„Soso wán foe den foeroe libi foe sma na tapoe soema joe ben abi boen krakti”
NA INI januari 1996, Carol ben siki foe wan hersen tumor. A ben abi moro leki siksitenti jari èn te na a ten dati a ben de ala ten wan prisiri, bigiskin oema di ben gi ala sma deki-ati nanga den wortoe foe en. Ma now den datra ben doe moeiti foe tapoe a gro foe a kefalek sani disi di ben kan kiri en. Ala di a ben e feti a feti disi, Carol ben kisi a brifi disi:
„Lobi Carol:
Mi e sari sote foe a gosontoe foe joe di e go na baka. Kolokoe taki wi abi a troetroe howpoe di bijbel e jepi wi foe abi sabi èn foe lobi makandra. A howpoe disi na taki Jehovah Kownoekondre sa tiri grontapoe so taki wi kan libi na ini wan paradijs, wan ten di wi alamala e angri foe miti.
Mi wani meki joe sabi taki a persoonlijk preikiwroko foe joe ben froeloesoe foeroe sma foe a têgo dede. Mi na wan foe den sma disi. Mi no de seiker efoe joe e memre a fosi leisi di wi ben miti. Na a ten dati mi ben abi 20 jari. Mi ben abi langa wiwiri, ben e seri drug, èn mi ben e tanapoe nanga wan groepoe ogri jongoe sma. Wi alamala ben abi gon na wi èn wi no ben abi nowan troetroe lobi gi sma, boiti gi wisrefi.
Joe ben naki na mi doro nanga wan tra Kotoigi èn ben pristeri mi A Waktitoren nanga Ontwaakt! Mi ben proeberi foe gi joe wan Amerkan dala èn mi ben taigi joe taki mi no ben wani den tijdschrift. Joe ben froeteri mi taki a no foe kisi bijdrage meki joe e go preiki. Joe ben taigi mi taki joe ben e doe wan wroko foe jepi sma foe leisi bijbel. Mi de no seiker efoe mi ben teki den tijdschrift noso taki mi ben leisi den. Ma joe prani a fosi siri foe waarheid na ini mi libi.
Wan toe jari na baka, wan tra Kotoigi, Gary, ben kon na mi mama oso èn mi ben de drape. Mi ben taigi en foe a fisiti di joe ben tjari wan toe jari pasa kaba. Gary ben studeri bijbel nanga mi wan heri pisiten langa te leki mi ben teki dopoe te foe kaba na ini 1984. Now mi e leri den pikin foe mi a waarheid foe Gado Kownoekondre.
Mi de seiker taki mi na soso wán foe den foeroe libi foe sma na tapoe soema joe ben abi krakti, na ini den jari foe joe getrow diniwroko. Ma, foe a lobi boen-atifasi disi ede, joe meki mi nanga mi osofamiri kon sabi a Bigi Gado, Jehovah, nanga en Manpikin, Krestes Jesus. Mi e angri foe a dei te mi kan si joe na ini a njoen sistema foe sani te Jehovah sa figi poeroe ala watra na wi ai, èn dede no sa de moro. — Openbaring 21:4.
Mi nanga mi osofamiri, wi breiti taki wi ben abi na okasi foe kon sabi joe èn foe de wan pisi foe a kotoigiwroko foe joe. Grantangi.
Nanga brada lobi,
Peter”
Baka di Carol ben siki siksi moen langa, a dede na ini maart 1996, èn a ben sai foeroe siri foe waarheid na ini den 35 jari di a ben wroko leki wan fajafaja evangelie preikiman. A ben leri taki noiti wan sma sabi pe wan siri sa tjari froktoe, srefi foeroe jari na baka. — Mateus 13:23.