Froetrow tapoe Jehovah foe kisi trowstoe
„Meki a Gado di e gi horidoro nanga trowstoe, sorgoe taki oenoe abi a srefi fasi foe denki na oen mindri di Krestes Jesus ben abi.” — ROMESMA 15:5.
1. Foe san ede moro trowstoe de fanowdoe ibri dei?
IBRI dei di e pasa gowe, moro nanga moro trowstoe de fanowdoe. Soleki fa wan bijbel skrifiman ben taki moro leki 1900 jari pasa kaba, dan „te nanga now a heri mekisani makandra e tan geme èn abi pen makandra” (Romesma 8:22). Na ini wi ten, joe abi „geme” nanga „pen” moro leki oiti. Sensi a Fosi Grontapoefeti, a libisma famiri pina foe a wan moeilek situwâsi baka a trawan di ben kon leki feti, takroedoe, nanga natoeroe rampoe di foeroe tron abi foe doe nanga a tiri di libisma no e tiri grontapoe boen. — Openbaring 11:18.
2. (a) Soema abi a moro bigi fowtoe na ini den heloe di a libisma famiri e kisi now? (b) Sortoe troetori e gi wan fondamenti foe howpoe?
2 Foe san ede someni pina de na ini wi ten? Te bijbel e taki fa den ben trowe Satan komoto na hemel, baka di a Kownoekondre ben opo na ini 1914, dan a e piki: „Heloe foe grontapoe nanga se, bika Didibri saka kon na oenoe, èn a abi bigi atibron, foe di a sabi taki a abi wan sjatoe pisi ten nomo” (Openbaring 12:12). A krin boeweisi foe a kontroe foe a profeititori dati, wani taki dati pikinmoro wi doro a kaba foe na ogri tiri foe Satan. Fa a de wan trowstoe foe sabi taki heri esi libi na grontapoe sa kon baka ini a situwâsi foe vrede di ben de bifo Satan ben sorgoe taki a fosi papa nanga mama foe wi meki oproeroe!
3. O ten libisma no ben abi trowstoe fanowdoe?
3 Biginbigin, a Mekiman foe libisma ben meki wan moi djari leki wan tanpresi gi a fosi libisma paar. A ben de na ini wan kontren di den ben kari Eden, san wani taki „Prisiri” noso „Boen ten” (Genesis 2:8, foetoewortoe). Boiti dati, Adam nanga Eva ben abi wan volmaakti gosontoe, nanga a froewakti taki den no ben o dede noiti. Prakseri nomo foe den foeroe kontren pe den ben kan meki a bekwaamfasi foe den kon moro boen — a sorgoe di den ben moesoe sorgoe gi a djari, koni wroko, bow, pokoe. Prakseri toe foe ala den sani di Gado meki èn di den ben kan ondrosoekoe te den ben hori densrefi na a komando foe poti grontapoe na den ondro èn meki en tron wan paradijs (Genesis 1:28). Ija, a libi foe Adam nanga Eva no ben o foeroe nanga geme èn nanga pen, ma nanga boen ten èn nanga prisiri. A de krin, taki den no ben o abi trowstoe fanowdoe.
4, 5. (a) Foe san ede Adam nanga Eva no ben man kakafoetoe gi a tesi foe gi jesi? (b) Fa a ben doe kon taki a libisma famiri ben abi trowstoe fanowdoe?
4 Ma san Adam nanga Eva ben abi fanowdoe troetroe, ben de taki den ben moesoe kweki wan dipi lobi nanga warderi gi den hemel Tata di abi switifasi. So wan lobi ben o boeweigi den foe gi jesi na Gado na ini ala situwâsi. (Teki gersi Johanes 14:31.) Na wan sari, taki wi fosi papa so srefi wi fosi mama no ben gi jesi na Jehovah, a reti Soeverein foe den. Na presi foe dati den ben meki densrefi kon na ondro na ogri tiri foe Satan Didibri, wan engel di ben kon fadon. A ben de Satan di ben kori Eva foe sondoe èn njan foe a froktoe di a no ben mag njan foe en. Baka dati, Adam ben sondoe di en so srefi ben njan foe a froktoe foe a bon di Gado ben warskow en krin foe disi: „Na a dei di joe sa njan foe dati, joe sa dede nomonomo.” — Genesis 2:17.
