Den e froeklari boskopoeman foe a vrede foe Gado kolokoe
„Na den wan di Jehovah froeloesoe, sa drai kon baka èn foe troe, den sa kon na Sion nanga wan babari foe prisiri ede, èn prisiri sa de na tapoe den ede te ten di no skotoe.” — JESAJA 35:10.
1. San grontapoe abi tranga fanowdoe?
NA INI a ten disi, a libisma famiri abi wan boskopoeman foe boen njoensoe fanowdoe leki noiti na fesi. Wan sma de tranga fanowdoe foe froeteri a waarheid foe Gado nanga den prakseri foe en, wan kotoigi di de sondro frede, di sa warskow den godelowsoe sma gi a pori di o kon èn foe jepi den reti-ati sma foe feni a vrede foe Gado.
2, 3. Fa Jehovah ben meki en pramisi di skrifi na ini Amos 3:7 kon troe ini a kefal foe Israèl?
2 Na ini den dei foe Israèl, Jehovah ben pramisi foe gi den sortoe boskopoeman dati. Na a kaba foe a di foe neigi jarihondro b.G.T., a profeiti Amos ben taki: „A Soeverein Masra Jehovah no sa doe noti, sondro foe tjari en froetrow afersi kon na krin gi den foetoeboi foe en, den profeiti” (Amos 3:7). Na ini den jarihondro di kon baka a froeklari disi, Jehovah ben doe foeroe makti wroko. Foe eksempre, na ini 607 b.G.T., a ben strafoe en pipel di a ben froekisi, hebi, bika den ben meki oproeroe èn ben abi broedoe-paiman. A ben strafoe den nâsi lontoe den toe, di ben prisiri foe di Israèl ben njan pina (Jeremia, kapitel 46-49). Dan, na ini 539 b.G.T., Jehovah ben meki taki a tranga grontapoemakti foe Babilon ben fadon, èn leki wan bakapisi foe dati, na ini 537 b.G.T. wan fikapisi foe Israèl ben go baka na a kondre foe den foe bow a tempel baka. — 2 Kroniki 36:22, 23.
3 Den sani disi di ben pasa, ben de sani di ben seki grontapoe, èn soleki fa den wortoe foe Amos ben taki, dan na fesi kaba Jehovah ben tjari den kon na krin gi profeiti di ben dini leki boskopoeman, èn di ben warskow Israèl gi san ben o kon. Na ini a mindri foe a di foe aiti jarihondro b.G.T., a ben meki Jesaja opo kon. Na ini a mindri foe a di foe seibi jarihondro b.G.T., a ben meki Jeremia opo kon. Dan, krosibei na a kaba foe a jarihondro dati, a ben meki Esekièl opo kon. Den wan disi nanga tra getrow profeiti ben gi wan finifini kotoigi foe den prakseri foe Jehovah.
Kon sabi soema na den boskopoeman foe Gado na ini a ten disi
4. San e sori taki a libisma famiri abi boskopoeman foe vrede fanowdoe?
4 Fa a de na ini a ten disi? Foeroe sma na ini grontapoe e kisi wan tranga firi taki wan ogri sani o pasa, te den e si fa a libisma libimakandra e go na baka. Den wan di lobi regtfardikifasi e kisi pen na ati, te den e si a hoigrifasi nanga a krinkrin godelowsoefasi foe krestenhèit. Soleki fa Jehovah ben meki Esekièl taki na fesi kaba, dan den „e soktoe èn e geme foe ala den tegoe sani di e pasa na en mindri” (Esekièl 9:4). Ma foeroe sma no sabi san na den prakseri foe Jehovah. Wan sma moesoe taigi den.
