A pai di Job kisi — Wan fonten foe howpoe

„Jehovah . . . ben blesi a kaba foe Job baka ten moro leki a bigin foe en.” — JOB 42:12.

1. San Jehovah e doe gi en pipel, srefi te tesi e meki den kon swaki srefisrefi?

JEHOVAH „e tron a sma di e pai denwan di e soekoe en serjoesoe” (Hebrewsma 11:6). A e boeweigi en pipel toe di gi densrefi ini a dini foe en, foe gi kotoigi nanga deki-ati, srefi efoe tesi meki den kon swaki neleki den dedewan (Job 26:5; Openbaring 11:3, 7, 11). Dati ben de so ini a kefal foe Job di ben pina. Ala di den dri falsi trowstoeman ben taki takroe sani foe Job, tokoe a no ben tapoe en mofo foe di a ben frede libisma. Na presi foe dati, a ben gi kotoigi fri èn sondro frede.

2. Fa Jehovah Kotoigi komoto na den tesi foe den, ala di den pina foe froefolgoe nanga pina ede?

² Foeroe disiten Kotoigi foe Jehovah pina foe so wan hebi froefolgoe nanga pina, taki pikinmoro den dede (2 Korentesma 11:23). Ma neleki Job, den sori lobi gi Gado èn den handri na wan regtfardikifasi (Esekièl 14:14, 20). Den komoto toe na den tesi foe den, nanga a fasti bosroiti foe plisi Jehovah, nanga a tranga foe gi kotoigi fri èn sondro frede, èn nanga a kon di den ben kon foeroe nanga troetroe howpoe.

Job e gi kotoigi fri èn sondro frede

3. Sortoe kotoigi Job ben gi ini en lasti taki?

³ Na ini en lasti taki, Job ben gi wan moro bigi kotoigi srefi leki fa a ben doe na fesi. A ben tapoe a mofo foe den falsi trowstoeman foe en krinkrin. Na wan spotoefasi a ben taki nanga krasi: „O, omeni jepi oenoe ben gi na wan sma sondro krakti!” (Job 26:2) Job ben gi glori na Jehovah. A krakti foe Jehovah e anga wi grontapoe na noti ini a loktoe èn a e anga wolkoe di foeroe nanga watra, tapoesei foe grontapoe (Job 26:7-9). Tokoe Job ben taki dati den sortoe wondroe dati, ’na soso den franja foe den pasi foe Jehovah’. — Job 26:14.

4. San Job ben taki foe soifri retifasi, èn foe san ede a ben kan taki na a fasi dati?

⁴ Foe di Job ben sabi seiker taki a no ben fowtoe, meki a ben froeklari: „Te leki mi dede mi no sa teki mi soifri retifasi poeroe foe misrefi!” (Job 27:5) Tra fasi leki den falsi kragi di den ben taki foe en, a no ben doe no wan sani foe froedini san ben pasa nanga en. Job ben sabi taki Jehovah no e arki den begi foe sma di fadon komoto na bribi, ma taki a sa pai den sma di e hori den soifri retifasi. Disi kan memre wi heri boen taki heri esi a broeja di Armagedon o tjari kon, sa poeroe den ogriwan foe a makti presi foe den èn den no sa man lowe gi na anoe foe Gado di no sa kibri a libi foe den. Te na a ten dati, a pipel foe Jehovah sa waka ini a soifri retifasi foe den. — Job 27:11-23.

5. San Job ben taki foe a troetroe koni?

⁵ Prakseri fa den dri man di ben abi a koni foe grontapoe, ben e arki di Job ben sori taki libisma gebroiki a koni foe en foe feni gowtoe, solfroe nanga tra goedoe na ini a gron èn na ini a se. „Ma”, na so a ben taki, „wan saka di foeroe nanga koni warti moro leki wan saka di foeroe nanga peri” (Job 28:18). Den falsi trowstoeman foe Job no ben man bai troetroe koni. Troetroe koni komoto na a Mekiman foe winti, alen, koti-faja foe hemel, nanga dondroe. Ija, a lespeki „frede gi Jehovah — dati na koni, èn a drai di wan sma e drai en baka gi san ogri, dati na froestan”. — Job 28:28.