5 Na so fasi, a sondoe paar ben bigin dede. Di Gado ben gi den a dedestrafoe, dan a ben taigi Adam toe: „A gron kon de froefroektoe foe joe ede. Nanga pen joe sa njan foe a njanjan di a gron e gi ala den dei foe joe libi. Èn na tapoe en, maka nanga brantimaka sa gro gi joe, èn joe moesoe njan den prani foe a veld” (Genesis 3:17, 18). Na so fasi Adam nanga Eva ben lasi a howpoe foe meki a grontapoe di sma no ben wroko ete, kon tron wan paradijs. Di Gado ben jagi den poeroe foe Eden, den ben moesoe gi ala a krakti foe den, foe di den ben moesoe wroko tranga foe man feni njanjan nanga moeiti foe gron di ben kon froefroektoe. Den bakapikin foe den, di kisi a sondoe fasi disi di abi dede leki bakapisi, ben kon ini wan situwâsi pe den ben abi foeroe trowstoe fanowdoe. — Romesma 5:12.
Wan pramisi di e gi trowstoe, ben kon troe
6. (a) Sortoe sani di e gi trowstoe, Gado ben pramisi baka di libisma ben sondoe? (b) Foe sortoe profeititori di abi foe doe nanga trowstoe, Lamèk ben taki?
6 Di Jehovah ben strafoe a sma di ben soetoe faja gi libisma foe meki oproeroe, dan A ben sori foe de ’a Gado di e gi trowstoe’ (Romesma 15:5). A ben doe disi foe di a ben pramisi foe seni wan „siri” kon di te foe kaba ben o froeloesoe den bakapikin foe Adam foe den takroe bakapisi di ben kon foe di Adam ben meki oproeroe (Genesis 3:15). Baka wan pisi ten, Gado ben sori na fesi toe fa a froeloesoe disi ben o kon. Foe eksempre, a ben gebroiki en santa jeje foe meki Lamèk, wan fara bakapikin foe Adam di ben kon foe en manpikin Sèt, taki profeititori foe san a manpikin foe Lamèk ben o doe: „A wan disi sa gi wi trowstoe gi a wroko foe wi èn gi a pen di wi abi na wi anoe foe a gron di Jehovah floekoe” (Genesis 5:29). Akroederi a pramisi disi, a boi ben kisi a nen Noa, san sma froestan leki „Rostoe” noso „Trowstoe”.
7, 8. (a) Sortoe situwâsi ben meki taki Jehovah ben sari taki a ben meki libisma, èn san a ben abi na prakseri foe doe? (b) Fa Noa ben libi akroederi san a nen foe en ben wani taki?
7 Disiten, Satan ben kisi bakaman na mindri son wan foe den engel na hemel. Den disi ben teki libisma skin èn teki moi oema bakapikin foe Adam leki wefi. Den sortoe demakandra dati di ben de kontrari a skin, ben meki taki a libisma libimakandra ben kon pori moro èn foe dati wan godelowsoe ras foe Nefilim, „falaman”, ben kon di ben foeroe grontapoe nanga ogri di ben doe nanga tranga (Genesis 6:1, 2, 4, 11; Judas 6). „Ma now Jehovah ben si taki na ogridoe foe libisma ben kon foeroe na grontapoe . . . Èn Jehovah ben firi sari taki a ben meki libisma na grontapoe, èn disi ben hati En na ini en ati.” — Genesis 6:5, 6.
8 Jehovah ben abi na prakseri foe pori na ogri grontapoe dati nanga wan froedoe di ben o kon na heri grontapoe, ma fosi a ben meki Noa bow wan ark foe kibri libi. So boen, a libisma ras nanga den difrenti sortoe meti ben kisi kibri. Fa Noa nanga en famiri ben moesoe firi froelekti baka a Froedoe, di den ben komoto na a ark èn ben kon na tapoe wan krin grontapoe! Fa a ben de wan trowstoe foe si taki a floekoe di ben de na tapoe a gron ben poeroe baka, san ben meki en moro makriki foe prani sani! Ija, a profeititori foe Lamèk ben sori foe de troe, èn Noa ben libi akroederi san a nen foe en ben wani taki (Genesis 8:21). Noa, leki wan getrow foetoeboi foe Gado, ben de a wrokosani foe tjari pikinso „trowstoe” kon gi a libisma famiri. Ma na ogri krakti foe Satan nanga den ogri jeje engel foe en, no ben kaba nanga a Froedoe, èn a libisma famiri e tan geme na ondro a hebi foe sondoe, siki, nanga dede.