5. Fa Jesus ben sori taki boskopoeman ben sa de na ini a ten foe wi?
5 Wan sma na ini a ten disi e taki nanga deki-ati sondro foe frede nanga a jejefasi foe Jesaja, Jeremia, nanga Esekièl? Jesus ben sori taki wan sma ben sa doe dati. Di a ben taki na fesi foe sani di ben o pasa na ini a ten foe wi, a ben taki: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon” (Mateus 24:14). Soema na ini a ten disi e meki a profeititori dati kon troe, èn e dini leki wan boskopoeman, wan preikiman foe boen njoensoe? Sani foe a ten foe wi di e kroederi nanga a ten foe Israèl foe owroeten, e jepi wi foe gi piki tapoe na aksi dati.
6. (a) Froeteri den sani di „na Israèl foe Gado” ben ondrofeni na ini a ten foe a fosi grontapoefeti. (b) Fa Esekièl 11:17 ben kon troe gi Israèl foe owroeten?
6 Na ini den doengroe dei foe a Fosi Grontapoefeti, a disiten pipel foe Jehovah, a fikapisi foe a salfoe „Israèl foe Gado”, ben go na ini wan srefi sortoe katibo leki di foe Israèl na Babilon (Galasiasma 6:16). Den ben de na ini katibo na jejefasi na Babilon a Bigiwan, a grontapoe organisâsi foe falsi relisi, di krestenhèit de a moro prenspariwan foe en èn di abi moro bigi fowtoe. Ma tokoe, den wortoe di Jehovah ben taigi Esekièl ben sori taki Jehovah no ben gowe libi a fikapisi disi. A ben taki: „Mi wani tjari oenoe kon na wán toe komoto na den pipel èn tjari oenoe kon makandra komoto na den kondre pe oenoe panja go, èn mi wani gi oenoe a gron foe Israèl” (Esekièl 11:17). Foe meki a pramisi dati kon troe gi Israèl foe owroeten, dan Jehovah ben meki a Persiasma Cirus opo kon, di ben meki a grontapoemakti foe Babilon fadon èn di ben opo a pasi gi wan fikapisi foe Israèl foe drai go baka na a kondre foe den. Ma fa a de na ini a ten disi?
7. Sortoe sani di ben pasa na ini 1919 ben sori taki Jesus ben doe wan sani nanga Babilon a Bigiwan? Tjari disi kon na krin.
7 Moro froekoe na ini a jarihondro disi, krakti boeweisi ben de, taki wan Moro Bigi Cirus ben de na wroko. Soema ben de a sma dati? No wan tra sma leki Jesus Krestes, di sensi 1914 ben poti tapoe a kownoestoeroe na ini a hemel Kownoekondre. A bigi Kownoe disi ben sori boen wani na den salfoe brada foe en na grontapoe, di salfoe kresten ben kon fri foe katibo na jejefasi na ini a jari 1919, èn ben drai go baka na a „kondre” foe den, a kondre foe den na jejefasi (Jesaja 66:8; Openbaring 18:4). Na so Esekièl 11:17 ben abi wan disiten kontroe. Na ini owroeten, Babilon ben moesoe fadon foe opo a pasi gi Israèlsma foe drai go baka na a kondre foe den. Na ini a ten disi, a kon boen baka foe na Israèl foe Gado ben de a boeweisi taki Babilon a Bigiwan ben fadon nanga na anoe foe a Moro Bigi Cirus. A di foe toe engel foe Openbaring kapitel 14 ben meki a fadon disi bekènti, di a ben bari taki: „Babilon a Bigiwan fadon, en di ben meki ala den nâsi dringi foe a win foe na atibron foe en hoeroedoe!” (Openbaring 14:8) Disi na troetroe wan lasi gi Babilon a Bigiwan, spesroetoe gi krestenhèit! Èn a de troetroe wan blesi gi troe kresten!
