Pasen noso a Memrefesa — Sortoe wan foe den joe moesoe hori?
TAPOE 7 april, te deibroko e skèin en leti so fara leki na ai kan si, dan miljoenmiljoen sma sa breiti taki a moro santa dei foe den foe a jari doro — Pasen. Wan ten ben de, taki den ben gebroiki a nen gi wan pisi ten foe 120 dei foe fesa nanga faste, di ben bigin nanga wan fesadei di den ben kari Septuagesima èn a ben kaba na san den ben kari Dri-wánfasi Dei. Na ini a ten disi den e gebroiki a nen gi soso wán dei nomo, foe memre na opobaka foe Jesus — Paas-sonde.
Ma wan neti na a bigin foe a srefi wiki dati, miljoenmiljoen tra sma sa kon makandra foe hori a Memrefesa foe Krestes dede, di sma sabi toe leki na Avondmaal foe Masra. A de wan fesa di Jesus srefi ben seti na a lasti neti di a ben de na grontapoe. Na a ten dati a ben taigi den disipel foe en: „Tan doe disi foe memre mi.” — Lukas 22:19.
Sortoe wan foe den fesa disi joe sa hori?
Fa Pasen bigin
A nen Pasen, di sma e gebroiki na foeroe kondre, no de foe feni na ini bijbel. A boekoe Medieval Holidays and Festivals, e froeteri wi taki „den ben gi a fesadei a nen Eostre, foe a heiden Oema-gado foe Deibroko èn foe Lente”. Èn soema ben de na oema-gado disi? „A ben de Eostre di ben opo den doro foe Walhala, soleki fa den tori e froeteri, foe tjari Baldur kon na inisei, di den ben kari a Weti Gado, foe di a krin èn den e kari en a Son Gado toe, foe di a fesi-ede foe en ben gi leti na libisma”, na so The American Book of Days e piki. A e taki moro fara: „Tweifri no de taki ini den froekoe dei foe Kerki den ben teki den owroe heiden gwenti abra èn ben meki den tron wan kresten fesa. Foe di a fesa foe Eostre ben de wan fesa foe a njoen libi di ben kon baka na ini lente, meki a ben de makriki foe meki a tron wan fesa foe na opobaka na dede foe Jesus, di den ben preiki na evangelie foe en.”
A teki di den teki den heiden fesa disi abra, e tjari kon na krin fa a doe kon, taki na son kondre den abi den gwenti foe Pasen, soleki den paas-eksi, a paas-konikoni, nanga den waran kroisiboroe. A boekoe Easter and Its Customs e taki foe a gwenti di sma abi foe meki waran kroisiboroe, „nanga a broin tapoesei di e brenki èn pe wan . . . kroisi marki na tapoe”. A boekoe e taki: „A kroisi ben de wan heiden simbôl, langaten bifo den sani di ben pasa na a fosi Boen Freida ben meki a ben kon de prenspari foe ala ten èn son tron den ben marki kroisi na tapoe brede nanga koekoe na ini den ten bifo a kresten bribi ben kon.”
Na no wan presi na ini bijbel wi e si, taki den e taki foe den sani disi, èn no wan boeweisi de toe taki den fositen disipel foe Jesus ben bribi na ini den. Foe taki en leti, na apostel Petrus e froeteri wi, taki wi moesoe „angri gi a soifri merki di de foe a wortoe, di nanga jepi foe dati [wi] kan gro kon kisi froeloesoe” (1 Petrus 2:2). So boen, foe san ede den kerki foe krestenhèit ben teki den sortoe simbôl dati, di de heiden simbôl srefisrefi, poti na ini den bribi nanga den doe foe den?
A boekoe Curiosities of Popular Customs e piki: „A ben de soleki fa a Kerki foe fositen ben gwenti foe doe, foe meki den sortoe heiden fesa disi di ben de èn di den no ben kan roetoe poeroe, kon de prenspari gi kresten. Ini a tori foe Pasen a ben de toemoesi makriki foe kanti abra go tapoe Pasen. A prisiri di sma ben prisiri, foe di a troetroe son ben opo kon, èn foe di a natoeroe ben wiki komoto na a dede di a ben dede na ini winter, ben tron a prisiri di sma ben prisiri, foe di a Son foe regtfardikifasi ben opo kon, na Krestes opobaka na grebi. Wan toe heiden fesa di den ben hori na a fosi dei foe mei, ben kenki toe meki den kroederi nanga a fesadei foe Pasen.” Na presi foe den relisi fesiman ben tan farawe foe pôpi heiden gwenti nanga den obiadoe, dan den ben doe neleki a ben de wan boen sani èn den ben meki den kon de „prenspari gi kresten”.
