Ehud — Wan man di abi bribi nanga deki-ati

FOEROE jari ben pasa sensi den Israèlsma ben poti foetoe a fosi leisi na ini a Pramisi Kondre. Moses nanga a sma di ben teki en presi, Josua, ben dede langa ten kaba. Foe di den sortoe bribiman disi no ben de, meki a warderi gi a troe anbegi ben saka gowe. Den Israèlsma ben bigin srefi foe anbegi den Ba-al èn den santa postoe.a Leki wan bakapisi foe dati, Jehovah ben gi en pipel na ini na anoe foe den Siriasma aiti jari langa. Baka dati, den Israèlsma ben bari kari Gado foe jepi den. Nanga sari-ati a ben arki. Jehovah ben opo wan kroetoeman, Othnièl foe fri En pipel. — Kroetoebakra 3:7-11.

Den sani disi di ben pasa ben moesoe leri den Israèlsma wan prenspari troetori — te den e gi jesi na Jehovah, dan dati e tjari blesi kon, ma te den no e gi jesi, dan dati abi floekoe leki bakapisi (Deuteronomium 11:26-28). Ma a pipel foe Israèl no ben leri wan sani foe dati. Baka 40 jari foe vrede, den ben gowe libi a troe anbegi agen. — Kroetoebakra 3:12.

Moab teki den abra

A leisi disi Jehovah ben meki en pipel fadon na ini na anoe foe kownoe Eglon foe Moab. Bijbel e kari en „wan kefalek deki man”. Nanga a jepi foe Amon nanga Amalèk, Eglon ben go feti nanga Israèl èn ben poti en paleisi na ini Jeriko, „a Palmbon foto”. Sani ben waka heri tra fasi, taki a fosi foto foe den Kanansma di Israèl ben teki abra, ben de now den edekantoro foe sma di ben anbegi a falsi gado Kamos!b — Kroetoebakra 3:12, 13, 17.

Eglon ben kwinsi den Israèlsma 18 jari langa, èn a de krin taki a ben aksi wan hebi belasting foe den. Foe di a ben aksi belastingmoni di moesoe pai ibri pisi ten, Moab ben tranga na ekonomia posisi foe en, ala di a e leigi den goedoe foe Israèl. Wi kan froestan foe dati ede, taki a pipel foe Gado ben bari kari en foe kisi froelekti, èn agen Jehovah ben arki. A ben opo wan tra froeloesoeman gi den — now a ben de wan Benjaminietsma, di nen Ehud. Foe tjari wan kaba kon na a ogri-ati tiri foe Eglon na tapoe Israèl, Ehud ben meki plan foe doe wan sani na tapoe a tra dei te den moesoe pai belastingmoni. — Kroetoebakra 3:14, 15.

Foe sreka ensrefi gi a deki-ati taktik foe en, Ehud ben meki wan feti-owroe di e koti na toe sei èn di ben langa wan èl. Efoe disi ben de wan sjatoe èl, dan a fetisani ben de sowan 38 centimeter langa. Son sma ben sa taki dati a ben de wan dolk. Soleki fa a sori, a no ben abi wan dwars pisi na mindri a plata sei nanga na anoe. So boen, Ehud ben kan kibri a pikin feti-owroe foe en na ini den fow foe en krosi. Moro fara, foe di Ehud ben de wan kroektoe-anoe man, meki a ben man weri en feti-owroe na en reti-anoe sei — a presi pe sma no gwenti weri wan fetisani. — Kroetoebakra 3:15, 16.

A taktik foe Ehud ben abi risikow. Foe eksempre: San ben sa pasa efoe den foetoeboi foe a kownoe ben sa ondrosoekoe efoe Ehud ben abi fetisani na en? Awansi den no ben ondrosoekoe, seiker den no ben sa libi a kownoe foe den wawan, nanga wan Israèlsma! Ma efoe tokoe den ben libi en wawan èn Ehud ben kan kiri Eglon, fa Ehud ben sa lowe dan? O fara a ben sa kan lon go bifo den foetoeboi foe Eglon ben sa si san ben pasa?

