Ala di wi de nanga sari, wi no de sondro howpoe
„Wi no wani foe oenoe no sabi foe den wan di e sribi na ini dede; so taki oenoe no e sari leki den trawan di no abi howpoe.” — 1 TESALONIKASMA 4:13.
1. San a libisma famiri e ondrofeni doronomo?
JOE lasi wan lobiwan na ini dede? Awinsi o jongoe noso o owroe wi de, moro foeroe foe wi ben sari foe di wan famiri noso wan mati ben dede. Kande a ben de wan foe den gransma foe wi, wan mama noso papa, wan trowpatna, noso wan pikin. A grani di sma e grani, siki, nanga onkolokoe, na sani di e meki sma e dede doronomo. Ogridoe, ogri di doe nanga tranga, nanga feti e meki moro takroe situwâsi nanga sari de. Ibri jari na heri grontapoe, wan gemiddelde foe moro leki 50 miljoen sma e dede. Na ini 1993 dati ben de wan gemiddelde foe 140.250 sma ibri dei. A takroe bakapisi foe dede abi krakti na tapoe mati nanga famiri, èn a firi di den abi foe di den lasi wan sma, dipi.
2. Sortoe sani no de normaal na a dede di pikin e dede?
2 Wi no e firi nanga a papa nanga mama na California, Verenigde Staten foe Amerkankondre, di lasi na wan sari fasi wan oemapikin foe den di ben de nanga bere, na ini wan onfroewakti oto onkolokoe? Tapoe wan momenti pe den no ben froewakti wan sani, den ben lasi a wan-enkri oemapikin foe den èn so srefi a beibi di ben o de den fosi granpikin. A masra ben lasi en wefi nanga en fosi manpikin noso oemapikin. A no de wan gewoon sani srefisrefi gi wan mama nanga wan papa foe pina na ondro a dede foe wan pikin, awinsi a pikin jongoe ete noso a moro owroe. A no de wan gewoon sani taki pikin e dede bifo den papa nanga mama dede. Wi alamala lobi a libi. Foe dati ede, dede na wan troetroe feanti. — 1 Korentesma 15:26.
Dede e tron wan pisi foe a libisma famiri
3. Fa a dede foe Abel ben kan abi krakti na tapoe Adam nanga Eva?
3 Sondoe nanga dede tiri leki kownoe gi sowan siksi doesoen jari kaba na ini a libisma historia, foe sensi wi fosi libisma papa nanga mama, Adam nanga Eva, ben opo densrefi teige Gado (Romesma 5:14; 6:12, 23). Bijbel no e taigi wi fa den ben handri baka di Kain ben kiri Abel. Gi moro leki wán reide a sani disi ben moesoe de wan kefalek takroe ondrofeni gi den. Drape gi a fosi tron, den ben ondrofeni fa a de troetroe te sma e dede, di ben de foe si na ini a kefal foe den eigi manpikin. Den ben si den froktoe foe na opo di den ben opo densrefi teige Gado èn foe a tan di den ben tan go doro foe no gebroiki na wan boenfasi a friwani di den ben abi. Ala di Gado ben e warskow Kain, tokoe Kain ben froekisi foe de a fosi sma di ben kiri en eigi brada. Wi sabi taki a dede foe Abel ben moesoe foe seki Eva srefisrefi, bikasi di a ben kisi Seth, a ben taki: „Gado poti wan tra siri na a presi foe Abel, bikasi Kain ben kiri en.” — Genesis 4:3-8, 25.
