Wroko di e kon moro bigi na a ten foe Krestes denoja
„Dan a kownoe sa taigi den sma na en leti-anoe: ’Kon, oenoe di ben kisi blesi foe mi Tata, teki leki famiri-goedoe a kownoekondre di den ben sreka gi oenoe sensi grontapoe ben bigin seti.’” — MATEUS 25:34.
1. Na sortoe fasi a pa·rou·siʹa foe Krestes ben de neleki „den dei foe Noa”?
KRESTES denoja — a sani di sma ben e froewakti langaten kaba! A ten leki „den dei foe Noa”, di Jesus ben taki foe dati ini a tori foe „a kaba foe a seti foe sani”, ben doro ini a jari 1914 (Mateus 24:3, 37). Ma san Krestes en denoja noso pa·rou·siʹa, ben sa wani taki gi a salfoe fikapisi foe „a getrow èn koni srafoe”? (Mateus 24:45) We, den ben sa moesoe doe moro nanga moro fajafaja wroko leki tjariman foe leti! Froewondroe sani ben o pasa! Wan wroko foe tjari sma kon na wán, di sma noiti ben si ete, ben o bigin.
2. Sortoe krin ben feni presi leki wan kontroe foe Maleaki 3:1-5?
2 Ma fosi a ben de fanowdoe foe meki den salfoe kresten disi kon krin. So leki Maleaki 3:1-5 ben taki na fesi, Jehovah Gado nanga en „boskopoeman foe a froebontoe”, Jesus Krestes, ben kon ini a bigin foe a jari 1918 foe ondrosoekoe a tempel na jeje fasi. A kroetoe ben sa bigin na „a oso foe Gado” (1 Petrus 4:17). Maleaki 3:3 ben taki na fesi: „En [Jehovah] moesoe sidon leki wan man di e soifri èn e krin a solfroe èn a moesoe krin den manpikin foe Leifi; èn a moesoe soifri den neleki gowtoe èn neleki solfroe.” A ben de wan ten foe e soifri èn e krin sani.
3. Foe san ede a ben de fanowdoe taki a krin na jeje fasi ben feni presi?
3 Foe di a fikapisi foe a srafoe-groepoe ben kisi a kroetoe disi, di ben abi en heimarki ini 1918, den ben kon krin foe grontapoe nanga relisi dotifasi. Foe san ede Jehovah ben krin den? Bika en tempel na jeje fasi ben de ini a tori. Disi na a seti leki di foe wan tempel foe e anbegi Jehovah tapoe gron foe a verzoen ofrandi foe Jesus Krestes. Jehovah ben wani taki en tempel ben moesoe de ini wan krin kondisi, so taki te den ben o tjari foeroe nomroe anbegiman nanga wan grontapoe howpoe kon drape, den ben kan feni wan presi pe sma ben e lespeki en universeel soevereiniteit, wan presi pe den e santa a nen foe en leki Gado, wan presi pe den e gi jesi na den regtfardiki wet foe en. So boen, den ben sa warderi Jehovah èn teki prati na a meki bekènti foe a gran prakseri foe en.
Den e kisi moro grani
4, 5. (a) Fa wan aksi di Jesus Krestes ben poti de wan tjalensi gi ibriwan sma foe a srafoe-groepoe ini a ten disi? (b) Na sortoe fasi wi kan froestan den wortoe „getrow èn koni srafoe” nanga „en oso-knekti”? (c) Sortoe wroko Jesus ben gi a srafoe?