6. Foe san ede Job ben taki foe a libi di a ben abi fosi?

⁶ Ala di Job ben pina, tokoe a no ben tapoe foe dini Jehovah. Na presi foe drai en baka gi a Moro Heiwan, a man disi foe soifri retifasi ben angri foe a ’matifasi di a ben abi nanga Gado’ fosi (Job 29:4). Job no ben skepi di a ben froeteri finifini fa a ’ben froeloesoe den sma di ben kisi kwinsi, ben weri regtfardikifasi gi ensrefi, èn ben de wan troetroe papa gi den pôtiwan’ (Job 29:12-16). Na presi foe dati, a ben taki foe den troe tori foe en libi leki wan getrow foetoeboi foe Jehovah. A de so, taki safrisafri joe kweki so wan boen nen? A no de foe taki, dati Job ben poeroe a lei foe den kragi kon na doro toe, di den dri hoigri bidrigiman ben taki.

7. Sortoe sma Job ben de?

⁷ Jongoe man ben lafoe Job, ’di no ben sa poti a papa foe den srefi nanga den dagoe foe na ipi foe en’. Sma ben wisiwasi en èn ben spiti na en tapoe. Ala di Job ben kisi hebi kwinsi, tokoe no wan sma no ben hori en na prakseri (Job 30:1, 10, 30). Ma foe di a ben gi ensrefi dorodoro ini a dini foe Jehovah, meki a ben abi wan krin konsensi èn a ben kan taki: „A sa wegi mi ini soifri wegi èn Gado sa kon sabi mi soifri retifasi” (Job 31:6). Job no ben de wan soetaman noso wan man di ben meki takroe plan, èn a no ben misi foe jepi den sma ini nowtoe. Ala di a ben goedoe, tokoe noiti a no ben froetrow tapoe goedoe na skin fasi. Boiti dati, Job no ben anbegi kroektoe gado, foe di a no ben dini den dede sani, leki a moenkenki (Job 31:26-28). Foe di a ben froetrow tapoe Gado, meki a ben de wan heri boen eksempre leki wan sma di hori en soifri retifasi. Awansi ala den pina di a ben pina èn den falsi trowstoeman di ben drape, tokoe Job feti gi ensrefi na wan konifasi èn a ben gi wan heri moi kotoigi. Di den wortoe foe en ben kon na wan kaba, dan a ben froetrow tapoe Gado leki en Kroetoeman èn a Sma di e pai sma. — Job 31:35-40.

Elihu e taki

8. Soema ben de Elihu, èn fa a ben sori lespeki nanga deki-ati?

⁸ No fara foe drape joe ben abi a jonkoeman Elihu, wan bakapikin foe Buz, a manpikin foe Nahor èn na so fasi a ben de wan fara famiriman foe Jehovah en mati Abraham (Jesaja 41:8). Elihu ben sori lespeki gi den moro owroe man, foe di a ben e arki ala toe sei foe a takimakandra. Ma tokoe a ben taki nanga deki-ati foe afersi pe den no ben abi leti na ini. Foe eksempre, a ben saka tiki gi Job di „ben e froeklari en eigi sili regtfardiki, na presi foe froeklari Gado regtfardiki”. Na atibron foe Elihu ben de spesroetoe nanga den falsi trowstoeman. A ben gersi leki den froeklari foe den ben hei Gado, ma troetroe den ben gi en sjen, foe di den ben teki a sei foe Satan ini a strei. Foe di Elihu ben „foeroe nanga wortoe” èn foe di santa jeje ben boeweigi en, meki a ben de wan kotoigi foe Jehovah di no ben teki no wan sma sei. — Job 32:2, 18, 21.

9. Fa Elihu ben sori taki Job ben sa kon betre baka?

⁹ Job ben broko en ede moro nanga en eigi regtfardikifasi leki nanga di foe Gado. Foe taki en leti, a ben hari taki nanga Gado. Ma di dede ben kon krosibei, wan sani ben sori taki a ben sa kon betre baka. Fa so? We, nanga a boskopoe disi Elihu ben firi foe taki dati Jehovah ben feni Job boen: „No meki a saka go na ini a peti! Mi feni wan froeloesoe-paiman! Meki a skin foe en kon moro moi leki ini en jongoe jari; meki a drai go baka na den dei foe en jongoe krakti.” — Job 33:24, 25.

