Wan njoen libi gi den afo foe wi

A DE so, taki Gado Wortoe, bijbel, e leri taki ibriwan sma di dede, e pasa go langalanga foe go doro foe libi na ini a jeje kondre? Nôno, bijbel no e leri dati. Bijbel e pristeri wan toemoesi moi howpoe foe libi baka dede, ma no na a fasi fa foeroe sma e prakseri.

Prakseri san bijbel e taki foe Adam, a fosi afo foe wi. Jehovah ben meki en „foe a doti foe a gron” (Genesis 2:7). Adam ben abi na okasi foe libi foe têgo na ini kolokoe na grontapoe (Genesis 2:16, 17). Ma, a ben opo ensrefi teige a lobi-ati Mekiman foe en, èn a bakapisi foe dati ben de dede.

Pe Adam ben go di a dede? Gado ben taigi en: „Joe [sa] drai go baka na a gron, bika na drape Gado ben teki joe poeroe. Bika doti joe de èn na doti joe sa drai go baka.” — Genesis 3:19.

Pe Adam ben de bifo Jehovah ben meki en foe doti? No wan presi. Adam no ben de. So boen, di Jehovah ben taigi Adam taki a ben sa „drai go baka na gron”, a wan-enkri sani di A ben wani taki, na dati Adam ben sa de sondro libi baka, neleki doti. Adam no ’pasa go na wan tra presi’ foe de a tata di ben bigin nanga wan grontapoe pe soso jeje foe den afo foe wi e libi. Èn so srefi toe a no ben pasa go foe libi wan kolokoe libi na hemel èn a no ben pasa go foe njan pina foe têgo na ini wan presi pe sma e kisi têgo skin-ati. A wan-enkri kenki di feni presi na ini a kefal foe Adam, na dati a kenki foe wan sma di ben libi, kon tron wan sma di no ben libi, foe wan sma di ben de, kon tron wan sma di no ben de.

Fa a de nanga ala den tra sma foe a heri libisma famiri? A de so, taki den bakapikin foe Adam e tapoe foe libi toe te den dede? Bijbel e piki: „Alamala [libisma nanga meti] e go na wán presi. Den alamala komoto na doti, èn den alamala e drai go baka na doti.” — Preikiman 3:19, 20.

Fa a de nanga den dedewan

Ija, den dedewan de sondro libi, èn den no man jere, si, taki, noso denki. Foe eksempre, bijbel e taki: „Den wan di de na libi, sabi taki den o dede; ma gi den dedewan, den no sabi notinoti . . . A lobi foe den nanga a wani di den no wani si trawan na ai èn a djaroesoe foe den, pori gowe kaba.” Bijbel e taki toe: „No wan wroko noso prakseri noso sabi noso koni no de na ini Sjeol [a grebi], a presi pe joe e go.” — Preikiman 9:5, 6, 10.

Foe dati ede, soleki fa Gado Wortoe e taki, dan te sma de na libi, dan den sabi taki dede de. Ma, te dede kon, dan den no sabi notinoti. Den no e tanapoe sei den eigi dedeskin, e loekoe san sma e doe nanga a skin. Te wan sma no de na libi, dan a no e firi switi èn a no abi pen toe, a no abi prisiri èn a no abi sorgoe. Den wan di dede no sabi taki ten e pasa. A fasi fa den de, den no sabi notinoti moro, moro dipi srefi leki te wan sma e sribi.

Job, wan fositen foetoeboi foe Gado, ben sabi taki sma no ben sa libi go doro, baka te den dede. A ben froestan toe taki sondro a jepi foe Gado, howpoe no ben sa de foe kon na libi baka. Job ben taki: „Wan gosontoe tranga man e dede èn a e didon leki wan sma di lasi; èn wan libisma foe grontapoe e blo en lasti blo, èn pe a de? [A] abi foe didon èn a no man opo moro” (Job 14:10, 12). Seiker, Job no ben froewakti taki te a dede, dan a ben o go moksi nanga den afo foe en na ini wan grontapoe foe jeje.

A howpoe foe na opobaka

Foe di den sma di e libi, e tapoe nanga libi te den dede, dan a moro prenspari aksi na a wan di Job ben poti di a ben go doro foe aksi: „Efoe wan gosontoe tranga man dede, a kan libi baka?” Job srefi ben gi a piki disi: „Ala den dei foe mi wroko di mi moesoe doe nanga dwengi [a ten na ini a grebi], mi sa wakti, te leki a froeloesoe foe mi kon. Joe [Jehovah] sa kari, èn misrefi sa piki joe. Gi a wroko foe na anoe foe joe, joe sa abi wan tranga angri.” — Job 14:14, 15.

Nanga tra wortoe, ala di Job ben sa kon tron wan sma di no de moro, tokoe Gado no ben sa frigiti en. Job ben abi bribi taki a ten ben o kon pe Jehovah Gado ben sa „kari” en baka, foe libi nanga jepi foe wan opobaka.

