Den begi ini bijbel de warti foe go ondrosoekoe den
WAN oema di ben abi sorgoe, wan kownoe, èn Gado en eigi Manpikin ben begi den begi di wi sa go ondrosoekoe finifini now. Difrenti sortoe omstandigheid ben meki taki den sma ben begi so. Tokoe den omstandigheid disi ben sa kan abi krakti tapoe wi ini a ten disi. San wi kan leri foe den eksempre disi?
„Loekoe a kwinsi di joe oema-srafoe e kisi”
Joe e feti nanga wan problema di no wani gowe? Noso den sorgoe di joe abi, de leki wan hebi na joe tapoe? Dan den omstandigheid foe joe gersi di foe Hana bifo a ben kisi en fosi manpikin, Samuèl. Hana no ben abi pikin èn wan tra oema ben e spotoe nanga en. Foe taki en leti, na omstandigheid foe Hana ben gi en someni broko-ede èn a ben abi so foeroe sorgoe, dati a no ben wani njan (1 Samuèl 1:2-8, 15, 16). A ben kon na Jehovah èn a ben begi a tranga begi di e kon now:
„O Jehovah foe den legre, efoe sondro foe misi joe sa loekoe a kwinsi di joe oema-srafoe e kisi èn memre mi troetroe, èn joe no sa frigiti joe oema-srafoe èn troetroe joe sa gi joe oema-srafoe wan manpikin, dan mi sa gi en na Jehovah ala den dei foe en libi, èn no wan sebinefi sa kon na tapoe en ede.” — 1 Samuèl 1:11.
Loekoe taki Hana no ben taki sani, sondro foe taki spesroetoe san a ben wani. A ben taki nanga Jehovah èn a ben aksi en wan spesroetoe sani (wan manpikin) èn a ben bosroiti foe doe wan spesroetoe sani (foe meki a manpikin foe en doe a diniwroko foe Gado doronomo). San a begi disi e leri wi?
Te problema e naki joe, dan taki ini begi spesroetoe san na den problema foe joe. A no abi trobi sortoe problema joe abi — awinsi a de na joe oso sei, a firi di joe e firi joesrefi joe wawan, noso a siki di joe e siki — froeteri Jehovah disi na ini begi. Froeteri Jehovah spesroetoe san na joe problema èn fa joe e firi. „Ibri neti mi e froetrow Jehovah nanga ala mi problema”, na so Louise, wan oema di lasi en masra na ini dede, e taki. „Son leisi den problema lai, ma mi e taigi En ibriwan foe den problema krinkrin.”
Te wi e taki nanga Jehovah nanga spesroetoe wortoe, dan dati e tjari winimarki kon gi wi. Te wi e doe so, dan dati e jepi wi foe froestan wi eigi problema krinkrin, èn dati kan meki taki a problema no gersi so bigi moro leki fa a ben de bifo. Te wi e taki spesroetoe sani ini den begi foe wi, dan dati e froelekti wi foe den sorgoe foe wi. Srefi bifo Hana ben kisi piki tapoe a begi foe en, a ben firi korostoe, èn „a fesi foe en no ben gersi moro, wan sma di abi sorgoe” (1 Samuèl 1:18). Boiti dati, te wi e taki spesroetoe san wi abi foe taki, dan dati e meki taki wi de na ai foe si a piki tapoe a begi foe wi. „O moro mi e taki ini den begi foe mi spesroetoe san mi e denki,” na so Bernhard, wan kresten na Doisrikondre, e taki, „o moro krin den piki tapoe den begi foe mi de.”
„Mi na soso wan pikin boi”
Ma tokoe, wan sma ben sa kan firi wan tra sortoe foe broko-ede te a e kisi wan toewijzing di a e firi taki a no man doe en. Son tron joe e firi taki den frantiwortoe di joe kisi foe Jehovah de toemoesi foeroe? Noso wan toe sma e si joe leki wan sma di no boen gi a toewijzing di joe kisi? A jongoe kownoe Salomo ben de ini a srefi sortoe omstandigheid dati, di den ben salfoe en foe de kownoe foe Israèl. Wan toe heihei man ben wani, taki wan tra sma ben moesoe tron kownoe (1 Kownoe 1:5-7, 41-46; 2:13-22). Ini a bigin foe a tiri foe en, Salomo ben aksi wan sani ini begi:
„Jehovah mi Gado, joesrefi meki joe foetoeboi tron kownoe . . . Mi na soso wan pikin boi. Mi no sabi fa mi moesoe go èn fa mi moesoe kon na inisei. . . . Gi joe foetoeboi wan ati di e gi jesi foe kroetoe joe pipel, foe man si krin san boen èn san takroe.” — 1 Kownoe 3:7-9.