A de seiker taki Ehud ben prakseri foe den finifini tori disi, èn kande a ben prakseri toe foe wan toe takroe bakapisi. Ma tokoe a ben go doro nanga en plan èn ben e sori deki-ati èn bribi na ini Jehovah.

Ehud e miti Eglon

A dei ben doro foe gi a tra belastingmoni. Ehud nanga den man foe en ben go na ini a paleisi foe a kownoe. A no ben tan langa èn den ben tanapoe na fesi kownoe Eglon srefi. Ma a ten no ben doro ete taki Ehud ben moesoe feti. Na baka di den ben gi a belastingmoni, Ehud ben seni den man gowe di ben tjari a belastingmoni. — Kroetoebakra 3:17, 18.

Foe san ede Ehud ben wakti foe naki Eglon trowe? A ben kon frede? Kwetikweti! Foe man meki en plan go doro, Ehud ben abi wan presi fanowdoe pe en wawan ben kan taki nanga a kownoe — wan primisi di a no ben kisi na a fosi leisi di a miti en. Boiti dati, Ehud ben moesoe man lon gowe esi-esi. A ben sa moro makriki te wán man e lowe, leki te a heri groepoe sma di ben tjari a belastingmoni ben sa moesoe lowe. Foe dati ede Ehud ben wakti na tapoe a joisti ten. A sjatoe fisiti di a ben tjari na Eglon ben meki a man sabi fa a paleisi ben tan èn foe kon sabi soifri fa a de nanga a veiligheid foe a kownoe.

Baka di a ben doro „den ston olo di ben de na Gilgal”, Ehud ben gowe libi den man foe en èn ben teki waka go baka na a paleisi foe Eglon. A waka di Ehud ben waka pikinmoro 2 kilometer, ben gi en pikinso ten foe prakseri foe a wroko foe en èn foe begi foe kisi a blesi foe Jehovah. — Kroetoebakra 3:19.

Ehud ben drai kon baka

Soleki fa a sori, dan Ehud ben kisi wan switikon na ini a paleisi baka. Kande a bigi belastingmoni di a ben gi na fesi, ben meki Eglon firi boen. A ben kan de so, taki ala di a fosi fisiti ben sjatoe, a ben gi Ehud nofo ten foe abi wan nen na a kownoe. Awansi fa a tori ben de, Ehud ben de baka na Eglon.

„Mi abi wan kibritori foe taigi joe, o kownoe”, Ehud ben taki. A kon di a ben kon so fara kaba, ben sori taki Jehovah ben tiri en. Ma wan problema ben de. A „kibritori” di Ehud ben tjari kon no ben kan taki pe den foetoeboi foe a kownoe ben de. Efoe Jehovah ben o djompo kon na ini a tori, dan Ehud ben abi a jepi dati wantewante fanowdoe. „Tan tiri!” a kownoe ben komanderi. Foe di Eglon no ben wani meki tra sma jere a „kibritori” disi, meki a ben seni den foetoeboi foe en gowe. Prakseri omeni froelekti dati ben gi Ehud! — Kroetoebakra 3:19.

Eglon ben e sidon na ini en tapoesei kamra di Ehud ben kon na en èn ben taki: „Wan wortoe foe Gado mi abi gi joe.” Di Ehud ben taki „Gado”, a ben taki foe Kamos? Kande na so Eglon ben prakseri. Baka di Ehud kori en, a ben opo en skin foe en kownoestoeroe èn ben tanapoe na ini froewakti. Ehud ben waka kon miti en, èn kande a ben waka fersektiki so taki a no sa meki a kownoe denki taki a ben sa feti nanga en. Ne, esi-esi „Ehud ben soetoe en kroektoe-anoe go na inisei èn ben teki a feti-owroe foe en reti bowtoe èn ben djoekoe en go na ini [Eglon] bere. Èn na anoe foe a feti-owroe ben tan go moro na ini en èn so srefi a plata sei so taki a fatoe ben tapoe a heri plata sei, bika a no ben hari a feti-owroe poeroe foe en bere, èn a poepe ben bigin kon na doro”. — Kroetoebakra 3:20-22.