8. San a boekoe Esekièl e taki foe a kolokoe di a pipel foe Gado ben de kolokoe baka di den ben kon fri na ini 1919?
8 Na ini Esekièl 11:18-20, wi e leisi foe a fasi fa a profeiti e taki foe a kolokoe foe a pipel foe Gado, baka di den kon boen baka. A fosi kontroe foe den wortoe foe en ben wani taki, a krin di Israèl ben kon krin na ini den dei foe Esra nanga Nehemia. A disiten kontroe wani taki wan srefi sortoe sani. Meki wi go loekoe fa. Jehovah e taki: „Foe troe, den sa kon [na a kondre foe den] èn poeroe ala den tegoe sani foe en na en ini, nanga ala den sani foe en di sma e foega gi.” Soleki fa a profeititori ben taki, dan na a bigin foe 1919, Jehovah ben meki en pipel kon krin èn a ben gi den krakti baka foe dini en. Na ini a kontren foe den na jejefasi, den ben bigin poeroe ala den doe nanga leri foe Babilon di ben meki den kon doti na ini En ai.
9. Sortoe prenspari blesi Jehovah ben gi en pipel, bigin nanga 1919?
9 Dan, soleki fa vers 19 e taki, Jehovah e go doro foe taki: „Èn mi wani gi den wán ati, èn mi sa poti wan njoen jeje na den ini; èn mi sa poeroe troetroe na ati foe ston na ini a skin foe den èn gi den wan ati foe skin.” Akroederi den wortoe disi, Jehovah ben meki den salfoe foetoeboi foe en kon de wán na ini 1919, a ben gi den „wán ati”, foe taki en so, so taki den ben sa dini en „skowroe na skowroe” (Sefanja 3:9). Moro fara, Jehovah ben gi en pipel santa jeje foe tranga den na ini a wroko foe gi kotoigi èn foe meki a toemoesi boen froktoe na ini den, di Galasiasma 5:22, 23 e taki foe en. Èn na presi foe gi den wan tranga ati di gersi ston, Jehovah ben gi den wan safoe ati di kan boigi èn di e gi jesi, wan ati di ben sa arki a wani foe en.
10. Foe san ede Jehovah blesi en pipel di kon boen baka, foe sensi 1919?
10 Foe san ede a ben doe disi? Jehovah srefi e tjari disi kon na krin. Wi e leisi na ini Esekièl 11:20: „So taki den kan waka tapoe mi eigi tirilin èn hori mi eigi kroetoe bosroiti èn troetroe doe den, èn troetroe den kan tron mi pipel èn misrefi kan tron a Gado foe den.” Na Israèl foe Gado ben leri foe gi jesi na a wet foe Jehovah, na presi foe waka baka den eigi idea. Den ben leri foe doe a wani foe Gado sondro foe frede libisma. Dati meki den ben de krin foe si leki sma di de tra fasi leki den falsi kresten foe krestenhèit. Den ben de a pipel foe Jehovah. Foe dati ede, Jehovah ben de klari foe gebroiki den leki en boskopoeman, en „getrow èn koni srafoe”. — Mateus 24:45-47.
A kolokoe di den boskopoeman foe Gado de kolokoe
11. Fa a boekoe Jesaja taki foe a kolokoe foe Jehovah en pipel?
11 Joe kan prakseri foe a kolokoe di den ben de kolokoe di den ben kon froestan sortoe posisi den abi di de wan grani? Leki wán groepoe den ben taki den wortoe foe Jesaja 61:10 baka: „Sondro misi mi sa prisiri pasa marki na ini Jehovah. Mi sili sa breiti na ini mi Gado.” A pramisi foe Jesaja 35:10 ben kon troe ini den: „Na den wan di Jehovah froeloesoe, sa drai kon baka èn foe troe, den sa kon na Sion nanga wan babari foe prisiri ede, èn prisiri sa de na tapoe den ede te ten di no skotoe. Den sa breiti pasa marki èn den sa prisiri, èn sari nanga soktoe moesoe lon gowe.” Jehovah en boskopoeman foe a vrede foe Gado ben de kolokoe na a srefi fasi na ini 1919, di den ben bigin foe preiki a boen njoensoe gi ala libisma. Sensi a ten dati te leki a dei foe tide, den no tapoe foe doe a wroko disi, èn a kolokoe foe den kon moro bigi. Jesus ben taki na ini en Bergitaki: „Kolokoe foe den sma di lobi vrede, foe di den sa kari den ’manpikin foe Gado’” (Mateus 5:9, foetoewortoe). A fikapisi foe salfoe „manpikin foe Gado” ben ondrofeni a troefasi foe a froeklari dati sensi 1919 te leki a ten disi.
