Jehovah kan meki joe kon tranga
„A e gi krakti na a wan di weri; èn a wan sondro dinamis energie a e gi tranga pasa marki krinkrin.” — JESAJA 40:29.
1, 2. San na wan toe boeweisi foe Jehovah en krakti di de pasa marki?
JEHOVAH na wan Gado di „abi krakti pasa marki”. Wi kan si boeweisi foe Gado en „têgo krakti nanga Gadofasi”, ini a toemoesi moi fasi foe den sani di a meki, èn di joe kan si èn firi. Den sma di e weigri foe erken a sortoe boeweisi dati foe a de di Gado de a Mekiman foe ala sani, no kan taki den no sabi. — Psalm 147:5; Romesma 1:19, 20.
2 Jehovah en krakti e kon de foe si moro nanga moro, ala di den sabidensiman e loekoe boen fara go na ini na universum foe ondrosoekoe en, di abi den ipi-ipi stari sistema na ini di wi no kan teri èn di de hondrohondro miljoen leti-jari farawe foe dja. Opo ai loekoe go na hemel na wan doengroe neti di krin, èn si efoe joe no e firi leki fa a psalm singiman ben firi: „Te mi e si a hemel foe joe, den wroko foe joe finga, moenkenki nanga den stari di joe sreka, san na libisma di e dede, taki joe e tan prakseri en èn a manpikin foe a libisma foe grontapoe, taki joe e sorgoe gi en?” (Psalm 8:3, 4) Èn o boen Jehovah sorgoe gi libisma, gi wi! A ben gi a fosi man nanga oema wan moi grontapoe tanpe. Srefi a doti foe gron ben abi krakti — foe meki prani gro, èn foe gi gosontoe njanjan di no doti. Libisma nanga meti e kisi skin krakti foe a sori disi di Gado ben sori a krakti foe en krin na a fasi disi. — Genesis 1:12; 4:12; 1 Samuèl 28:22.
3. Sortoe tra sani e sori a krakti foe Gado, na sei foe den sani ini na universum di wi kan si èn firi?
3 Boiti taki hemel e hari a prakseri foe sma èn taki den bon nanga den bromki nanga den meti foe grontapoe moi srefisrefi, den e sori wi krin a krakti foe Gado. Na apostel Paulus ben skrifi: „En eigifasi di wi no kan si, de krin foe si sensi di a meki grontapoe, bikasi joe kan si den nanga jepi foe den sani di ben meki, srefi en têgo krakti nanga Gadofasi” (Romesma 1:20). Ma wan tra boeweisi foe en krakti de, di moesoe kisi a prakseri nanga a warderi foe wi. Joe ben sa kan aksi joesrefi: ’San e sori a krakti foe Gado moro krin leki na universum?’ A piki de Jesus Krestes. Foe taki en leti, na ondro a krakti foe santa jeje, na apostel Paulus e taki dati na anga di Krestes ben anga na wan pina-oedoe, na „a krakti foe Gado èn a koni foe Gado” (1 Korentesma 1:24). ’Foe san ede disi de so?’, joe ben sa kan aksi, ’Èn san a abi foe doe nanga mi libi nownow de?’
A krakti di de foe si nanga jepi foe en Manpikin
4. Fa a krakti foe Gado ben de foe si ini a tori foe en Manpikin?
4 A fosi leisi di a krakti foe Gado ben de foe si, ben de di a ben meki en wan-enkri gebore Manpikin, di a ben meki leki a prenki foe En. A jeje Manpikin disi, ben de gi Jehovah leki wan „meester wrokoman”, foe di a ben gebroiki a krakti foe Gado di pasa marki, di a ben meki ala tra sani (Odo 8:22, 30). Paulus ben skrifi den kresten brada foe en na Kolose: „Nanga jepi foe en, ala tra sani ben meki di de na hemel èn na grontapoe, den sani di wi kan si nanga den sani di wi no kan si . . . Ala tra sani ben meki nanga jepi foe en èn foe en ede.” — Kolosesma 1:15, 16.
