A kresten osofamiri e jepi den owroesma
„No trowe mi na mi owroedei; no gowe libi mi joisti te mi krakti e gowe libi mi.” — PSALM 71:9.
1. Fa sma ini foeroe koeltoeroe e handri nanga owroesma?
„ONDROSOEKOE e sori taki pikinmoro siksi foe den seibi (86%) owroesma di trawan e meshandri, na den eigi famiri di e handri takroe nanga den”, The Wall Street Journal ben taki. A tijdschrift Modern Maturity ben taki: „A meshandri di den e meshandri owroesma na soso a moro njoen fasi foe [ogridoe ini osofamiri], di sma fosi no ben taki foe en so, èn now a kon so fara taki sma kan leisi foe en na ini den njoensoe koranti foe Verenigde Staten foe Amerkankondre.” Ija, den owroesma ini foeroe koeltoeroe ben tron sma di trawan e meshandri na wan ogri fasi èn di den no e sorgoe boen gi den. A ten foe wi na troetroe wan ten pe foeroe sma de „di lobi densrefi, . . . de sondro tangi, de deloyaal, èn no abi wan troetroe lobi”. — 2 Timoteus 3:1-3.
2. Fa Jehovah e si owroesma, so leki fa den Hebrew Boekoe foe bijbel e sori?
2 Ma tokoe, dati a no a fasi fa den ben moesoe handri nanga owroesma ini Israèl foe owroeten. A wet ben taki: „Gi greisi wiwiri oenoe moesoe opo tanapoe, èn oenoe moesoe sori taki oenoe e hori na owroe man na prakseri èn oenoe moesoe abi frede gi oen Gado. Mi na Jehovah.” A boekoe di abi koni odo èn di skrifi nanga jepi foe santa jeje, e gi wi a rai: „Arki joe papa di ben meki joe geborte kon èn no wisiwasi joe mama soso foe di a kon owroe.” A e gi a komando: „Arki, mi manpikin, a tranga leri foe joe papa, èn no libi a wet foe joe mama.” A wet foe Moses ben leri sma foe abi lespeki gi owroesma, man so boen leki oema, èn foe hori den na prakseri. A de krin taki Jehovah wani taki sma moesoe gi grani na den owroesma. — Levitikus 19:32; Odo 1:8; 23:22.
Sorgoe gi den owroesma ini bijbel ten
3. Fa Josef ben sori sari-ati gi en owroe papa?
3 Den ben moesoe sori lespeki no soso nanga wortoe, ma nanga doe foe switifasi toe. Josef ben sori troetroe sari-ati gi en owroe papa. A ben wani foe Jakob meki a rèis foe Kanan go na Egipti, wan pasi di ben langa moro leki 300 kilometer. Foe dati ede Josef ben seni gi Jakob „tin boeriki di ben tjari boen sani foe Egipti èn tin oema-boeriki di ben tjari tarwe nanga brede èn sani foe sorgoe gi en papa te a ben sa de na pasi”. Di Jakob ben doro na Gosen, Josef ben go na en èn „wantewante a ben fadon na en neki èn en watra-ai ben lon fadon na en neki, ibritron baka”. Josef ben lai en papa pasa marki nanga dipi firi foe lobi. Fa dati na wan toemoesi moi eksempre foe a lobi di wan sma abi gi owroesma! — Genesis 45:23; 46:5, 29.