Den foetoeboi foe a kownoe di ben tan wakti nomo krosibei, no ben boeweigi. Ma Ehud ben de na ini kefar ete. Ibri momenti den foetoeboi foe Eglon ben sa kan lon kon na inisei èn si a dedeskin foe a kownoe foe den di fadon. Ehud ben moesoe gowe esi-esi! Baka di a ben sroto den doro, a ben lowe na a tapoesei olo foe a tapoesei kamra. — Kroetoebakra 3:23, 24a.

A feni di den ben feni Eglon èn a lasi di den ben lasi a feti

No langa na baka, den foetoeboi foe Eglon ben wani sabi san e pasa. Ma den no ben abi a deki-ati foe kon na ini a konmakandra di a kownoe ben abi en wawan, foe di a no ben sa feni dati boen. Ne den ben kon si taki den doro foe a tapoesei kamra ben sroto. „A de na koemakoisi nomo na ini a kowroe inisei kamra”, den ben prakseri. Ma baka wan pisi ten, den no ben wani sabi wawan, ma den ben broko den ede now. Den foetoeboi foe Eglon no ben man wakti moro langa. „Foe dati ede, den ben teki a sroto èn ben opo [den doro foe a tapoesei kamra], èn loekoe!, a masra foe den ben didon na gron dede-dede!” — Kroetoebakra 3:24b, 25.

Na a ten dati, Ehud ben lowe kaba. A ben waka pasa den ston olo na Gilgal èn te foe kaba a ben doro na Se-ira, wan presi na den bergi kontren foe Efra-im. Ehud ben kari den man foe Israèl kon makandra èn ben tiri den na ini wan feti makandra teige den Moabietsma. A tori e froeteri taki „den ben bigin naki Moab fadon, pikinmoro tin doesoen mansma, ibri bigiskin man èn ibri deki-ati man; no wán ben lowe”. Now di Moab no ben tranga moro, dan 80 jari langa, sani no ben trobi a kondre Israèl moro. — Kroetoebakra 3:26-30.

Leri foe na eksempre foe Ehud

Bribi na ini Gado ben poesoe Ehud. Hebrewsma kapitel 11 no e kari en spesroetoe leki wan foe den wan „di nanga jepi foe bribi ben wini kownoekondre na ini feti, . . . ben kisi deki-ati na ini feti, ben jagi den legre foe doroseisma” (Hebrewsma 11:33, 34). Tokoe Jehovah ben horibaka gi Ehud di a ben handri na ini bribi èn ben fri Israèl foe na ogri-ati makti foe kownoe Eglon.

Deki-ati ben de wán foe den eigifasi foe Ehud. A ben moesoe abi deki-ati foe man gebroiki wan troetroe feti-owroe na wan boen fasi. Wi leki disiten foetoeboi foe Gado, wi no e gebroiki so wan sortoe feti-owroe (Jesaja 2:4; Mateus 26:52). Ma wi e gebroiki „a feti-owroe foe a jeje”, a Wortoe foe Gado (Efeisesma 6:17). Ehud ben sabi fa foe gebroiki a fetisani foe en heri boen. Wisrefi moesoe de bekwaam foe gebroiki a Wortoe foe Gado te wi e preiki a boen njoensoe foe a Kownoekondre (Mateus 24:14). Persoonlijk studie foe bijbel, a de di wi moesoe de doronomo na den kresten konmakandra, a abi di wi abi wan prati na wan fajafaja fasi na ini a diniwroko, èn a bow di wi e bow na tapoe wi hemel Tata na ini begi, sa jepi wi foe waka na baka den eigifasi di Ehud ben sori, troetroe wan man di abi bribi nanga deki-ati.

[Foetoewortoe]

[Prenki na tapoe bladzijde 31]

Ehud nanga den man foe en ben gi kownoe Eglon belastingmoni

[Sma di abi a reti foe a prenki]

Wan kopie foe Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s