5-7. (a) Fa libisma ben abi foe doe nanga a fasi fa a krakti foe Gado ben de foe si ini a ten di pasa? (b) Sortoe reide de foe bribi taki a krakti foe Gado kan de foe si ini a kefal foe kresten ini a ten disi?
5 Wi na wan pisi foe den ’sani di ben meki na grontapoe’. So boen, Gado ben kan gi wi a krakti foe en? We, wanwan leisi di Gado ben handri nanga onvolmaakti libisma, dan a ben gi spesroetoe krakti na den foetoeboi foe en, so taki den ben kan doe den prakseri foe en. Moses ben sabi taki, moro foeroe, libisma e libi 70 noso 80 jari (Psalm 90:10). Fa a ben de nanga Moses srefi? A ben libi 120 jari, tokoe „na ai foe en no ben kon doengroe, èn a krakti foe en skin no ben gowe libi en” (Deuteronomium 34:7). Ala di dati no wani taki, dati Gado e meki ibriwan foe den foetoeboi foe en e libi so langa leki fa Moses ben libi, noso e meki den tan abi so wan krakti, tokoe dati e boeweisi troetroe taki Jehovah kan gi krakti na libisma.
6 Wan sani di e sori moro fara taki Gado man foe gi krakti na mansma nanga oemasma, na san a ben doe nanga a wefi foe Abraham. „Sara srefi ben kisi a krakti foe kisi bere, srefi di a ben pasa a libimarki, bika a ben sabi taki a sma getrow, di ben doe a pramisi.” Noso loekoe fa Jehovah ben gi krakti na den kroetoeman èn na tra sma foe Israèl: „Gideon, Barak, Simson, Jefta, David, so boen leki Samuèl nanga den tra profeiti, di . . . ben meki kon tranga foe wan swaki fasi.” — Hebrewsma 11:11, 32-34.
7 So wan krakti kan tron wan sani di e wroko ini a kefal foe wi toe. Ija, now wi no e froewakti foe kisi bakapikin nanga jepi foe wan wondroe kande, noso kande wi no man sori taki wi tranga so leki fa Simson ben tranga. Ma wi kan de tranga, so leki fa Paulus ben taigi den gewoon sma na Kolose. Ija, Paulus ben skrifi gi mansma, oemasma nanga pikin-nengre, so leki fa wi kan feni den ini den gemeente ini a ten disi, èn a ben taki dati den ben „meki kon tranga nanga ala krakti”. — Kolosesma 1:11.
8, 9. Fa a krakti foe Jehovah ben kon de foe si ini a fosi jarihondro ini a tori foe libisma leki wisrefi?
8 Na a ten foe Jesus en diniwroko na grontapoe, Jehovah ben sori krin taki a krakti foe En ben wroko nanga jepi foe en Manpikin. Foe eksempre, na wan ten di ipi-ipi sma ben kon na Jesus na Kaperna-um, „a krakti foe Jehovah ben de drape, so taki a ben kan dresi sma”. — Lukas 5:17.
9 Baka na opobaka foe Jesus, a ben gi den bakaman foe en a djaranti, taki den ben sa ’kisi krakti te a santa jeje ben kon na den tapoe’ (Tori foe den Apostel 1:8). Fa disi ben de troe! Wan historia skrifiman e froeteri foe den sani di ben pasa wan toe dei baka a Pinksterfesa ini 33 Gewoon Teri: „Nanga bigi krakti den apostel ben go doro foe gi kotoigi ini a tori foe na opobaka foe Masra Jesus” (Tori foe den Apostel 4:33). Paulus srefi ben de wan sma di ben meki kon tranga foe doe a wroko di Gado ben gi en foe doe. Baka di a ben drai en libi èn ben kan si baka, dan a „ben tan kisi krakti moro nanga moro èn a ben tjari broeja kon na mindri den djoe di ben libi na Damaskus, foe di a ben sori na wan krin fasi taki disi na a Krestes”. — Tori foe den Apostel 9:22.