4. Foe san ede Rut na wan moi eksempre foe waka na en baka?
4 Wan tra moi model di wi kan waka na dati baka ini a tori foe switifasi gi owroesma, na Rut. Ala di a ben de wan heidensma, a ben tan krosibei foe Naomi, en man-mama, wan owroe djoe, di ben de wan weduwe. A ben gowe libi en eigi pipel èn ben teki a tjans foe no ben feni wan tra masra. Di Naomi ben gi Rut a deki-ati foe drai go baka na en eigi pipel, a ben piki nanga wan toe foe den moro moi wortoe di de foe feni ini bijbel: „No tan begi mi foe libi joe, foe drai baka foe no waka moro nanga joe; bikasi pe joe e go, mi sa go èn pe joe e pasa a neti, mi sa pasa a neti. Joe pipel sa de mi pipel èn joe Gado, sa de mi Gado. Pe joe e dede, mi sa dede èn drape den sa beri mi. Meki Jehovah doe so nanga mi èn poti moro na tapoe, efoe wan tra sani boiti dede ben sa tjari wan prati kon na mindri mi nanga joe” (Rut 1:16, 17). Rut ben sori boen eigifasi toe di a ben wani trow nanga na owroe Boas, akroederi a seti foe a swagritrow. — Rut, kapitel 2 te nanga 4.
5. Sortoe eigifasi Jesus ben sori ini a handri di a ben handri nanga sma?
5 Jesus ben gi so wan sortoe eksempre ini a fasi fa a ben handri nanga sma. A ben abi pasensi, sari-atifasi, switifasi èn a ben e gi sma kowroe-ati. A ben abi persoonlijk belangstelling gi wan pôti man di ben malengri èn di 38 jari langa no ben man waka èn Jesus ben meki a kon betre. A ben sori taki a ben hori den weduwe na prakseri (Lukas 7:11-15; Johanes 5:1-9). Srefi di a ben abi hebi banawtoe foe a hati dede foe en na a pina-oedoe, a ben sorgoe taki sma ben sa loekoe en mama, di ben de ini a bigin foe en 50 jari. Gi ala sma, boiti gi den hoigri feanti foe en, Jesus ben de wan kompe di ben e gi ibriwan sma kowroe-ati. Foe dati ede a ben kan taki: „Kon na mi, oenoe alamala di e wroko tranga èn di abi hebi lai èn oenoe sa feni kowroe-ati. Teki mi tjatjari na oen tapoe èn leri foe mi, bika mi abi safrifasi èn sakafasi foe ati èn oenoe sa feni kowroe-ati gi oen sili.” — Mateus 9:36; 11:28, 29; Johanes 19:25-27.
Soema e froedini en foe sma hori den na prakseri?
6. (a) Soema e froedini foe kisi spesroetoe sorgoe? (b) Sortoe aksi wi kan poti gi wisrefi?
6 Foe di Jehovah Gado nanga en Manpikin, Jesus Krestes, ben gi so boen eksempre ini na afersi foe sorgoe gi sma, dan a de soso wan joisti sani taki kresten di gi densrefi abra, e waka baka a model foe den. Na wi mindri wi abi wan toe sma di ben wroko tranga èn di ben abi hebi lai foeroe jari langa — owroe brada nanga sisa di doro den lasti jari foe a libi foe den. Wan toe foe den de wi papa nanga mama noso wi granpapa nanga granmama kande. Wi e si den leki wan soso sani? Wi e wisiwasi den? Noso wi e warderi den foeroe ondrofeni èn koni foe den troetroe? A troe taki wan toe foe den e tesi a pasensi foe wi kande nanga den freimde eigifasi èn swakifasi di no de wan ongewoon sani gi owroe sma. Ma aksi joesrefi: ’Efoe mi ben de na ini densrefi omstandigheid dati, mi ben sa de tra fasi leki den?’