A begi foe Salomo ben drai lontoe a boen matifasi di Salomo ben abi nanga Jehovah, a grani di a ben kisi, èn a man di a ben sa man klari a toewijzing di a kisi foe doe. Na a srefi fasi, te wi e kisi frantiwortoe di wi firi taki wi no man doe en, dan wi moesoe begi Jehovah fajafaja foe sreka wi so taki wi kan doe a wroko. Poti prakseri tapoe den ondrofenitori di e kon now:
„Di den brada ben aksi mi foe teki moro frantiwortoe na a bijkantoro foe a Waktitoren Genootschap,” na so Eugene e tjari kon na krin, „dan mi ben firi taki mi no man doe en srefisrefi. Trawan ben de di ben moro betre leki mi èn di ben ondrofeni moro foeroe. Den toe neti di ben kon, mi no ben man sribi foeroe, foe di mi ben gebroiki moro foeroe foe a ten foe begi, èn dati ben tranga mi èn a ben gi mi a djaranti di mi ben abi fanowdoe.”
Sma ben aksi Roy foe hori wan lezing na wan beri, foe di wantronso wan jongoe mati di boen foeroe sma ben sabi, ben dede wan sari dede. A ben de seiker taki hondrohondro sma ben sa kon na a beri. San Roy ben doe? „A no foeroe leisi mi begi someni foe kisi krakti èn foe man feni den joisti wortoe foe taki, foe taigi den sma sani di kan bow den èn di kan trowstoe den.”
Te a Mekiman ’e meki sani go moro esi’ èn te na organisâsi foe en e gro, dan a de logis, taki moro foe den foetoeboi foe en e kisi frantiwortoe (Jesaja 60:22). Efoe den brada e aksi joe foe abi wan moro bigi prati, dan joe kan de seiker taki Jehovah kan jepi joe tapoe ala kontren pe joe e misi, soleki a ondrofeni di joe ondrofeni sani, a leri di joe leri sani, noso a man di joe man doe sani. Kon na fesi foe Gado na a srefi fasi fa Salomo ben doe dati, èn Gado sa gi joe san joe abi fanowdoe gi a toewijzing foe joe.
„Taki den alamala kan de wán”
Wan di foe dri omstandigheid di e opo ede kon nownowde, na te wan sma moesoe begi gi wan groepoe sma. Te sma e aksi wi foe begi pe tra sma de toe, dan san wi moesoe begi? Poti prakseri tapoe a begi foe Jesus soleki fa a skrifi na Johanes kapitel 17. Jesus ben begi a begi disi, ala di den disipel foe en ben de drape toe na a lasti neti foe en leki wan libisma. Sortoe faja begi a ben begi a hemel Tata foe en?
Jesus ben poti krakti tapoe den srefi marki èn a srefi howpoe di den alamala drape ben abi. A ben taki foe a kisi di a nen foe Jehovah Gado ben moesoe kisi glori èn foe a meki di a Kownoekondre ben moesoe meki bekènti na sma. Jesus ben poti krakti tapoe a warti di wan persoonlijk matifasi nanga a Tata nanga a Manpikin warti, ala di a matifasi disi abi en gron tapoe a sabi foe den Boekoe foe bijbel. A ben taki foe a prati di den foetoeboi foe en no moesoe abi nanga grontapoe, èn dati ben sa sreka den tapoe froefolgoe. Krestes ben aksi en Tata toe foe kibri den disipel èn foe tjari den kon na wán ini a troe anbegi.
Ija, Jesus ben poti krakti tapoe wánfasi (Johanes 17:20, 21). Na mofoneti, a srefi neti dati, den disipel ben kisi wan pikin-nengre sortoe trobi (Lukas 22:24-27). Ma tokoe, ini begi, Krestes no ben soekoe foe froemane sma, ma foe tjari den kon na wán. Na a srefi fasi, den begi di sma e begi na ini na osofamiri èn na ini a gemeente moesoe meki lobi go na fesi èn den begi disi moesoe soekoe foe loesoe den problema na mindri sma. Den sma di de drape foe arki a begi foe a sma di e teki fesi, moesoe man kon makandra na ini wánfasi. — Psalm 133:1-3.
A wánfasi disi de foe si te den wan di e arki a begi e taki: „Amen”, noso „Na so a de”, na a kaba foe a begi. Foe man doe dati, den moesoe froestan ala sani di ben taki èn den moesoe agri nanga dati. Foe dati ede, a no ben sa fiti foe taki wan sani ini a begi di wan toe sma no sabi. Foe eksempre, wan owroeman di e begi gi wan gemeente, ben sa kan aksi Jehovah en blesi gi wan brada noso sisa na jejefasi, di siki serjoesoe. Ma a ben sa de wan boen gwenti efoe a e doe disi soso te moro foeroe foe den sma gi soema a e begi, sabi a sma dati èn sabi taki a sma siki.
