San e poesoe joe foe dini Gado?

„Joe moesoe lobi Jehovah joe Gado nanga joe heri ati èn nanga joe heri sili èn nanga joe heri froestan èn nanga ala joe krakti.” — MARKUS 12:30.

1, 2. Sortoe span sani e doe na ini a tori foe a preikiwroko?

SMA no e si a troetroe waarde foe wan wagi soso foe di den e loekoe a dorosei foe en. A kan, taki a spoiti di a wagi spoiti moi kan meki a dorosei foe a wagi moro moi, èn a kan taki a fasi fa a meki na wan moi fasi e hari a prakseri foe wan sma di wani bai wan wagi; ma san de moro prenspari, na den sani di sma no e si wantewante — a masjin di e meki a wagi e rèi, makandra nanga tra wrokosani di poti foe man rèi a wagi.

² Na so a de toe nanga a dini di wan kresten e dini Gado. Jehovah Kotoigi e doe boen foeroe wroko di abi foe doe nanga Gado. Ibri jari den e gi moro leki wán miljard joeroe na a preiki foe a boen njoensoe foe Gado Kownoekondre. Moro fara, den e hori miljoenmiljoen bijbelstudie, èn hondrohondro doesoendoesoen sma e teki dopoe. Efoe joe na wan preikiman foe a boen njoensoe, dan joe abi wan prati — srefi te a gersi leki a de wan pikin prati — na den toemoesi moi nomroe disi. Èn joe kan de seiker taki „Gado no de onregtfardiki, so taki a ben sa frigiti a wroko foe oenoe nanga a lobi di oenoe ben sori gi en nen”. — Hebrewsma 6:10.

3. Sortoe sani, boiti den wroko di wi e doe, moesoe de wan toemoesi prenspari sani gi kresten, èn foe san ede?

³ Ma a troetroe waarde foe wi diniwroko — foe wi alamala makandra noso foe wi persoonlijk — no e marki nanga nomroe nomo. Soleki fa den ben taigi Samuèl, dan „wan libisma e si san na ai e si; ma foe a sei foe Jehovah, a e si san na ati de” (1 Samuèl 16:7). Ija, san wi de na inisei, na dati e teri gi Gado. A troe, taki den wroko di wi e doe de prenspari. Den sani di wan sma e doe te a e gi ensrefi na a dini foe Gado, e meki a leri foe Jehovah kon tron wan moi sani èn a e hari sma di kan kon tron disipel (Mateus 5:14-16; Titus 2:10; 2 Petrus 3:11). Ma tokoe den wroko foe wi no e sori ala sani. Jesus di ben opo baka na dede, ben abi reide foe broko en ede nanga a gemeente na Efeise — ala di tori ben skrifi foe den boen wroko foe den. „Mi sabi den doe foe oenoe”, a ben taigi den. „Ma tokoe, mi abi a sani disi teige oenoe, taki oenoe libi a lobi di oenoe ben abi fosi.” — Openbaring 2:1-4.

4. (a) Na sortoe fasi a diniwroko di wi e doe gi Gado kan tron leki wan gwenti nomo di wi e firi froeplekti foe doe? (b) Foe san ede a de fanowdoe foe ondrosoekoe wisrefi?

⁴ Wan kefar de. Baka wan pisi ten, a diniwroko di wi e doe gi Gado kan tron wan gwenti nomo di wi e firi froeplekti foe doe. Wan kresten oema ben taki fa a ben de nanga en: „Mi ben go na ini a velddienst, na den konmakandra, mi ben studeri, mi ben begi — ma mi ben doe disi soso foe di mi ben moesoe doe en, èn noiti mi ben doe en nanga firi.” A no de foe taki, dati den foetoeboi foe Gado moesoe kisi prèise te den e meki ala moeiti di den man, ala di den abi a firi taki den „trowe den na gron” noso „lasi-ati” (2 Korentesma 4:9; 7:6). Ma tokoe, te wi kresten diniwroko e tron wan sani di wi e doe nomo foe di a de wan gwenti, dan wi moesoe foe go loekoe a masjin foe inisei, foe taki en so. Srefi den moro boen wagi moesoe ondrow ten na ten; na so ala kresten moesoe ondrosoekoe densrefi toe doronomo (2 Korentesma 13:5). Trawan kan si den wroko foe wi, ma den no kan si san e poesoe wi foe handri. Foe dati ede, ibriwan foe wi moesoe broko en ede nanga na aksi: ’San e poesoe mi foe dini Gado?’