10. Fa a krakti foe Gado ben de wan jepi ini a kefal foe Paulus?
10 Foe troe Paulus ben abi spesroetoe krakti fanowdoe, te wi e prakseri san a ben aksi foe en foe man horidoro na jeje fasi èn na froestan sei, foe kan doe den dri zendingwaka di ben teki doesoendoesoen kilometer. A ben kakafoetoe toe gi ala sortoe problema, a ben horidoro na ini doengroe-oso èn a ben tanapoe na fesi a kisi di a ben sa kisi hebi skin-ati. Fa a ben doe disi? A ben piki: „Masra ben tanapoe krosibei foe mi èn a ben gi mi krakti, so taki nanga jepi foe mi a preikiwroko ben sa kan doe dorodoro.” — 2 Timoteus 4:6-8, 17; 2 Korentesma 11:23-27.
11. Foe sortoe howpoe, ini a tori foe a krakti foe Gado, Paulus ben taki, di ben de gi den kompe foetoeboi foe en na Kolose?
11 Foe dati ede, a no de foe froewondroe, taki Paulus, di a ben skrifi „den brada [foe en] di [ben] de ini wánfasi nanga Krestes” na Kolose, ben gi den a djaranti taki den ben kan ’meki kon tranga nanga ala krakti te na a marki foe a glori makti foe [Jehovah], so taki den ben kan horidoro krinkrin èn ben kan abi langa pasensi nanga prisiri’ (Kolosesma 1:2, 11). Ala di den wortoe dati ben de gi den salfoe kresten ini a fosi presi, tokoe ala sma di e waka ini den foetoestap foe Krestes, kan kisi foeroe wini foe san Paulus ben skrifi.
Den ben meki kon tranga na Kolose
12, 13. San na a reide taki wan brifi ben skrifi gi den Kolosesma, èn fa den ben handri na tapoe dati kande?
12 A gemeente na Kolose, di ben de ini Asia, a distrikt foe Rome, kande ben seti nanga jepi foe a preiki di a getrow kresten di ben nen Epafras, ben e preiki drape. A gersi taki, di Epafras ben jere taki Paulus ben de na doengroe-oso na Rome wan sani foe 58 Gewoon Teri, dan a ben teki a fasti bosroiti foe go loekoe na apostel èn gi en deki-ati, foe di a ben tjari toemoesi boen njoensoe gi en ini a tori foe a lobi foe den brada foe en na Kolose, èn a tanapoe di den ben tanapoe kánkan. Kande Epafras ben froeteri en na wan troe fasi foe wan toe problema ini a gemeente foe Kolose, di ben moesoe meki kon reti. Foe en sei, Paulus ben firi taki a ben moesoe skrifi a gemeente wan brifi foe gi den deki-ati nanga froemane. Joe toe kan kisi boen foeroe deki-ati foe kapitel wán foe a brifi dati, bika a e tjari kon na krin fa Jehovah kan meki den foetoeboi foe en kon tranga.
13 Joe kan prakseri fa den brada nanga sisa na Kolose ben moesoe firi di Paulus ben taki foe den leki „getrow brada ini wánfasi nanga Krestes”. Den ben froedini en foe kisi prèise foe a ’lobi foe den gi ala santawan’ èn foe ’a tjari di den ben tjari froktoe foe a boen njoensoe’, sensi di den ben tron kresten! A de so, taki den kan taki den srefi wortoe disi foe wi gemeente noso foe ibriwan foe wi aparti? — Kolosesma 1:2-8.
14. San ben de a winsi foe Paulus ini a tori foe den Kolosesma?
14 A njoensoe di Paulus ben kisi foe jere ben boeweigi na ati foe en someni, taki a ben taigi den Kolosesma taki a no ben tapoe foe begi gi den èn foe aksi taki den ben „kon foeroe nanga a soifri sabi foe a wani foe [Gado] ini ala koni nanga a jeje koni foe si sani krin, so taki [den] kan waka na wan fasi di fiti Jehovah ai”. A ben begi foe den ’tan tjari froktoe ini ibri boen wroko èn gro ini a soifri sabi foe Gado. Disi den ben kan doe, foe di den ben meki kon tranga nanga ala krakti te na a marki foe a glori makti foe en, so taki den ben kan horidoro krinkrin èn ben kan abi langa pasensi nanga prisiri’. — Kolosesma 1:9-11.
