Jehovah no e wisiwasi wan ati di broko
„Den srakti ofrandi gi Gado na wan jeje di broko; wan ati di broko èn masi, o Gado, joe no sa wisiwasi.” — PSALM 51:17.
1. Fa Jehovah e prakseri foe den anbegiman foe en di sondoe na wan serjoesoefasi, ma di abi berow?
JEHOVAH kan ’tapoe a pasi, meki sma no kon krosibei foe en, neleki nanga wan bigi groepoe wolkoe, so taki begi no kan boro pasa go’ (Kragisingi 3:44). Ma a wani taki en pipel moesoe kon na en. Srefi efoe wan foe en anbegiman ben sa meki wan serjoesoe fowtoe, ma a abi berow, wi hemel Tata e memre a boen di a sma dati ben doe. Foe dati ede, na apostel Paulus ben froeteri kompe kresten: „Gado no de onregtfardiki, so taki a e frigiti den wroko foe oenoe èn a lobi di oenoe ben sori gi en nen.” — Hebrewsma 6:10.
2, 3. San kresten owroeman moesoe hori na prakseri te den e handri nanga kompe bribiman di meki fowtoe?
2 Kresten owroeman ben sa moesoe prakseri toe den jari foe getrow dienst di kompe bribiman doe gi Gado. Disi abi na ini toe a santa diniwroko foe den sma di abi berow, ma di ben doe wan fowtoe sani noso di ben sondoe na wan serjoesoefasi. Kresten skapoeman e doe moeiti gi a gesontoe na jeje fasi foe ala den sma di de ini na ipi foe Gado. — Galasiasma 6:1, 2.
3 Wan sma di meki wan fowtoe èn di abi berow, abi a sari-ati foe Jehovah fanowdoe. Tokoe moro de fanowdoe. Den wortoe foe David na Psalm 51:10-19 e tjari disi kon na krin.
Wan soifri ati de fanowdoe
4. Foe san ede David ben begi foe kisi wan soifri ati nanga wan njoen jeje?
4 Efoe wan kresten di gi ensrefi abra de ini wan takroe kondisi na jeje fasi, foe di a sondoe, dan san a kan abi fanowdoe boiti a sari-ati foe Jehovah nanga a gi di a e gi en pardon? We, David ben begi: „Meki na ini mi, srefi wan soifri ati, o Gado èn poti na ini mi wan njoen jeje, wan di de stanfaste” (Psalm 51:10). Leki fa a sori, dan David ben aksi a sani disi foe di a ben froestan taki a firi foe doe bigi sondoe ben de ete na ini en ati. A kan, taki wi no ben kisi foe doe nanga den sortoe sondoe di ben kisi David ini a tori foe Batseiba nanga Uria, ma wi abi a jepi foe Jehovah fanowdoe foe tan farawe foe tesi di abi foe doe nanga wan fasi foe tjari wisrefi foe go doe wan bigi sondoe. Moro fara, wi abi kande persoonlijk jepi foe Gado fanowdoe foe poeroe foe wi ati den sondoe fasi dati, so leki gridifasi nanga a si di wi no wani si sma na ai — ogri di abi foe doe nanga foefoeroe foe sani èn a kiri foe sma. — Kolosesma 3:5, 6; 1 Johanes 3:15.
5. (a) San a wani taki foe abi wan soifri ati? (b) San David ben wani di a ben aksi wan njoen jeje?
5 Jehovah wani taki den foetoeboi foe en abi „wan soifri ati”, dati wani taki, wan soifri boeweigi foe ati noso wan soifri prakseri. Foe di David ben froestan taki a no ben sori so wan soifrifasi, meki a ben begi taki Gado krin na ati foe en èn tjari dati kon na ini wánfasi nanga den markitiki foe Gado. A psalm singiman ben wani wan njoen, opregti jeje noso firi na froestan sei toe. A ben abi wan jeje fanowdoe di ben sa jepi en foe kakafoetoe gi tesi èn meki a tan steifi na Jehovah en wet nanga en gronprakseri.
