Joe e frede foe froetrow tra sma?
’NO WAN sma de nanga soema mi man taki. Sma no o froestan mi. Den abi toemoesi foeroe foe doe nanga den eigi problema. Den no abi ten gi den problema foe mi.’ Na so foeroe sma e denki, èn foe dati ede den e hori den prakseri gi densrefi. Te tra sma e aksi den fa den de, dan nofo tron den wani taigi den, ma den no e doe en. Den no man taki srefi na wan fri fasi san den e denki.
A troe, sma de di no wani kisi jepi foe trawan. Tokoe foeroe sma wani srefisrefi foe kisi jepi, ma den e frede foe tjari den moro persoonlijk prakseri, firi, nanga ondrofeni, kon na doro. Joe na wan foe den? No wan sma de troetroe di joe kan froetrow?
Froestan a frede
Na ini a grontapoe foe a ten disi, foeroe sma no e froetrow makandra. Jongoe sma no e taki nanga den papa nanga mama foe den. Papa nanga mama no man taki nanga makandra. Pikinso sma nomo wani taki nanga sma di abi makti. Foe di son sma no man froetrow trawan, dan den e soekoe jepi na sopi, drug, noso den e libi wan werdri libi, foe proeberi foe lowe gi den problema foe den. — Odo 23:29-35; Jesaja 56:12.
A froetrow di sma abi na ini sma di abi makti, soleki kerki tiriman, datra, therapist, skoromeester nanga jufrow, ben kon swaki, bika foe den foeroe sani di kon na krin foe na eerlijk di den no eerlijk èn foe na immoreel libi foe den. Foe eksempre, wan schatting e sori dati moro leki 10 procent foe den kerki tiriman abi foe doe nanga seks di no fiti. Den „sma disi di e broko a froetrow”, na so wan skrifiman e taki, „e diki boen bigi olo nanga kloof na ini a fasi fa sma de nanga makandra”. San disi e doe den gemeente foe den? A e pori froetrow.
A go di den markitiki foe san boen nanga ogri e go na baka na ala sei, tjari problema kon na ini na osofamiri, so fara srefi taki osofamiri di no e wroko boen, kon tron pikinmoro wan gewoon sani, na presi taki dati na sani di e pasa wawan leisi. Wan ten na oso ben de wan presi pe sma ben kan kisi sorgoe èn leri. Na ini a ten disi a de neleki wan station pe sma e go soso na njanjan joeroe. Te wan pikin e gro kon bigi na ini wan osofamiri pe „natuurlijk firi foe lobi” no de, dan wan normaal bakapisi foe dati na taki a no sa man froetrow tra sma te a tron bigisma. — 2 Timoteus 3:3.
Moro fara, ala di den situwâsi foe a grontapoe e kon moro ogri, moro nanga moro wi e kisi foe doe nanga ondrofeni di kan tron wan trauma gi wi. Na ini wan srefi sortoe situwâsi a profeiti Mika ben skrifi: „No poti oen froetrow na ini wan mati di oen kan froetrow” (Mika 7:5). Kande joe e firi a srefi na baka di sani no ben waka leki fa joe ben froewakti, na baka di wan sma broko a froetrow di joe ben abi na ini en, noso na baka di wan sani ben pasa di joe libi ben de ini kefar. Joe feni taki a moeilek foe froetrow tra sma baka èn na emotioneel sei joe no e span moro, èn ibri dei joe e libi na wan fasi taki joe e kibri a fasi fa joe e firi. (Teki gersi Psalm 102:1-7.) A troe, so wan fasi foe denki kande e jepi joe foe wroko, ma a „pen na ini na ati” foe joe no e gi joe troetroe prisiri na ini a libi (Odo 15:13). A tori na taki, efoe joe wani de gosontoe na jeje sei, na emotioneel sei, na froestan sei, èn na skinfasi, dan joe no moesoe kibri a fasi fa joe e firi moro èn joe moesoe leri foe froetrow tra sma. Dati kan? Ija.
Foe san ede joe no moesoe kibri a fasi fa joe e firi
Froetrow na ini tra sma e froelekti wan ati di abi problema. Hana ben abi na ondrofeni disi. A ben abi wan boen trowlibi, wan boen oso, ma a ben de na ini dipi banawtoe. Ala di en „ati ben broko”, nanga koni a „ben bigin begi Jehovah” na so wan krakti fasi taki en mofoboeba ben bigin seki ala di a ben tan pî. Ija, a ben poti en froetrow na ini Jehovah. Ne a ben opo en ati gi a sma di ben teki presi gi Gado, Eli. Nanga sortoe bakapisi? „[Hana] ben gowe èn ben njan, èn en fesi no ben sori moro taki a ben broko en ede nanga en situwâsi.” — 1 Samuèl 1:1-18.
