Den profeiti dei foe Danièl èn a bribi foe wi
„Kolokoe a sma de di e tan froewakti èn di e doro den wan doesoen dri hondro dritenti na feifi dei!” — DANIÈL 12:12.
1. Foe san ede someni sma no man feni troetroe kolokoe èn nanga sortoe sani den poti troe kolokoe?
ALA sma wani de kolokoe. Ma ini a ten disi a no foeroe sma de kolokoe. Foe san ede? Afoe foe di moro foeroe sma e soekoe kolokoe na den fowtoe presi. Den e soekoe kolokoe na ini den sortoe sani leki a teki foe leri, goedoe, wan libiwroko noso a feti di den e feti foe kisi makti. Ma na a bigin foe en Bergipreiki, Jesus ben poti kolokoe nanga a sabi di wan sma sabi krinkrin taki a abi sani fanowdoe na jeje fasi, sari-ati, soifrifasi foe ati, èn den sortoe eigifasi dati (Mateus 5:3-10). A sortoe kolokoe di Jesus ben taki foe en, na wan troe sani èn a e tan.
2. San ben sa meki kolokoe kon ini a ten foe a kaba, so leki profeititori e taki, èn sortoe aksi e kon ini a tori disi?
2 Gi a salfoe fikapisi ini a ten foe a kaba, kolokoe abi foe doe nanga ete wan tra sani. Ini a boekoe Danièl wi e leisi: „Go, Danièl, bika den wortoe e tan kibri èn wan lakstampoe de na den tapoe te na a ten foe a kaba. Kolokoe a sma de di e tan froewakti èn di e doro den wan doesoen dri hondro dritenti na feifi dei!” (Danièl 12:9, 12) San na a pisi ten foe den 1335 dei disi? Foe san ede den sma di ben pasa den dei dati, ben de kolokoe? Disi abi wan sani foe doe nanga a bribi foe wi ini a ten disi? Wi e kisi jepi foe piki den aksi disi, te wi e go baka na a ten di Danièl ben skrifi den wortoe disi, sjatoe baka di Israèl ben kon fri foe a katibo na ini Babilon èn ini a di foe dri jari foe Cirus, a kownoe foe Persia. — Danièl 10:1.
Wan poti kon boen baka e tjari kolokoe kon
3. Sortoe sani di kownoe Cirus ben doe, ben tjari troetroe kolokoe gi den getrow djoe ini 537 bifo Gewoon Teri, ma sortoe grani Cirus no ben gi den djoe?
3 Gi den djoe, a kon fri foe den foe Babilon ben de wan troetroe prisiri okasi. Baka di den djoe ben horidoro na ini katibo pikinmoro 70 jari, Cirus a Bigiwan ben gi den wan kari foe drai go baka na Jerusalem foe bow a tempel foe Jehovah baka (Esra 1:1, 2). Den wan di ben doe wan sani na tapoe a kari dati, ben bigin nanga a waka foe den nanga bigi froewakti, èn den ben e doro na ini den eigi kondre ini 537 bifo Gewoon Teri. Ma Cirus no ben gi den wan kari foe opo wan kownoekondre baka na ondro a tiri foe wan bakapikin foe kownoe David.
4, 5. (a) Oten den ben trowe a kownoekondre foe David? Foe san ede? (b) Sortoe djaranti Jehovah ben gi taki a kownoekondre foe David ben sa poti baka?
4 Dati ben de wan prenspari sani. So wan feifi jarihondro na fesi, Jehovah ben pramisi David: „Joe oso èn joe kownoekondre seiker sa de na joe fesi te ten di no abi marki; ija, joe kownoestoeroe sa tron wan di sa poti steifi te ten di no abi marki” (2 Samuèl 7:16). A de wan sari, taki moro foeroe foe den kownoe bakapikin foe David ben opo densrefi kontrari makti èn a broedoe-paiman foe a nâsi ben kon so foeroe, taki ini 607 bifo Gewoon Teri, Jehovah ben gi pasi taki den ben trowe a kownoekondre foe David. Boiti wan sjatoe pisi ten di den ben de na ondro a tiri foe den Makabeisma, Jerusalem ben de na ondro a tiri foe freimde tirimakti foe sensi a ten dati, te leki a di foe toe pori foe en ini 70 Gewoon Teri. So boen, ini 537 bifo Gewoon Teri, „den fasti ten foe den nâsi”, a ten di no wan manpikin foe David ben sa tiri leki kownoe, ben bigin. — Lukas 21:24.