Santa jeje de prenspari
6. Foe san ede David ben begi taki Jehovah no poeroe en santa jeje foe en?
6 Te wi e lasi-ati foe den fowtoe foe wi noso foe sani di wi no doe boen, wi kan abi a firi taki Gado de foe trowe wi na wan sei èn poeroe en santa jeje noso en wroko krakti foe wi. David ben firi a fasi dati, bikasi a ben begi Jehovah: „No trowe mi komoto foe joe fesi; èn joe santa jeje, o no poeroe dati foe mi” (Psalm 51:11). Nanga berow èn nanga sakafasi David ben firi taki den sondoe foe en ben meki taki a no ben warti foe dini Jehovah. Foe Gado trowe en komoto foe en fesi ben sa wani taki foe lasi a boen, a trowstoe nanga a blesi foe en. Foe David ben sa kon boen baka na jeje fasi, a ben abi a santa jeje foe Jehovah fanowdoe. Nanga a santa jeje na en tapoe, na ini begi a kownoe ben kan soekoe a tiri foe Gado, so taki a ben kan plisi Jehovah, ben kan tan farawe foe sondoe èn ben kan tiri nanga koni. Foe di David ben froestan den sondoe foe en na a Giman foe santa jeje, meki a ben fiti taki a ben begi Jehovah foe no poeroe dati foe en.
7. Foe san ede wi moesoe begi foe kisi santa jeje èn kibri wisrefi foe wi no meki a firi sari?
7 Fa a de nanga wi? Wi moesoe begi foe kisi santa jeje èn kibri wisrefi foe no meki a firi sari foe di wi e misi foe waka baka a tiri foe en (Lukas 11:13; Efeisesma 4:30). Noso wi ben sa kan lasi a jeje èn no ben sa man foe sori den froktoe di Gado gi: lobi, prisiri, vrede, langa pasensi, switifasi, boen-ati, bribi, safri-atifasi nanga dwengi joesrefi. Jehovah Gado spesroetoe ben sa poeroe en santa jeje foe wi efoe wi e tan sondoe kontrari en sondro foe abi berow.
Prisiri pasa marki na ini a kisi foe froeloesoe
8. Efoe wi sondoe, ma wani prisiri na ini a kisi foe froeloesoe, dan san wi moesoe abi?
8 Wan sondoeman di abi berow èn di e ondrofeni a kon boen baka na jeje fasi, kan prisiri baka na ini san Jehovah gi foe kisi froeloesoe. Foe di David ben angri foe disi a ben begi Gado: „Gi mi baka a prisiri pasa marki foe a froeloesoe di joe gi mi èn taki joe e horibaka gi mi nanga wan jeje di de klariklari” (Psalm 51:12). Fa a ben de wan toemoesi moi sani foe prisiri ini a seiker howpoe foe kisi froeloesoe foe Jehovah Gado! (Psalm 3:8) Baka di David ben sondoe na Gado, dan nanga jepi foe En a ben soekoe foe kisi a prisiri baka na ini a kisi foe froeloesoe. Baka ten Jehovah ben sorgoe gi froeloesoe nanga jepi foe a froeloesoe ofrandi foe en Manpikin, Jesus Krestes. Efoe wi leki den foetoeboi foe Gado, di gi densrefi abra na en, sondoe na wan serjoesoefasi, ma wani foe abi a prisiri baka na ini a kisi foe froeloesoe, dan wi moesoe abi wan fasi di e sori berow so taki wi kan tan farawe foe doe sondoe na a santa jeje. — Mateus 12:31, 32; Hebrewsma 6:4-6.