4 Ini 1919 a srafoe-groepoe di ben kon krin, ben kan froewakti wroko di ala ten ben o kon moro bigi. Na a ten dati ini 1914, Jesus Krestes, a Masra foe den, ben kisi wan hemel Kownoekondre. Di a ben drai kon baka na den sma di de na ini en osofamiri foe ondrosoekoe ala den „oso-knekti” foe en, a ben weri wan djakti foe kownoe wartifasi, di a no ben abi di a ben de djaso na grontapoe. San a ben feni? A srafoe-groepoe ben e wroko na den afersi foe a Masra? So leki skrifi na Mateus 24:45-47, Jesus e poti wan aksi di de wan tjalensi gi ibriwan foe den salfoe disipel disi, foe go ondrosoekoe a gi di en e gi ensrefi na a Mesias foe Jehovah: „Soema de troetroe a getrow èn koni srafoe di en masra ben poti en tapoe den oso-knekti foe en, foe gi den njanjan na a reti ten? Kolokoe a srafoe dati de te en masra sa kon èn miti en e doe so. Foe troe mi e taigi oenoe, A sa poti en foe loekoe ala den goedoe foe en.”
5 A de krin taki a fasi fa Jesus ben taki foe a getrow srafoe no e fiti no wan aparti sma. Nôno, ma a e taki foe Krestes en heri getrow salfoe gemeente, leki wán groepoe. Den oso-knekti na den getrow salfoe bakaman foe Krestes, ibriwan aparti. Jesus ben sabi taki a ben o bai den salfoewan disi nanga en eigi broedoe, so boen na wan fasi di fiti a e sori go na den alamala makandra leki en srafoe. Wan Korentesma 7:23 e taki foe den: „OENOE [a e taki foe den alamala makandra] ben bai nanga wan prijs; tapoe foe tron srafoe foe libisma.” Jesus ben poti a srafoe-groepoe foe en foe meki den skèin a leti foe den foe hari sma, foe meki tra disipel èn foe gi den oso-knekti foe en njanjan ibritron pikinso-pikinso moro, foe di a e gi den den njanjan na jeje fasi, na a reti ten.
6. Fa a srafoe ben kisi pai leki wan bakapisi foe Jesus en wroko foe ondrosoekoe sani?
6 Sensi a ten di Jesus denoja bigin te kon miti 1918, a srafoe-groepoe, ala di den no ben pôpi èn den ben ondrofeni froefolgoe èn srefi wan pikinso broejafasi ben de, ben e proeberi foe gi den oso-knekti njanjan na a reti ten. Disi na san a Masra ben kon miti di a ben bigin nanga na ondrosoekoe-wroko foe en. Masra Jesus ben prisiri èn ini 1919 a ben froeklari a getrow srafoe-groepoe dati kolokoe. San a srafoe ben kisi leki prisiri paiman, foe di a ben doe san a Masra foe en ben poti en foe doe? Wan moro hei wroko! Ija, a srafoe ben kisi moro bigi frantiwortoe foe meki den goedoe foe en Masra kon moro foeroe. Foe di a Masra now ben de wan Kownoe na hemel, we, dan den grontapoe goedoe foe en ben kon kisi moro warti srefi.
7, 8. (a) San na ’ala den goedoe’ foe Masra? (b) San den e aksi foe a srafoe foe a kan teki a tiri tapoe den goedoe disi?
7 So boen, san na „ala den goedoe foe en”? Disi na ala den sani na jeje fasi di kon tron Krestes en eigi goedoe na grontapoe èn di abi foe doe nanga en makti leki Kownoe na hemel. Disi abi seiker na ini toe na ordroe foe meki disipel foe Krestes, nanga a bigi grani foe wroko leki sma di teki presi gi Gado Kownoekondre di opo gi ala den nâsi foe grontapoe.
8 So wan moro hei wroko foe loekoe den goedoe foe a Masra boen, ben e aksi taki a srafoe-groepoe gi moro ten nanga prakseri foe meki a Kownoekondre wroko doe èn, ija, foe meki moro pasi opo foe a wroko dati kon moro bigi. Now a ben abi wan moro bigi kontren foe wroko — a heri grontapoe pe libisma e libi.