Den meki kon tranga ini a ten disi toe
15. Fa wi kan sori taki wi abi a srefi fasi leki di Paulus ben sori ini san a ben skrifi den Kolosesma?
15 Fa Paulus ben gi wi wan moi eksempre! Wi brada na heri grontapoe abi den begi foe wi fanowdoe, foe den kan horidoro èn kan tan hori a prisiri foe den, ala di den e njan pina. Neleki Paulus, wi moesoe taki finifini foe sani ini den begi foe wi te wi e kisi njoensoe taki brada na ini wan tra gemeente, noso na wan tra kondre, abi problema. Kande wan krosibei gemeente kisi foe doe nanga wan natuur rampoe noso wan problema na jeje fasi. Noso a kan de taki kresten e horidoro na ini wan kondre pe borgoe orlokoe de noso pe sma foe den difrenti lo e kiri makandra. Ini begi wi moesoe aksi Gado foe jepi den brada foe wi „foe waka na wan fasi di fiti Jehovah ai”, foe tan tjari froktoe foe a Kownoekondre, ala di den e horidoro, èn foe gro ini sabi. Na a fasi disi den foetoeboi foe Gado e kisi a krakti foe en jeje, èn „e meki kon tranga nanga ala krakti”. Joe kan de seiker taki joe Tata sa jere èn sa gi piki. — 1 Johanes 5:14, 15.
16, 17. (a) Gi sortoe sani wi ati moesoe firi tangi, so leki fa Paulus ben skrifi? (b) Na sortoe fasi a pipel foe Gado ben kon fri èn ben kisi pardon?
16 Paulus ben skrifi taki den Kolosesma ben moesoe ’taki a Tata tangi di ben meki den kon fiti en ai foe teki prati ini a goedoe foe den santawan ini a leti’. Meki wi srefi taki wi hemel Tata tangi foe a presi di a gi wi ini a seti foe en, efoe disi de ini a hemel kontren noso a grontapoe kontren foe en Kownoekondre. Fa Gado ben meki onvolmaakti libisma fiti en ai? Paulus ben skrifi den salfoe brada foe en: „A ben meki wi kon fri foe a makti foe a doengroe èn ben poti wi abra ini a kownoekondre foe a Manpikin foe en lobi, nanga jepi foe soema wi abi wi froeloesoe nanga jepi foe wan froeloesoe-paiman, a kisi di wi kisi pardon foe wi sondoe.” — Kolosesma 1:12-14.
17 Awansi sortoe howpoe wi abi kande, wan hemel howpoe noso wan grontapoe howpoe, ala dei wi e taki Gado tangi foe a fri di a fri wi foe na ogri seti foe doengroe disi. A fri disi ben doe kon nanga jepi foe a bribi di wi abi ini a warti seti foe a froeloesoe-ofrandi foe Jehovah en lobi Manpikin (Mateus 20:28). Kresten di salfoe nanga santa jeje, kisi wini foe a froeloesoe-paiman di den kisi na wan spesroetoe fasi, so taki den kan ’poti abra ini a kownoekondre foe a Manpikin foe Gado en lobi’ (Lukas 22:20, 29, 30). Ma den „tra skapoe” e kisi wini toe foe a froeloesoe-paiman srefi nownow kaba (Johanes 10:16). Den kan kisi a pardon foe Gado, so taki den kan abi wan regtfardiki posisi na en fesi leki mati foe en. Den abi wan bigi prati na a meki di den e meki „a boen njoensoe disi foe a kownoekondre” bekènti ini a ten disi foe a kaba (Mateus 24:14). Na tapoe foe dati, den abi a kefalek moi howpoe foe kon regtfardiki dorodoro èn foe kon volmaakti na skin fasi, na a kaba foe Krestes en Doesoen Jari Tiri. Te joe e leisi fa Openbaring 7:13-17 e taki foe a tori, dan loekoe efoe joe no e agri taki disi ben sa de wan boeweisi taki wi meki kon fri èn wi e kisi blesi.
