Aksi foe leisiman

Fa sma moesoe tjari densrefi te trawan e teki dopoe leki kresten?

Dati na wan aksi di e hari wi prakseri, bika, ala di foeroe foe wi leisiman dopoe kaba, tokoe den abi foe doe nanga a tori disi, èn so srefi toe den wan di moesoe teki dopoe now. Meki wi taki fosi foe den wan di e teki dopoe, di den e doekroen den krinkrin go ondro watra. Fa den moesoe tjari densrefi?

Na Mateus 28:19, 20, Jesus ben taigi den bakaman foe en foe go èn foe meki disipel foe sma, e leri den èn e dopoe den. Jesus no ben sori taki a dopoe di wan sma e dopoe, de neleki wan toemoesi emotioneel ondrofenitori, wan sani di wan sma e doe foe di a de nanga faja èn nanga prisiri tapoe a momenti dati. A ben de wan serjoesoe sani, soleki fa wi e si foe na eksempre foe Jesus. Lukas 3:21 e taki: „Jesus srefi ben teki dopoe toe, èn a srefi joeroe ala di a ben begi, hemel ben kon opo gi en.” Ija, wi Eksempre ben si a dopoe leki wan serjoesoe sani, èn a ben teki dopoe na ondro begi. Baka di Jesus komoto ondro watra, wi no kan prakseri foe Jesus, leki wan sma di e meki wan simbôl taki a wini, leki wan sma di e bari, noso leki wan sma di e trowe en anoe go na loktoe. Tokoe, dati na san wan toe sma doe no so langa pasa. Nôno, Jesus ben begi en Tata, èn soso Johanes a Dopoeman ben drape.

Na a tra sei, bijbel no e taki dati dopoe moesoe de wan sari sani, èn taki a sma moesoe teki wan spesroetoe postiri èn moesoe taki spesroetoe sani ibritron baka, soleki fa wan toe kerki foe krestenhèit e aksi foe sma tide. We, prakseri a dei foe a Pinksterfesa, di doesoen nanga doesoen djoe nanga proselietsma ben teki dopoe leki kresten. Den ben studeri a wet foe Gado kaba, èn den ben kon abi wan matifasi nanga en. So boen, a wan-enkri sani di den ben moesoe doe ete, na foe teki leri foe Jesus èn foe teki en leki a Mesias. Te den ben doe dati, dan den ben kan teki dopoe.

Tori foe den Apostel 2:41 e taki: „Den wan di ben teki a wortoe foe en nanga prisiri, ben teki dopoe toe.” Te joe e leisi na ini a bijbel foe Weymouth, dan joe e leisi: „Foe dati ede, den wan di ben prisiri foe teki a wortoe foe en, ben teki dopoe.” Den ben feni prisiri ini a span njoensoe foe a Mesias, èn, a no de foe taki dati a prisiri di den ben prisiri srefisrefi, ben meki taki densrefi ben teki dopoe, wan dopoe na fesi foe hondrohondro sma di ben prisiri foe loekoe den wan di ben teki dopoe. Srefi den engel na hemel ben e loekoe èn ben e breiti. Memre den wortoe foe Jesus: „Mi taki gi oenoe, taki, so srefi den engel foe Gado sa prisiri toe foe wan-enkri sondari, di drai en libi.” — Lukas 15:10.

Difrenti fasi de, fa ibriwan foe wi kan sori taki a teki di sma e teki dopoe, na wan serjoesoe sani èn taki a de wan prisiri sani toe. Na son kerki, den sma di e teki dopoe e weri weti krosi noso blaka krosi. Troetroe, den Boekoe foe bijbel no e horibaka gi so wan prakseri. Tokoe, krosi di e meki sma si san de ondro den krosi, no ben sa fiti. A no abi trobi efoe na mansma, noso na oemasma e weri so. Èn soleki fa wi ben taki kaba, te wan sma e komoto ondro a watra, dan a njoen kresten no abi foe tjari ensrefi leki wan sma di wini wan bigi strei. Den tra sma foe a kresten bradafasi e breiti taki a njoen sma ben teki dopoe. A njoen sma sa moesoe froestan taki a sori di a e sori bribi foe di a teki dopoe, na soso wan bigin foe a langa pasi foe hori en soifri retifasi, èn na so wan fasi a e feni boen na Gado. — Mateus 16:24.

Wi, leki sma na ini a poebliki di e loekoe te trawan e teki dopoe, e prisiri toe nanga den na a okasi dati, spesroetoe te a sma dati na wan famiri foe wi noso wan sma nanga soema wi ben studeri bijbel. Ma, foe prisiri troetroe, wi moesoe arki a heri lezing gi den sma di sa teki dopoe, jere a piki di den e gi tapoe den aksi na poebliki, èn wi moesoe begi makandra nanga den toe. Efoe wi e doe so, dan dati sa jepi foe si a dopoe leki fa wi moesoe si en; wi sa si en na a fasi fa Gado e si a dopoe. Baka te wan sma teki dopoe, dan a no de fanowdoe foe hori wan fesa, noso foe gi bromki, noso foe hori wan dansi, soso foe sori fa wi e prisiri nanga a dopoe di wan sma dopoe. Ma, wi ben sa kan go na wi njoen brada noso sisa foe sori fa wi e prisiri foe a toemoesi moi sani di a doe èn foe gi en wan switi kon na ini a kresten bradafasi foe wi.

Foe taki en sjatoe, wi alamala, so srefi den wan di den sa doekroen ondro watra foe teki dopoe, moesoe si a dopoe leki wan serjoesoe sani. A no de a ten foe bari tranga, foe hori dansi, noso foe meki toemoesi foeroe prisiri. Ma, a no de wan ten foe sari toe. Nanga reti, wi kan breiti taki njoen sma kon makandra nanga wi foe waka tapoe a pasi foe têgo libi. Èn wi kan gi den njoen brada nanga sisa foe wi, wan switi kon.

[Wan prenki di e tapoe heri bladzijde 31]