7. San e agersi a fanowdoe foe abi pasensi nanga owroesma?
7 Wan tori de foe a Mindri-Owstoe, di e naki sma ati, foe a sari-atifasi di wan jongoe oemapikin ben abi gi den owroesma. Wan granmama ben jepi ini koekroe èn sondro espresi wan posren preti fadon foe en anoe èn a broko. A granmama ben sari taki a no ben man doe wan sani boen; ma na oemapikin foe en ben atibron moro srefi. Ne na oemapikin foe en kari en eigi jongoe oemapikin èn ben seni en go na wan wenkri foe a presi dati, foe go bai gi a granmama wan oedoe preti di no man broko. Na oemapikin ben kon baka nanga toe oedoe preti. En mama ben aksi en: „Foe san ede joe bai toe preti?” Ala di a granpikin ben draidrai, a ben piki: „Wán preti na gi granmama èn a trawan na gi joe te joe kon owroe.” Ija, ini a grontapoe disi, wi alamala abi na wi fesi taki wi sa kon owroe wan dei. Wi no ben sa warderi en te sma ben sa handri nanga wi nanga pasensi èn switifasi? — Psalm 71:9.
8, 9. (a) Fa wi moesoe handri nanga den owroesma di de na wi mindri? (b) Sortoe sani wan toe foe den sma di no so langa pasa ben tron kresten, moesoe hori na prakseri?
8 No frigiti noiti taki foeroe foe den owroe brada nanga sisa foe wi abi kaba wan historia foe wan langa pisi ten foe getrow kresten aktiviteit. Foe troe, den e froedini a grani foe wi èn taki wi hori den na prakseri, a jepi èn deki-ati di wi e gi den na wan switifasi. A koni man ben taki heri boen: „Greisi wiwiri de wan kownoe-ati foe moi fasi te a de foe feni na tapoe a pasi foe regtfardikifasi.” Èn na ede dati nanga greisi wiwiri, efoe a de foe wan man noso wan oema, moesoe kisi lespeki. Wan toe foe den owroe mansma nanga oemasma disi e dini ete leki getrow pionier èn foeroe mansma e go doro foe dini na wan getrow fasi leki owroeman ini den gemeente; wan toe foe den de wan eksempre ini a wroko di den e doe leki opziener di e rèis. — Odo 16:31.
9 Paulus ben gi Timoteus a rai: „No krasi wan owroe man. Ma handri nanga en leki wan papa, jongoe man leki brada, owroe oema leki mama, jongoe oema leki sisa nanga ala krinfasi” (1 Timoteus 5:1, 2). Den sma di no so langa ben komoto na a grontapoe di no abi lespeki, kon na ini a kresten gemeente, spesroetoe moesoe prakseri boen foe den wortoe foe Paulus, di abi den gron na tapoe lobi. Jongoewan, no waka na baka a takroe fasi fa sma e tjari densrefi, di joe ben si kande na skoro. No trowe a rai di Kotoigi, di moro owroe moro joe, e gi na wan switifasi (1 Korentesma 13:4-8; Hebrewsma 12:5, 6, 11). Ma te wan owroesma abi jepi fanowdoe foe di a no abi wan boen gosontoe noso a abi problema na monisei, soema abi a fosi frantiwortoe foe jepi den?
A ròl foe na osofamiri foe sorgoe den owroesma
10, 11. (a) Soema moesoe teki fesi ini a sorgoe gi den owroesma, so leki fa bijbel e sori? (b) Foe san ede a no makriki ala ten foe sorgoe gi den owroesma?
10 Ini a fosi kresten gemeente, problema ben kon ini a tori foe a sorgoe di den ben moesoe sorgoe gi weduwe. Fa na apostel Paulus ben sori taki den ben moesoe lekti den nowtoe dati? „Gi grani na weduwe di de troetroe weduwe. Ma efoe wan weduwe abi pikin noso granpikin, meki den dati leri fosi foe sori taki den gi densrefi na a dini foe Gado ini den eigi oso èn foe den tan pai wan paiman di fiti den papa nanga mama èn granpapa nanga granmama, bikasi disi de boen na Gado ai. Foe troe, efoe wan sma no e sorgoe gi den sma foe en èn spesroetoe gi den sma di de memre foe en osofamiri, dan nanga dati a drai en baka gi a bribi èn a de moro takroe leki wan sma di no de na bribi.” — 1 Timoteus 5:3, 4, 8.
