ben kari Jesus nanga den disipel foe en na a trowfesa’ (Johanes 2:2). A de troe, taki wan aparti kresten noso wan osofamiri kan go fisiti trawan soso foe abi wan prisiri ten di e bow sma. Ma gi wan prisiri sani di o feni presi, di sma meki plan gi, ondrofeni e sori taki a teki foe bosroiti na fesi, foe soema sa de drape, e jepi foe problema no kon. Wan owroeman na Tennessee, V.S. , di kweki manpikin nanga oemapikin, di de ini a foeroeten diniwroko, ben tjari disi kon na krin. Bifo en noso a wefi foe en ben sa teki wan kari, noso gi primisi na den pikin foe den foe go na wan fesa, den ben meki kontakti nanga a sma di ben o ontfanga den fisitiman, foe de seiker taki na fesi den ben bosroiti kaba soema ben sa de den sma di ben o de drape. Na osofamiri foe en ben kibri densrefi gi den trapoe di sonwan ben miti na demakandra pe ala sma ben mag go, efoe a ben de gi wan njanjan, wan piknik, noso oefening so leki a plèi foe bal.

¹⁹ Jesus no ben gi deki-ati foe kari soso famiriman, owroe mati, noso sma di ben owroe a srefi noso abi a srefi ekonomia situwâsi na wan demakandra. (Lukas 14:12-14; teki gersi Job 31:16-19; Tori foe den Apostel 20:7-9.) Efoe joe go denki boen soema joe wani foe kari, dan a de moro makriki foe teki so srefi kresten di de foe difrenti jari nanga situwâsi (Romesma 12:13; Hebrewsma 13:2). Wan toe foe den kan de swakiwan na jeje fasi noso njoenwan di kan abi wini foe demakandra nanga lepi kresten. — Odo 27:17.

Ontspanning na a presi pe a moesoe de

20, 21. Foe san ede a e fiti taki ontspanning abi wan presi ini wi libi?

²⁰ A e fiti gi wi leki pipel di e frede Gado, foe abi belangstelling gi na ontspanning foe wi èn foe broko wi ede taki disi de joisti èn taki wi de ini balansi nanga a ten di wi e gebroiki gi disi (Efeisesma 2:1-4; 5:15-20). A skrifiman di ben skrifi Preikiman nanga jepi foe santa jeje, ben firi a fasi dati: „Misrefi ben prèise a prisiri, bika libisma no abi no wan sani di moro betre leki foe njan, foe dringi èn foe meki prisiri, èn taki disi moesoe de en kompe na a tranga wroko foe en, ala den dei foe en libi di a [troe] Gado ben gi den na ondro son” (Preikiman 8:15). Den sortoe prisiri dati di de ini balansi, kan gi a skin krakti èn jepi foe tjari problema èn brokoskin ini balansi, di wi gwenti ini a seti foe a ten disi.

²¹ Foe agersi disi, wan pioniersisa foe Oostenrijk ben skrifi wan owroe mati: „Tra dei wi ben abi wan rèis di ben waka toemoesi prisiri. So wan 50 sma foe wi ben go na wan pikin se, krosibei foe Ferlak. Brada B—— ben tjari a groepoe ini a wagi foe en, di a ben e tjari dri sani foe losi njanjan, stoeroe di joe kan fow, tafra, èn srefi tafra foe plèi tafratennis. Wi ben njanboen foe disi srefisrefi. Wan sisa ben abi wan na en armonika di joe e plèi nanga anoe, so boen wan lo Kownoekondre singi ben singi. Den brada, jongoewan nanga owroewan, ben njanboen foe a demakandra.” A pioniersisa ben abi switi memre foe ontspanning di sma ben abi boen tiri a tapoe, èn di den ben hori fri foe trapoe, so leki a dringi foe sopi pasa marki noso wan waka nanga libi di ben broejabroeja. — Jakobus 3:17, 18.

22. Sortoe warskow moesoe kon krin na fesi ini a denki foe ibri wan foe wi, te wi e njanboen foe prisiri demakandra?

²² Paulus ben gi wi deki-ati foe loekoe boen foe no gi pasi na den lostoe foe na onvolmaakti skin, no srefi foe meki plan di kan meki wi kon tanapoe na fesi tesi (Romesma 13:11-14). Dati abi na ini toe plan gi prisiri ontspanning. Te wi e waka na baka a rai foe en foe doe dati, dan wi sa man foe tan farawe foe situwâsi di ben abi leki bakapisi gi sonwan taki a sipi foe den broko na jeje fasi (Lukas 21:34-36; 1 Timoteus 1:19). Na presi foe dati, a sa de wan koni sani foe teki ontspanning di gesontoe èn di sa jepi wi foe hori a matifasi foe wi nanga Gado. Wi sa abi wini na so fasi foe prisiri demakandra di wi kan si leki wan boen presenti foe Gado. — Preikiman 5:18.

[Foetoewortoe]

San wi leri?

◻ Sortoe balansi loekoe wi e si ini bijbel ini a tori foe njanboen foe prisiri demakandra?

◻ Foe san ede prakseri moesoe poti tapoe a tori foe ten èn a sortoe foe ontspanning?

◻ San na wan toe sani di wan kresten di e ontfanga fisitiman kan doe foe kibri sma gi trapoe?

◻ San ontspanning kan doe gi kresten efoe a de joisti èn ini balansi?

[Prenki na tapoe bladzijde 27]

Wan sma, di e ontfanga fisitiman noso wan sma di e teki fesi na wan prisiri demakandra, abi a frantiwortoe foe sorgoe taki den fisitiman no e fadon ini trapoe