Trow di e gi Jehovah grani

Na artikel disi di e taki foe den trow foe kresten, ben sreka fosi na Etiopia foe gi rai di e jepi na ini na Amhareisi tongo gi foeroe sma na ini a kondre dati di tron Jehovah Kotoigi no so langa pasa. a e taki foe wan toe gwenti foe a kontren drape èn foe sani di sma e doe, di kande e difrenti foe den wan pe joe e libi. Kande joe sa feni a difrenti wan heri moi sani. na a srefi ten, na artikel e gi bijbel rai di de ini balansi èn di joe kan gebroiki srefi efoe den trow gwenti e difrenti foe joe kontren.

„CHRISTELIJKE bruiloften die vreugde schenken” (Kresten trow di e gi prisiri) ben de a titel foe wan moi studie artikel na ini De Wachttoren foe 15 juli 1984. A tra artikel na ini a uitgave dati ben nen „Geniet op evenwichtige wijze van bruiloftsfeesten” (Abi balansi prisiri na trow fesa) (Gi ibri sma di e denki foe go trow, moro koni rai de na ini den boekoe Een gelukkig gezinsleven opbouwen (Bow wan kolokoe osofamiri libi), kapitel 2, èn Maak je jeugd tot een succes (Den jongoe jari foe joe — Meki den abi boen bakapisi), kapitel 19 nanga 20).a Foeroe sma tron Jehovah Kotoigi foe sensi den artikel dati ben kon, foe dati ede wi wani loekoe wan toe bodoi baka foe den artikel disi di wi kan gebroiki spesroetoe na ini wi kontren, èn so srefi tra boen penti di sa jepi wi foe meki trowfesa de okasi di e gi grani na Jehovah, a Sma di Seti a trowlibi.

Wan aksi di wi ben sa kan loekoe fosi na: O ten wan trow moesoe hori? A gwenti di sma abi foe trow wan spesroetoe pisi ten na ini a jari, moesoe abi krakti na tapoe a trowdei di wi e poti? A bribi djaso na taki ibri trow di e feni presi na tapoe wan tra ten na ini a jari, no sa waka boen. Disi na wan kroektoe bribi di no abi no wan fondamenti, bika foeroe trowpaar di e dini Jehovah na ini kolokoe èn na ini wánfasi, no ben trow na ini a pisi ten foe a jari di sma gwenti foe trow. Wi no e bribi na ini na abi foe kolokoe noso ongolokoe (Jesaja 65:11; Kolosesma 2:8). Wi no ben sa jepi famiri di no de na bribi, foe man si a difrenti na mindri waarheid nanga lei te wi e poti wan trowdei akroederi den kroektoe bribi foe den. Foe taki en krin, kresten kan trow na ini ibri moen.

Te wan trowlezing sreka na baka te a ceremonia na lanti doe kaba, a ben sa de wan koni sani foe no meki foeroe dei pasa bifo a lezing hori. Efoe a trowpaar ben sa wani wan trowlezing na ini a Kownoekondre zaal, dan den moesoe go na den gemeente owroeman langa ten na fesi foe aksi foe gebroiki a zaal. Den owroeman foe a gemeente sa wani de seiker taki den sani di sreka gi a trow ben sa gi den wan krin konsensi. A ten foe a trowlezing moesoe poti na so wan fasi taki a no e toeka nanga no wan aktiviteit foe a gemeente. A brada di den teki foe hori a trowlezing sa miti fosi nanga a njoen trowmasra nanga trowmisi foe gi den boen rai èn foe de seiker taki no wan moreel sani noso sani di abi foe doe nanga lanti no de di kan hendri a trow èn taki a e agri nanga iniwan sociaal demakandra di sa hori baka dati. A trowlezing moesoe langa pikinmoro wan afoe joeroe èn a moesoe gi na wan wartifasi, ala di krakti e poti na tapoe a jeje sei foe na afersi. A de seiker taki a trowlezing de moro prenspari leki iniwan receptie di kande de na baka.

Wan kresten trow na wan boen okasi foe sori taki wi „no de wan pisi foe grontapoe” (Johanes 17:14; Jakobus 1:27). Na ordefasi foe wi sa moesoe de toemoesi aparti. Disi ben sa wani taki dati wi moesoe de biten, na presi foe meki sma e wakti, foe di dati kan gens den gemeente aktiviteit. Disi na wan sani di spesroetoe a trowmisi moesoe froestan, foe di grontapoe famiri kan dwengi en foe go lati — foe man sori moro krin o prenspari a de. Te wan lepi kresten sisa de biten a kan sori taki eigifasi na jejefasi, soleki sakafasi nanga a hori di a e hori sma na prakseri, de prenspari gi en! So srefi te wan fowtowman kisi kari foe meki fowtow foe na okasi, ordefasi de prenspari. A ben sa boen efoe wi e aksi a fowtowman foe weri krosi di fiti èn taki a no e hendri a lezing te a e meki fowtow. No wan fowtow moesoe meki na a begi. Na ordefasi foe wi sa gi Jehovah grani èn sa gi wan boen kotoigi. A no de fanowdoe foe proeberi foe handri akroederi den gwenti foe grontapoe, di ben sa meki a no de krin foe si san na okasi wani taki troetroe.