4. Foe san ede a leitori taki wan sili no man dede, no ben kan de wan trowstoe, baka di Abel dede?
4 Wi fosi libisma papa nanga mama ben si a troetroe strafoe toe di Gado ben tjari na den tapoe — taki efoe den ben opo densrefi teige Gado èn den no ben gi jesi na en, dan den ben o „dede nomonomo”. Ala di Satan ben lei, tokoe soleki fa a sori, dan a leitori taki a sili no man dede, no ben opo ede kon ete, so boen den no ben kan feni no wan falsi trowstoe foe na idea dati. Gado ben taigi Adam: „Joe sa . . . drai go baka na gron, bika na drape Gado ben teki joe poeroe. Bika doti joe de èn na doti joe sa drai go baka.” Gado no ben taigi Adam srefisrefi taki a ben sa tan libi leki wan sili di no man dede, na hemel, na hel, na Limbus, na vagevuur, noso na ini wan tra presi (Genesis 2:17; 3:4, 5, 19). Leki libilibi sili di ben sondoe, den ben o dede te foe kaba èn den no ben o de moro. Kownoe Salomo ben skrifi na ondro a krakti foe a santa jeje foe Gado: „Den wan di de na libi sabi taki den o dede; ma den dedewan no sabi notinoti, èn den no abi no wan pai moro foe kisi, bikasi sma no e memre den moro. So srefi a lobi foe den, a bita-ati foe den nanga a djaroesoe foe den lasi gowe kaba, èn gi ten di no abi marki den no abi wan prati moro na ini iniwan sani di moesoe doe na ondro a son.” — Preikiman 9:5, 6.
5. San na a troe howpoe gi den dedewan?
5 Den wortoe disi troe srefisrefi! Foe troe, soema man memre den gransma foe den di dede so wan toe hondro, noso dri hondro jari pasa kaba? Foeroetron, sma no sabi srefi den grebi foe den, noso langa ten kaba sma no e loekoe den moro. Disi wani taki dati no wan howpoe no de gi den lobiwan foe wi di dede? Nôno, kwetikweti. Marta ben taigi Jesus foe en brada Lasarus di dede: „Mi sabi taki a sa opo baka na a opobaka tapoe a lasti dei” (Johanes 11:24). Den Hebrewsma ben bribi taki Gado ben sa opo den dedewan na wan ten di de na den fesi. Tokoe dati no ben tapoe den foe de nanga sari te den lasi wan lobiwan foe den na ini dede. — Job 14:13.
Getrow sma di ben de nanga sari
6, 7. Fa Abraham nanga Jakob ben handri na tapoe dede?
6 Pikinmoro fo doesoen jari pasa, di Sara, a wefi foe Abraham ben dede, dan „Abraham ben kon foe sori dipi sari gi Sara èn foe krei gi en”. A getrow foetoeboi dati foe Gado, ben sori den dipi firi foe en gi a lasi di a ben lasi a loyaal wefi foe en di a ben lobi. Ala di a ben de wan man di ben abi deki-ati èn di ben tranga, tokoe a no ben sjen foe sori a sari foe en nanga watra-ai. — Genesis 14:11-16; 23:1, 2.
7 A kefal foe Jakob ben de a srefi. Di den ben kori en taki wan ogri meti ben kiri en manpikin Josef, dan fa a ben handri? Wi e leisi na Genesis 37:34, 35: „Foe dati ede Jakob ben priti a mantel foe en èn a ben weri wan saka na den djonkoe foe en èn a ben tan low foeroe dei gi a manpikin foe en. Èn ala den manpikin nanga den oemapikin foe en ben tan kon foe trowstoe en, ma a ben tan weigri foe feni trowstoe èn a ben e taki: ’Bika mi sa tan low te leki mi sa saka go na mi manpikin na ini Sjeol!’ Èn en papa ben tan krei gi en.” Ija, a de wan libisma sani èn a de wan natuurlijk sani foe sari te wan lobiwan dede.
8. Fa den Hebrewsma ben sori foeroetron taki den de nanga sari?
8 Wan toe sma ben sa kan denki, akroederi den gwenti foe disiten, noso akroederi den gwenti foe a presi pe den e libi, taki Jakob ben sari toemoesi èn taki a ben doe toemoesi foeroe mekimeki. Ma Jakob ben gro kon na ini wan tra ten èn na ini wan tra koeltoeroe. A fasi fa a ben sori sari — di a ben weri wan saka — de a fosi leisi di den e taki foe dati na ini bijbel. Ma soleki fa skrifi na ini den Hebrew Boekoe foe bijbel, dan den ben sori sari toe te den ben krei, te den ben meki kragisingi, èn te den ben e sidon na ini asisi. Soleki fa den boeweisi e sori, dan no wan sma ben tapoe den Hebrewsma foe sori troetroe sari.a — Esekièl 27:30-32; Amos 8:10.
Sari na ini a ten foe Jesus
9, 10. (a) Fa Jesus ben handri na tapoe a dede foe Lasarus? (b) San a fasi fa Jesus ben handri, e taigi wi foe en?