Wan sma di bigi moro Noa
9. Fa Jesus Krestes ben sori foe de wan jepiman nanga trowstoeman gi den libisma di ben abi berow?
9 Te foe kaba, na a kaba foe so wan 4000 jari foe libisma historia, a pramisi Siri ben doro. Foe di Jehovah Gado abi bigi lobi gi a libisma famiri meki a ben seni en wan-enkri gebore Manpikin kon na grontapoe foe dede leki wan loesoe-paiman gi sondoe libisma (Johanes 3:16). Jesus Krestes e tjari foeroe froelekti kon gi sondari di abi berow èn di e sori bribi na ini en ofrandi dede. Ala sma di e gi den libi abra na Jehovah èn e tron dopoe disipel foe en Manpikin, e ondrofeni kowroe-ati nanga trowstoe di e tan (Mateus 11:28-30; 16:24). Ala di den no de volmaakti, den e feni en wan bigi prisiri foe dini Gado nanga wan krin konsensi. Fa a de wan trowstoe gi den foe sabi taki efoe den e tan sori bribi na ini Jesus, taki den sa kisi têgo libi leki pai! (Johanes 3:36; Hebrewsma 5:9) Efoe den e doe wan serjoesoe sondoe, foe di den swaki, dan den abi wan jepiman, noso trowstoeman, a Masra Jesus Krestes di opo baka (1 Johanes 2:1, 2). Te den e bekènti a sondoe dati èn e doe san bijbel e taki foe no tron wan sma di e doe sondoe doronomo, dan den e kisi froelekti, foe di den sabi taki ’Gado de getrow èn regtfardiki so taki a e gi den pardon foe den sondoe foe den.’ — 1 Johanes 1:9; 3:6; Odo 28:13.
10. San wi e leri foe den wondroe di Jesus ben doe di a ben de na grontapoe?
10 Di Jesus ben de na grontapoe, dan en so srefi ben gi kowroe-ati foe di a ben fri sma foe ogri jeje di ben de na den tapoe, foe di a ben dresi ibri sortoe siki, èn foe di a ben opo den lobiwan di ben dede, kon na libi baka. A troe taki den sortoe wondroe dati ben tjari boen kon foe wan sjatoe pisi ten nomo, foe di den sma di ben blesi na a fasi dati, ben kon owroe èn dede baka ten. Ma tokoe nanga disi, Jesus ben sori go na den têgo blesi foe a tamara di a sa gi na a heri libisma famiri. Now di a de wan makti hemel Kownoe, dan heri esi a sa doe moro leki foe poeroe ogri jeje na sma tapoe nomo. A sa trowe den na ini wan dipi peti makandra nanga a fesiman foe den, Satan, foe kon ini wan situwâsi pe den no man doe noti. Dan a glori Doesoen Jari Tiri foe Krestes sa bigin. — Lukas 8:30, 31; Openbaring 20:1, 2, 6.
11. Foe san ede Jesus ben kari ensrefi „Masra foe sabadei”?
11 Jesus ben taki dati a ben de „Masra foe sabadei”, èn foeroe tron te a ben dresi sma, dan a ben doe dati tapoe Sabadei (Mateus 12:8-13; Lukas 13:14-17; Johanes 5:15, 16; 9:14). Foe san ede? We, Sabadei ben de wan pisi foe a Wet foe Gado di a ben gi Israèl èn na so fasi a ben de leki „wan skaduw foe den boen sani di moesoe kon ete” (Hebrewsma 10:1). Den siksi wrokodei foe a wiki e memre wi na den 6000 jari di libisma de na ini katibo kaba foe a tiri foe Satan di e kwinsi sma. Sabadei na a kaba foe a wiki e meki wi prakseri na a rostoe di libisma sa abi èn di e gi trowstoe na ini a Doesoen Jari Tiri foe a Moro Bigi Noa, Jesus Krestes. — Teki gersi 2 Petrus 3:8.