9. San David ben aksi di a ben aksi Gado foe horibaka gi en „srefi nanga wan jeje di de klariklari”?
9 David ben aksi foe Jehovah horibaka gi en „nanga wan jeje di de klariklari”. A de krin taki disi no e sori go na a de di Gado de klariklari foe gi jepi noso na en santa jeje, ma na a firi foe David di ben poesoe en na froestan sei. David ben wani foe Gado horibaka gi en, foe di a ben sa gi en wan jeje di de klariklari foe doe san boen èn foe no fadon na ini sondoe wan tron moro. Jehovah Gado doronomo e horibaka gi den foetoeboi foe en èn e opo den sma di pikinmoro no man tjari den difrenti tesi moro (Psalm 145:14). Fa a de wan trowstoe taki wi e froestan disi, spesroetoe te wi meki fowtoe, ma abi berow èn e winsi foe dini Jehovah na wan getrowfasi moro leki wan ten!
San foe leri den sma di pasa a wet?
10, 11. (a) San David ben kan leri den Israèlsma di ben pasa a wet? (b) David ben kan gi sondoeman leri soso baka di ensrefi ben doe san?
10 Efoe Gado ben sa gi pasi gi dati, dan David ben wani foe doe wan sani, sondro foe prakseri ensrefi nomo, di ben sa sori a warderi foe en gi a sari-ati foe Jehovah èn ben sa jepi trawan. Nanga dipi firi na ini begi di ben seni na Jehovah, a kownoe, di ben abi berow, ben taki: „Mi wani leri den sma di pasa joe wet, den pasi foe joe, so taki sondoeman srefi sa drai kon langalanga baka na joe” (Psalm 51:13). Fa David di ben lai nanga sondoe ben kan gi leri na den sma di pasa a Wet foe Gado? San a ben sa kan taigi den? Èn sortoe boen disi ben kan abi?
11 Te David ben sori den Israèlsma di pasa Gado wet, den pasi foe Jehovah, ala di a ben howpoe taki den ben sa tapoe foe waka tapoe a takroe pasi, a ben kan sori o ogri sondoe de, san na abi foe berow wani taki èn fa foe kisi a sari-ati foe Gado. Foe di David ben firi a banawtoe foe a feni di Jehovah no ben feni en boen èn wan konsensi di ben fon en, dan sondro degedege a ben sa de wan leriman di na wan safoe-atifasi ben sa gi leri na sma di abi berow èn di ati ben broko. A no de foe taki, dati a ben kan gebroiki na eksempel foe en foe gi leri na trawan, soso baka te ensrefi ben teki den markitiki foe Jehovah èn ben kisi pardon foe En, foe di den sma di e weigri foe saka densrefi na ondro den markitiki foe Gado no abi no wan reti foe ’kari den gebod foe Gado’. — Psalm 50:16, 17.
12. Fa David ben njanboen foe a sabi di a ben sabi taki Gado ben froeloesoe en foe broedoe paiman?
12 Di David ben taki wantron moro foe den prakseri foe en na wan tra fasi, a ben taki: „Froeloesoe mi foe broedoe paiman, o Gado a Gado foe mi froeloesoe, so taki a tongo foe mi sa froeteri na wan prisirifasi foe joe regtfardikifasi” (Psalm 51:14). Broedoe paiman ben tjari a kroetoe foe dede kon (Genesis 9:5, 6). So boen foe di David ben sabi taki a Gado foe en froeloesoe ben froeloesoe en foe broedoe paiman ini a tori foe Uria, dan dati ben sa gi en a vrede foe ati nanga a froestan. A tongo foe David ben kan singi dan na wan prisirifasi Gado en regtfardikifasi, no foe en eigi regtfardikifasi (Preikiman 7:20; Romesma 3:10). David no ben man figi a hoeroedoe foe en poeroe noso meki Uria komoto kon baka foe a grebi, neleki fa wan libisma foe a ten disi no kan gi wan sma di a ben kori, a njoen-wenkefasi foe en baka noso tjari wan sma di a ben kiri kon na libi baka. Wi no moesoe denki foe dati te wi e kisi tesi? Èn omoro wi moesoe warderi Jehovah en sari-ati di a e sori wi ini regtfardikifasi! Te joe e loekoe en boen, dan warderi moesoe meki wi tjari trawan go na a bigi Fonten disi foe regtfardikifasi nanga a gi di a e gi sma pardon.