5 Ma tokoe, Jehovah no ben frigiti a pramisi foe en di a ben gi David. Nanga wan nomroe foe fisjoen nanga dren, a ben tjari kon na krin, nanga jepi foe en profeiti Danièl, den finifini tori foe sani di ben sa pasa na grontapoe ini a ten di ben de na Danièl fesi. A ben sa feni presi ini den jarihondro foe a ten di Babilon ben de wan grontapoemakti, te leki a ten te wan kownoe ini a famirilin foe David ben sa tiri baka ini wan kownoekondre foe Jehovah pipel. Den profeititori disi, di skrifi ini Danièl kapitel 2, 7, 8, nanga 10-12, ben gi den getrow djoe a djaranti taki, te foe kaba, a kownoestoeroe foe David troetroe ben sa „tron wan di sa poti steifi te ten di no abi marki”. Seiker, a waarheid dati di ben tjari kon na krin, ben tjari kolokoe kon gi den djoe di ben drai go baka na den eigi kondre ini 537 bifo Gewoon Teri!
6. Fa wi doe sabi taki sonwan foe den profeititori foe Danièl ben moesoe kon troe ini wi ten?
6 Moro foeroe sabiman di e skrifi sani foe bijbel e taki dati pikinmoro ala sani foe den profeititori foe Danièl, ben kon troe bifo Jesus Krestes ben gebore. Ma disi krinkrin no de a kefal. Ini Danièl 12:4, wan engel e froeteri Danièl: „Kibri den wortoe èn poti wan lakstampoe na tapoe a boekoe, te na a ten foe a kaba. Foeroe sma sa go-kon, èn a troe sabi sa de pasa marki.” Efoe a lakstampoe ben moesoe poeroe foe a boekoe foe Danièl — tjari dorodoro kon na krin san a wani taki — soso ini a ten foe a kaba, dan seiker, awansi fa a no fa, wan toe sani foe a profeititori moesoe fiti gi a ten dati. — Loekoe Danièl 2:28; 8:17; 10:14.
7. (a) Oten den fasti ten foe den nâsi ben kon na wan kaba, èn sortoe fanowdoe aksi ben moesoe kisi wan piki na a ten dati? (b) Soema no ben de „a getrow èn koni srafoe”?
7 Ini 1914 den fasti ten foe den nâsi ben kon na wan kaba èn a ten foe a kaba gi a grontapoe disi ben bigin. A kownoekondre foe David ben opo baka, no na Jerusalem na grontapoe, ma sondro foe sma ben man si disi, ini „den wolkoe foe hemel” (Danièl 7:13, 14). Na a ten dati, bika „den takroe wiwiri” foe a falsi krestendom ben gro so foeroe, a situwâsi foe den troe kresten no ben de krin foe si — awansi fa a no fa, ini na ai foe libisma. Ma tokoe, wan prenspari aksi ben moesoe kisi wan piki: „Soema de troetroe a getrow èn koni srafoe?” (Mateus 13:24-30; 24:45) Soema na grontapoe ben sa teki presi gi David kownoekondre, di ben opo baka? A no den troetroe brada foe Danièl, den djoe. Jehovah ben trowe den, bika den ben mankeri bribi èn den ben naki foetoe fadon na a Mesias (Romesma 9:31-33). Na no wan fasi a getrow srafoe ben de foe feni na mindri den organisâsi foe krestenhèit! Den ogri-ati wroko foe den ben sori taki Jesus no ben sabi den (Mateus 7:21-23). Soema a getrow srafoe ben de dan?
8. Soema ben sori foe de „a getrow èn koni srafoe” ini a ten foe a kaba? Fa wi doe sabi dati?
8 Krinkrin sondro misi, a ben de a pikin groepoe salfoe brada foe Jesus di sma ben sabi ini 1914 leki Bijbel Ondrosoekoeman, ma sensi 1931 sma ben kon sabi den leki Jehovah Kotoigi (Jesaja 43:10). Den wawan ben taki na poebliki foe a Kownoekondre di ben opo baka ini a famirilin foe David (Mateus 24:14). Den wawan ben tan aparti foe grontapoe èn ben gi glori na Jehovah nen (Johanes 17:6, 14). Èn ini a tori foe den wawan, den bijbel profeititori di abi foe doe nanga Gado pipel ini den lasti dei, ben kon troe. Na mindri den profeititori disi joe abi a nomroe foe profeiti pisi ten di kari ini Danièl kapitel 12, pe joe abi na ini toe den 1335 dei di ben sa tjari kolokoe kon.