Sani di e meki taki wan sma no abi a joisti reide di e poesoe en

5. Sortoe gebod ben de a moro prenspari wan, soleki fa Jesus ben taki?

⁵ Di den ben aksi Jesus sortoe wan foe den wet di ben gi na Israèl ben de a moro prenspari wan, dan a ben kari wan gebod di no ben poti prakseri na tapoe sani di de foe si na dorosei, ma na tapoe sani na inisei di e poesoe wan sma: „Joe moesoe lobi Jehovah joe Gado nanga joe heri ati èn nanga joe heri sili èn nanga joe heri froestan èn nanga ala joe krakti” (Markus 12:28-30). Na so fasi Jesus ben meki sma kon sabi san ben sa moesoe de a krakti di e poesoe wi foe dini Gado — lobi.

6, 7. (a) Na sortoe trikifasi Satan ben soekoe foe pori na osofamiri libi, èn foe san ede? (2 Korentesma 2:11) (b) Fa a fasi fa wan pikin kweki, kan abi foeroe krakti na tapoe a fasi fa a e si a tirimakti foe Gado?

⁶ Satan wani poti sani na wi pasi, so taki wi no man kweki a prenspari eigifasi lobi. Wán fasi di a gebroiki foe doro a marki disi, na foe soekoe foe broko na osofamiri libi. Foe san ede? Foe di disi na a fosi presi pe wi e kisi foe doe nanga lobi di e tan. Satan sabi a bijbel gronprakseri heri boen, taki den leri di wan sma e kisi na ini en pikin-nengre ten, kan abi foeroe waarde te a sma dati kon tron wan bigisma (Odo 22:6). Na ini den jongoe jari foe wi, a e proeberi na wan triki fasi foe drai a fasi fa wi e denki foe lobi. Leki a „gado foe a seti foe sani disi”, Satan e si taki den prakseri foe en kan abi boen bakapisi, te foeroe sma e gro kon na ini osofamiri pe no wan seikerfasi nanga lobi no de, ma pe den e feti doronomo foe bita-ati èn foe bigi atibron ede, èn pe den e taki dotitaki. — 2 Korentesma 4:4; Efeisesma 4:31, 32; 6:4, foetoewortoe; Kolosesma 3:21.

⁷ A boekoe Een gelukkig gezinsleven opbouwen (Bow wan kolokoe osofamiri libi) ben taki dati a fasi fa wan papa e gebroiki a ròl di a abi leki papa, „kan abi wan krakti di e tan langa na tapoe a fasi fa den pikin foe en baka ten sa si tirimakti di e kon foe libisma èn foe Gado toe”.a Wan kresten man di ben gro kon bigi nanga wan papa di ben streng srefisrefi èn di ben handri grofoe e erken: „Gi mi a makriki foe gi jesi na Jehovah; foe lobi en na wan moro moeilek sani.” A no de foe taki, dati a de prenspari foe gi jesi, bika na ini Gado ai „a moro betre foe gi jesi leki foe tjari wan srakti-ofrandi” (1 Samuèl 15:22). Ma san kan jepi wi foe go moro fara leki foe gi jesi nomo èn foe kweki lobi gi Jehovah di de leki wan krakti di e poesoe wi foe anbegi en?

„A lobi di a Krestes abi, e poesoe wi”

8, 9. Fa a loesoe-ofrandi foe Jesus moesoe boeweigi wi na ini a lobi di wi lobi Jehovah?