10. Te o fara Job ben moesoe kisi tesi, ma foe sortoe sani wi kan de seiker te wi e hori 1 Korentesma 10:13 na prakseri?

¹⁰ Elihu ben poti Job kon reti, foe di Job ben taki dati no wan wini no de te wan sma e prisiri ini Gado, foe di a sma hori en soifri retifasi. Elihu ben taki: „A no kan kwetikweti taki a troe Gado e handri na wan ogrifasi, èn taki na Almaktiwan e handri na wan onregtfardikifasi! Bika na a fasi fa a sma foe grontapoe e handri, na a fasi dati a sa pai en.” Toemoesi esi Job ben poti krakti na tapoe en eigi regtfardikifasi, ma a ben doe dati sondro nofo sabi nanga inzicht. Elihu ben taki moro fara: „Meki Job kisi tesi pikinmoro pasa marki, foe den piki foe en ede, na mindri sma di e doe ogri” (Job 34:10, 11, 35, 36). Na a srefi fasi, wi kan boeweisi a bribi foe wi nanga a soifri retifasi foe wi dorodoro, soso efoe wi e ’kisi tesi pikinmoro pasa marki’ na a wán noso tra fasi. Ma tokoe, wi lobi hemel Tata no sa meki wi kisi tesi moro leki san wi kan tjari. — 1 Korentesma 10:13.

11. San wi moesoe memre te wi e kisi foeroe tesi?

¹¹ Di Elihu ben go doro, a ben sori agen taki Job ben poti toemoesi foeroe krakti na tapoe en eigi regtfardikifasi. Prakseri moesoe poti na tapoe wi Gran Mekiman (Job 35:2, 6, 10). Gado „no sa hori no wan ogriwan na libi, ma a sa gi reti na denwan di e kisi kwinsi”, na so Elihu ben taki (Job 36:6). No wan sma kan aksi Gado foe a gi frantiwortoe foe en pasi èn taki dati a ben de onregtfardiki. Gado moro hei leki wi kan sabi, èn den jari foe en wi no kan kon sabi èn wi no man teri den srefisrefi (Job 36:22-26). Te wi e kisi foeroe tesi, memre dan taki wi têgo Gado de regtfardiki èn taki a sa pai wi gi den getrow wroko foe wi foe gi en prèise.

12. San den lasti wortoe foe Elihu e sori ini a tori foe a kroetoe di Gado ben sa tjari na tapoe den ogriwan?

¹² Ala di Elihu ben taki, wan bigi winti ben de na pasi. Di a ben kon moro krosibei, dan na ati foe Elihu bigin djompo èn a ben beifi. A ben taki foe bigi sani di Jehovah ben doe èn a ben taki: „Arki disi, o Job; tan tanapoe èn sori taki joe e poti prakseri na tapoe den wondroe wroko foe Gado.” Neleki Job, wi moesoe prakseri foe den wondroe wroko foe Gado nanga a lespekifasi foe en di e gi frede. „Ini a tori foe na Almaktiwan, wi no kon froestan en srefisrefi”, na so Elihu ben taki. „A hei ini makti, èn retidoe nanga regtfardikifasi pasa marki a no sa si leki wan soso sani. Foe dati ede, meki libisma frede en” (Job 37:1, 14, 23, 24). Den lasti wortoe foe Elihu e memre wi, taki te Gado sa tjari kroetoe kon na tapoe den ogriwan heri esi, dan a no sa si retidoe nanga regtfardikifasi leki wan soso sani èn a sa hori denwan na libi, di e frede en leki sma di e anbegi en na wan lespekifasi. Fa a de wan grani foe de na mindri den sortoe sma dati di e hori den soifri retifasi èn di e erken Jehovah leki na Universeel Soeverein! Hori doro so leki fa Job ben doe, èn noiti no meki Didibri poeroe joe blesi presi na mindri foe den kolokoe sma disi.