Tjari den skapoe kon na wán
9. San ben de a bakapisi foe di a wroko foe a srafoe ben kon moro foeroe?
9 Foe di Krestes en getrow èn koni srafoe-groepoe ben e gi jesi meki den meki a wroko foe den kon moro bigi. San ben de a bakapisi? Den ben tjari den lastiwan foe den salfoe 144.000 kon na ini. Ne a fisjoen foe Johanes, so leki skrifi na Openbaring 7:9-17, ben tron wan troe sani di span èn di e waran na ati. Spesroetoe sensi 1935, a srafoe-groepoe njanboen foe en taki den ben de kotoigi foe a kontroe disi foe a fisjoen di den e tjari kon na krin doronomo. Foe ala sei foe grontapoe, „wan bigi ipi” foe miljoenmiljoen sma e kon now ini bigi groepoe makandra, na ini a kontren foe Jehovah en tempel na jeje fasi leki anbegiman foe en. Na engel foe Jehovah ben froeteri Johanes taki no wan man ben man foe taki o bigi a bigi ipi disi de. Dati wani taki no wan skotoe no poti gi a nomroe foe sma di a srafoe-groepoe sa tjari kon na Jehovah en tempel na jeje fasi. So langa a pasi opo, a wroko foe tjari den kon na ini sa go doro.
10. Nanga sortoe lobi wroko a srafoe kisi foe doe ini a ten disi?
10 A getrow srafoe-groepoe abi wan hebi frantiwortoe foe sorgoe gi a nomroe foe „tra skapoe” di e gro doronomo, ala di a sabi taki den agersi skapoe disi di komoto na ala nâsi, diri srefisrefi gi Masra, Jesus. Te joe e loekoe en boen, den na en ipi skapoe (Johanes 10:16; Tori foe den Apostel 20:28; 1 Petrus 5:2-4). So boen nanga lobi gi Masra èn gi den skapoe, a srafoe-groepoe e sorgoe nanga ala prisiri gi den sani di a bigi ipi abi fanowdoe na jeje fasi.
11-13. Sortoe wortoe di e fiti, a sma di ben de presidenti foe a Watch Tower Society a ten dati, ben taki ini a tori foe a wroko foe a srafoe?
11 Ija, a moro bigi pisi foe a wroko di a srafoe e doe foe tjari leti, na a tjari kon na wán foe den grontapoe borgroe disi foe Gado Kownoekondre. F. W. Franz, di na a ten dati ben de a presidenti foe a Waktitoren Genootschap, ben taki leti bifo en dede na ini december 1992, foe a wroko foe a getrow srafoe, di ala joeroe e gro moro nanga moro:
12 „Jesus Krestes ben gebroiki na organisâsi ala ten moro nanga moro na wan froewondroe fasi, so leki mi ben ondrofeni na ini ala den 99 jari foe mi libi. A no wan gewoon libisma e tiri na organisâsi, ma a moesoe de Masra Jesus Krestes. Bika a ben gro kon krinkrin moro bigi èn na so wan froewondroe fasi moro leki wi ben denki wan ten. Now wi abi wan organisâsi di kon moro bigi na heri grontapoe. A e wroko na a Noordsei afoepisi foe grontapoe èn na a Zuidsei afoepisi foe grontapoe, na owstoesei èn na westsei. Soso wán sma kan de frantiwortoe gi a gro disi di de wan froewondroe sani — a Manpikin foe Gado, di abi a frantiwortoe foe sorgoe gi a getrow èn koni srafoe-groepoe. A ben e doe den frantiwortoe foe en boen èn dati e froeklari a bigi gro di wi ben de kotoigi foe en.
13 A no wán libisma e doe na afersi. Wi abi wan organisâsi di de theokratis èn a e wroko na wan theokrasiafasi, na wan fasi di Gado e tiri. No wan libisma, no a sma srefi di poti a fondamenti foe a Watch Tower Bible and Tract Society, kan taki dati en abi a grani noso sma kan taki dati en abi a frantiwortoe foe san den ben doe na heri grontapoe. A sani disi moi kefarlek.” A no de so taki ala den sma di de foe a bigi ipi, e agri nanga den heri ati nanga den firi disi foe brada Franz di dede kaba? Ija, troetroe, den de grantangi srefisrefi gi den wroko, di e kon moro bigi èn di a getrow srafoe e doe.