18. Foe sortoe sani di Gado e doe ete foe meki sma kon boen baka nanga en, den e taki na Kolosesma?
18 A brifi foe Paulus e jepi wi foe froestan omeni tangi wi moesoe gi na a moro bigi man di oiti ben libi. San Gado ben e doe nanga jepi foe Krestes? „[A ben de] foe meki ala tra sani kon boen baka nanga ensrefi, foe di a ben tjari vrede kon nanga jepi foe a broedoe di a ben trowe na a pina-oedoe, awansi den na den sani na grontapoe noso den sani na hemel.” A prakseri foe Gado de foe tjari ala sani di a meki, kon ini volmaakti wánfasi baka nanga en, so leki fa a ben de bifo den ben opo densrefi teige en na Eden. A Sma di ben gebroiki foe meki ala sani, na a srefi Sma di e gebroiki now foe meki ala sani di Gado meki, kon boen baka nanga En. — Kolosesma 1:20.
Meki kon tranga nanga sortoe sani na prakseri?
19, 20. Foe sortoe sani a e anga taki wi de santa èn sondro flaka?
19 Frantiwortoe e kon na tapoe denwan foe wi, di kon boen baka nanga Gado. Wan ten wi ben de sondari èn wi ben de freimdesma gi Gado. Ma now di wi e poti bribi ini a srakti-ofrandi foe Jesus èn foe di wi no e denki ogri wroko moro, dan ini a gron foe a tori wi de ini wan posisi di ’santa èn di no abi flaka’ èn sma „no man kragi wi na fesi foe [Gado]” (Kolosesma 1:21, 22). Prakseri nomo, neleki fa Gado no ben sjen gi den getrow kotoigi dati foe owroeten, na so a no e sjen gi wi, taki wi e kari en wi Gado (Hebrewsma 11:16). Ini a ten disi, no wan sma kan kragi wi taki wi e tjari a glori nen foe en na wan fasi di no e fiti, noso taki wi e frede foe meki a nen dati bekènti na ala sei foe grontapoe!
20 Ma loekoe a warskow di Paulus ben gi na Kolosesma 1:23: „Boiti efoe, a no de foe taki, oenoe e go doro ini a bribi, di poti steifi na tapoe a fondamenti èn di no e degedege, èn oenoe no e meki sani poeroe oenoe foe a howpoe foe a boen njoensoe dati, di oenoe ben jere èn di ben preiki ini a heri mekisani di de na ondro hemel.” Someni e anga foe a tan di wi e tan getrow na Jehovah, èn a waka di wi e waka ini den foetoestap foe en lobi Manpikin. Jehovah nanga Jesus doe someni gi wi! Meki wi sori wi lobi gi den, foe di wi e waka na baka a rai foe Paulus.
21. Foe san ede wi abi foeroe reide foe meki wi ati djompo foe prisiri ini a ten disi?
21 Na ati foe den kresten foe Kolose ben moesoe djompo foe prisiri, di den ben jere taki ’a boen njoensoe di den ben jere’, ben „preiki [kaba] ini a heri mekisani di de na ondro hemel”. Ini a ten disi na ati foe wi e djompo srefi moro foe prisiri, te wi e jere o fara a boen njoensoe foe a Kownoekondre e meki bekènti nanga jepi foe moro leki fo nanga afoe miljoen Kotoigi ini moro leki 230 kondre. Ija, ibri jari pikinmoro 300.000 sma foe ala nâsi e kon boen baka nanga Gado! — Mateus 24:14; 28:19, 20.
22. San Gado kan doe gi wi, srefi efoe wi e ondrofeni pina?
22 Ala di a ben de krin taki Paulus ben de na doengroe-oso na a ten di a ben skrifi a brifi gi den Kolosesma, tokoe na no wan fasi a ben kragi foe a situwâsi di a ben de na ini. Na presi foe dati, a ben taki: „Now mi e prisiri taki mi e pina foe oenoe ede.” Paulus ben sabi san a ben de foe „horidoro krinkrin èn [foe] ben kan abi langa pasensi nanga prisiri” (Kolosesma 1:11, 24). Ma a ben sabi taki a no ben doe disi nanga en eigi krakti. Jehovah ben meki en kon tranga! Na so a de toe ini a ten disi. Doesoendoesoen Kotoigi di ben de na doengroe-oso èn di ben kisi froefolgoe, no lasi a prisiri foe den foe dini Jehovah. Na presi foe dati, den kon froestan o troe den wortoe foe Gado de, di de foe feni na Jesaja 40:29-31: „A e gi krakti na a wan di weri . . . Den sma di e howpoe tapoe Jehovah sa kisi krakti baka.”