Den 1260 dei
9, 10. Sortoe sani di ben pasa, ben marki a „ten èn ten èn wan afoe ten” foe Danièl 7:25, èn ini sortoe tra bijbeltekst den e taki foe wan srefi sortoe pisi ten?
9 Ini Danièl 12:7, wi e leisi foe a fosi profeiti pisi ten: „A sa de gi wan fasti ten, den fasti ten èn wan afoe. Èn so esi leki wan kaba sa kon na a masi foe a makti foe a santa pipel, dan ala den sani disi sa kon na wan kaba.”a Den e taki foe a srefi pisi ten disi ini Openbaring 11:3-6, di e taki dati den kotoigi foe Gado ben sa preiki ini saka, dri nanga afoe jari èn baka dati den ben sa kiri den. Agen wi e leisi ini Danièl 7:25: „A sa taki srefi wortoe teige a Moro Heiwan, èn doronomo a sa trobi èn hendri den santawan srefi foe a Moro Heiwan. Èn a sa proeberi foe kenki ten nanga wet, èn den sa gi den abra na en anoe foe wan ten, èn ten èn wan afoe ten.”
10 Ini a lasti profeititori disi, „a” na a di foe feifi grontapoe tirimakti, te joe e teri foe sensi Babilon. Na a „toetoe, wan pikinwan”, di na a ten foe en makti, a Manpikin foe libisma e kisi „tirimakti èn wartifasi èn wan kownoekondre” (Danièl 7:8, 14). Na agersi toetoe disi, di fosi ben de na Ingrisi grontapoemakti, ben kon de na a ten foe a fosi grontapoe orlokoe leki na Anglo-Amerkan toe-pisi grontapoe tirimakti, di den Verenigde Staten foe Amerkankondre e tiri den now. Dri nanga afoe ten, noso jari, a makti disi ben sa trobi èn hendri den santawan èn proeberi foe kenki ten nanga wet. Te foe kaba, den ben sa gi den santawan abra na en anoe. — Loekoe toe Openbaring 13:5, 7.
11, 12. Sortoe sani di ben pasa ben tjari sma go na a bigin foe den 1260 profeiti dei?
11 Fa ala den profeititori disi di gersi, ben kon troe? Foeroe jari bifo a Fosi Grontapoe Orlokoe, den salfoe brada foe Jesus ben warskow na poebliki, taki ini 1914 sma ben sa si a kaba foe den fasti ten foe den nâsi. Di na orlokoe bigin, a ben de krin taki sma no ben poti prakseri na tapoe a warskow. Satan ben gebroiki a „werdri meti” foe en, a grontapoe politiek organisâsi di na a ten dati na Ingrisi grontapoemakti ben tiri den, ini wan moeiti foe „kenki ten nanga wet”, foe man drai a ten te Gado Kownoekondre ben sa tiri (Openbaring 13:1, 2). Satan no ben man. Gado Kownoekondre ben opo na hemel, farawe foe pe libisma ben man doro. — Openbaring 12:1-3.
12 Gi den Bijbel Ondrosoekoeman, na orlokoe ben wani taki wan ten foe tesi. Sensi januari 1914 den ben sori a Photo-Drama of Creation, wan bijbel pristeri di ben poti a prakseri tapoe den profeititori foe Danièl. Ini a waran pisi ten foe a jari dati, ini a noordsei pisi foe grontapoe, orlokoe ben bigin. Ini oktober, den fasti ten ben kon na wan kaba. Na a kaba foe a jari, a salfoe fikapisi ben froewakti froefolgoe, so leki den ben kan si na a jaritekst di den ben teki gi a jari 1915, na a aksi foe Jesus gi den disipel foe en: „Oenoe man dringi foe a beiker foe mi?”, di abi en gron na tapoe Mateus 20:22, King James Version.