Borgroe foe a Kownoekondre
14, 15. (a) San Jesus ben agersi ini na agersitori foe den talenti (Mateus 25:14-30)? (b) So leki fa a fiti, dan san e kon baka dati ini Mateus kapitel 25?
14 Ini Mateus kapitel 25, Jesus en agersitori foe den skapoe nanga den bokoboko e taki foe a bigi wroko disi foe tjari den grontapoe borgroe foe Gado Kownoekondre kon na wán. Ini na agersitori di e waka na en fesi, na agersitori foe den talenti, Jesus e prenki taki den salfoe disipel di e howpoe foe tiri nanga en ini en hemel Kownoekondre, moesoe wroko foe meki den grontapoe goedoe foe en kon moro foeroe. A ben fiti so boen srefisrefi taki ini a tra agersitori di e waka na baka a wan dati, Jesus e prenki san den e aksi foe den sma di wani tron borgroe foe a Kownoekondre foe en.
15 Loekoe san a e taki na Mateus 25:31-33: „Te a Manpikin foe libisma kon ini en glori èn ala den engel nanga en, dan a sa sidon na en glori kownoestoeroe tapoe. Èn ala den nâsi sa kon makandra na en fesi èn a sa prati den sma foe makandra neleki fa wan skapoeman e prati den skapoe foe den bokoboko. Èn a sa poti den skapoe na en reti anoe, ma den bokoboko na en kroektoe anoe.”
16. Fa den e tjari den nâsi kon na wán èn fa den e prati a pipel?
16 Jesus ben doro ini en glori ini 1914. Di a ben bigin feti, dan en nanga ala den engel foe en, ben opo go feti nanga den ogri jeje feanti foe en èn a ben trowe den komoto na hemel. San e kon now na ini en agersitori e jepi wi foe froestan taki a sidon di Jesus e sidon tapoe wan glori kownoestoeroe, e prenki wan situwâsi foe kroetoe ini a ten foe en denoja. A tjari kon na wán foe ala den nâsi na en fesi, wani taki dati Jesus e handri nanga den nâsi leki na ipi foe en di a e froewakti foe abi, te joe e taki en na agersifasi. A de wan ipi pe skapoe nanga bokoboko moksi. Ala di a kan teki wan pisi foe wan dei foe prati den skapoe foe den bokoboko ini wan troetroe ipi, a prati foe sma di de fri foe teki san de reti noso san de fowtoe èn di e feni presi na heri grontapoe, e teki moro langa. Disi de so foe di den e prati den tapoe gron foe a fasi fa ibri sma aparti e tjari ensrefi.
17. Foe san ede a situwâsi ini a ten disi de serjoesoe gi ala pipel?
17 Ini na agersitori, a Skapoeman-Kownoe e poti den agersi skapoe na en leti-anoe èn den agersi bokoboko na en kroektoe-anoe. A e kon krin taki a leti-anoesei na wan kroetoe nanga wan boen bakapisi — têgo libi. A kroektoe-anoesei e prenki wan kroetoe nanga wan takroe bakapisi — a di foe têgo pori. A bosroiti di a Kownoe e teki ini a tori disi abi serjoesoe bakapisi.