12. Sortoe ondrofeni di e gi trowstoe wi kan froewakti?
12 Fa den grontapoe borgoe foe Krestes tiri sa firi froelekti te den sa si te nanga langa, taki den kon fri foe na ogri krakti di Satan abi na den tapoe! Moro trowstoe sa kon te den sa kon betre foe den mankeri di den abi na skin sei, na emotioneel sei èn na froestan sei (Jesaja 65:17). Dan, prakseri nomo foe a bigi prisiri di den sa abi te den e bigin ontfanga lobiwan baka di komoto na dede! Na den fasi disi Gado „sa figi poeroe ala watra na den ai” (Openbaring 21:4). Ala di safrisafri den e gebroiki den winimarki foe Jesus froeloesoe ofrandi, den borgoe foe Gado Kownoekondre di e gi jesi, sa gro kon de volmaakti, foe di den kon fri dorodoro foe ala den takroe bakapisi foe a sondoe foe Adam (Openbaring 22:1-5). Baka dati Satan sa kon fri „gi wan sjatoe pisi ten” (Openbaring 20:3, 7). Ala libisma di e hori Jehovah en reti soevereiniteit hei na wan getrow fasi, sa kisi têgo libi leki pai. Prakseri foe a boen bigi prisiri nanga froelekti di sa de te sma „sa kon fri [dorodoro] toe foe a katibo foe pori”! Na so fasi a libisma famiri di e gi jesi, sa prisiri foe „a glori fri foe den pikin foe Gado”. — Romesma 8:21.
13. Foe san ede ala troe kresten abi a trowstoe fanowdoe di Gado e gi?
13 Disiten, wi tan de na ondro a geme nanga pen di ala sma abi di e libi na ini na ogri sistema foe Satan. Siki na skin sei èn na emotioneel sei e kon moro nanga moro èn disi abi krakti na tapoe ala sortoe sma, so srefi getrow kresten (Filipisma 2:25-27; 1 Tesalonikasma 5:14). Boiti dati, nofo tron wi leki kresten e pina foe na onregtfardiki fasi fa Satan e meki spotoe nanga froefolgoe kon na wi tapoe, foe di wi ’e gi jesi na Gado leki tiriman moro leki na libisma’ (Tori foe den Apostel 5:29). So boen, efoe wi abi foe horidoro foe doe Gado wani te na a kaba foe Satan grontapoe, dan wi abi a trowstoe, jepi, nanga krakti fanowdoe di A e gi.
Pe wi man feni trowstoe
14. (a) Sortoe sani Jesus ben pramisi, a neti bifo en dede? (b) San de fanowdoe efoe wi wani abi wini dorodoro foe a trowstoe foe Gado en santa jeje?
14 A neti bifo Jesus en dede, a ben sori den getrow apostel foe en krin taki sjatoe baka dati a ben o gowe libi den èn ben o drai go baka na en Tata. Disi ben broeja den èn ben meki den firi sari (Johanes 13:33, 36; 14:27-31). Foe di Jesus ben si taki den ben abi moro trowstoe fanowdoe, meki a ben pramisi: „Mi sa aksi a Tata èn a sa gi oenoe wan tra jepiman di sa de nanga oenoe foe têgo” (Johanes 14:16, foetoewortoe). Djaso Jesus ben sori go na Gado en santa jeje, di a ben kanti kon na tapoe den disipel foe en 50 dei baka en opobaka.a Wan foe den sani ben de, taki a jeje foe Gado ben trowstoe den di den ben kisi tesi èn ben tranga den foe tan doe Gado wani (Tori foe den Apostel 4:31). Ma sma no moesoe si a jepi dati leki wan sani di e kon foe ensrefi. Efoe den wani abi wini foe en dorodoro, dan ibri kresten moesoe tan begi foe kisi a jepi dati di e gi trowstoe, di Gado e gi foe di a e gebroiki en santa jeje. — Lukas 11:13.