13. Fa den Bijbel Ondrosoekoeman ben preiki ini saka ini den 1260 dei èn san ben pasa na a kaba foe a pisi ten dati?
13 Foe dati ede, sensi december 1914, a pikin groepoe disi foe kotoigi ’ben preiki ini saka’, èn ben horidoro na wan sakafasi, ala di den ben bariwroko gi den kroetoe foe Jehovah. A dede foe C. T. Russell, a fosi presidenti foe a Watchtower, Bible and Tract Society, ini 1916, ben seki foeroe sma. Ala di a span foe na orlokoe ben panja na ala sei, den Kotoigi ben ondrofeni moro nanga moro gens. Den ben poti sonwan na strafoe-oso. Sma leki Frank Platt na Ingrisikondre nanga Robert Clegg na Kanada, ben kisi hebi skin-ati foe den tirimakti di ben lobi foe meshandri sma na wan ogri-atifasi. Te foe kaba, na tapoe 21 juni 1918, tapoe a gron foe falsi kragi, den ben gi J. F. Rutherford, a njoen presidenti, makandra nanga den tiriman foe a Watchtower, Bible and Tract Society, wan langa strafoe na strafoe-oso. So boen, na a kaba foe a profeiti pisi ten, a „pikin toetoe” ben kiri na orga poebliki preikiwroko. — Danièl 7:8, King James Version.
14. Fa sani ben kenki gi a salfoe fikapisi ini 1919 èn baka dati?
14 A boekoe Openbaring e froeteri na fesi san e pasa baka dati. Baka wan sjatoe pisi ten foe no doe wan sani — di den froeteri na fesi foe dati leki dri nanga afoe dei pe den e didon dededede na strati — a salfoe fikapisi ben kon na libi baka èn ben bigin wroko baka (Openbaring 11:11-13). Na tapoe 26 maart 1919, a presidenti nanga den tiriman foe a Watchtower, Bible and Tract Society, ben komoto na strafoe-oso èn baka ten den ben krin den dorodoro foe den falsi kragi di den ben kisi. Wantewante baka di a salfoe fikapisi kon fri, den bigin orga densrefi baka foe go doro nanga a wroko. So boen, leki wan kontroe foe a fosi heloe foe Openbaring, leki sprenka na jeje fasi den ben komoto na a dipi peti di no abi gron pe no wan wroko no e doe, makandra nanga deki smoko, di ben sori na fesi, a doengroe tamara foe falsi relisi (Openbaring 9:1-11). Ini den wan toe jari di ben kon baka dati, na jeje fasi den ben kisi njanjan èn den ben sreka densrefi gi san ben de na den fesi. Ini 1921 den ben tjari wan njoen boekoe kon na doro, The Harp of God (A harpoe foe Gado), di den ben meki foe jepi den njoenwan nanga pikin-nengre foe leri fondamenti bijbel waarheid (Openbaring 12:6, 14). Ala den sani disi di skrifi dja, ben pasa na wan tra prenspari pisi ten.
Den 1290 dei
15. Na sortoe fasi wi kan teri a bigin foe den 1290 dei? Oten a pisi ten disi ben kon na wan kaba?
15 Na engel ben taigi Danièl: „Èn foe sensi a ten di den poeroe a fasti marki [„a doronomo ofrandi”, foetoewortoe], èn ben poti a tegoe sani di e tjari pori kon, a sa de wan doesoen toe hondro neigitenti dei” (Danièl 12:11). Ondro a Wet foe Moses, „a doronomo ofrandi” ben bron na tapoe na altari ini a tempel na Jerusalem. Kresten no e tjari bron ofrandi, ma den e tjari wan doronomo ofrandi na jeje fasi. Paulus ben sori na disi di a ben taki: „Meki wi tjari ala ten wan srakti-ofrandi foe prèise gi Gado, dati wani taki, den froktoe foe wi mofoboeba di e meki en nen bekènti na poebliki.” (Hebrewsma 13:15; teki gersi Hosea 14:2.) A doronomo ofrandi disi den ben poeroe ini juni 1918. San ben de „a tegoe sani” dan — a di foe toe sani di den moesoe froewakti? A ben de a Folkoebontoe, di den makti di ben wini, ben poesoe go na fesi na a kaba foe a Fosi Grontapoe Orlokoe.b A ben de wan tegoe sani, bika den tiriman foe krestenhèit ben poti en na a presi foe Gado Kownoekondre, èn ben meki a Bontoe teki presi leki a wanenkri howpoe gi libisma foe kisi vrede. Den ben presenteri a Bontoe ini januari 1919. Efoe wi e teri 1290 dei (dri jari, seibi moen) sensi a ten dati, dan wi e doro ini september 1922.