13. Soso na ondro sortoe omstandigheid den mofoboeba foe wan sondoeman kan opo na wan boenfasi foe prèise Jehovah?
13 No wan sondoeman kan opo den mofoboeba foe en na wan boen fasi foe prèise Jehovah so langa Gado na wan sari-atifasi no opo den, foe taki en so, foe taki foe den waarheid foe En. David ben singi foe dati ede: „O Jehovah, meki a de so taki joe e opo den mofoboeba disi foe mi, taki mi eigi mofo kan froeteri foe a prèise foe joe moro fara” (Psalm 51:15). Nanga wan konsensi di ben kon fri, foe di Gado ben gi en pardon, David ben sa kisi deki-ati foe leri den sma di pasa Gado wet den pasi foe Jehovah èn na wan frifasi a ben kan prèise En hei. Ala den sma di kisi pardon foe den sondoe foe den, so leki dati ben pasa nanga David, moesoe warderi a no-froedini boen-atifasi foe Jehovah èn den moesoe meki gebroiki foe ibri okasi foe meki a waarheid foe Gado bekènti èn ’froeteri a prèise foe en moro fara’. — Psalm 43:3.
Srakti ofrandi di Gado e teki
14. (a) Sortoe srakti ofrandi den ben aksi ini akroederi nanga a Wet froebontoe? (b) Foe san ede a ben sa de wan fowtoe sani foe denki taki wi kan pai a meki di wi e meki fowtoe, nanga wan toe boen sani?
14 David ben kisi foeroe inzicht di ben meki a taki: „Bika joe [Jehovah] no e prisiri nanga ofrandi — noso mi ben sa gi en; nanga ofrandi di bron dorodoro joe no e prisiri” (Psalm 51:16). A Wet froebontoe ben aksi taki meti ofrandi ben moesoe òfer na Gado. Ma den sortoe ofrandi dati no ben man pai gi David en sondoe foe soetadoe nanga a kiri di a ben kiri wan sma, sani di sma kan kisi a dedestrafoe foe dati. Noso a ben sa doe ala san a ben man, foe òfer meti ofrandi na Jehovah. Sondro opregti berow, srakti ofrandi no abi waarde. A ben sa de foe dati ede wan fowtoe sani foe denki taki wi kan pai foe fowtoe di wi doe doronomo nanga a doe di wi e doe wan toe boen sani.
15. San na a fasi foe wan sma di gi ensrefi abra, ma di abi wan jeje di broko?
15 David ben taki moro fara: „Den srakti ofrandi gi Gado na wan jeje di broko; wan ati di broko èn masi, o Gado, joe no sa wisiwasi” (Psalm 51:17). Ini a kefal foe wan sondoeman di abi berow, „srakti ofrandi di boen gi Gado na wan jeje di broko”. So wan sma no abi wan fasi foe lobi foe strei. Na ati foe wan sma di gi ensrefi na Gado èn di abi wan jeje di broko, e sari srefisrefi foe den sondoe foe en èn a abi sakafasi, foe di a e firi taki Gado no e feni en boen èn a de klariklari foe doe ala sani foe kisi a boen foe Gado baka. Wi no kan gi Gado no wan sani di abi waarde, te leki wi abi berow foe den sondoe foe wi èn gi wi ati na en wawan. — Nahum 1:2.
16. Fa Gado e prakseri foe wan sma di ati broko foe a sondoe di a doe?
16 Gado no e trowe wan srakti ofrandi, so leki wan ati di broko èn di masi. Awansi sortoe moeilekhèit wi e ondrofeni leki en pipel, meki wi foe dati ede no abi a firi foe lasi-ati. Efoe wi ben naki foetoe fadon, ala di wi de na tapoe a pasi foe libi, na wan noso tra fasi di e meki na ati foe wi e bari foe kisi Gado en sari-ati, dan howpoe de ete. Srefi efoe wi ben sondoe ma abi berow, Jehovah no sa wisiwasi na ati foe wi di broko. A sa gi wi pardon na tapoe a fondamenti foe Krestes en froeloesoe ofrandi èn A sa gi wi En boen (Jesaja 57:15; Hebrewsma 4:16; 1 Johanes 2:1). Ma neleki David den begi foe wi moesoe de, foe kisi a boen foe Gado baka èn no foe lon gi a strafoe noso piri-ai di de fanowdoe. Gado ben gi David pardon, ma a ben strafoe en toe. — 2 Samuèl 12:11-14.