⁸ A moro bigi sani di e poesoe wi foe kweki troetroe lobi gi Jehovah, na a warderi di wi e warderi a loesoe-ofrandi foe Jesus Krestes. „Nanga jepi foe disi a lobi foe Gado ben kon na krin na ini wi kefal, taki Gado ben seni en wan-enkri gebore Manpikin kon na grontapoe, so taki nanga jepi foe en wi ben sa kon kisi libi” (1 Johanes 4:9). So esi leki wi e froestan èn e warderi disi, dan a lobi disi di Jehovah sori, abi leki bakapisi taki wi e sori lobi baka. „Wi lobi, bika [Jehovah] ben lobi wi fosi.” — 1 Johanes 4:19.

⁹ Jesus ben de klariklari foe teki a wroko di a ben kisi foe de a Froeloesoeman foe libisma. „Nanga disi wi kon sabi lobi, bika a sma dati gi en sili abra foe wi ede” (1 Johanes 3:16; Johanes 15:13). A lobi di Jesus ben abi na so wan fasi taki a òfer ensrefi, moesoe meki wi e handri na wan fasi di e sori taki wi e warderi disi. Meki wi agersi a tori: Kon wi taki, dati wan sma ben poeroe joe na watra so taki joe no soengoe èn lasi joe libi. Joe ben sa kan go na oso nomo, drei joe skin, èn frigiti a tori? Kwetikweti! Joe ben sa moesoe taki a sma tangi di ben jepi joe. Foe taki en leti, na a sma dati ben meki taki joe no lasi libi. A no de so, taki wi moesoe taki Jehovah Gado nanga Jesus Krestes moro tangi? Sondro a loesoe-paiman, ibriwan foe wi ben sa soengoe èn lasi en libi, foe taki en so, na ini sondoe èn na ini dede. Na presi foe dati, foe di lobi ben sori na a kefalek moi fasi disi, meki wi abi a howpoe foe libi foe têgo na ini wan paradijs na grontapoe. — Romesma 5:12, 18; 1 Petrus 2:24.

10. (a) Fa wi kan meki a loesoe-ofrandi kon tron wan persoonlijk sani? (b) Na sortoe fasi a lobi foe Krestes e poesoe wi?

¹⁰ Prakseri dipi foe a loesoe-paiman. Teki en leki wan sani di de gi joe persoonlijk, soleki fa Paulus ben doe: „Ija, a libi di mi e libi now na ini a skin, mi e libi nanga jepi foe a bribi di mi abi gi a Manpikin foe Gado, di ben lobi mi èn ben gi ensrefi abra foe mi ede” (Galasiasma 2:20). Te wi e prakseri dipi foe sani na so wan fasi, dan dati sa meki taki wi abi wan opregti reide di e boeweigi wi, bika Paulus ben skrifi gi den Korentesma: „A lobi di Krestes abi, e poesoe wi, bika . . . a dede gi alamala, so taki den wan di libi ben sa kan libi no gi densrefi moro, ma gi en di dede gi den èn ben opo baka” (2 Korentesma 5:14, 15). The Jerusalem Bible e taki dati a lobi foe Krestes „e teki wi abra krinkrin”. Te wi e prakseri dipi èn finifini foe a lobi foe Krestes, dan dati e poesoe wi, a e boeweigi wi ati troetroe, a e teki wi abra srefi. A e naki wi ati èn e boeweigi wi foe doe wan sani. A vertaling foe J. B. Phillips e taki dati „a moro prenspari sani di moesoe meki wi e doe sani, na a lobi foe Krestes”. Ibri tra sortoe sani di e poesoe wi, no sa meki froktoe kon na ini wi di e tan, soleki fa dati ben de foe si na a eksempre foe den Fariseiman.

„Loekoe boen nanga a sroedeki foe den Fariseiman”

11. Froeteri foe a fasi fa den Fariseiman ben tjari densrefi na ini a tori foe wroko di abi foe doe nanga relisi.

¹¹ Den Fariseiman ben teki ala libi poeroe foe na anbegi di sma ben moesoe anbegi Gado. Na presi foe poti krakti na tapoe a lobi foe Gado, den ben poti krakti na tapoe wroko, leki wan markitiki foe marki a jejefasi foe wan sma. A poti di den ben poti ala den prakseri na tapoe den finifini komando, ben meki den sori regtfardiki foe dorosei, ma foe inisei den ben „lai nanga dede bonjo nanga ala sortoe sani di no krin”. — Mateus 23:27.