Jesus Krestes, a Manpikin foe Gado, ben sori taki a howpoe di Job ben abi na ini na opobaka, no ben de wan soso sani. Jesus ben boeweisi taki dedesma kan opo baka. Fa? Foe di Jesus srefi ben opo sma na dede! Jesus no ben de drape foe gi Job wan opobaka, ma di Jesus ben de na grontapoe, a ben opo wan manpikin baka foe wan weduwe foe a foto Nain. Jesus ben gi wan oemapikin foe twarfoe jari, foe wan man nen Ja-irus, wan opobaka toe. Èn Jesus ben opo en mati Lasarus baka, ala di Lasarus ben dede gi fo dei kaba. — Lukas 7:11-15; 8:41, 42, 49-56; Johanes 11:38-44.

Boiti den wondroe disi di Jesus ben doe, a ben taki foe wan gran opobaka na ini a ten di e kon. A ben taki: „A joeroe e kon pe ala den wan di de na ini den memre grebi sa jere en sten èn sa kon na doro” (Johanes 5:28, 29). Baka dati, Jehovah ben gebroiki na apostel Paulus foe opo wan jonkoeman na dede baka. Èn so srefi toe, Paulus ben sori taki a e bribi na ini wan opobaka na ini a ten di e kon, di a ben taki: „Mi howpoe de tapoe Gado . . . taki wan opobaka sa de foe den regtfardikiwan nanga den onregtfardikiwan.” — Tori foe den Apostel 20:7-12; 24:15.

Den tekst disi di e sori go na wan opobaka na ini a ten di e kon, no abi foe doe nanga libi di e go doro na ini a jeje kondre. Den e sori go na a ten pe miljoenmiljoen sma di dede, sa opo baka foe libi nanga libisma skin, leti djaso na grontapoe. Den sma disi di kisi wan opobaka, no sa de sma di no e memre san den ben doe na ini a fosi libi foe den, djaso na grontapoe. Den no sa gebore baka leki pikin-nengre. Na presi foe dati, den sa de densrefi sma di den ben de na a dede foe den, èn den sa abi a srefi persoonlijkheid di den ben abi fosi èn so toe den sa kan memre den srefi sani foe fosi. Densrefi sa kan kon sabi densrefi baka, èn so srefi trawan sa sabi soema na den. Fa disi sa de wan prisiri sani te den sma disi e miti den mati èn den famiri foe den baka! Èn fa a sa de wan span momenti foe miti den afo foe wi!

Wan opobaka foe libi na ini hemel

Jesus no ben taki dati wan toe sma ben sa go na hemel? Ija, a ben taki dati. Tapoe a neti bifo den ben kiri Jesus, a ben taki: „Na ini na oso foe mi Tata foeroe tanpresi de. . . . Mi e go drape foe sreka wan presi gi oenoe. Èn te mi go sreka wan presi gi oenoe drape, dan mi e kon baka èn mi sa teki oenoe go na mi oso, so taki oenoe kan de toe pe mi de” (Johanes 14:2, 3). Jesus ben taki nanga den getrow apostel foe en, ma den wortoe foe en no wani taki dati ala boen sma e go na hemel.

Jesus ben sori taki den wan di sa opo baka na ini hemel, moesoe doro tra marki leki libi wan boen libi nomo. Wan foe den marki di den moesoe doro, na foe abi soifri sabi foe Jehovah èn a prakseri foe en (Johanes 17:3). Tra marki di den moesoe doro, na foe sori bribi na ini a loesoe-paiman foe Jesus Krestes èn foe arki Gado (Johanes 3:16; 1 Johanes 5:3). Boiti dati, wan tra marki di den moesoe doro na foe „kon gebore njoen baka” leki wan dopoe kresten di wiki nanga Gado en santa jeje (Johanes 1:12, 13; 3:3-6). Moro fara, wan tra marki di sma moesoe doro foe libi na ini hemel, na foe horidoro neleki fa Jesus ben doe dati foe sori taki den tan getrow na Gado, srefi te na dede. — Lukas 22:29; Openbaring 2:10.

Wan reide de foe san ede sma moesoe doro den hei markitiki disi. Den wan di kisi wan opobaka foe libi na hemel, abi wan prenspari wroko foe doe. Jehovah ben sabi taki den tiri foe libisma noiti no ben sa man tiri den afersi na grontapoe nanga boen bakapisi. So boen, a ben seti sani gi wan hemel tiri, noso Kownoekondre, di ben sa tiri a libisma famiri (Mateus 6:9, 10). Jesus ben sa de a Kownoe foe a Kownoekondre dati (Danièl 7:13, 14). Son sma di a froekisi foe grontapoe èn di kisi wan opobaka na hemel, ben sa tiri nanga Jesus. Bijbel ben taki na fesi dati den sma disi di kisi wan opobaka na hemel, ben sa kon tron „wan kownoekondre nanga priester foe wi Gado, èn den [ben sa] tiri leki kownoe na grontapoe”. — Openbaring 5:10.