18. Foe san ede a si di sma no man si a Kownoe no kan de wan pardon gi no wan sma?
18 A si di wi no man si a kownoe Manpikin foe libisma nanga wi ai, ini a ten foe en denoja noso pa·rou·siʹa, no e gi no wan sma pardon. Moro nanga moro agersi skapoe e go moksi densrefi makandra nanga a srafoe-groepoe foe preiki a boen njoensoe foe Gado Kownoekondre na heri grontapoe èn foe meki a leti foe den skèin. Foe troe, a kotoigiwroko foe den doro ala den farawe pisi foe grontapoe. — Mateus 24:14
19. Sortoe eigifasi foe a skapoe-groepoe den e prenki ini na agersitori foe den skapoe nanga den bokoboko?
19 Foe san ede a Skapoeman-Kownoe e pai denwan foe a skapoe-groepoe nanga wan blesi tamara? Bika den e horibaka nanga den heri ati gi a Kownoekondre preikiwroko èn a switifasi di den e sori gi den salfoe brada foe en, san Jesus e si leki den doe disi gi ensrefi. Foe dati ede a kownoe Manpikin foe libisma e taigi den: „Kon, oenoe di ben kisi a blesi foe mi Tata, teki leki famiri-goedoe a kownoekondre di ben sreka gi oenoe sensi grontapoe ben e bigin seti.” — Mateus 25:34; 28:19, 20.
Jepi a Kownoe
20, 21. Sortoe boeweisi den skapoe e gi taki den e tanapoe na a sei foe a Kownoekondre?
20 Loekoe taki te a Kownoe e gi den skapoe disi wan kari foe teki a grontapoe kontren foe Gado Kownoekondre, den e sori taki den e froewondroe. Den e aksi en: ’Masra, oten wi ben doe ala den sani disi gi joe?’ A e piki: „Troetroe, mi e taigi oenoe: Foe so fara oenoe doe dati gi wan foe den mofinawan foe den brada disi foe mi, dan na gi mi oenoe doe dati” (Mateus 25:40). Di Jesus ben sori ensrefi na Maria Magdalena na a dei foe en opobaka, a ben taki foe den brada foe en na jeje fasi di a ben taigi en: „Go na den brada foe mi” (Johanes 20:17). Na a ten foe en denoja di wi no man si nanga wi ai, Jesus abi soso wan pikin fikapisi foe en 144.000 brada na jeje fasi di de na libi ete na grontapoe.
21 Foe di sma ai no man si Jesus na hemel, meki a no de langalanga so taki agersi skapoe e doe den lobi sani disi gi en. Den e si en tapoe en kownoestoeroe soso nanga den ai foe bribi. Jesus e warderi ala den moeiti di den e doe foe asisteri den brada foe en na jeje fasi, di sa tron den hemel kompe-erfgenaam foe en. San den ben doe gi den brada foe en, a e si neleki den ben doe disi gi ensrefi. Den agersi skapoe e prakseri boen fosi den ben doe boen na den brada foe Krestes, bika den e erken taki den na en brada. Den e froestan taki Jesus en brada na jeje fasi na sma di e teki presi gi a Kownoekondre foe Jehovah èn den wani foe gi krin boeweisi taki den e teki a sei foe a Kownoekondre dati makandra nanga den.
22. Fa a skapoe groepoe e kisi pai? (Teki gersi Openbaring 7:14-17.)
22 Jehovah ben taki na fesi taki a groepoe agersi skapoe disi sa de foe si na a ten disi foe a denoja foe en Manpikin. Jehovah abi wan blesi paiman foe gi den! A bigi ipi sa kisi den blesi foe vrede djaso na grontapoe ondro a prisiri Doesoen Jari Tiri foe Jehovah en Kownoe, Jesus Krestes.
23. Na sortoe fasi den skapoe sabi taki den e jepi den brada foe a Kownoe?
23 Te wi e poti prakseri na tapoe bijbel profeititori di abi foe doe nanga a ten foe Krestes denoja, makandra nanga Jesus agersitori foe den skapoe nanga bokoboko, dan san wi e si? Disi: A no de so taki wan sma e tron wan skapoe di abi wan regtfardiki posisi na fesi Gado nanga en Kownoe, foe di a sma no sabi fa sani de èn e doe boen sondro wan reide na wan foe den brada na jeje fasi, foe a Kownoe. Den sma foe a skapoe-groepoe sabi san den e doe, ala di den no e si a Kownoe di e tiri, nanga den troetroe ai. Den e doe moeiti foe jepi den brada foe a Kownoe no soso na skin fasi, ma so srefi na wan jeje fasi. Fa? Foe di den e asisteri den ini a preiki foe a boen njoensoe foe a Kownoekondre foe Gado èn ini a hori foe bijbelstudie foe meki disipel gi Krestes. So boen, ini a ten disi moro leki fo miljoen tjariman foe leti de di e meki a Kownoekondre foe Gado bekènti.
