Joe kan abi matifasi di e tan

SANI de, di e tapoe sma foe abi mati. Foe taki en leti, bijbel ben taki na fesi dati na ini den „lasti dei” disi, sma no ben o abi lobi, den no ben o abi a natuurlijk lobi firi, èn den no ben o de loyaal (2 Timoteus 3:1-5; Mateus 24:12). Den omstandigheid disi ben abi leki bakapisi taki noiti ete someni sma abi a firi taki den de den wawan. Wan sma ben taki: „A birti foe mi de neleki na ark foe Noa. Efoe joe no trow, dan joe no e teri.” A fowtoe no kan de soso na ibri sma di abi a firi taki a de en wawan. Na son presi na grontapoe, wan toe foe den sani di e meki taki a de wan problema foe abi wan matifasi di e tan, na den sortoe sani leki a froisi di sma e froisi moro leki fosi, osofamiri di e prati, foto di no e ke nanga sma èn pe ogri e pasa foeroe nanga sma, èn a fri ten foe sma, moro nanga moro e kon pikinso.

Wan sma na ini a ten disi, di e libi na ini wan foto, kan miti moro sma na ini wán wiki leki wan pranasisma na ini a di foe 18 jarihondro ben si na ini wán jari noso na ini en heri libi srefi! Ma tokoe a de so, taki a matifasi di sma abi nanga makandra nofo tron de so frafra. Wan lo sma e doe wan heri ipi moeiti foe miti tra sma doronomo èn den e proeberi foe abi wan boen ten. Ma wi moesoe erken, taki foe meki prisiri makandra nanga takroe kompe, sondro foe disi wani taki wan sani, de neleki te wan sma e gebroiki maka foe meki wan faja. Preikiman 7:5, 6 e taki: „Moro betre joe e jere fa wan koniman e piri-ai gi joe, leki foe de a sma di e jere a singi foe sma di no koni. Bika leki a babari di maka e meki na ondro a patoe, na so a lafoe foe wan sma di no koni, de toe; èn disi toe na foe soso.” Foe wan sjatoe pisi ten nomo, maka e meki wan faja e bron krin èn a e meki foeroe babari, ma a faja no tranga nofo foe gi wi waran. Na so a de toe, taki mati di e lafoe nanga foeroe babari, kan poeroe wi prakseri foe wan sjatoe pisi ten nomo, ma den no sa man poeroe a firi di wi abi taki wi de wi wawan èn den no sa man poeroe na angri di wi e angri foe abi troetroe mati.

Te wan sma de sondro foe tra sma de nanga en, dan dati na wan heri tra sani leki te wan sma abi a firi taki a de en wawan. Son leisi a de fanowdoe taki wi de sondro foe tra sma de nanga wi, so taki wi kan rostoe èn na so fasi wi leki wan mati, kan gi moro foe wisrefi. Foeroe sma, te den abi a firi taki den de den wawan, wantronwantron e go soekoe ontspanning di den kan kisi nanga jepi foe wan elektronis aparaat. Wan ondrosoekoe ben sori, taki wan foe den sani di sma e doe moro foeroe te den abi a firi taki den de den wawan, na taki den e go loekoe telefisi. Ma tokoe den ondrosoekoeman ben kon si, taki wan foe den lasti sani di wi moesoe doe te wi abi a firi taki wi de wi wawan, na foe tan loekoe telefisi doronomo. A e gi sma a firi foe no wani doe noti, taki den e froeferi, èn den e dren nanga opo ai, èn na so fasi disi e tron wan sani di no boen troetroe foe meki dati kon ini a presi foe persoonlijk matifasi di sma ben sa kan abi nanga trawan.

Te joe loekoe en boen, dan a kan de wan heri boen sani te wi de sondro foe tra sma de nanga wi, efoe wi e gebroiki a ten dati na wan fasi di e bow wi. Wi kan doe disi foe di wi e leisi, e skrifi brifi, e meki sani, èn e rostoe. A de di wi de sondro foe tra sma de nanga wi, na wan fasi di e bow wi, èn a wani taki toe dati wi e begi na Gado, e studeri bijbel, èn e prakseri dipi foe dati (Psalm 63:6). Disi na fasi foe kon moro krosibei na Jehovah Gado, a sma di ben sa wani de wi moro bigi Mati.

