Joe kan lobi Gado troetroe?
„NO WAN libisma kan si mi èn tokoe tan na libi”, na so Gado e taki (Exodus 33:20). Boiti dati, no wan boeweisi no de, taki sensi di bijbel kaba skrifi, wan libisma taki langalanga nanga En. A no gersi wan moeilek sani — srefi wan sani di no man — foe kweki wan dipi firi foe lobi gi wan sma di joesrefi noiti no si noso jere? A man troetroe taki wi abi wan lobi-ati matifasi nanga a Mekiman foe na universum?
No wan tweifri no moesoe de taki wan sma man kweki wan waran, persoonlijk lobi gi Gado. Na ini Deuteronomium 6:5, wi e leisi taki a nâsi Israèl ben kisi a komando: „Joe moesoe lobi Jehovah, joe Gado, nanga joe heri ati nanga joe heri sili nanga ala joe krakti”. Baka ten, Jesus Krestes ben taigi den bakaman foe en baka, taki a wet disi de so èn a ben taki toe: „Disi na a moro bigi èn fosi komando” (Mateus 22:37, 38). Bijbel ben sa gi wi tranga foe lobi Gado efoe so wan matifasi no ben man de foe kisi?
Ma Jehovah e froewakti foe wi foe lobi en soso foe di en gi wi a komando? Nôno. Gado ben meki a fosi libisma paar nanga a man di den ben man lobi en. A no ben dwengi Adam nanga Eva foe abi wan lobi-ati matifasi nanga a Mekiman foe den. Na presi foe dati, Gado ben poti den na ini a moro boen situwâsi pe den kan kweki wan dipi firi foe lobi gi en. Na den ben moesoe loekoe san den ben o doe — kon moro krosibei na Gado noso hari densrefi poeroe foe en.
Adam nanga Eva ben froekisi foe meki oproeroe (Genesis 2:16, 17; 3:6, 7). Ma den bakapikin foe den, ben sa abi na okasi foe kweki wan lobi-ati matifasi nanga a Mekiman.
Waka nanga a troe Gado
Foe eksempre, na ini bijbel den e taki foe Abraham leki wan sma di ben de Gado „mati” (Jakobus 2:23). Tokoe Abraham kwetikweti no ben de a wan-enkri sma di ben abi wan krosibei matifasi nanga Gado. Bijbel e taki foe foeroe tra onvolmaakti libisma di ben sori wan troetroe firi foe lobi gi Jehovah èn „ben waka nanga a troe Gado”. — Genesis 5:24; 6:9; Job 29:4; Psalm 25:14; Odo 3:32.
Den owroeten foetoeboi foe Gado no ben gebore nanga lobi èn nanga a firi foe lobi gi Gado. Den ben abi foe kweki disi. Fa? Foe di den ben o kon sabi en na en eigi nen, Jehovah (Exodus 3:13-15; 6:2, 3). Foe di den ben o sabi taki a de èn den ben o sabi foe en makti leki Gado (Hebrewsma 11:6). Foe di foeroe tron den ben o prakseri dipi foe den lobi-ati wroko foe en (Psalm 63:6). Foe di den ben o sori Gado na ini begi den moro dipi prakseri foe den (Psalm 39:12). Foe di den ben o leri foe a boenfasi foe en (Sakaria 9:17). Foe di den ben o kweki wan gosontoe frede foe no afrontoe en. — Odo 16:6.
Joe kan tron wan mati foe Gado èn waka nanga en? A troe, taki joe no kan si Gado noso jere en sten. Ma tokoe Jehovah e gi joe a kari foe tron ’wan fisitiman na ini en tenti’, en mati (Psalm 15:1-5). So boen, a man taki joe lobi Gado. Ma fa joe kan kweki wan krosibei èn lobi matifasi nanga en?