15. San na wan toe fasi fa Jehovah e gi wi trowstoe?
15 Wan tra fasi fa Gado e gi trowstoe, de nanga bijbel, a Wortoe foe en. Paulus ben skrifi: „Ala sani di ben skrifi fositen ben skrifi foe gi wi leri, taki nanga a hori di wi e horidoro èn nanga a trowstoe foe den Boekoe foe bijbel wi ben sa abi howpoe” (Romesma 15:4). Disi e sori taki a de fanowdoe taki doronomo wi moesoe studeri èn prakseri dipi foe den sani di skrifi na ini bijbel èn na ini den poeblikâsi di abi den gron tapoe bijbel. Wi moesoe go na kresten konmakandra doronomo toe, pe wi kan abi prati na prakseri foe Gado Wortoe di e gi trowstoe. Wan foe den moro prenspari marki foe den sortoe konmakandra disi na foe gi makandra deki-ati. — Hebrewsma 10:25.
16. San den sani di Gado gi wi foe trowstoe wi, moesoe boeweigi wi foe doe?
16 A brifi di Paulus ben skrifi den Romesma e go doro foe sori den boen bakapisi di wi e kisi te wi e gebroiki den sani di Gado gi foe trowstoe wi. „Meki a Gado di e gi horidoro nanga trowstoe,” na so Paulus ben skrifi, „sorgoe taki oenoe abi a srefi fasi foe denki na oen mindri di Krestes Jesus ben abi, taki leki wán man èn nanga wán mofo oenoe kan gi a Gado nanga Tata foe wi Masra Jesus Krestes glori” (Romesma 15:5, 6). Ija, te wi e gebroiki ala den sani di Gado gi foe trowstoe wi, dan wi sa kon gersi moro leki wi deki-ati Fesiman, Jesus Krestes. Disi sa boeweigi wi foe tan gebroiki wi mofo foe gi Gado glori te wi e doe a kotoigiwroko foe wi, te wi de na den konmakandra foe wi, te wi taki nanga kompe bribiman aparti, èn na ini den begi foe wi.
Na ini ten foe hebi tesi
17. Fa Jehovah ben trowstoe en Manpikin, èn nanga sortoe bakapisi?
17 Jesus ben de na ini „hebi broeja”, èn ben „sari troetroe” tapoe a neti bifo a banawtoe dede foe en (Mateus 26:37, 38). Dati meki a ben waka go pikinso moro fara foe den disipel foe en èn ben begi na en Tata foe kisi jepi. „Gado ben arki en foe di a ben abi frede gi Gado” (Hebrewsma 5:7). Bijbel e froeteri taki „wan engel foe hemel ben kon na [Jesus] èn ben tranga en” (Lukas 22:43). A deki-ati fasi fa Jesus ben go foe tanapoe na fesi den gensman foe en leki wan mansma, na wan boeweisi taki a fasi fa Gado ben trowstoe en Manpikin ben wroko boen troetroe. — Johanes 18:3-8, 33-38.
18. (a) Sortoe pisi ten na ini Paulus en libi spesroetoe, ben lai nanga tesi? (b) Fa wi kan de wan trowstoe gi sari-ati owroeman, di e wroko tranga?
18 Na apostel Paulus toe ben kisi foe doe nanga pisi ten foe hebi tesi. Foe eksempre, en diniwroko na Efeise ben lai nanga soso „watra-ai èn nanga tesi di ben kon na [en] tapoe foe den takroe plan di den djoe ben meki ede” (Tori foe den Apostel 20:17-20). Te foe kaba, Paulus ben gowe libi Efeise baka di sma di ben horibaka gi na oemagado Artemis ben meki a foto kon ini oproeroe foe a preikiwroko foe Paulus ede (Tori foe den Apostel 19:23-29; 20:1). Di Paulus ben go noordsei na a foto Troas, dan wan tra sani ben trobi en srefisrefi. Pikinso bifo na oproeroe na Efeise, a ben kisi wan boskopoe di ben broeja en. A njoen gemeente na Korente ben abi foe doe nanga pratifasi, èn a ben froedrage hoeroedoe. Dati meki di Paulus ben de na Efeise, a ben skrifi wan brifi foe gi den krakti piri-ai, ala di a ben howpoe taki den ben o poti a situwâsi kon reti baka. Disi no ben de wan makriki sani gi en foe doe. „Foe di mi ben abi foeroe banawtoe nanga pen na ini na ati mi ben skrifi oenoe nanga foeroe watra-ai”, a ben tjari kon na krin baka ten na ini wan di foe toe brifi (2 Korentesma 2:4). Neleki Paulus, sari-ati owroeman no e feni en makriki foe gi rai foe meki sma kisi a joisti denki èn foe gi piri-ai, na a wán sei foe di den so srefi sabi den eigi swakifasi heri boen (Galasiasma 6:1). Foe dati ede, meki wi de wan trowstoe gi den wan di e teki fesi na wi mindri, foe di wi de klariklari foe doe wan sani na tapoe a lobi-ati rai e gi tapoe a gron foe bijbel. — Hebrewsma 13:17.