16. Fa a ben de krin taki a salfoe fikapisi ben de klariklari foe bigin wroko, na a kaba foe den 1290 dei?
16 San ben pasa baka dati? We, den Bijbel Ondrosoekoeman ben kon kisi njoen krakti baka, den ben kon fri foe Babilon a Bigiwan èn den ben de klariklari foe bigin wroko (Openbaring 18:4). Na wan kongres di den ben hori ini september 1922, na Cedar Point, Ohio, Verenigde Staten, sondro frede den ben bigin meki den kroetoe foe Gado bekènti ini a tori foe krestenhèit (Openbaring 8:7-12). Den maka foe den sprenka troetroe ben bigin hati den! San ben kon moro, a di foe toe heloe foe Openbaring ben bigin. Wan bigi ipi foe kresten legre foe asi — di ini a bigin ben de a salfoe fikapisi èn bakaten ben kon moro bigi nanga a bigi ipi — ben opo kon na heri grontapoe (Openbaring 7:9; 9:13-19). Ija, a kaba foe den 1290 dei ben tjari prisiri kon gi Gado pipel.c Ma moro ben de ete.
Den 1335 dei
17. Oten den 1335 dei ben bigin èn kaba?
17 Danièl 12:12 e taki: „Kolokoe a sma de di e tan froewakti èn di e doro den wan doesoen dri hondro dritenti na feifi dei!” A de krin taki den 1335 dei disi noso dri jari, aiti nanga afoe moen, ben bigin na a kaba foe wan ten di ben kon na fesi. Efoe wi e teri foe sensi september 1922, dan disi e tjari wi ini a lasti pisi foe mofojari (noordsei pisi foe grontapoe) 1926. San ben pasa ini den 1335 dei dati?
18. Sortoe troetori e sori taki ini 1922 sani ben moesoe go na fesi ete?
18 Ala di prenspari sani ben pasa ini 1922, a ben de krin, taki son sma ben loekoe ete nanga foeroe froewakti na a ten di ben pasa. Den Studies in the Scriptures, di C. T. Russell ben skrifi, ben de ete fondamenti sani di den ben studeri. Moro fara, a pikin boekoe Millions Now Living Will Never Die (Miljoenmiljoen sma di e libi now, noiti sa dede), di ben panja na ala sei, ben presenteri na idea, taki ini 1925 den marki di Gado ben abi na prakseri ini a tori foe meki grontapoe tron wan paradijs baka èn na opobaka foe den getrow sma foe owroeten, ben sa bigin foe kon troe. A ben gersi taki a horidoro foe den salfoewan pikinmoro ben kon na wan kaba. Ma tokoe, wan toe sma di ben de nanga den Bijbel Ondrosoekoeman, no ben abi a firi foe prati a boen njoensoe nanga tra sma.
19, 20. (a) Fa foeroe sani ben kenki gi Gado pipel na a ten foe den 1335 dei? (b) Sortoe sani di ben pasa, ben marki a kaba foe a pisi ten foe den 1335 dei, èn san den ben sori ini a tori foe Gado pipel?
19 Di den 1335 dei ben go doro, ala den sani disi kenki. Foe tranga den brada, den ben orga doronomo groepoe-studie foe The Watch Tower. Den ben poti krakti na tapoe velddienst. Foe bigin nanga mei 1923, ala sma ben kisi a kari foe abi wan prati na a velddienst na a fosi toedewroko foe ibri moen, èn ten ben poti na wan sei na den mindriwiki konmakandra, foe gi den deki-ati foe doe a wroko disi. Ini augustus 1923, na wan bigi konmakandra na Los Angelos, California, Verenigde Staten, den ben sori taki Jesus en agersitori foe den skapoe nanga den bokoboko ben sa kon troe bifo a Doesoen Jari Tiri (Mateus 25:31-40). Ini a jari 1924 den ben si na opo foe a radio station WBBR, di den ben gebroiki foe meki a boen njoensoe bekènti nanga jepi foe radio. Na artikel “Birth of the Nation”, ini The Watch Tower foe 1 maart 1925, ben gi wan moro betre froestan foe Openbaring kapitel 12. Te foe kaba, getrow kresten ben kan froestan na wan joisti fasi den span sani di ben pasa ini 1914-1919.