23, 24. San na a santa kibritori di Paulus e kari na Kolosesma 1:26?
23 A diniwroko foe a boen njoensoe di e poti prakseri na tapoe Krestes, ben de toemoesi prenspari gi Paulus. A ben wani taki trawan ben moesoe si a waarde foe a ròl di Krestes abi ini a prakseri foe Gado, èn foe dati ede a ben taki foe dati leki „a santa kibritori di ben kibri gi den seti foe sani di pasa èn gi den geslakti di pasa”. Ma a no ben sa tan wan kibritori ala ten. Paulus ben taki moro fara: „Now a tjari kon na krin gi den santawan foe en” (Kolosesma 1:26). Di sma ben opo densrefi teige Gado na Eden, dan Jehovah ben pramisi taki moro betre sani ben o kon, èn a ben froeteri na fesi taki ’a siri foe na oema ben sa masi na ede foe a sneki’ (Genesis 3:15). San disi ben wani taki? Geslakti baka geslakti, hondrohondro jari langa, a ben tan wan kibritori. Ne Jesus ben kon èn a „ben trowe leti na tapoe a libi èn na tapoe sani di no kan kisi pori, nanga jepi foe a boen njoensoe”. — 2 Timoteus 1:10.
24 Ija, Krestes nanga a Mesian Kownoekondre de a moro prenspari pisi foe a „santa kibritori”. Paulus ben taki foe „den sani na hemel”, èn a ben sori go na den sma di sa abi wan prati na a Kownoekondre tirimakti nanga Krestes. Den sa gebroiki den sma disi foe tjari blesi kon di no abi speri, gi ala den „sani na grontapoe”, den sma di sa njan boen foe wan têgo paradijs djaso. Foe dati ede, joe kan si taki a ben fiti srefisrefi, taki Paulus ben sori go na „a glori goedoe foe a santa kibritori disi”. — Kolosesma 1:20, 27.
25. San moesoe de a fasi fa wi e doe now, so leki fa Kolosesma 1:29 e sori?
25 Paulus ben loekoe fajafaja go na fesi foe kisi a presi foe en ini a Kownoekondre. Ma tokoe a ben froestan taki a no ben de wan sani di a ben kan howpoe na tapoe sondro foe doe wan sani. „Foe troe mi e wroko tranga, èn mi e doe boen foeroe moeiti akroederi a fasi fa a e wroko, èn di e wroko na ini mi nanga krakti” (Kolosesma 1:29). Loekoe taki Jehovah, nanga jepi foe Krestes, ben meki Paulus kon tranga, so taki a ben kan doe a diniwroko di e kibri sma libi. Jehovah kan doe a srefi sani gi wi ini a ten disi. Ma wi moesoe aksi wisrefi: ’Mi abi a jeje foe preiki di mi ben abi, di mi ben leri a waarheid a fosi leisi?’ San na a piki di joe e gi? San kan jepi ibriwan foe wi foe go doro ’foe wroko tranga èn doe boen foeroe moeiti akroederi a fasi fa a krakti foe Jehovah e wroko’? A tra artikel e taki foe a srefi afersi disi.
Joe ben si disi?
◻ Foe san ede wi kan de seiker taki Jehovah kan sori a makti foe en gi a boen foe libisma?
◻ San na a reide foe den wortoe di Paulus ben skrifi na Kolosesma kapitel wán?
◻ Fa Gado e meki sma kon boen baka nanga en, so leki fa a skrifi na Kolosesma 1:20?
◻ San Jehovah kan doe nanga jepi foe wi, ala di a e gebroiki a krakti foe en?
[Karta/Prenki na tapoe bladzijde 21]
(Efoe joe wani si pe den sani disi skrifi, loekoe a tijdschrift)
KOLOSE