Wroko di e kon moro bigi
24. Sortoe lobi wroko ben meki a srafoe-groepoe kon de den moro kolokoe sma na grontapoe ini a ten disi?
24 Meki wi go loekoe den foeroe moi wroko baka, foe a getrow srafoe-groepoe. Na a fosi presi, den ben poti a srafoe-groepoe na tapoe ala den goedoe foe a Masra — den Kownoekondre afersi foe en na grontapoe — èn den goedoe disi e tan kon moro nanga moro. Na a di foe toe presi, a groepoe dati e gi njanjan na jeje fasi no wawan na den salfoe oso-knekti, ma na a bigi ipi toe di e tan gro kon moro bigi nomonomo. Na a di foe dri presi, a srafoe-groepoe e teki fesi ini a panja di den e panja a Kownoekondre leti. Na a di foe fo presi, pe a wroko di a srafoe e doe e gro moro foeroe, de ini a tjari kon na wán foe a bigi ipi foe den tra skapoe, foe tjari den kon na Jehovah tempel na jeje fasi. Na a di foe feifi presi, a srafoe-groepoe, makandra nanga den agersi skapoe, di e horibaka gi den nanga den heri ati, e sorgoe taki moro bigi presi e meki foe orga bijkantoro-wroko a heri grontapoe lontoe, so srefi na den ede kantoro na Amerkankondre. Den sortoe lobi wroko disi meki taki a srafoe-groepoe de a moro kolokoe pipel na grontapoe ini a ten disi èn den meki miljoenmiljoen tra sma kolokoe toe. Ala den sma disi e taki tangi na Jehovah Gado nanga Jesus Krestes, di ben tiri a getrow srafoe en wroko di e kon moro bigi!
25. Fa den skapoe kan go doro foe horibaka gi a srafoe-groepoe, nanga sortoe froewakti na den fesi?
25 A srafoe-groepoe e wroko now moro tranga leki wan ten na fesi na den wroko di Gado ben gi den foe doe. A ten di tan abra bifo a „bigi banawtoe” broko loesoe, pikinmoro a pasa! (Mateus 24:21) O prenspari a de, taki den sma di de skapoe foe Gado tan na a reti sei foe boen foe en Skapoeman-Kownoe! So boen dan, meki ala sma go doro fajafaja foe horibaka gi a getrow èn koni srafoe. Soso te wi e doe so, dan wan dei di no de fara, ala agersi skapoe sa man foe jere den kolokoe wortoe dati: „Kon, oenoe di ben kisi blesi foe mi Tata, teki leki famiri-goedoe a kownoekondre di den ben sreka gi oenoe foe sensi grontapoe ben bigin seti.”
Joe kan gi wan piki?
◻ Sortoe fosi kroetoe ben kon baka di den ben poti a Kownoe na tapoe a kownoestoeroe?
◻ Fa Mateus 24:45-47 ben abi wan disiten kontroe?
◻ Gi sortoe wroko di e kon moro bigi, a srafoe-groepoe nanga a bigi ipi de grantangi srefisrefi?
◻ Fa Mateus 25:34-40 e kon troe na a ten foe a pa·rou·siʹa?
[Prenki na tapoe bladzijde 13]
Masra e froetrow ala den goedoe foe en na a getrow srafoe
[Prenki na tapoe bladzijde 15]
Jesus go sidon na tapoe en glori kownoestoeroe foe kroetoe a libisma famiri