Den ogri-ati gado foe libisma

FOEROETRON den ben taki foe den fositen gado taki den lobi foe si broedoe èn den abi tranga lostoe gi seks. Papa nanga mama ben bron den pikin foe den srefi libilibi na ini faja, foe meki den gado foe den firi boen (Deuteronomium 12:31). Na a tra sei, den heiden filosoofman ben leri taki Gado no ben abi den firi so leki atibron noso sari-ati.

Den fasi foe si sani di den filosoofman disi abi, di den kisi foe den ogri jeje, ben abi krakti na tapoe den djoe, a so-kari pipel foe Gado. A djoe filosoofman Philo, wan man di ben libi ini a ten foe Jesus, ben froeklari taki Gado „no man abi no wan firi srefisrefi”.

Srefi a strak djoe sekte foe den Fariseiman no ben kan komoto na ondro a krakti foe a Griki filosofia. Den ben teki den leri foe Plato abra, taki libisma meki nanga wan sili di no man dede, di fasi ini wan skin foe wan libisma. Na tapoe foe dati, akroederi a fosi jarihondro historiaman Josefus, den Fariseiman ben bribi taki den sili foe ogri sma „e pina foe têgo strafoe”. Ma bijbel no e gi no wan gron foe so wan fasi foe denki. — Genesis 2:7; 3:19; Preikiman 9:5; Esekièl 18:4.

Fa a de nanga den bakaman foe Jesus? Den ben gi pasi taki den heiden filosofia abi krakti na den tapoe? Foe di na apostel Paulus ben erken a kefar disi, meki a ben warskow den kompe-kresten: „Loekoe boen: kande wan sma de di sa tjari oenoe gowe leki wan foefoeroe sani nanga jepi foe a filosofia èn nanga jepi foe soso sani foe bidrigi sma akroederi den gwenti foe libisma, akroederi den biginbigin sani foe grontapoe èn no akroederi Krestes.” — Kolosesma 2:8; loekoe toe 1 Timoteus 6:20.

A de wan sari sani, taki wan toe so-kari kresten owroeman foe a di foe toe nanga a di foe dri jarihondro, no ben poti prakseri na tapoe a warskow dati èn den ben leri sma taki Gado no abi firi. The Encyclopedia of Religion e froeklari: „Moro foeroe, den ben froestan den eigifasi foe Gado so leki fa den ben taki troe foe den, akroederi den prakseri foe den djoe nanga foe filosofia fasi foe denki ini a ten dati . . . A prakseri taki Gado, a Tata, ben kan abi den firi so leki sari . . . , ben de wan sani di moro foeroe sma ben si leki wan sani di den no ben kan erken, no te leki den lasti jari foe a di foe twenti jarihondro.”

Foe dati ede, krestenhèit ben teki a falsi leri abra di abi foe doe nanga wan ogri-ati gado di e strafoe sondari, foe di a e meki den pina foe têgo, ala di den e firi dati. Na a tra sei, Jehovah Gado e taki krinkrin na ini en Wortoe, bijbel, taki „a paiman foe sondoe na dede”, no têgo pina di sma e firi. — Romesma 6:23.

[Sma di abi a reti foe a prenki na tapoe bladzijde 3]

Na tapoesei: Acropolis Museum, Grikikondre

Nanga a primisi foe a British Museum