Broko ede nanga a soifri anbegi
17. San sondoeman moesoe doe boiti foe aksi Gado foe kisi pardon?
17 Efoe wi ben doe wan serjoesoe sondoe, dan sondro degedege disi sa meki wi skin broko èn wan ati di abi berow sa boeweigi wi foe begi taki Gado e gi wi pardon. Foe dati ede, meki wi begi toe gi trawan. Ala di David ben howpoe foe gi boen anbegi baka na Gado, a psalm foe en no ben frigiti tra sma foe di a ben prakseri ensrefi nomo. A abi na ini toe a begi disi gi Jehovah: „Doe boen na Sion ini a boen wani foe joe; meki a de so taki joe e bow den skotoe foe Jerusalem.” — Psalm 51:18.
18. Foe san ede David di ben abi berow ben begi gi Sion?
18 Ija, David ben howpoe foe kisi a boen foe Gado baka. Ma a ben de a sakafasi begi foe a psalm singiman toe taki ’ini En boen wani Gado ben sa tan na Sion’, a mamafoto foe Israèl, Jerusalem, pe David ben howpoe foe bow a tempel foe Gado. Den serjoesoe sondoe foe David ben tjari a heri nâsi ini kefar, foe di ala sma ben kan njanpina foe a fowtoe di a kownoe ben doe. (Teki gersi 2 Samuèl, kapitel 24.) Foe taki en leti, den sondoe foe en ben swaki „den skotoe foe Jerusalem”, so taki now den ben moesoe bow den baka.
19. Foe san a ben sa de wan joisti sani foe begi, efoe wi doe wan sondoe ma ben kisi pardon?
19 Efoe wi ben sondoe serjoesoe, ma ben kisi a pardon foe Gado, a ben sa de joisti foe begi taki na a wan noso tra fasi Gado meki ibri ogri, di a fasi fa wi ben tjari wisrefi ben meki doe kon, boen baka. Wi ben tjari kande sjen na tapoe en santa nen, ben njan a gemeente na ondro kande èn ben tjari sari gi na osofamiri foe wi. Wi lobi hemel Tata kan poeroe ala sjen di ben tjari na tapoe en nen, a kan bow a gemeente baka nanga jepi foe en santa jeje èn a kan trowstoe den ati foe den lobiwan foe wi di lobi èn e dini en. Efoe sondoe de ini a tori efoe no, a no de foe taki, dati a meki kon santa foe Jehovah en nen nanga a tan boen foe en pipel moesoe de ala ten wan sani di wi e broko wi ede nanga dati. — Mateus 6:9.
20. Na ondro sortoe omstandigheid Jehovah ben sa prisiri nanga den srakti ofrandi foe Israèl?
20 Efoe Jehovah ben bow den skotoe foe Sion baka, san moro ben sa pasa? David ben singi: „Ini a kefal dati joe [Jehovah] sa prisiri nanga ofrandi foe regtfardikifasi, nanga ofrandi di bron èn heri ofrandi; ini a kefal dati den sa òfer mankaw na tapoe joe eigi altari” (Psalm 51:19). David ben wani fajafaja taki en nanga a nâsi ben prisiri foe a boen foe Jehovah, so taki den ben man foe anbegi en na wan boen fasi. Dan Gado ben sa prisiri nanga den bron ofrandi en den heri ofrandi foe den. Disi ben sa de so, foe di disi ben sa de ofrandi foe regtfardikifasi di pipel di ben gi densrefi na Gado, di ben de opregti èn di ben abi berow, ben òfer èn di ben njanboen foe a boen foe Gado. Bika den ben de grantangi foe Jehovah en sari-ati meki na tapoe na altari foe en den ben sa òfer mankaw — den moro boen èn moro diri srakti ofrandi. Ini a ten disi, wi e gi Jehovah grani foe di wi e tjari den moro boen sani di wi abi gi en. Èn den ofrandi foe wi abi na ini toe „den jongoe mankaw foe wi mofoboeba”, ofrandi foe prèise gi wi Gado, Jehovah, di abi sari-atifasi. — Hosea 14:2; Hebrewsma 13:15.