20 A jari 1925 ben kon na en kaba, ma a kaba no ben kon ete! Sensi den jari foe 1870, Bijbel Ondrosoekoeman ben dini nanga wan dei na ini den prakseri — fosi 1914, baka dati 1925. Now, den ben froestan taki den ben moesoe dini so langa leki Jehovah wani dati. The Watch Tower foe 1 januari 1926, ben abi a prenspari artikel: “Who will honor Jehovah?” (Soema sa gi Jehovah grani?), di, leki noiti na fesi, ben poti krakti tapoe a prenspari di Gado nen prenspari. Èn te foe kaba, ini mei 1926 na a kongres na Londen, Ingrisikondre, den ben teki wan resolutie di ben nen: „Wan kotoigi gi den tiriman foe grontapoe.” A resolutie disi langalanga ben meki a waarheid foe Gado Kownoekondre bekènti èn a pori foe Satan grontapoe, di de na pasi. Na a srefi kongres, a krakti boekoe Deliverance (Froeloesoe) ben kon na doro, èn a ben tron a fosiwan foe wan nomroe foe boekoe di ben kon ini a presi foe Studies in the Scriptures. Gado pipel ben e loekoe go na fesi now, no na baka. Den 1335 dei ben kon na wan kaba.
21. San horidoro ini a pisi ten foe den 1335 dei ben wani taki gi Gado pipel ini a ten dati èn san a kontroe foe profeititori ini a tori foe a ten disi wani taki gi wi?
21 Wan toe sma no ben wani kenki akroederi den sani disi di ben pasa, ma den sma di ben horidoro ben de troetroe kolokoe. Boiti dati, te wi e loekoe baka na a kontroe foe den profeiti pisi ten disi, wi toe de kolokoe bika a froetrow foe wi kon tranga, taki a pikin groepoe foe salfoe kresten di ben pasa den ten dati, de troetroe a getrow èn koni srafoe. Sensi den jari dati, na organisâsi foe Jehovah ben gro kon kefarlek bigi, ma a getrow èn koni srafoe te now ete de a moro prenspari pisi foe na organisâsi, èn a e tiri en. Fa a de wan span sani, foe dati ede, foe sabi taki gi den salfoewan èn den tra skapoe, moro kolokoe e wakti den ete! Disi wi sa si te wi e loekoe wan tra profeititori foe Danièl.
[Foetoewortoe]
a Foe kon sabi san taki kaba foe fasi fa foe teri den profeiti pisi ten disi, loekoe Onze toekomstige Wereldregering — Gods koninkrijk, kapitel 8, di a Watchtower Bible and Tract Society of New York, Inc., tjari kon na doro.
c Loekoe A Waktitoren foe 1 januari 1991, bladzijde 9, èn a Jariboekoe foe 1975 foe Jehovah Kotoigi (Bakratongo), bladzijde 132.
Joe kan tjari disi kon na krin?
◻ Fa wi doe sabi taki wan toe foe den profeititori ini Danièl ben moesoe kon troe ini a ten foe wi?
◻ Foe san ede wi kan abi a froetrow taki a salfoe fikapisi na „a getrow èn koni srafoe”?
◻ Oten den 1260 dei ben bigin èn kaba?
◻ Sortoe njoen sani èn a poti di den ben poti den kon boen baka, den 1290 dei ben tjari gi a salfoe fikapisi?
◻ Foe san ede den sma di ben horidoro te na a kaba foe den 1335 dei ben de kolokoe?
[Faki na tapoe bladzijde 11]
DEN PROFEITI PISI TEN FOE DANIÈL
1260 dei:
december 1914 te nanga juni 1918
1290 dei:
januari 1919 te nanga september 1922
1335 dei:
september 1922 te nanga mei 1926
[Prenki na tapoe bladzijde 8]
Sensi 1919 a ben de krin taki „a getrow èn koni srafoe”na a salfoe fikapisi
[Prenki na tapoe bladzijde 10]
Edekantoro foe a Folkoebontoe ini Genève, Switserland
[Sma di abi a reti foe a prenki]
UN photo