11 Ini ten foe nowtoe, krosibei osofamiri memre moesoe de den fosiwan di e jepi den owroe sma.a Na a fasi disi, pikin di kon bigi, kan sori warderi gi den jari foe lobi, wroko nanga sorgoe di a papa nanga mama foe den ben gi den. Disi no sa de makriki kande. Te sma e kon owroe, dan foe densrefi den no man go so esi moro èn wan toe foe den no man jepi densrefi moro. Trawan e wani sma poti ala prakseri na den tapoe nomo èn den e dwengi, kande sondro foe sabi dati. Ma di wi ben de beibi, a no ben de so taki wi ben wani sma moesoe poti ala prakseri na wi tapoe nomo èn wi no ben dwengi toe? Èn a papa nanga mama foe wi no ben de klariklari foe jepi wi? Now di den kon owroe, sani kon kenki. San de fanowdoe foe dati ede? Sari-ati nanga pasensi. — Teki gersi 1 Tesalonikasma 2:7, 8.
12. Sortoe eigifasi de fanowdoe foe sorgoe gi den owroesma — èn ala tra sma ini a kresten gemeente?
12 Na apostel Paulus ben gi praktis rai di a ben skrifi: „So srefi, leki sma di Gado teki poeroe na mindri trawan, santa èn lobi, weri gi oensrefi safoe lobifasi foe sari-atifasi, boen-atifasi, sakafasi foe jeje, safri-atifasi nanga langa pasensi. Tan froedrage makandra èn gi makandra pardon na wan frifasi te a wan abi wan sani foe kragi foe a trawan. So leki fa Jehovah gi oenoe pardon na wan fri fasi, na so oenoe moesoe doe toe. Ma weri gi oensrefi na ala den sani disi, lobi, foe di a de wan volmaakti banti foe wánfasi.” Efoe wi de froeplekti foe sori a sortoe sari-atifasi èn lobi disi ini a gemeente, dan wi no moesoe sori dati srefi moro ini a famiri? — Kolosesma 3:12-14.
13. Soema, boiti owroe papa nanga mama noso granpapa nanga granmama, sa kan abi jepi fanowdoe?
13 Sontron a no soso papa nanga mama noso granpapa nanga granmama kan abi a jepi disi fanowdoe, ma tra owroe famiriman toe. Son owroesma di no abi pikin, ben dini foeroe jari ini a zendingwroko, ini a diniwroko foe rèis èn tra foeroeten wroko. Na wan opregtifasi den ben poti a Kownoekondre na a fosi presi den heri libi langa (Mateus 6:33). A no ben sa de joisti foe dati ede, foe sori den wan jeje foe lobi? Foe troe, wi abi wan boen eksempre ini a fasi fa a Waktitoren Genootschap e sorgoe gi owroe memre foe a Bethelfamiri. Na a Bethel edekantoro na Brooklyn èn na wan toe bijkantoro foe a Genootschap, memre foe a Bethelfamiri di den leri a wroko foe sorgoe gi owroesma èn di kisi a toewijzing foe doe disi, e poti prakseri ala dei na tapoe difrenti owroe brada nanga sisa. Den breiti foe sorgoe gi den owroesma disi, neleki den na den eigi papa nanga mama noso granpapa nanga granmama. Na a srefi joeroe, den e leri foeroe foe na ondrofeni foe den owroesma. — Odo 22:17.