Jehovah e piki Job

13, 14. (a) Foe sortoe sani Jehovah ben bigin aksi Job? (b) Sortoe penti wi kan leri foe den tra aksi di Gado ben poti gi Job?

¹³ Fa Job ben moesoe foe froewondroe di Jehovah ben taki nanga en ini a bigi winti! A bigi winti dati ben de wan doe foe Gado, tra fasi leki a bigi winti di Satan ben gebroiki foe meki na oso fadon èn kiri den pikin foe Job. Job no ben man gi piki tapoe no wan foe den sani, di Gado ben aksi: „Pe joe ben de, di mi ben seti grontapoe? . . . Soema ben poti en oekoeston, di den mamanten stari makandra ben opo wan prisiri babari, èn ala den manpikin foe Gado bigin bari foe prisiri ede?” (Job 38:4, 6, 7) Jehovah ben poti gi Job a wan aksi baka a trawan di ben abi foe doe nanga a se, den wolkoe di lontoe en, son-opo, den doro foe dede, leti nanga doengroe, nanga den stari sistema. Job no ben kan gi piki, di Gado ben aksi en: „Joe kon sabi a fasi fa hemel seti?” — Job 38:33.

¹⁴ Tra aksi ben sori taki, bifo Gado ben meki libisma èn den ben kisi a makti tapoe den fisi, den fowroe, den meti, nanga den sani di e kroipi, Gado ben sorgoe gi den — sondro a jepi noso a rai foe libisma. Den aksi di Jehovah ben poti moro fara, ben taki foe den mekisani so leki a werdri mankaw, a struisfowroe nanga na asi. Gado ben aksi Job: „A de na tapoe joe komando taki na aka e frei go na loktoe èn taki a e bow en nesi hei na tapoesei?” (Job 39:27) Kwetikweti! Prakseri pikinso a fasi fa Job ben doe di Gado ben aksi en: „A sma di e soekoe trobi moesoe hari taki nanga na Almaktiwan?” A no de foe froewondroe taki Job ben taki: „Loekoe! Mi tron wan sma di no wani taki foeroe moro. San mi sa piki joe? Mi poti mi anoe tapoe mi mofo” (Job 40:2, 4). Foe di Jehovah abi leti ala ten, efoe oiti wi e kisi a tesi foe kragi teige en, dan wi moesoe ’poti wi anoe tapoe wi mofo’. Den aksi di Gado ben poti, ben gi glori toe na a hei di a hei, a lespekifasi, nanga a krakti foe en, so leki fa dati de foe si ini den sani di a meki.

Behemot nanga Lefiatan

15. Sortoe meti Behemot de, so leki fa moro foeroe sma e si en, èn san na wan toe eigifasi foe en?

¹⁵ Baka dati Jehovah ben taki foe Behemot, di sma e si moro foeroe leki a nijlpaard (Job 40:15-24). Wan aparti sani foe a meti disi di e njan prani de, taki a ’e njan groen grasi’, ala di a bigi kefalek, a hebi srefisrefi èn en boeba tranga. A krakti foe en de ini den djonkoe foe en èn ini den titei foe en bere. Den bonjo foe en foetoe tranga leki „kopro peipi”. Behemot no e broeja na ini watra di krasi, ma makriki a e swen tra sei leki fa a watra e lon.

16. (a) Sortoe mekisani e fiti den sani di skrifi foe Lefiatan, èn san na wan toe troetori foe en? (b) Na sortoe sani a makti foe Behemot nanga Lefiatan kan sori go ini a tori foe a doe di wi moesoe doe den wroko di wi kisi foe doe na ini a diniwroko foe Jehovah?