12. Fa den Fariseiman ben sori taki na ati foe den ben de sondro firi, di Jesus ben dresi wan man?

¹² Na ini wán kefal Jesus, na wan sari-atifasi, ben dresi wan man di en anoe ben kon drei. A man disi ben moesoe foe de troetroe kolokoe di a ben firi wantewante taki a ben kon betre foe wan siki di sondro tweifri ben moesoe hati en na skinfasi èn na emotioneel sei! Ma tokoe den Fariseiman no ben prisiri nanga en. Na presi foe dati, den ben kroetoekroetoe foe wan pikin sani — taki Jesus ben jepi wan sma na a Sabadei. Foe di den ben broko den ede nanga den pikin sani di abi foe doe nanga a fasi fa den ben froeklari a Wet, meki den Fariseiman no ben froestan srefisrefi san a Wet ben wani taki troetroe. A no de foe froewondroe taki Jesus „ben sari srefisrefi foe a de di na ati foe den ben de sondro firi”! (Markus 3:1-5) Moro fara, a ben warskow den disipel foe en: „Loekoe boen nanga a sroedeki foe den Fariseiman nanga di foe den Sadoeseiman” (Mateus 16:6). Bijbel e poeroe a fasi fa den ben handri èn ben denki kon na doro, foe wi kan kisi winimarki foe dati.

13. Sortoe sani wi kan leri foe na eksempre foe den Fariseiman?

¹³ Na eksempre foe den Fariseiman e leri wi, taki wi moesoe de reidelek na ini a fasi fa wi e si wroko. A no de foe taki, dati wroko na prenspari sani, bika „bribi sondro wroko dede” (Jakobus 2:26). Ma onvolmaakti libisma abi a gwenti foe kroetoe trawan foe san den e doe, na presi foe kroetoe den foe san den de. Wanwan leisi a kan de so toe taki wi e kroetoe wisrefi na a fasi disi. Wi kan foeroe wi ede nomo nanga a doe foe wroko, neleki dati na a wan-enkri sani foe marki a jejefasi foe wi. Wi ben kan frigiti o prenspari a de foe ondrosoekoe den reide di e boeweigi wi. (Teki gersi 2 Korentesma 5:12.) Wi ben sa kan kon tron sma di de toemoesi strak èn di e prakseri pasa marki foe hori wisrefi na wet, èn di „e poeroe a maskita, ma di e swari a kameili”, foe di wi e gi jesi finifini na san a wet e taki, ala di wi e frigiti san a wani taki troetroe. — Mateus 23:24.

14. Fa den Fariseiman ben de leki wan beker noso wan preti di no krin?

¹⁴ San den Fariseiman no ben froestan, na taki efoe wan sma lobi Jehovah troetroe, dan ensrefi sa doe sani di abi foe doe nanga a gi di a gi ensrefi na a dini foe Gado. A jejefasi foe wan sma e kon foe inisei go na dorosei. Na wan krakti fasi Jesus ben kroetoe den Fariseiman, foe di den ben abi wan fowtoe prakseri foe a tori disi. A ben taki: „Heloe foe oenoe, leriman foe wet nanga Fariseiman, oen hoigriman! bika oenoe e krin a dorosei foe a beker èn foe a preti, ma na inisei den lai nanga foefoeroe èn nanga sani di no fiti. Oen breni Fariseiman, krin na inisei foe a beker èn foe a preti fosi, so taki a dorosei foe en kan kon krin toe.” — Mateus 23:25, 26.