A ben sa de so, taki wan bigi nomroe foe sma e doro den hei marki gi wan hemel opobaka? Nôno. Foeroe foe den sma di e sribi na ini dede, no boen foe libi na ini hemel, èn dati no de foe di den ben abi a fowtoe. Foeroe foe den no ben abi na okasi foe leri a waarheid foe Jehovah èn den prakseri foe en. Den ben libi èn den dede, sondro foe den kisi sabi foe Jesus Krestes noso foe a Kownoekondre foe Gado.

Jesus ben kari den wan di ben sa go na hemel, wan „pikin ipi” (Lukas 12:32). Baka ten, a ben kon na krin taki a nomroe foe den sma disi di „ben bai foe grontapoe” foe tiri nanga Krestes na hemel, ben sa de 144.000 (Openbaring 14:1-3; 20:6). Ala di 144.000 na wan nomroe di bigi nofo gi den „foeroe tanpresi” di Jesus ben taki foe en, tokoe a de wan pikin nomroe efoe joe teki en gersi nanga den miljardmiljard sma di kon foe Adam. — Johanes 14:2.

Sani di o pasa bifo na opobaka na grontapoe bigin

Meki wi loekoe sjatoe baka, den sani di wi ben taki foe den te leki now. Soleki fa bijbel e taki, den wan di dede, no e libi, baka a dede foe den, te leki Jehovah Gado gi den wan opobaka. Son wan e opo baka foe kisi libi na hemel, pe den sa tiri nanga Jesus Krestes na ini a Kownoekondre tiri. Moro foeroe foe den sma sa opo baka foe libi na grontapoe, pe den sa tron borgoe foe a Kownoekondre dati.

Nanga jepi foe na opobaka na grontapoe, Jehovah sa meki wan pisi foe a prakseri foe en gi grontapoe, kon troe. Jehovah ben meki grontapoe „foe sma libi na en tapoe” (Jesaja 45:18). A ben moesoe de a tanpresi foe a libisma famiri gi alaten. Foe dati ede, a psalm singiman ben singi: „Foe taki foe hemel, den hemel na foe Jehovah, ma grontapoe a gi na den manpikin foe libisma.” — Psalm 115:16.

Bifo na opobaka foe kisi libi na grontapoe e bigin, bigi kenki moesoe feni presi. Kande joe sa agri taki a no ben de a prakseri foe Gado, foe grontapoe kon foeroe nanga feti, nanga a doti di den e doti grontapoe, nanga ogridoe, èn nanga ogri di doe nanga tranga. Den problema disi e kon foe sma di no e lespeki Gado èn den regtfardiki wet foe en. Foe dati ede, Gado Kownoekondre sa „pori ala sma di e pori grontapoe” — èn dati na wan bigi sani di sa pasa foe meki a wani foe Gado feni presi na grontapoe (Openbaring 11:18). A Kownoekondre sa pori ala ogri sma, èn a sa gi pasi taki den regtfardiki sma kan tan abra foe libi na grontapoe foe têgo. — Psalm 37:9, 29.

Paradijs na grontapoe

Den sma di sa opo baka foe libi tapoe wan krin grontapoe, na safri-ati sma di e broko den ede nanga trawan èn di e doe retidoe. (Teki gersi Mateus 5:5.) Na ondro a lobi tiri di den e kisi foe a Kownoekondre foe Gado, den sa libi kolokoe na ini seikerfasi. Bijbel e sori heri moi na fesi, den situwâsi di sa de foe si na ini a ten dati: „[Gado] sa figi ala watra-ai poeroe na den ai foe den, èn dede no sa de moro, no wan sari, no wan babari, noso no wan skin-ati no sa de moro. Den fosi sani pasa gowe.” — Openbaring 21:4.

Ija, grontapoe sa kenki kon tron wan paradijs (Lukas 23:43). Prakseri san dati sa wani taki! Ati-oso nanga presi pe den e sorgoe gi owroe sma nanga tra sma di no kan kon betre, no sa de fanowdoe moro. Na ini paradijs, den sma di e kisi kwinsi foe di den na owroe sma, sa kon tron krakti sma di kon gosontoe baka (Job 33:25; Jesaja 35:5, 6). Beripe, grebiston, èn oso pe dedeskin de, no sa de fanowdoe moro. Nanga jepi foe a Kownoekondre foe en, Jehovah sa „swari dede foe têgo” (Jesaja 25:8). Den sortoe blesi disi, seiker sa wani taki wan njoen libi gi wi èn gi den afo foe wi.

[Prenki na tapoe bladzijde 5]

Den sma di opo baka foe libi na grontapoe sa de borgoe foe a Kownoekondre