9 San wi kan taki foe den fosi disipel foe Jesus? Foe eksempre, di Lasarus ben dede, dan den sisa foe en, Marta nanga Maria, ben low foe a dede foe en èn den ben krei. Fa a volmaakti man Jesus ben handri di a ben doro na a oso foe den? A tori foe Johanes e froeteri: „Di Maria ben doro pe Jesus ben de èn di a si en, dan a fadon na den foetoe foe en, èn a ben e taki: ’Masra, efoe joe ben de djaso, dan mi brada no ben o dede.’ Foe dati ede, di Jesus ben si en e krei èn den djoe di ben kon nanga en e krei, dan a ben kon soktoe na ini en jeje èn a ben broko en ede; èn a ben taki: ’Pe oenoe poti en didon?’ Den taigi en: ’Masra kon loekoe.’ Jesus ben bigin krei.” — Johanes 11:32-35.
10 „Jesus ben bigin krei.” Den wortoe disi e sori foeroe foe a libisma fasi di Jesus abi, a sari-ati foe en, nanga den firi foe en. Ala di a ben sabi a howpoe foe na opobaka heri boen, tokoe „Jesus ben krei” (Johanes 11:35, King James Version). A tori e taki moro fara taki den sma di ben de drape e loekoe, ben froeklari: „Loekoe, fa a ben lobi [Lasarus] troetroe!” Foe troe, efoe a volmaakti man Jesus ben krei foe di a ben lasi wan mati na ini dede, dan a no de wan sjen efoe wan man noso wan oema na ini a ten disi e low èn e krei. — Johanes 11:36.
Sortoe howpoe de gi den dedewan?
11. (a) San wi kan leri foe den bijbel eksempre na ini a tori foe a low di sma e low? (b) Foe san ede wi no e sari leki den wan di no abi howpoe?
11 San wi kan leri foe den eksempre disi di de na ini bijbel? Wi e leri taki a de wan libisma sani èn a de wan natuurlijk sani foe de nanga sari èn wi no moesoe sjen foe sori a sari foe wi. Ala di wi no e sari so foeroe bikasi foe na opobaka howpoe ede, tokoe a dede foe wan lobiwan na wan lasi ete di de wan toemoesi sari sani, di wi kan firi dipi. Foeroe jari, kande someni tenti-jari foe wan krosibei matifasi èn a ten di wi ben de makandra, kon na wan kaba wantronso èn na wan sari fasi. Foe troe, wi no e sari leki den wan di no abi howpoe noso leki den wan di abi wan falsi howpoe (1 Tesalonikasma 4:13). So srefi, wi no meki den kori wi nanga a leitori taki libisma abi wan sili di no man dede, noso taki a sili e tan libi foe di a e kenki go na ini wan tra libi sani. Wi sabi taki Jehovah pramisi ’njoen hemel nanga wan njoen grontapoe, èn na drape regtfardikifasi sa de’ (2 Petrus 3:13). Gado „sa figi poeroe ala watra-ai na [wi] ai, èn dede no sa de moro, no wan low, no wan babari no wan pen no sa de moro. Den fositen sani pasa kaba”. — Openbaring 21:4.
12. Fa Paulus ben sori taki a ben bribi na ini na opobaka?
12 Sortoe howpoe de gi den wan di dede?b A kresten skrifiman Paulus ben gi wi trowstoe nanga howpoe nanga jepi foe Gado en santa jeje, di a ben skrifi: „Leki lasti feanti, dede moesoe tron notinoti” (1 Korentesma 15:26). The New English Bible e taki: „A lasti feanti di moesoe kisi pori, na dede.” Foe san ede Paulus ben kan de so seiker foe dati? Bikasi a sma di ben opo baka na dede, Jesus Krestes, ben drai a libi foe Paulus èn a ben gi en leri (Tori foe den Apostel 9:3-19). Dati ben de wan reide toe foe san ede Paulus ben kan taki: „Foe di dede de nanga jepi foe wan man [Adam], na opobaka foe dede de nanga jepi foe wan man toe [Jesus]. Bikasi leki fa ini Adam ala sma e dede, na so na ini Krestes ala sma sa kon na libi.” — 1 Korentesma 15:21, 22.