19. Foe san ede Paulus ben go foe Troas na Masedonia, èn fa a ben kisi froelekti te foe kaba?
19 Di Paulus ben de na Efeise, dan no wawan a ben skrifi den brada na Korente, ma a ben seni Titus go gi den so srefi foe jepi den, èn ben gi Titus a komando foe froeteri en san den ben doe di den kisi a brifi. Paulus ben howpoe foe miti Titus na Troas bifo Titus ben waka go moro fara. Drape Paulus ben kisi blesi nanga moi okasi foe meki disipel. Ma disi no ben froelekti en foe den broko-ede foe en, bika Titus no ben doro ete (2 Korentesma 2:12, 13). Dati meki a ben teki waka foe go na Masedonia, ala di a ben howpoe foe miti Titus drape. Den broko-ede di Paulus ben abi ben kon moro hebi, foe di sma ben gens a diniwroko foe en tranga. „Di wi ben doro na Masedonia”, a ben tjari kon na krin, „dan wi skin no ben kisi froelekti, ma wi ben tan kisi kwinsi na ala sortoe fasi — feti ben de na dorosei, èn frede ben de na inisei. Ma tokoe Gado, di e trowstoe den wan di brokoskin, ben trowstoe wi nanga a de di Titus de nanga wi” (2 Korentesma 7:5, 6). Fa Paulus ben firi froelekti di Titus ben doro te foe kaba foe froeteri en foe a boen fasi fa den Korentesma ben handri na tapoe a brifi foe en!
20. (a) San na wan tra prenspari fasi fa Jehovah e gi trowstoe, soleki fa a ben de nanga Paulus? (b) San wi sa go loekoe na ini a tra artikel?
20 Na ondrofeni foe Paulus e trowstoe den foetoeboi foe Gado na ini a ten disi, foe di foeroe foe den e kisi foe doe toe nanga tesi di e meki den firi „brokoskin”, noso „brokosaka”. Ija, ’a Gado di e gi trowstoe’ sabi san ibriwan foe wi abi fanowdoe èn a kan gebroiki wi foe trowstoe makandra, neleki fa Paulus ben kisi trowstoe nanga san Titus ben froeteri, taki den Korentesma ben abi berow (2 Korentesma 7:11-13). Na ini a tra artikel foe wi, wi sa loekoe a waran fasi fa Paulus ben piki den Korentesma èn fa disi kan jepi wi foe de sma di e gi a trowstoe foe Gado na wan boen fasi na ini a ten disi.
[Foetoewortoe]
a Wan foe den moro prenspari fasi fa a jeje foe Gado ben wroko na tapoe den fosi jarihondro kresten ben de foe salfoe den leki sma di Gado ben teki leki jeje manpikin nanga brada foe Jesus (2 Korentesma 1:21, 22). Disi de gi 144.000 disipel foe Krestes nomo (Openbaring 14:1, 3). Na ini a ten disi a moro bigi pisi foe den kresten na wan switi fasi kisi a howpoe foe têgo libi na ini wan paradijs grontapoe. Ala di den no salfoe, tokoe den e kisi a jepi nanga trowstoe foe Gado santa jeje toe.
Joe kan gi wan piki?
◻ Fa a doe kon taki a libisma famiri ben abi trowstoe fanowdoe?
◻ Fa Jesus ben sori foe de moro bigi leki Noa?
◻ Foe san ede Jesus ben kari ensrefi „Masra foe sabadei”?
◻ Fa Gado e gi trowstoe na ini a ten disi?
[Karta/Prenki na tapoe bladzijde 9]
(Efoe joe wani si pe den sani disi skrifi, loekoe a tijdschrift)
Paulus ben kisi foeroe trowstoe nanga san Titus ben froeteri foe den Korentesma
MASEDONIA
Filipi
GRIKIKONDRE
Korente
ASIA
Troas
Efeise