A ròl foe a gemeente ini a tori foe a sorgoe gi sma
14. Sortoe sani ben seti gi den owroesma ini a fosi kresten gemeente?
14 Foeroe kondre ini a ten disi abi wan sistema foe oso pe owroesma kan tan, so boen leki a sorgoe di lanti e sorgoe taki owroesma e kisi datra jepi. Kresten kan meki wan boen gebroiki foe den seti disi, pe den man doe dati. Ma ini a fosi jarihondro, den sortoe seti dati no ben de. Foe dati ede a kresten gemeente ben doe wan sani foe jepi den pôti weduwe. Paulus ben gi tiri: „Poti wan weduwe, di no moro jongoe leki siksitenti jari, tapoe a lijst [foe a gemeente jepi en], a wefi foe wán masra, di den e gi kotoigi foe den boen wroko foe en, efoe a ben kweki pikin, efoe a ben teki freimdesma na en oso, efoe a ben wasi den foetoe foe den santawan, efoe a ben gi jepi na den sma di ben de ini banawtoe, efoe a ben doe ibri boen wroko nanga faja.” So boen, Paulus ben sori taki a gemeente abi wan ròl toe foe jepi den owroesma. Oemasma di abi jeje eigifasi èn di no ben abi pikin di de na bribi, ben kan kisi a jepi dati. — 1 Timoteus 5:9, 10.
15. Foe san ede jepi sa kan de fanowdoe, so taki den kan kisi a jepi foe lanti?
15 Ini kondre pe lanti seti sani foe owroesma kan kisi jepi, a wani taki nofotron taki papirawroko de foe doe, san kande kan gersi leki a e meki sma e lasi-ati. Ini den sortoe kefal dati a fiti, taki den opziener ini a gemeente seti sani foe gi jepi, so taki den owroesma kan aksi foe a jepi dati foe lanti, den kan go teki den moni noso aksi srefi foe kisi moro jepi. Sontron omstandigheid di kenki kan meki taki a pensjoen moni kren. Ma foeroe tra praktis sani de toe di den opziener kan orga, foe sorgoe gi den owroesma. San na wan toe foe den sani disi?
16, 17. Na sortoe difrenti fasi wi kan sori a lobi foe teki den owroesma ini a gemeente na wi oso?
16 A sori foe lobi foe teki sma na oso, na wan gwenti di ben de kaba na bijbel ten. Te na a dei foe tide ini foeroe Mindri-Owstoe kondre, sma lobi foe teki freimdesma na den oso, awansi na soso foe gi den wan kopi te noso kofi. Foe dati ede a no de foe froewondroe taki Paulus ben skrifi: „Prati afoe nanga den santawan akroederi san den abi fanowdoe. Waka a pasi foe lobi foe teki sma na oso” (Romesma 12:13). A Griki wortoe gi lobi foe teki sma na oso, phi·lo·xe·niʹa, troetroe wani taki „lobi gi (abi wan waran firi gi noso switifasi gi) freimdesma”. Efoe a kresten moesoe lobi foe teki freimdesma na en oso, a no moesoe lobi srefi moro foe teki den sma na en oso di de brada noso sisa foe en ini a bribi? Nofotron a de wan prisiri kenki ini na aladei libi foe wan owroe sma, te a e kisi wan kari foe kon njan nanga trawan. Efoe joe wani foe jere koni wortoe nanga ondrofenitori te joe abi wan prisiri demakandra, dan kari den owroesma toe. — Teki gersi Lukas 14:12-14.
17 Foeroe fasi de foe kan gi owroesma deki-ati. Efoe wi e go leki wán groepoe makandra ini wan oto na a Kownoekondrezaal noso na wan bigi konmakandra, dan wan toe owroesma de di ben sa lobi foe go makandra nanga wi? No wakti te den kon aksi. Aksi den foe tjari den nanga joe. Wan tra praktis jepi na foe go bai sani gi den. Noso efoe den man, dan kande wi kan teki den makandra nanga wi te wi e go bai sani? Ma sorgoe taki presi de pe den kan rostoe èn kowroe densrefi te dati ben sa de fanowdoe. Sondro misi joe sa moesoe abi pasensi nanga switifasi, ma a troetroe tangi foe wan owroe sma, kan de wan moi pai. — 2 Korentesma 1:11.