Moro foeroe koeltoeroe sabi den winimarki te den e taki nanga tra sma foe den persoonlijk afersi foe den. Foe eksempre, te wi e froeteri den prakseri èn den ondrofeni foe wi na den sma di ben de na ini wan srefi sortoe situwâsi, dan dati kan gi wi winimarki. Ondrosoekoeman e taki: „A hori di wan sma e hori den firi foe en gi en wawan, kan meki a kon siki — wi moesoe tjari afersi kon na doro foe man tan gosontoe na froestan sei.” Moro nanga moro ondrosoekoe foe sabidensi e sori taki na odo di skrifi nanga jepi foe Gado santa jeje, de troe: „Wan sma di e hori ensrefi aparti, sa soekoe en eigi wini nomo; teige ala praktis koni a sa handri.” — Odo 18:1.
Efoe joe no e opo joe ati gi tra sma, dan fa den kan jepi joe? Ala di Jehovah Gado na wan sma di e leisi ati, den moro dipi prakseri èn firi foe joe na sani di famiri nanga mati no sabi — boiti te joe froeteri den (1 Kroniki 28:9). Te a problema abi foe doe nanga a pasa di joe pasa a wet foe Gado, èn te joe e wakti nomonomo foe tjari wan afersi kon na krin, dan dati e meki na afersi moro takroe. — Odo 28:13.
Foe troe, den winimarki di e kon gi wi te wi e froetrow tra sma nanga den problema foe wi, de moro foeroe leki den risiko di de taki den sma sa hati wi firi. A no de foe taki, dati disi no wani taki dati sondro prakseri fosi wi moesoe poeroe den finifini persoonlijk tori foe wi kon na doro. (Teki gersi Kroetoebakra 16:18; Jeremia 9:4; Lukas 21:16.) „Kompe de, di de foe broko trawan na pisipisi”, Odo 18:24 e warskow, ma a e taki moro fara: „Wan mati de, di de moro krosibei leki wan brada.” Pe joe kan feni so wan mati?
Froetrow joe famiri
Efoe joe abi wan problema, joe proeberi foe taki foe en nanga joe trowpatna noso nanga joe papa nanga mama? „Gi foeroe problema, a wan-enkri sani di de fanowdoe na foe taki finifini foe den”, na so wan raiman di abi ondrofeni e erken (Odo 27:9). Kresten masra di ’lobi den wefi leki densrefi’, wefi di e „saka densrefi na den masra ondro”, èn papa nanga mama di e teki a frantiwortoe serjoesoe di den kisi foe Gado foe ’kweki den pikin foe den na ini a serjoesoe froemane foe Jehovah’, sa wroko tranga foe tron sma di e arki nanga firi èn sma di man gi rai di e jepi (Efeisesma 5:22, 33; 6:4). Ala di noiti Jesus ben abi wan wefi èn pikin na skinfasi, tokoe a ben gi wan toemoesi moi eksempre ini a tori disi! — Markus 10:13-16; Efeisesma 5:25-27.
Fa a de te a problema moro bigi leki san a famiri kan doe? Noiti wi abi foe de wi wawan na ini a kresten gemeente. „Soema swaki, èn mi no swaki”?, na apostel Paulus ben taki (2 Korentesma 11:29). A ben gi a froemane: „Tan tjari den hebi foe makandra” (Galasiasma 6:2; Romesma 15:1). Na mindri den brada nanga sisa foe wi na jejefasi, seiker wi kan feni moro leki wán „brada di en mama meki foe te banawtoe de”. — Odo 17:17.
Froetrow na ini a gemeente
Na ini den moro leki 80.000 gemeente foe Jehovah Kotoigi na heri grontapoe, mansma di abi sakafasi de di e dini leki „kompe wrokoman foe oen prisiri ede” (2 Korentesma 1:24). Den na den owroeman. „Ibriwan” Jesaja e taki, „moesoe boeweisi foe de leki wan kibripresi gi a winti èn wan kibripresi gi a sibiboesi, leki watra di e lon ini wan kondre sondro watra, leki a kowroepe foe wan bigi stonbergi di tanapoe leti-opo ini wan kondre di drei”. Disi na san den owroeman e meki moeiti foe de. — Jesaja 32:2; 50:4; 1 Tesalonikasma 5:14.
Den owroeman doro den bijbel markitiki bifo ’santa jeje ben poti den na wroko’. Te joe sabi disi, dan dati sa tranga a froetrow foe joe na ini den (Tori foe den Apostel 20:28; 1 Timoteus 3:2-7; Titus 1:5-9). San joe e taki nanga den, den sa hori na wan froetrow fasi. A de di a moesoe de foe froetrow, na wan foe den markitiki di a moesoe doro. — Teki gersi Exodus 18:21; Nehemia 7:2.
Den owroeman na ini a gemeente „e loekoe den sili foe oenoe leki sma di sa gi frantiwortoe” (Hebrewsma 13:17). Disi no e boeweigi joe foe poti joe froetrow na ini den man disi? A de so, taki a no ala owroeman de boen na ini den srefi eigifasi. A kan gersi taki a moro makriki foe taki nanga son wan foe den, taki den abi moro switifasi, noso taki den man froestan wi moro leki den trawan (2 Korentesma 12:15; 1 Tesalonikasma 2:7, 8, 11). Foe san ede joe no e froetrow wan owroeman na soema joe e firi joesrefi moro boen?