¹⁶ Gado ben aksi Job toe: „Joe kan hari Lefiatan poeroe nanga wan fisi-oekoe, noso joe kan tai a tongo foe en nanga wan titei?” Den sani di skrifi foe Lefiatan e sori taki a de a kaiman (Job 41:1-34). Nanga no wan sma a sa meki wan froebontoe foe vrede, èn no wan koni libisma abi someni don deki-ati taki a ben sa meki a reptiel disi kisi atibron. Peiri no e jagi en gowe, èn „a e lafoe a ratata foe wan lansri”. Te Lefiatan e kisi atibron, dan den dipi foe liba e koekoe leki wan patoe pe salfoe e bori na ini. Taki Lefiatan nanga Behemot ben abi moro foeroe krakti leki Job, ben jepi Job foe saka ensrefi. Na wan sakafasi wi moesoe erken toe taki foe wisrefi wi no tranga. Wi abi a koni nanga a krakti di Gado gi fanowdoe, foe kan lowe gi den tifi foe Satan, a Sneki, èn foe doe den wroko di wi kisi foe doe na ini a diniwroko foe Jehovah. — Filipisma 4:13; Openbaring 12:9.

17. (a) Fa Job ben „si Gado”? (b) Sortoe boeweisi ben gi nanga den aksi di Job no ben man piki, èn fa disi kan jepi wi?

¹⁷ Foe di Job ben saka ensrefi dorodoro, meki a ben erken taki a ben si sani na wan fowtoefasi èn a ben erken taki a ben taki sondro foe abi sabi. Tokoe a ben taki dati a ben bribi taki a ben sa „si Gado” (Job 19:25-27). Fa dati ben kan pasa, foe di no wan libisma no kan si Jehovah èn tan na libi? (Exodus 33:20) Foe taki en leti, dan Job ben si fa Gado ben sori a krakti foe en, Job ben jere a wortoe foe Gado, èn Gado ben opo den ai foe en froestan, so taki a ben si a waarheid ini a tori foe Jehovah. Foe dati ede Job ’ben taki dati a ben teki den wortoe foe en baka èn taki a ben abi berow na ini doti nanga asisi’ (Job 42:1-6). Den foeroe aksi di a no ben man piki, ben boeweisi a moro hei makti foe Gado èn ben sori o pikin libisma de, srefi wan libisma di ben gi ensrefi ini a dini foe Jehovah leki fa Job ben doe dati. Disi e jepi wi foe si, taki wi no moesoe si den afersi foe wi moro prenspari leki a santa di wi moesoe santa a nen foe Jehovah èn foe regtfardiki en soevereinfasi (Mateus 6:9, 10). A moro prenspari sani di wi moesoe broko wi ede nanga dati, ben sa moesoe de, taki wi e hori wi soifri retifasi na Jehovah èn e gi en nen glori.

18. San den falsi trowstoeman foe Job ben moesoe doe?

¹⁸ Ma san de foe taki foe den falsi trowstoeman di ben regtfardiki densrefi? Nanga reti Jehovah ben kan kiri Elifas, Bildad nanga Sofar, foe di den no ben taki a waarheid ini a tori foe en, so leki fa Job ben doe. „Teki gi oensrefi seibi mankaw nanga seibi manskapoe èn go na mi foetoeboi Job”, Gado ben taki, „èn oen man moesoe tjari wan bron-ofrandi foe oen eigi boen ede; èn Job mi foetoeboi srefi sa begi gi oenoe.” Den dri man ben moesoe saka densrefi foe gi jesi na Jehovah èn doe san a ben winsi. Job di ben e hori en soifri retifasi ben moesoe begi gi den, èn Jehovah ben feni a begi foe en boen (Job 42:7-9). Ma san de foe taki foe Job en wefi, di ben gi en deki-ati foe floekoe Gado èn dede? A sori taki a ben kon boen baka nanga Job, foe di Gado ben abi sari-ati.

Den pai di Gado pramisi e gi wi howpoe

19. Fa Jehovah ben sori ini a tori foe Job, taki A ben hei moro Didibri?

¹⁹ So esi leki Job ben tapoe foe broko en ede nanga den pina di a ben pina èn a ben kan dini Gado baka, Jehovah ben kenki afersi gi en. Baka di Job ben begi gi den dri man, dan Gado ’ben tjari wan kenki kon ini a situwâsi foe en di ben de leki a di foe wan strafoeman’ èn ben gi en ’foe ala san a ben abi, toe tron moro foeroe’. Jehovah ben sori taki A ben hei moro Didibri, foe di a ben tapoe a siki di Satan ben tjari kon èn na wan wondroefasi a ben meki Job kon betre. Gado ben jagi den legre foe ogri jeje toe èn ben hori wan ai na den tapoe, foe di a ben poti wan kibri lontoe Job baka nanga jepi foe na engel kampoe foe En. — Job 42:10; Psalm 34:7.