12, 13. (a) Soema ben moksi densrefi nanga na Israèl foe Gado foe go dini Jehovah, èn sortoe wroko den ben doe? (b) Sortoe bigi prisiri den salfoe foetoeboi foe Jehovah ondrofeni?
12 Ala di den jari ben e pasa, a nomroe foe na Israèl foe Gado ben gro te leki den jari baka 1930, di a tjari di a fikapisi foe den salfoewan ben tjari kon na makandra, pikinmoro ben doro wan kaba. A nomroe foe preikiman foe a boen njoensoe no ben gro moro na a ten dati? Kwetikweti. Wan bigi ipi kresten di ben abi wan howpoe foe libi na grontapoe ben bigin sori ensrefi kaba, èn den wan disi ben go makandra nanga den salfoe brada foe den na ini a preikiwroko. Na apostel Johanes ben si a bigi ipi disi na ini wan fisjoen, èn a fasi fa a e taki foe den de aparti: „Den de na fesi a kownoestoeroe foe Gado; èn den e doe santa diniwroko gi en . . . dei nanga neti” (Openbaring 7:15). Ija, a bigi ipi ben kon abi foeroe foe doe na ini a dini di den ben dini Gado. A bakapisi ben de taki, di a nomroe foe den salfoewan ben bigin kon moro pikin, baka 1935, den getrow kompe disi ben doe a kotoigiwroko nanga moro krakti.
13 Na a fasi disi Jesaja 60:3, 4 ben kon troe: „Nâsi seiker sa go na joe leti, èn kownoe na a brenki foe joe leti di e skèin. Opo joe ai èn loekoe lontoe! Den tjari den alamala kon makandra; den kon na joe. Foe farawe den eigi manpikin foe joe e tan kon, èn den oemapikin foe joe, di den sa sorgoe na a seibere.” Na wan moi fasi den e taki foe a kolokoe di a fasi disi fa sani ben waka, ben tjari kon gi na Israèl foe Gado, na ini Jesaja 60:5, pe wi e leisi: „Na ini a ten dati joe sa si èn seiker sa brenki, èn joe ati sa seki troetroe èn sa bradi ensrefi, bika den goedoe foe a se sa drai kon na joe; srefi den goedoe foe den nâsi sa kon na joe.”
Na organisâsi foe Jehovah e boeweigi ensrefi go na fesi
14. (a) Sortoe fisjoen foe sani na hemel Esekièl ben si, èn sortoe komando a ben kisi? (b) San a pipel foe Jehovah kon si na ini a ten disi, èn sortoe froeplekti den e firi foe doe?
14 Na ini 613 b.G.T., Esekièl ben si na ini wan fisjoen a hemel organisâsi foe Jehovah di gersi wan wagi èn di e boeweigi ensrefi go na fesi (Esekièl 1:4-28). Baka ten Jehovah ben taigi en: „Manpikin foe libisma, go na mindri na oso foe Israèl, èn joe moesoe taki nanga den nanga den wortoe foe mi” (Esekièl 3:4). Na ini a jari disi, 1997, wi e si taki na hemel organisâsi foe Jehovah e boeweigi ete sondro foe wan sani man tapoe en foe meki den prakseri foe Gado kon troe. Dati meki, wi abi a firi ete foe froeteri trawan foe den prakseri dati. Na ini den dei foe Esekièl, a ben taki wortoe di langalanga ben kon foe Jehovah ondro a krakti foe santa jeje. Na ini a ten disi, wi e taki wortoe di komoto na bijbel, a Wortoe foe Jehovah, di sma ben skrifi ondro a krakti foe santa jeje. Èn a boekoe dati abi troetroe wan moi boskopoe gi a libisma famiri! Ala di foeroe sma e broko den ede nanga a tamara, tokoe bijbel e sori taki sani loekoe moro takroe — èn na a srefi ten, moro boen — leki den e prakseri.