13. Fa den sma di ben de kotoigi foe na opobaka foe Lasarus, ben handri na tapoe dati?
13 A leri di Jesus ben gi, e gi wi foeroe trowstoe nanga howpoe gi a ten di de na wi fesi. Foe eksempre, san a ben doe na ini a kefal foe Lasarus? A ben go na a grebi pe a skin foe Lasarus ben didon fo dei kaba. A taki wan begi, „èn baka di a ben taki den sani disi, a ben bari nanga wan tranga sten: ’Lasarus, kon na doro!’ A man di ben dede, ben kon na doro ala di en anoe nanga foetoe ben tai nanga krosi tetei ete, èn en fesi ben tai nanga wan doekoe. Jesus ben taigi den: ’Loesoe en èn meki a go’”. Joe kan denki fa Marta nanga Maria ben froewondroe èn ben prisiri? O fa den birtisma ben moesoe froewondroe di den ben si a wondroe disi! A no de foe froewondroe taki foeroe foe den sma di ben de drape e loekoe, ben poti bribi na ini Jesus. Ma den relisi feanti foe en, „ben poti ede makandra foe kiri en”. — Johanes 11:41-53.
14. Na tapoe san na opobaka foe Lasarus ben sori go na fesi?
14 Jesus ben doe na opobaka dati na fesi foe foeroe sma di ben de drape leki kotoigi, èn a ben de wan sani di sma no man frigiti. A sani disi ben sori go na a opobaka di de na wi fesi ete, èn Jesus ben taki na fesi foe dati na wan okasi na fesi, di a ben taki: „No froewondroe foe disi, bikasi a joeroe e kon pe ala sma di de na ini den memre-grebi sa jere a sten [foe a Manpikin foe Gado] èn den sa kon na doro, den wan di ben doe boen sani foe kisi wan opobaka foe libi, den wan di ben doe ogri sani foe kisi wan opobaka foe kroetoe.” — Johanes 5:28, 29.
15. Sortoe boeweisi Paulus nanga Ananias ben abi foe na opobaka foe Jesus?
15 Soleki fa wi ben taki na fesi kaba, na apostel Paulus ben bribi na ini na opobaka. Na tapoe sortoe gron? Fosi Saul ben abi wan takroe nen, wan sma di ben froefolgoe den kresten. A nen foe en èn a fasi fa sma ben sabi en, ben meki taki den wan di ben bribi, ben frede gi en. A no ben de so, taki na en ben de a sma di ben feni en boen taki den ben ston a kresten Stefanus kiri, a sma di ben pina foe en bribi ede? (Tori foe den Apostel 8:1; 9:1, 2, 26) Tokoe, di Saulus ben de na pasi e go na Damaskus, Krestes di ben opo baka, ben meki en froestan taki a fasi fa a ben handri no ben boen, di Jesus ben e naki en foe kon breni gi wan sjatoe pisiten. Saulus ben jere wan sten e taigi en: „’Saulus, Saulus, foe san ede joe e froefolgoe mi?’ A ben taki: ’Soema na joe, Masra?’ A ben taki: ’Mi na Jesus, a sma di joe e froefolgoe.’” Ne, a srefi Krestes di ben opo baka, ben gi Ananias di ben libi na Damaskus, a komando foe go na a oso pe Saulus ben e begi èn foe meki a kon si baka. So boen, foe di Saulus nanga Ananias srefi ben abi na ondrofeni dati, meki den ben abi nofo reide foe bribi na ini na opobaka. — Tori foe den Apostel 9:4, 5, 10-12.
16, 17. (a) Fa wi doe sabi taki Paulus no ben bribi na ini a Griki idea taki libisma abi wan sili di no man dede? (b) Sortoe steifi howpoe bijbel e gi? (Hebrewsma 6:17-20)
16 Loekoe fa Saulus, na apostel Paulus, leki wan kresten di ben kisi froefolgoe, ben piki di den ben tjari en na fesi foe granman Felix. Wi e leisi dati na Tori foe den Apostel 24:15: „Tapoe Gado mi e howpoe . . . taki wan opobaka sa de foe den regtfardikiwan nanga den onregtfardikiwan.” A de krin taki Paulus no ben bribi na ini a heiden Griki idea, taki wan sili di no man dede, de na ini libisma, èn di kande ben go na ini wan tra libi noso wan presi pe sma e go baka te den dede. A ben bribi na ini na opobaka èn a ben gi leri foe abi bribi na ini na opobaka. Gi son wan, disi ben sa wani taki foe kisi a presenti foe libi pe den no sa dede moro, leki jeje mekisani na hemel makandra nanga Krestes, èn gi a moro bigi pisi a ben sa wani taki foe drai kon baka na wan libi na tapoe wan volmaakti grontapoe. — Lukas 23:43; 1 Korentesma 15:20-22, 53, 54; Openbaring 7:4, 9, 17; 14:1, 3.