Jehovah e jere a babari foe wi
21, 22. Sortoe leri Psalm 51 abi na ini foe a boen foe wi?
21 Na opregti begi foe David di skrifi na ini Psalm 51 e sori wi taki wi moesoe doe wan sani na tapoe a sondoe foe wi nanga wan troetroe jeje foe berow. A psalm disi abi toe na ini spesroetoe leri gi a boen foe wi. Foe eksempel, efoe wi e sondoe ma abi berow, wi kan froetrow na tapoe a sari-ati foe Gado. Ma meki wi broko wi ede ini a fosi presi nanga ala sjen di wi ben tjari kon na tapoe a nen foe Jehovah (vers 1-4). Neleki David, wi kan aksi wi hemel Tata foe kisi sari-ati na tapoe a fondamenti foe a sondoe fasi di wi kisi foe wi papa nanga mama (vers 5). Wi moesoe de nanga troefasi èn wi moesoe soekoe a koni foe Gado (vers 6). Efoe wi ben sondoe, wi moesoe begi Jehovah foe kon krin, foe kisi wan soifri ati nanga wan stanfaste jeje. — Vers 7-10.
22 Foe Psalm 51 wi kan si toe taki noiti wi moesoe gi wisrefi pasi foe tan doe sondoe doronomo. Efoe wi ben doe so, Jehovah ben sa poeroe foe wi en santa jeje noso wroko krakti. Ma nanga Gado en jeje na wi tapoe, dan nanga boen bakapisi wi kan leri trawan den pasi foe en (vers 11-13). Efoe wi ben meki fowtoe ma abi berow, Jehovah sa gi wi pasi foe tan prèise en, foe di noiti a e wisiwasi wan ati di broko èn di masi (vers 14-17). A psalm disi e sori wi morofara taki den begi foe wi no moesoe poti a prakseri na tapoe wi wawan. Na presi foe dati, wi moesoe begi gi a blesi nanga a boen na jeje fasi foe ala den sma di de ini a troe anbegi foe Jehovah. — Vers 18, 19.
23. Foe san ede Psalm 51 moesoe boeweigi wi foe abi deki-ati èn no lasi ati?
23 A psalm disi foe David di e naki sma ati, moesoe boeweigi wi foe de nanga deki-ati èn foe no lasi-ati. A e jepi wi foe froestan taki wi no moesoe denki taki ala sani lasi, srefi efoe wi e naki foetoe fadon èn e sondoe. Foe san ede? Foe di efoe wi abi berow, Jehovah en sari-ati kan kibri wi foe no lasi-ati. Efoe wi abi berow èn e gi wisrefi krinkrin foe dini wi lobi hemel Tata, a e jere a babari foe wi foe kisi sari-ati. Èn fa a de wan trowstoe foe sabi taki Jehovah no e wisiwasi wan ati di broko!
Fa joe ben sa piki?
◻ Foe san ede kresten abi wan soifri ati èn Gado en santa jeje fanowdoe?
◻ San wan sma di abi berow kan leri sma di pasa a wet foe Jehovah?
◻ Fa Jehovah e si wan ati di broko èn masi?
◻ Sortoe leri wi e feni na Psalm 51?
[Prenki na tapoe bladzijde 26]
Joe e begi foe kisi santa jeje èn e kibri joesrefi foe joe no meki a firi sari?
[Prenki na tapoe bladzijde 28]
Sori taki joe e warderi Jehovah en no-froedini boen-atifasi foe di joe e meki en waarheid bekènti