15. Kari eksempre di e sori taki Jesus ben loekoe moro fara leki nomo a fasi fa wan sma gersi.

¹⁵ A dorosei foe wan beker, wan preti noso srefi wan oso, no e sori ala sani. Den disipel foe Jesus ben froewondroe foe a moi di a tempel foe Jerusalem ben moi, di Jesus ben kari „foefoeroeman-olo”, foe den sani ede di ben pasa na inisei (Markus 11:17; 13:1). Soleki fa a ben de na ini a kefal foe a tempel, na so a de toe nanga miljoenmiljoen sma di e taki dati den na kresten, soleki fa den sani di skrifi foe a krestenhèit e sori. Jesus ben taki, dati a ben sa kroetoe son sma di ben doe „krakti wroko” na ini en nen, dati den de „wrokoman foe kroektoedoe” (Mateus 7:22, 23). Heri tra fasi foe dati, a ben taki foe wan wedwe di ben gi moni di pikinmoro no ben warti notinoti, leki bijdrage na a tempel: „A pôti wedwe disi ben poti moro leki ala den wan di e poti moni na ini den monikisi . . . A ben poti ala san a ben abi fanowdoe foe tan na libi, ala di a pôti” (Markus 12:41-44). A fasi fa Jesus ben si sani, ben de kontrari foe makandra? Kwetikweti. Na ini ala toe situwâsi Jesus ben sori a fasi fa Jehovah e denki (Johanes 8:16). Na baka den wroko a ben si den reide di ben boeweigi den èn a ben kroetoe den akroederi dati.

„Ibriwan akroederi en eigi koni”

16. Foe san ede a no de doronomo fanowdoe foe teki a wroko di wi e doe gersi nanga di foe wan tra kresten?

¹⁶ Efoe wi abi den joisti reide di e poesoe wi, dan a no de doronomo fanowdoe foe teki sani gersi nanga makandra. Foe eksempre, foeroe boen no e kon foe a feti di wi e feti foe wroko, foe wroko den srefi joeroe di wan tra kresten e wroko na ini a diniwroko noso foe abi den srefi bakapisi di wan tra kresten abi na ini a preikiwroko. Jesus ben taki dati wi moesoe lobi Jehovah nanga wi heri ati, froestan, sili èn nanga wi krakti — no nanga di foe wan tra sma. Ibriwan sma e difrenti na ini san a man doe, na ini a hori di a man horidoro, èn na ini den situwâsi foe en. Efoe a situwâsi foe joe e gi pasi foe dati, dan lobi sa boeweigi joe foe gi moro ten na ini a diniwroko — kande srefi leki wan foeroeten pionier dinari. Ma efoe joe e feti nanga wan siki, dan a ten di joe e gi na a diniwroko kan de moro mendri leki san joe ben sa wani gi. No lasi-ati. Getrowfasi na Gado no de wan sani di joe e marki nanga den joeroe. Efoe joe abi den joisti reide di e poesoe joe, dan joe sa abi reide foe prisiri. Paulus ben skrifi: „Meki ibriwan sma ondrosoekoe en eigi wroko, èn dan a sa abi reide foe prisiri nanga en wawan, èn no te a teki en gersi nanga tra sma.” — Galasiasma 6:4.

17. Froeteri sjatoe nanga joe eigi wortoe, foe na agersitori foe den talenti.

¹⁷ Loekoe na agersitori di Jesus ben froeteri foe den talenti, soleki fa a skrifi na Mateus 25:14-30. Wan man di ben de foe go na wan dorosei kondre, ben kari den srafoe foe en kon na en èn a ben froetrow den nanga den goedoe foe en. „Na a wan a ben gi feifi talenti, na wan trawan toe talenti, na ete wan trawan wán, ibriwan akroederi en eigi koni.” San a masra ben kon si di a ben drai kon baka foe seti tori nanga den srafoe foe en? A srafoe di ben kisi feifi talenti ben kisi feifi talenti moro. Na so toe, a srafoe di ben kisi toe talenti ben kisi toe talenti moro. A srafoe di ben kisi wan talenti ben beri en na ini gron èn a no ben doe noti foe meki den goedoe foe en masra kon moro foeroe. Fa a masra ben feni a situwâsi?

18, 19. (a) Foe san ede a masra no ben teki a srafoe di a ben gi toe talenti, gersi nanga a srafoe di ben kisi feifi talenti? (b) San na agersitori foe den talenti e leri wi foe wortoe di e taki foe prèise wan sma èn foe a teki di wi e teki sma gersi nanga makandra? (c) Foe san ede a di foe dri srafoe ben kisi wan takroe kroetoe?