Wan moi wini gi a gemeente
18. Foe san ede den owroesma de wan blesi gi a gemeente?
18 Fa a de wan blesi foe si wan toe sma di abi greisi nanga weti wiwiri (sma toe di den ede piri foe di den owroe) ini a gemeente! A wani taki dati na mindri a jongoefasi nanga krakti foe den jongoesma, wi abi wan pikinso koni nanga ondrofeni toe — wan troetroe wini gi ibri gemeente. A sabi foe den de leki kowroe watra di sma moesoe go kisi foe wan peti. A de neleki fa Odo 18:4 e taki en: „Den wortoe foe a mofo foe wan man na dipi watra. A peti foe koni na wan liba di e koekoe kon na tapoe.” Fa a de wan deki-ati gi owroesma te den e firi taki wi wani den èn wi e warderi den! — Teki gersi Psalm 92:14.
19. Fa wan toe sma ben òfer densrefi gi na owroe papa nanga mama foe den?
19 Wan toe sma ini a foeroeten diniwroko ben feni en fanowdoe foe libi san ben de grani gi den, so taki den ben man drai go baka na oso foe sorgoe gi owroe, siki papa nanga mama. Den ben òfer densrefi gi denwan di fosi ben òfer densrefi gi den. Wan trowpaar, di fosi ben de zendeling èn di de ete ini a foeroeten diniwroko, ben drai go baka na oso foe sorgoe gi den owroe papa nanga mama foe den. Disi den doe moro leki 20 jari. Fo jari pasa kaba a mama foe a man ben moesoe go na wan oso pe den e sorgoe owroesma. Ibri dei a masra, di abi moro leki 60 jari now, e go fisiti en mama di abi 93 jari. A e tjari kon na krin: „Fa mi ben kan libi en? Na mi mama!” Ini tra kefal gemeente nanga aparti sma ben gi densrefi na wan friwani fasi èn ben aksi foe loekoe den owroesma, so taki den pikin foe den ben kan tan ini a toewijzing foe den. So wan lobi, di no e prakseri ensrefi nomo, warti foe kisi bigi prèise toe. Ibri situwâsi moesoe handri na wan serjoesoe fasi, bika wi no moesoe poti den owroesma na wan sei. Sori taki joe lobi na owroe papa nanga mama foe joe. — Exodus 20:12; Efeisesma 6:2, 3.
20. Sortoe eksempre Jehovah ben gi wi ini a sorgoe gi den owroesma?
20 Ija, wi owroe brada nanga sisa na a kownoe-ati foe moifasi gi wan famiri noso wan gemeente. Jehovah ben taki: „Srefi te na a owroe dei foe wan sma mi de a srefi Sma; èn te na a greisi wiwiri foe wan sma misrefi sa tan tjari hebi lai. Misrefi sa opo handri foe troe, so taki misrefi kan tjari èn so taki misrefi kan tjari hebi lai èn so taki misrefi kan tjari fri kon.” Meki wi sori a srefi pasensi èn lobi gi den owroe brada nanga sisa foe wi ini a kresten famiri. — Jesaja 46:4; Odo 16:31.
[Foetoewortoe]
a Gi moro rai ini a tori foe san osofamiri memre kan doe foe jepi den owroesma, loekoe A Waktitoren foe 1 juni 1987, bladzijde 6-10.
Joe e memre disi ete?
◻ Sortoe eksempre foe bijbel wi abi foe a sorgoe gi den owroesma?
◻ Fa wi moesoe handri nanga den owroesma?
◻ Fa osofamiri memre kan sorgoe gi den lobi owroesma foe den?
◻ San a gemeente kan doe foe jepi den owroesma?
◻ Foe san ede den owroesma na wan blesi gi wi alamala?
[Prenki na tapoe bladzijde 19]
Rut ben sori owroe Naomi switifasi nanga lespeki
[Prenki na tapoe bladzijde 20]
Den owroesma de warti memre foe a gemeente