Eksempre na ini bijbel foe sma di ben abi wan matifasi nanga makandra

Ala di a boen foe abi switifasi gi foeroe sma, tokoe bijbel e memre wi taki „wan mati de, di de moro krosibei leki wan brada” (Odo 18:24). Wi alamala abi wan toe boen mati fanowdoe di troetroe lobi wi, èn di abi wan matifasi nanga wi di e prisiri wi, e tranga wi, èn e gi wi vrede. Ala di joe no e si den sortoe matifasi dati foeroe na ini a ten disi, tokoe wan toe eksempre foe fositen skrifi spesroetoe na ini bijbel. Foe eksempre, Jonatan nanga David ben abi wan spesroetoe sortoe matifasi. San wi kan leri foe disi? Foe san ede a matifasi di den ben abi nanga makandra, ben tan?

Foe eksempre, David so srefi Jonatan ben hori prenspari afersi na prakseri. Ma a moro prenspari sani ben de, taki den ala toe ben abi wan tranga firi foe gi densrefi abra na Jehovah Gado. Di Jonatan ben si a bribi di David ben abi na ini Gado, èn den sani di a ben doe foe feti gi a pipel foe Jehovah, dan „a sili foe Jonatan ben kon tai tranga na a sili foe David, èn Jonatan bigin lobi en leki en eigi sili” (1 Samuèl 18:1). Dati meki a lobi di mati abi gi Gado, e jepi taki den e tan nanga makandra.

Jonatan nanga David ben de loyaal sma èn den ben libi akroederi den gronprakseri foe Gado. Foe dati ede den ben kan abi lespeki gi makandra (1 Samuèl 19:1-7; 20:9-14; 24:6). Foe troe a de wan blesi te wi abi mati di lobi Gado èn di e libi akroederi den gronprakseri di skrifi na ini bijbel.

Tra sani ben de toe, di ben meki taki a matifasi foe David nanga Jonatan ben gro. Den ben de eerlijk èn opregti mati foe makandra, èn ibriwan foe den ben froetrow makandra. Na wan loyaalfasi Jonatan ben poti den afersi foe David moro hei leki di foe en. A no ben djaroesoe di David ben kisi a pramisi taki a ben o tron kownoe; na presi foe dati, Jonatan ben horibaka gi en na emotioneel sei èn na jeje sei. Èn David ben teki a jepi foe en (1 Samuèl 23:16-18). David nanga Jonatan ben sori san den ben firi gi makandra, na a fasi di bijbel e sori taki a fiti. A matifasi foe den di ben de akroederi a wani foe Gado, ben gron tapoe a troetroe warderi nanga a lobi firi di den ben abi (1 Samuèl 20:41; 2 Samuèl 1:26). No wan sani ben kan kon na mindri a matifasi di den ben abi nanga makandra, foe di ala toe man ben tan getrow na Gado. Te wi e waka na baka den sortoe gronprakseri disi, dan dati sa jepi wi foe bow troetroe matifasi di e tan.

Fa foe kweki matifasi

Joe e soekoe troetroe mati? Kande joe no abi foe soekoe fara. Wan toe foe den sma di joe e miti foeroe tron, ben kan de joe mati, èn kande den abi joe matifasi fanowdoe. Spesroetoe te disi abi foe doe nanga kresten kompe, dan a de wan koni sani foe gebroiki a rai di Paulus ben gi foe ’bradi wisrefi’ (2 Korentesma 6:11-13). Ma no lasi-ati te ibri leisi di joe e proeberi foe feni wan mati, a no e tron wan tranga matifasi. Nofo tron a e teki ten foe kweki wan matifasi, èn no ibri matifasi sa tranga a srefi (Preikiman 11:1, 2, 6). A no de foe taki, dati efoe wi wani njan boen foe troetroe matifasi, wi no moesoe prakseri wisrefi nomo, èn wi moesoe waka baka a rai foe Jesus: „Ala sani, foe dati ede, di oenoe wani foe sma doe gi oenoe, oenoe moesoe doe gi den so srefi.” — Mateus 7:12.