15. Foe san ede a situwâsi na grontapoe moro takroe leki foeroe sma e denki na ini a ten disi?
15 A situwâsi de moro takroe foe di, soleki fa wi ben leri na ini den artikel na fesi, djonsro krestenhèit nanga ala tra falsi relisi sa kisi pori krinkrin neleki Jerusalem na ini 607 b.G.T. Moro fara, djonsro den sa figi a heri politiek seti na heri grontapoe poeroe, di a boekoe Openbaring e prenki leki wan werdri meti nanga seibi ede èn nanga tin toetoe, soleki fa dati ben pasa nanga foeroe heiden kondre ini a birti foe Jerusalem (Openbaring 13:1, 2; 19:19-21). Na ini den dei foe Esekièl, Jehovah ben taki finifini foe a frede di a pori foe Jerusalem di ben kon krosibei, ben meki doe kon. Ma den wortoe foe en sa wani taki moro, te sma e si a pori foe a grontapoe disi, di e kon krosibei. Jehovah ben taigi Esekièl: „Foe joe sei, o manpikin foe libisma, soktoe nanga djonkoe di e beifi. Ija, nanga bitafasi joe moesoe soktoe na fesi na ai foe den. Èn a moesoe pasa taki, efoe den e taigi joe: ’Foe san ede joe e soktoe?’, joe moesoe taki: ’Foe wan njoensoe ede.’ Bika a sa kon seiker, èn ibri ati moesoe smèlter èn ala anoe moesoe kon slak èn ibri jeje moesoe kon lasi-ati èn ala kindi srefi sa dropoe nanga watra. ’Loekoe! A sa kon seiker èn [den] sa meki a pasa’, na san a Soeverein Masra Jehovah e taki” (Esekièl 21:6, 7; Mateus 24:30). Ija, sani di o pasa èn di o meki sma kon frede, de krosibei na wi fesi. A broko di wi e broko wi ede troetroe nanga kompe libisma, e boeweigi wi foe meki a warskow bekènti, foe froeteri a „njoensoe” foe na atibron foe Jehovah di e kon.
16. Foe san ede a situwâsi gi den safoe-ati sma de moro boen leki foeroe sma e denki?
16 Na a srefi ten, a situwâsi gi safoe-ati sma de moro boen leki moro foeroe sma e prakseri. Na sortoe fasi? Foe di Jesus Krestes dede gi den sondoe foe wi èn e tiri now leki Kownoe foe a Kownoekondre foe Gado (1 Timoteus 1:15; Openbaring 11:15). Djonsro den problema foe libisma, di gersi leki den no man kisi wan loesoe, sa kisi wan loesoe nanga jepi foe a hemel Kownoekondre dati. Dede, siki, kroekafasi, angri, nanga ogridoe sa tron sani foe fositen, èn a Kownoekondre foe Gado sa tiri wan paradijs grontapoe, sondro foe wan sani e gens en (Openbaring 21:3, 4). A libisma famiri sa njan boen foe a vrede foe Gado — wan matifasi foe vrede di den abi nanga Jehovah Gado èn nanga makandra. — Psalm 72:7.