17 So boen, bijbel e gi wi wan krinkrin pramisi nanga wan steifi howpoe, taki nanga jepi foe na opobaka, foeroe sma sa si den lobiwan foe den baka djaso na grontapoe, ma na ondro heri tra situwâsi. — 2 Petrus 3:13; Openbaring 21:1-4.
Praktis jepi gi den wan di de nanga sari
18. (a) Sortoe boen jepisani ben tjari kon na doro na den „Frede gi Gado” distriktkongres? (Loekoe a boksoe.) (b) Sortoe aksi moesoe kisi piki now?
18 Nownowde wi abi den sani di wi e memre èn den sani di e meki wi sari. San wi kan doe foe pasa a ten disi di de wan tesi gi wi foe di wi lasi wan lobiwan na ini dede? San tra sma kan doe foe jepi den wan di de nanga sari? Boiti dati, san wi kan doe foe jepi den opregtiwan di wi e miti na ini a velddienst èn di de sondro wan troetroe howpoe èn di de nanga sari toe? Èn sortoe trowstoe wi kan kisi moro fara na ini bijbel, di abi foe doe nanga den lobiwan foe wi di fadon sribi na ini dede? A tra artikel sa pristeri wan toe idea.
[Foetoewortoe]
a Efoe joe wani moro bodoi foe a low di sma ben low na ini bijbel ten, dan loekoe Hulp tot begrip van de bijbel bladzijde 1337-1338, di a Watchtower Bible and Tract Society of New York, Inc., tjari kon na doro.
b Foe kisi moro bodoi foe a howpoe foe na opobaka di de foe feni na ini bijbel, loekoe Hulp tot begrip van de bijbel, bladzijde 1185-1192.
Joe kan gi piki?
◻ Foe san ede wi kan taki dati dede na wan feanti?
◻ Fa den foetoeboi foe Gado na ini bijbel ten ben sori taki den de nanga sari?
◻ Sortoe howpoe de gi den lobiwan di dede?
◻ Sortoe gron Paulus ben abi foe bribi na ini na opobaka?
[Faki na tapoe bladzijde 8, 9]
Praktis jepi gi den wan di de nanga sari
Na den „Frede gi Gado” distriktkongres foe 1994 te go miti 1995, A Waktitoren Genootschap ben meki bekenti taki wan njoen brochure ben tjari kon na doro, di nen Wanneer iemand die u dierbaar is, sterft (Te wan lobiwan foe joe dede). A poeblikâsi disi di e gi sma deki-ati, ben meki foe gi trowstoe na sma foe ala nâsi nanga tongo. Soleki fa kande joe si kaba, a e gi a makriki froeklari foe bijbel foe san ede dede de èn san na a situwâsi foe den dedewan. Moro prenspari srefi, a e poti krakti na tapoe a pramisi foe Gado, nanga jepi foe Krestes Jesus, foe wan opobaka foe libi na tapoe wan krin paradijs grontapoe. A e gi trowstoe troetroe na den wan di e low. Foe dati ede, a moesoe de wan boen jepisani na ini a kresten diniwroko èn a moesoe dini foe wiki belangstelling èn a moesoe abi leki bakapisi taki moro foeroe bijbelstudie sa opo. Den aksi di de foe studeri, poti na wan koni fasi na ini boksoe na a kaba foe ibri pisi, so taki a de makriki foe loekoe den penti foe san oenoe ben taki makandra nanga ibri wan opregtisma di e low.
[Prenki na tapoe bladzijde 8]
Di Lasarus dede, Jesus ben krei
[Prenki na tapoe bladzijde 9]
Jesus opo Lasarus baka foe dede
[Sma di abi a reti foe a prenki na tapoe bladzijde 7]
A fosi low, by W. Bouguereau, foe a fosi grasi plaat na ini a Photo-Drama of Creation, 1914