Wan receptie no de fanowdoe foe meki wan trow waka boen, ma no wan bijbel reide no de foe no hori so wan prisiri okasi. Ma so wan fasi fa kresten e kon makandra moesoe de difrenti foe den grontapoe receptie di lai nanga sani di doe pasa marki, foeroe dringi, njan pasa marki, werdri pokoe, fisti dansi, èn srefi feti. Bijbel e kari „bradjari fesa” leki wán foe den wroko foe a skin (Galasiasma 5:21). A moro makriki foe hori ai na tapoe sani te a no de wan toemoesi bigi konmakandra. A no de fanowdoe foe meki wan tenti soso foe handri akroederi den pôpi gwenti. Efoe wan sma e bosroiti foe gebroiki wan tenti foe abi moro presi noso gi a weer, dan dati na en persoonlijk afersi.

Ondrofeni sori taki wan boen fasi foe meki a nomroe foe fisitiman no de toemoesi foeroe, na foe gebroiki spesroetoe fisitiman karta. A moro boen foe kari aparti sma na presi foe kari heri gemeente, èn leki kresten di abi ordefasi wi moesoe lespeki a nomroe foe sma di kisi kari. Fisiti karta e jepi wi toe taki wi no sa kisi a sjen te wan sma di sluit uit kon na tapoe a receptie, bika efoe dati feni presi, dan foeroe brada nanga sisa ben sa kan froekisi foe gowe (1 Korentesma 5:9-11). Efoe wan trowpaar e kari famiri noso mati di no de na bribi, dan seiker den no sa kari so foeroe foe den, èn na so fasi a trowpaar e si den wan „di de na ini a srefi bribi leki wi” leki moro prenspari (Galasiasma 6:10). Son sma feni en moro boen foe kari grontapoe mati noso famiri di no de na bribi kon na a trowlezing na presi foe kari den kon na a receptie. Foe san ede? We, kefal ben de pe grontapoe famiri ben meki so wan sjen situwâsi na a trow receptie, taki foeroe brada nanga sisa ben firi taki den no ben kan tan drape. Wan toe trowpaar sreka sani foe abi nomo wan pikin njanjan nanga krosibei famiri èn kresten mati.

Soleki fa Johanes 2:8, 9 e sori, a de praktis foe teki wan „fesiman foe a fesa”. A trowmasra sa wani foe teki wan kresten di a e froetrow èn di sa sorgoe taki ordefasi nanga hei markitiki de. Efoe mati e tjari presenti, dan den moesoe doe disi sondro foe ’prodo nanga den sani di den abi’ (1 Johanes 2:16). Pokoe kan de wan prisiri sani sondro taki a pori nanga wortoe di e meki sma e tweifri, toemoesi foeroe babari, noso werdri pokoe. Foeroe sma feni taki a moro boen te wan owroeman e arki den pokoe di den sa plei, na fesi. Dansi kan tjari trapoe kon, foe di foeroe pôpi dansi teki foe dansi di e sori taki a sma man meki pikin èn den e sori seks firi di no fiti. A „momenti foe koti a trowkoekoe èn foe njan en nanga champagne”, son tron ben de leki wan marki gi grontapoe sma foe handri na wan loesoe fasi. Foe taki en leti, foeroe kresten trowpaar teki a bosroiti foe no abi no wan sopi na den trow receptie, èn na so fasi den no e kisi problema.

Foe di wi wani gi Jehovah grani, wi no sa meki prodo foe poti toemoesi foeroe prakseri na tapoe wisrefi. Srefi grontapoe boekoe ben taki teige a gwenti di de foe doe sani na wan bradjari fasi. A ben sa don srefisrefi te wan trowpaar e go na ini paiman foe abi wan toemoesi bradjari trowfesa èn dan foeroe jari den no abi nofo fanowdoe sani foe tan na libi, bika den moesoe pai den kostoe foe a wán dei dati! A no de foe taki, krosi di e weri na a okasi dati moesoe de bescheiden èn boen, di e fiti gi wan sma di e taki dati a e anbegi Gado (1 Timoteus 2:9, 10). Na artikel „Christelijke bruiloften dienen redelijkheid te weerspiegelen” (Kresten trow moesoe sori reidelekfasi) (De Wachttoren foe 1 juli 1969) ben gi moi komentaar foe krosi di sma e weri:

„A trow foe wan sma na wan spesroetoe okasi, èn foe dati ede a de wan gwenti taki prakseri e poti foe sori taki joe e prisiri èn e loekoe moi. Ma disi no wani taki dati wan sma moesoe weri wan spesroetoe sortoe japon noso paki. A boen efoe wan sma e loekoe a modo foe a kontren, den kostoe èn san ensrefi lobi. . . . Ma a ben sa de reidelek foe bai so wan diri sani foe weri di kan de wan hebi na moni sei gi densrefi noso gi tra sma? . . . Wan toe trowmisi ben lobi foe weri a japon foe wan mati noso famiri di den lobi. Trawan feni foeroe prisiri foe meki den eigi trow krosi, èn kande nanga dati den kan abi wan krosi di den ben kan gebroiki na tra okasi na ini a ten di e kon. Èn a de wan joisti sani srefisrefi te wan trowpaar e trow na ini den moro moi krosi di den lobi foe weri . . . Tra sma di ben sa man foe abi wan bigi trowfesa pe foeroe sani sreka, kande wani abi wan ’bescheiden trowfesa’ gi densrefi foe di a ten de moeilek.”

Na a srefi fasi, a trow groepoe (den mati foe a trowmasra èn den oema kompe foe a trowmisi) no abi foe bigi. Den toe no ben sa wani foe poti toemoesi foeroe prakseri na densrefi tapoe, nanga den krosi foe den noso nanga den sani di den e doe. Ala di wan sma di sluit uit ben kan kisi primisi foe fisiti a lezing na a Kownoekondre zaal, tokoe De Wachttoren foe 15 juli 1984 ben taki: „A no ben sa fiti foe abi sma na ini a trow groepoe di sluit uit noso di e libi wan kefalek takroe libi di de teige bijbel gronprakseri.”

Ala di Jesus ben go na wan trow, wi no kan prakseri taki a ben sa feni a pôpi gwenti boen foe meki wan groepoe wagi e rèi na ini foto nanga foeroe babari; skowtoe ben gi sma so srefi boetoe foe di den ben blo a toetoe foe a wagi ala di den e rèi ini a trow groepoe. (Loekoe Mateus 22:21.) Foe taki en sjatoe, na presi foe teki a prodo abra di den sma foe den nâsi e prodo nanga sani noso a fasi fa den e tjari densrefi dan kresten moesoe sori a koni foe bescheiden sma. — Odo 11:2.

Ma fa a de nanga a fisiti di wi e fisiti den trowfesa foe birtisma, grontapoe kompe wrokoman, noso farawe famiri noso mati? Ibri kresten moesoe bosroiti gi ensrefi foe a tori disi. A de boen foe hori na prakseri taki a ten foe wi de prenspari gi wi, foe di wi abi ten fanowdoe gi wi diniwroko, persoonlijk studie, nanga tra osofamiri èn gemeente wroko (Efeisesma 5:15, 16). Na a kaba foe a wiki, wi abi konmakandra èn velddienst di wi no wani foe misi (Hebrewsma 10:24, 25). A ten foe foeroe trowfesa e toeka nanga bigi konmakandra noso tra spesroetoe velddienst wroko di abi foe doe nanga na Avondmaal foe Masra. Wi no moesoe gi pasi foe meki sani poeroe wi prakseri foe doe a srefi spesroetoe moeiti di wi brada na heri grontapoe e doe foe fisiti na Avondmaal foe Masra. Bifo wi ben kisi sabi foe waarheid, wi ben gebroiki foeroe ten nanga grontapoe sma, kande srefi na ini situwâsi di no ben gi Gado grani (1 Petrus 4:3, 4). Now tra sani de prenspari gi wi. A kan ala ten foe winsi boen gi wan grontapoe trowpaar foe di wi e seni wan fristeri karta noso foe di wi e tjari wan sjatoe fisiti na tapoe wan tra dei. Wan toe sma gebroiki den sortoe okasi disi foe gi kotoigi, foe di den e taki foe wan toe bijbeltekst di fiti gi sma di djonsro ben trow.

Wan trow pe jeje afersi de moro prenspari leki a fasi fa grontapoe e doe sani, sa gi Jehovah grani troetroe. Te kresten e sorgoe taki den tan aparti foe grontapoe nanga en kroektoe bribi èn den sani di a e doe pasa marki, te den no e meki a trowfesa toeka nanga den theokrasia aktiviteit foe den di den e doe doronomo, èn te den e sori bescheidenfasi na presi foe meki prodo, dan kresten sa prisiri foe na okasi. Boiti dati, den sa man prakseri baka foe na okasi nanga wan boen konsensi èn nanga moi prakseri. Ala di wi e sori koni èn reidelekfasi, meki a de so, taki ala den kresten trowfesa foe wi e gi wan kotoigi na opregti sma di e loekoe wi.

[Foetoewortoe]

[Prenki na tapoe bladzijde 24, 25]

Kresten no e waka neleki srafoe na baka ibri trow gwenti foe a kontren