17. Sortoe gro e tjari prisiri kon gi na ati foe den boskopoeman foe a vrede foe Gado?
17 Na son presi na grontapoe, a e hari sma prakseri taki ipi-ipi safoe-ati sma e doe wan sani tapoe a boskopoe disi foe a vrede foe Gado. Foe kari soso wan toe eksempre: A jari di pasa, a verslag foe Oekraini ben froeteri taki a nomroe preikiman ben gro nanga 17 procent. A verslag foe Mosambik ben froeteri foe wan gro foe 17 procent, Litoewania wan gro foe 29 procent. Rosiakondre ben abi wan gro foe 31 procent, ala di a nomroe foe den preikiman foe Albania ben gro nanga 52 procent. Den gro disi e sori den tin doesoen tron tin doesoen opregti sma di wani njan boen foe a vrede foe Gado èn di teki a sei foe regtfardikifasi. So wan gro di e go esi-esi, e tjari prisiri kon gi a heri kresten bradafasi.
18. Fa a fasi foe wi sa de, efoe sma e arki noso efoe den no e arki?
18 Sma na ini a presi pe joe e libi de klariklari foe gi jesi na a boskopoe? Efoe dati de so, dan wi e prisiri makandra nanga joe. Ma na ini son kontren, a e teki foeroe, foeroe joeroe foe tranga wroko bifo joe feni srefi wán sma di abi belangstelling. Den wan di e dini na ini den sortoe kontren dati e doe en safrisafri noso den e lasi-ati? Nôno. Jehovah Kotoigi e memre den wortoe di Gado ben taigi Esekièl, di foe a fosi leisi A ben gi a jongoe profeiti a komando foe preiki gi den djoe kondreman foe en: „Foe den sei, efoe den sa jere noso sa libi en — bika den na wan oproeroe oso — den sa sabi seiker toe taki wan profeiti ben de na den mindri” (Esekièl 2:5). Neleki Esekièl, wi e tan froeteri sma foe a vrede foe Gado, efoe den e arki efoe no e arki. Efoe den e arki, wi breiti. Efoe den e weigri foe arki wi, e spotoe wi, srefi e froefolgoe wi, wi e horidoro. Wi lobi Jehovah, èn bijbel e taki: „Lobi . . . e froedrage ala sani” (1 Korentesma 13:4, 7). Foe di wi horidoro foe preiki, meki sma sabi soema na den Kotoigi foe Jehovah. Den sabi a boskopoe foe wi. Te a kaba e kon, dan den sa sabi taki den Kotoigi foe Jehovah ben proeberi foe jepi den foe njan boen foe a vrede foe Gado.
19. Sortoe bigi grani wi e warderi, leki foetoeboi foe a troe Gado?
19 Wan moro bigi grani de leki foe dini Jehovah? Nôno! A moro bigi kolokoe foe wi e kon foe a matifasi di wi abi nanga Gado èn foe di wi sabi taki wi e doe a wani foe en. „Kolokoe foe a pipel di sabi a prisiri babari. O Jehovah, ini a leti foe joe fesi den e tan waka” (Psalm 89:15). Meki a de so, taki ala ten wi e warderi a prisiri foe de Gado en boskopoeman foe vrede gi a libisma famiri. Meki a de so, taki wi e teki prati fajafaja na a wroko disi, te leki Jehovah e taki dati a wroko kaba.
Joe e memre disi ete?
◻ Soema na Gado en boskopoeman foe vrede na ini a ten disi?
◻ Fa wi doe sabi taki Babilon a Bigiwan ben fadon na ini 1919?
◻ Nanga sortoe prenspari sani a „bigi ipi” e broko den ede?
◻ Foe san ede a tamara moro doengroe leki foeroe sma denki na ini a ten disi?
◻ Foe san ede a tamara gi reti-ati sma kan de moro boen leki den e prakseri?
[Prenki na tapoe bladzijde 21]
Foeroe sma e kisi wan tranga firi taki wan ogri sani o pasa te den e si fa a libisma libimakandra e go na baka
[Prenki na tapoe bladzijde 23]
Den boskopoeman foe a vrede foe Gado na den moro kolokoe sma na grontapoe na ini a ten disi