Soema abi a matifasi foe joe fanowdoe? Boiti den speri foe joe, fa a de nanga den moro jongoe wan noso den owroe sma? A libijari foe David nanga Jonatan, Rut nanga Naomi, èn Paulus nanga Timoteus, ben difrenti foeroe foe makandra, ala di den ben de mati foe makandra (Rut 1:16, 17; 1 Korentesma 4:17). Weduwe nanga tra sma di no trow, kan tron joe mati toe? Prakseri toe foe den wan di njoen na ini a birti foe joe. Kande den gowe libi a demakandra foe boen foeroe noso ala den mati foe den, foe di den ben froisi noso ben kenki a fasi fa den e libi. No wakti te trawan e kon na joe. Efoe joe na wan kresten, soekoe matifasi di e tan, foe di joe e gebroiki a rai di Paulus gi: „Na ini brada lobi, abi safoe lobi firi gi makandra. Teki fesi te oenoe e gi makandra grani.” — Romesma 12:10.

Wi kan si matifasi leki wan fasi foe gi. Jesus ben taki dati efoe wi e gi, dan sma sa gi wi toe. A ben tjari kon na krin toe, taki moro kolokoe de ini a gi foe sani leki ini a kisi foe sani (Lukas 6:38; Tori foe den Apostel 20:35). Joe miti sma foe difrenti koeltoeroe? Den internationaal kongres foe Jehovah Kotoigi sori taki sma foe difrenti koeltoeroe kan tron troetroe mati foe ala ten, te den alamala e anbegi Gado.

Sorgoe taki joe e hori den mati foe joe boen

A de wan sari taki son tron mati e hati den firi foe makandra. A konkroe di den e konkroe, a broko foe a froetrow di den ben froetrow makandra, a warderi di den no e warderi makandra nofo — disi na wan toe sani di e hati srefisrefi, te wan sma di joe ben si leki wan troetroe mati, doe so. San wi kan doe na den sortoe okasi dati?

Gi wan boen eksempre. Doe ala san joe kan foe no hati a firi foe sma, efoe disi no de fanowdoe. Na son presi a de wan sani di sma lobi srefisrefi te mati e spotoe nanga den swakifasi foe makandra. Ma te mati handri makandra na wan grofoe fasi noso te den e bedrigi makandra, dan dati no sa tjari den moro krosibei na makandra, srefi efoe den e taki dati den „abi prisiri”. — Odo 26:18, 19.

Doe ala moeiti foe hori den mati foe joe boen. Son tron kesekese e kon te mati e froewakti toemoesi foeroe foe makandra. Wan mati di siki noso di abi boen foeroe foe doe, foe di a abi wan bigi problema, kande no sa man sori a waran switifasi foe en leki fa a ben gwenti. Foe dati ede, proeberi na den momenti dati foe froestan a tori, èn horibaka gi en.

Loesoe problema esi-esi èn na wan switifasi. Doe dati someni leki joe kan, sondro foe tra sma de nanga oenoe (Mateus 5:23, 24; 18:15). Sorgoe taki a mati foe joe sabi taki joe wani foe tan abi wan boen matifasi nanga en. Troetroe mati e gi makandra pardon (Kolosesma 3:13). Joe sa de a sortoe mati dati — wan mati di de moro krosibei leki wan brada?

Foe leisi èn foe prakseri sani di abi foe doe nanga matifasi, na soso wan bigin. Efoe wi abi a firi taki wi de wi wawan, dan meki wi doe wan sani na dati na wan fasi di fiti, èn heri esi wi no sa abi a firi moro taki wi de wi wawan. Efoe wi wroko tranga na disi, dan wi kan feni troetroe mati. Nanga wan toe foe den, wi sa abi wan spesroetoe banti. Ma no wan sma kan teki a presi foe Gado, a moro bigi Mati. Soso Jehovah kan sabi, froestan, èn horibaka gi wi doronomo (Psalm 139:1-4, 23, 24). Boiti dati, a Wortoe foe en e gi wi wan toemoesi moi howpoe gi a tamara — wan njoen grontapoe pe a sa man taki wi abi troetroe mati foe têgo. — 2 Petrus 3:13.

[Prenki na tapoe bladzijde 5]

David nanga Jonatan ben abi wan troetroe matifasi nanga makandra, èn wi kan abi dati toe