¹⁸ Meki wi go loekoe a srafoe fosi di ben kisi feifi talenti èn a wan di ben kisi toe talenti. A masra ben taigi ibriwan foe den srafoe disi: „Dati boen srefisrefi, boen èn getrow srafoe!” A ben sa taki disi na a srafoe di ben abi feifi talenti efoe a wan dati ben kisi soso toe? Wi no denki so! Na a tra sei, a no ben taigi a srafoe di ben wini toe talenti: ’Foe san ede joe no ben kisi feifi? We, loekoe a kompe srafoe foe joe èn omeni a ben kisi gi mi!’ Nôno, a sari-ati masra, di ben de wan prenki foe Jesus, no ben teki sma gersi nanga makandra. A ben gi talenti na „ibriwan foe den akroederi en eigi koni”, èn a no ben froewakti foe kisi moro leki san den ben man gi. Ala toe srafoe ben kisi den srefi wortoe foe prèise, bika ala toe ben wroko nanga den heri ati gi a masra foe den. Wi alamala kan leri wan sani foe disi.

¹⁹ A no de foe taki, dati a di foe dri srafoe no ben kisi wortoe foe prèise. Foe taki en leti, den ben trowe en go na dorosei na ini doengroe. A ben kisi soso wán talenti, èn sma no e froewakti taki a ben sa meki a srefi leki a srafoe di ben abi feifi talenti. Ma a no ben proeberi srefi! A takroe kroetoe di a ben kisi ben de, te foe kaba, foe na „ogri èn loboso” fasi fa en ati ben tan, èn di ben sori taki a no ben abi lobi gi a masra.

20. Fa Jehovah e si a doe di wi no man doe ala sani?

²⁰ Jehovah e froewakti foe ibriwan foe wi taki wi lobi en nanga ala wi krakti, ma tokoe a de wan sani di e prisiri wi troetroe taki „ensrefi sabi heri boen fa wi meki, foe di a e hori na prakseri taki wi meki foe doti”! (Psalm 103:14) Odo 21:2 e taki dati „Jehovah e ondrosoekoe den ati” — a no e ondrosoekoe nomroe. A e froestan ibri sani di wi no man doe èn di wi no man tiri, efoe dati na sani na monisei, skinsei, emotioneelsei, noso na ini wan tra sani (Jesaja 63:9). Na a srefi ten, a e froewakti taki wi moesoe gebroiki ala den goedoe di wi abi kande. Jehovah de volmaakti, ma te a e handri nanga den onvolmaakti anbegiman foe en, dan a no de wan sma di e aksi foe den taki den moesoe de volmaakti. Èn a no de onreidelek te a e handri nanga sma èn a no e froewakti sani toe foe sma di den no man doe.

21. Sortoe boen bakapisi sa kon, efoe lobi e boeweigi wi foe doe wi diniwroko gi Gado?

²¹ Foe lobi Jehovah nanga wi heri ati, sili, froestan nanga krakti „warti moro ala den bron-ofrandi nanga den srakti-ofrandi” (Markus 12:33). Efoe lobi e boeweigi wi, dan wi sa doe ala san wi kan na ini a diniwroko foe Gado. Petrus ben skrifi taki efoe den eigifasi foe Gado, pe lobi de na ini toe, „de na ini joe èn de pasa marki, den sa tapoe joe foe de inaktief noso foe no tjari froktoe di abi foe doe nanga a soifri sabi foe wi Masra Jesus Krestes”. — 2 Petrus 1:8.

[Foetoewortoe]

Foe loekoe sani sjatoe baka

◻ San moesoe de a krakti di e poesoe wi foe doe wi diniwroko gi Gado?

◻ Fa a lobi foe Krestes e boeweigi wi foe dini Jehovah?

◻ Gi sortoe sani na tapoe san den Fariseiman ben poti ala den prakseri wi moesoe wai pasi?

◻ Foe san ede a no de wan koni sani foe tan teki a diniwroko foe wi gersi nanga di foe wan tra kresten?

[Prenki na tapoe bladzijde 18, 19]

Den sani di wan sma man doe, a hori di a man horidoro, èn den situwâsi foe en, e difrenti foe di foe wan tra sma