’Ma wan ogri de na ini disi?’ joe sa aksi joesrefi kande. Son sma e denki taki a no ogri. „Te wan relisi leki a krestendom, e kon na sma foe wan tra koeltoeroe, dan a e teki sonwan foe den gwenti foe a pipel abra, gwenti di komopo na moro owroe relisi èn a ’e dopoe’ den meki den tron wan kresten gwenti”, na so Alan W. Watts, wan kerki fesiman foe na Episkopaal kerki e taki na ini en boekoe Easter — Its Story and Meaning. „Krestenhèit e teki fesa poeroe na mindri trawan èn e meki den kerkisma kon sabi fesa, di sori foe de prenspari a srefi leki den têgo gronprakseri di kerki e leri.” Gi foeroe sma a de so, taki foe di a kerki foe den feni den fesa disi boen èn e si den leki santa fesa, dan a nofo kaba gi den foe teki den fesa dati toe. Ma sma e frigiti prenspari aksi. Fa Gado e denki foe den gwenti disi? A gi wi tirilin foe wi waka na baka ini a tori disi?
Kon sabi fa Gado e denki foe a tori
„Pasen, a Fesa foe na opobaka foe wi Masra, na a moro bigi fesa foe a Kresten Kerki”, na so Christina Hole ben taki na ini en boekoe Easter and Its Customs. Tra skrifiman e agri nanga dati. „No wan santa dei noso fesa na ini a kresten jari joe kan teki gersi nanga a prenspari di Paas-sonde prenspari”, na so Robert J. Myers e taki na ini a boekoe Celebrations. Ma dati e meki wan toe aksi kon na fesi. Efoe a de so prenspari foe hori Pasen, dan foe san ede no wan komando de na ini bijbel di e taki krin taki wi moesoe hori a fesa disi? Wan sani skrifi taki den fositen disipel foe Jesus ben hori Paas-sonde?
No taki bijbel no e gi tirilin di abi foe doe nanga sortoe fesa wan sma moesoe hori èn sortoe fesa a no moesoe hori. Gado ben taigi na owroeten nâsi Israèl krin fa a e denki foe disi, èn soleki fa ben skrifi kaba, dan kresten ben kisi leri finifini taki den moesoe tan hori a Memrefesa foe Krestes dede (1 Korentesma 11:23-26; Kolosesma 2:16, 17). Wan tra uitgave foe The Encyclopædia Britannica e froeteri wi: „No wan sani skrifi na ini a Njoen Testamenti noso na ini den boekoe foe den apostolis Tata, taki den ben hori Pasen. A santafasi foe fesadei ben de wan denki di no ben de ini a prakseri foe den fositen kresten. . . . No Masra [Jesus] no den apostel foe en, ben gi a komando foe hori a fesa disi noso wan tra fesa.”
Son sma e denki taki a prisiri di den sortoe fesa disi e gi nanga firi di sma e firi kolokoe, nofo kaba foe gi sma a reti foe hori den. Ma wi kan leri wan sani foe a leisi di den Israèlsma ben teki wan relisi doe foe den Egiptisma abra èn ben gi en a nen foe ’wan fesa foe Jehovah’. Den „ben go sidon njan èn dringi” so srefi èn „ben opo foe abi wan boen ten”. Ma san den ben doe, ben meki Jehovah Gado atibron srefisrefi, èn a ben strafoe den hebi. — Exodus 32:1-10, 25-28, 35.
A Wortoe foe Gado e taki krin foe a tori. A „leti” foe troe bribi no kan abi prati nanga a „doengroe” foe Satan grontapoe; „wánfasi” no kan de na mindri Krestes nanga heiden bribi. Boekoe e taigi wi: „’Foe dati ede, komoto na den mindri, èn poti joesrefi aparti’, na so Jehovah taki, ’èn no fasi moro san no krin’; ’èn mi sa teki joe.’” — 2 Korentesma 6:14-18.
Foe di kresten kisi a komando na ini bijbel foe hori a Memrefesa wawan — no a Pasen — dan den moesoe hori en. So boen, fa wi kan hori a fesa na wan fasi di fiti?
[Prenki na tapoe bladzijde 5]
A „fesa gi Jehovah” di den Israèlsma ben hori, ben meki Gado atibron srefisrefi
[Sma di abi a reti foe a prenki na tapoe bladzijde 2]
A kafti: M. Thonig/H.Armstrong Roberts