Den man disi a no wrokoman di e kisi pai. Na presi foe dati, den na „presenti na ini man”, di Jehovah e gi foe jepi joe (Efeisesma 4:8, 11-13; Galasiasma 6:1). Fa? Na wan bekwaam fasi den e gebroiki bijbel, èn den sa gebroiki a krakti foe en di e dresi, na ini joe eigi situwâsi (Psalm 107:20; Odo 12:18; Hebrewsma 4:12, 13). Den sa begi nanga joe èn gi joe (Filipisma 1:9; Jakobus 5:13-18). A jepi di wi e kisi foe den lobi raiman disi, kan doe foeroe foe dresi wan sma di abi prakseri di e trobi en èn foe meki wan sma kisi vrede foe froestan baka.
Fa foe meki froetrow matifasi
Foe aksi foe kisi jepi, rai, noso foe wan sma arki joe nomo, a no wan sani di e sori taki joe swaki noso taki joe no man doe sani srefi. A de nomo wan troetroe sani di wi moesoe erken taki wi de onvolmaakti èn taki nowan sma abi ala den piki. Seiker, a moro bigi raiman èn froetrowman di wi abi, na wi hemel Tata, Jehovah Gado. Wi e agri nanga san a psalm singiman ben skrifi: „Jehovah na mi krakti nanga mi skilt. Tapoe en mi ati e froetrow, èn mi kisi jepi” (Psalm 28:7). Na ini begi wi kan ’trowe wi ati’ ala ten sondro foe sjen gi en, nanga a froetrow taki a e jere wi èn e sorgoe gi wi. — Psalm 62:7, 8; 1 Petrus 5:7.
Ma fa joe kan leri foe froetrow den owroeman nanga trawan na ini a gemeente? Fosi, ondrosoekoe joesrefi. Joe abi troetroe reide foe frede? Joe e tweifri na den reide foe san ede tra sma e doe sani? (1 Korentesma 13:4, 7) Wan fasi de foe meki a risiko moro mendri taki sma kan hati joe firi? Ija. Fa? Proeberi foe kon leri sabi tra sma persoonlijk, na ini situwâsi di abi foe doe nanga jeje afersi. Taki nanga den na den gemeente konmakandra. Wroko makandra na ini na oso-foe-oso wroko. Froetrow, neleki lespeki, na wan sani di wan sma moesoe froedini. Foe dati ede, abi pasensi. Foe eksempre, te joe e leri sabi wan skapoeman na jejefasi, dan a froetrow na ini en sa gro. Poeroe den broko-ede foe joe safrisafri kon na doro. Efoe a e handri na wan fasi di fiti, nanga firi, èn nanga koni, dan joe ben sa kan proeberi foe opo joe ati moro gi en.
Kompe anbegiman foe Jehovah, spesroetoe den kresten owroeman, e wroko tranga foe waka na baka den lobi eigifasi foe Gado, na ini a demakandra foe den nanga tra sma (Mateus 5:48). Disi abi leki bakapisi taki wan jeje foe froetrow sa de ini a gemeente. Wan brada di de owroeman langa ten kaba, e taki: „Den brada moesoe sabi wan sani: Awansi san wan sma doe, na owroeman no e lasi en kresten lobi gi en. Kande a no lobi san a sma ben doe, ma a lobi en brada ete èn a wani jepi en.”
So boen, a no de fanowdoe foe firi taki wi de wi wawan nanga wan problema. Taki nanga wan sma di abi „eigifasi na jejefasi” èn di kan jepi joe foe tjari a hebi lai di joe abi (Galasiasma 6:1). Hori na prakseri taki „broko-ede di e gi frede ini na ati foe wan man, sa meki a beni go na gron”, ma „switi wortoe de wan oni-oso, switi gi a sili èn dresi gi den bonjo”. — Odo 12:25; 16:24.
[Faki na tapoe bladzijde 26]
Iniwan kresten kan kisi a kari foe jepi wan famiri, wan mati, noso wan brada na jejefasi di abi wan persoonlijk problema. Joe sabi fa foe gi jepi?
Wan boen raiman
na wan sma nanga soema a makriki foe taki: Mateus 11:28, 29; 1 Petrus 1:22; 5:2, 3
e gebroiki a joisti situwâsi: Markus 9:33-37
e proeberi foe froestan a problema: Lukas 8:18; Jakobus 1:19
no e doe sani toemoesi esi: Kolosesma 3:12-14
e jepi sma di abi firi di e hati den: 1 Tesalonikasma 5:14; 1 Petrus 3:8
sabi te o fara a kan go: Galasiasma 6:3; 1 Petrus 5:5
e gi spesroetoe rai: Psalm 19:7-9; Odo 24:26
e hori tori gi ensrefi: Odo 10:19; 25:9