Loekoe toe, taki Jesus no ben kari ala den pikinpikin sani di ibriwan foe a groepoe ben abi fanowdoe. Efoe a ben sa doe dati, dan a ben sa kari persoonlijk sani foe wan toe sma di soso den sma dati sabi. Persoonlijk broko-ede foe wan sma, na wan afersi di fiti foe taki ini wan persoonlijk begi, di kan langa so langa a sma wani èn o persoonlijk a sma wani en toe.
Fa wan sma moesoe sreka ensrefi foe begi gi wan bigi groepoe foe anbegiman? Wan kresten di ondrofeni foeroe, e tjari kon na krin: „Na fesi kaba mi e bigin poti prakseri tapoe san mi moesoe taki tangi, san den brada ben sa kan abi fanowdoe, èn sortoe persoonlijk sani mi kan begi gi den. Mi e poti den sani di mi wani taki, so srefi den wortoe foe prèise, ini a joisti presi ini mi denki. Bifo mi e begi na poebliki, mi e begi safri foe aksi jepi, so taki mi kan begi gi den brada na wan fasi di fiti.”
A e gersi taki, awinsi san na den omstandigheid foe joe, joe sa feni wan begi ini bijbel di wan sma ben begi ini wan omstandigheid di de a srefi leki a di foe joe. Den foeroe sortoe begi di de na ini den Boekoe foe bijbel, de wan boeweisi foe a lobi boen-atifasi foe Gado. Te joe e leisi den begi disi èn te joe e prakseri dipi foe den, dan dati sa jepi joe foe meki den begi foe joe kon moro boen.
[Faki na tapoe bladzijde 5]
BEGI DI DE NA INI BIJBEL ÈN DI E HARI A PRAKSERI FOE SMA
Den foetoeboi foe Jehovah ben begi na ondro foeroe difrenti sortoe situwâsi. Joe kan feni joesrefi ini wán noso moro foe den situwâsi di e kon now?
Joe abi tiri foe Gado fanowdoe, soleki fa Eli-eser ben abi dati fanowdoe? — Genesis 24:12-14.
Joe abi foe doe nanga kefar di de krosibei, soleki fa a ben de nanga Jakob? — Genesis 32:9-12.
Joe wani foe kon sabi Gado moro boen, soleki fa Moses ben wani dati? — Exodus 33:12-17.
Joe abi foe doe nanga gensman, soleki fa Elia ben abi foe doe nanga den? — 1 Kownoe 18:36, 37.
A de wan moeilek sani gi joe foe preiki, soleki fa a ben de gi Jeremia? — Jeremia 20:7-12.
Joe moesoe taki foe sondoe èn joe wani foe kisi pardon, soleki fa Danièl ben abi foe doe dati? — Danièl 9:3-19.
Joe e ondrofeni froefolgoe, soleki fa den disipel foe Jesus ben ondrofeni dati? — Tori foe den Apostel 4:24-31.
Loekoe so srefi Mateus 6:9-13; Johanes 17:1-26; Filipisma 4:6, 7; Jakobus 5:16.
[Faki na tapoe bladzijde 6]
SAN WAN SMA KAN BEGI TE A E FETI NANGA WAN OWROE GWENTI
Joe e feti nanga wan swakifasi di e kon ibritron baka? Fa den begi di skrifi na ini bijbel, kan de wan jepi gi joe? Leri foe David, di ben begi na difrenti ten ini a tori foe en eigi swakifasi.
David ben singi: „Ondrosoekoe mi, O Gado, èn sabi mi ati. Ondrosoekoe mi, èn sabi den prakseri di e trobi mi” (Psalm 139:23). David ben winsi, taki Jehovah Gado ben soekoe èn ben feni den lostoe foe en, den firi foe en, noso den sani di ben poesoe en, èn den sani di no ben fiti. Foe taki en tra fasi, David ben aksi Jehovah foe jepi en foe wai pasi gi sondoe.
Ma den swakifasi foe David ben wini en, èn a sondoe foe en ben bigi. Agen, na begi ben jepi David — a leisi disi a ben jepi en foe meki a matifasi di a ben abi nanga Gado, kon boen baka. Soleki fa Psalm 51:2 e taki, dan David ben begi: „Wasi a fowtoe foe mi poeroe krinkrin, èn krin mi foe a sondoe foe mi srefi.”
Nanga sakafasi wisrefi kan begi Jehovah foe a jepi wi foe feti nanga den gwenti di no boen. Disi sa gi wi krakti foe wini wan owroe swakifasi èn a kan jepi wi foe wai pasi gi sondoe. Efoe wi fadon baka, dan wi moesoe go na Jehovah baka nanga faja begi, so taki A e jepi wi foe go doro nanga a feti.
[Prenki na tapoe bladzijde 7]
Begi di sma e begi gi wan groepoe sma, moesoe poti krakti tapoe den howpoe ini den Boekoe foe bijbel èn tapoe marki na jeje fasi di ala sma ini a groepoe abi