20. Na sortoe fasi Jehovah ben pai Job èn ben blesi en?

²⁰ Den brada nanga den sisa foe Job, nanga sma di a ben sabi fosi, ben tan kon foe njan nanga en, èn den ben firi gi en, èn ben trowstoe en foe a rampoe di Jehovah ben gi pasi foe a ben ondrofeni dati. Den alamala ben gi Job moni nanga wan gowtoe linga. Jehovah ben blesi a kaba foe Job moro leki a bigin foe en, so taki a ben kisi 14.000 skapoe, 6000 kameili, 1000 paar kaw, nanga 1000 oema-boeriki. Job ben kisi seibi manpikin nanga dri oemapikin toe, a srefi nomroe di a ben abi fosi. Den oemapikin foe en — Jemima, Kesia, nanga Keren-hapoek — ben de den moro moi oema foe a kondre, èn Job ben gi den wan pisi foe a goedoe di den brada foe den ben kisi (Job 42:11-15). Boiti dati, Job ben libi ete 140 jari èn a ben si fo geslakti foe den bakapikin foe en. A tori e tapoe: „Te foe kaba Job dede, ala di a ben kon owroe èn ben de tevrede nanga den dei foe en” (Job 42:16, 17). A langa di a libi foe en ben kon moro langa, ben de a wondroe wroko foe Jehovah Gado.

21. Fa a tori di bijbel e froeteri foe Job, e jepi wi, èn sortoe fasti bosroiti wi moesoe abi?

²¹ A tori di bijbel e froeteri foe Job, e meki wi kon froestan moro boen san na den sani di Satan e gebroiki èn a e jepi wi foe si fa na universeel soevereinfasi abi foe doe nanga a soifri retifasi foe libisma. Neleki Job, ala sma di lobi Gado sa kisi tesi. Ma wi kan hori doro neleki fa Job ben doe dati. A ben pasa den tesi foe en nanga bribi èn nanga howpoe, èn den pai di a ben kisi ben de foeroe. Leki foetoeboi foe Jehovah ini a ten disi, wi abi troe bribi nanga howpoe. Èn fa a Bigi Sma di e gi pai, poti wan moi howpoe na fesi foe ibriwan foe wi! Te den salfoewan e hori a pai di den sa kisi na hemel na prakseri, dan dati sa jepi den foe dini Gado na wan loyaalfasi, a pisi ten di den sa de na libi ete na grontapoe. Foeroe sma di abi a howpoe foe libi na grontapoe, noiti no sa dede srefi, ma den sma di dede, sa kisi a pai foe wan opobaka na ini Paradijs na grontapoe makandra nanga Job srefi. Nanga so wan troetroe howpoe ini na ati nanga ini a prakseri, meki ala sma di lobi Gado boeweisi taki Satan na wan leiman, foe di den e tanapoe steifi na Jehovah sei leki sma di e hori den soifri retifasi foe den èn sma di na wan getrowfasi e hori baka gi en universeel soevereinfasi.

Fa joe ben sa piki?

◻ San ben de wan toe penti di Job ben taki ini en lasti piki di a ben gi den falsi trowstoeman foe en?

◻ Fa Elihu ben sori foe de wan kotoigi foe Jehovah di no ben teki no wan sma sei?

◻ San ben de wan toe foe den aksi di Gado ben poti gi Job, èn sortoe krakti den ben abi?

◻ Fa joe kisi wini foe a tori di bijbel e froeteri foe Job?

[Prenki na tapoe bladzijde 25]

Den sani di Jehovah ben froeklari foe Behemot nanga Lefiatan, ben jepi Job foe saka ensrefi